Dagedage ai Iehova ese Ai Ia Naria—Kahana Namba 2

TANOBADA Ibounai Tuarina Iharuana lalonai, Nazi ami taudia edia uniform ena belta ena gabana gauna dekenai toretore ta ia noho, unai toretore be, “Dirava be Ai Danu Ia Noho.” Lau laloa unai be tomadiho koikoi edia kara ta, tuari bona rara bubua karana dekenai. Unai ese lau ia habadua momokani. East Germany, Limbach-Oberfrohna dekenai, Iehova ena Witness taudia rua ese lau idia hereva henia neganai, lau be tomadiho taudia lau ura henia lasi momokani, unai dainai lau laloa Dirava ia noho lasi, bona gau iboudiai be sibodia idia vara kava.

Lau idia vadivadi henia Witness taudia dekenai lau gwau: “Namo lasi umui laloa lau be Keristen tauna ai do lau lao.” To edia hereva ese ia hahedinaraia Dirava ta ia noho, bona unai ese lauegu lalona ia veria. Lau ura diba lau abia, unai dainai idia dekena amo Bible ta lau hoia bona nega sisina murinai idia danu Bible ai stadilaia hebou. Unai be lagani 1953 lalonai, tubutubu gaudia idia vara lou neganai, unai lagani lalonai Komiunis taudia ese Iehova ena Witness taudia edia gaukara East Germany dekenai be lagani toi bamona idia taravatulaia vadaeni.

Lagani 1953, August 15 ena Watchtower ese Iehova ena Witness taudia edia mauri dalana ia hahedinaraia, ia gwau: “Ena be gavamani taudia ese idia itadia tao hanaihanai noho, bona idia hagaridia toho noho, bona ena be edia tadikaka danu idia hedavari totona idia itaia guna ta ese idia murinai idia mai o lasi, ena be Gima Kohorona magasin danu idia davaridia neganai dibura ruma dekenai lagani rua eiava toi idia noho ‘taunimanima veridia buka bona magasin idia hariharilaia dainai’, to idia gari lasi, bona ena be gaukara idia gunalaia tadikaka goadadia momo be dibura ruma dekenai idia atodia, to Iehova ena hesiai taudia East Germany dekenai be haroro gaukara idia karaia noho.”

Lagani 1955 lalonai, lauegu adavana, Regina, bona lau be Iehova ena Witness taudia edia hebouhebou badana Nuremberg, West Germany dekenai ai lao, bona murina laganina ai, ai ruaosi be West Berlin dekenai ai bapatiso. Unai be Berlin Haba badana idia do haginia lasi neganai, unai amo East Germany be West Berlin amo ia parara, lagani 1961 lalonai. Lau do bapatiso lasi neganai, lauegu abidadama karana Iehova dekenai ena hetoho lau davaria danu.

Maduna Lau Huaia

Iehova ena Witness taudia edia kongregesen Limbach-Oberfrohna dekenai ai lao hamatamaia neganai, unai kongregesen taudia idia ura ta ese Bible buka bona magasin do ia mailaia West Berlin amo. Ai ese bisinesi maragina ta ai karaia bona aiemai natudia be rua, to ai ura Iehova ena hesiai gaukara ai karaia bada. Aiemai motuka gunana ena toana ai haidaua, bona unai amo ia dekenai buka 60 ai hunia diba. Unai kara ai karaia dainai dika ai davaria diba, to unai kara ese lau ia hadibaia Iehova dekenai lau tabekau totona.

Motuka dekenai East Berlin amo ai lao West kahana gabuna dekenai, be auka momokani, bona nega haida lau laloa edena bamona do ai hanaia diba. Haroro gaukara idia taravatulaia lasi gabuna dekenai ai ginidae neganai, buka bona magasin ai abidia bona East Germany ena gabu hetoana dekenai ai do hanaia lasi neganai, motuka lalonai buka bona magasin ai hunidia namonamo.

Nega ta, buka oredia ai hunia namonamo noho lalonai, tau ta be ena ruma amo ia raka lasi. Ia boiboi badabada, ia gwau: “Umui e.” Unai lau kamonai neganai, lauegu kudouna ia marere momokani. Unai tau be ai ia itaia noho, eiava? Unai tau ia gwau: “Namona be gabu ma ta dekenai umui lao. East Germany edia reidio-motuka be hanaihanai unuseniai idia atoa, dika umui do idia itaia garina.” Unai amo lauegu gari ia ore. East Germany ena gabu hetoana ai hanaia neganai, kerere ta ai davaria lasi, ai hani be motuka dekenai ane ai abia ela bona ai ginidae aiemai gabu dekenai.

Sibona Do Ai Gini, Heduru Lasi Totona Ai Hegaegae

Lagani 1950 ia lao lagani 1959 lalodiai, East Germany tadikakadia be West Berlin tadikakadia dekenai idia tabekau magasin, buka, bona hakaua herevana idia abia totona. To lagani 1960 lalonai, kara ta idia karaia East Germany lalonai, Witness ta ta be edia gabu dekenai idia noho tadikakadia danu idia hetura namonamo totona. Lagani 1961, June ena hua lalonai, elda taudia edia Kingdom Ministry School ena klas ginigunana idia karaia Berlin dekenai. Pura hani lalonai unai sikuli kosi ginigunana dekenai lau lao. Pura 6 murinai, Berlin Haba badana idia haginia neganai, ai be West kahana amo ai parara. Aiemai gaukara be hehuni dalanai ai karaia, bona sibona ai gini, heduru lasi bamona.

Haida idia gari badina idia laloa, East Germany dekenai, Iehova ena Witness taudia edia gaukara do ia metairametaira ia lao ela bona ia doko momokani. To lagani gunanai orea ena heau daladia idia haidaua dainai unai heduru ese lauma dalanai ai ia hatamonaia bona ai ia hagoadaia. Danu, Kingdom Ministry School ena klas ginigunana idia lao henia elda taudia ese idia dibaia gaudia be ma elda taudia haida dekenai idia hadibaia. Unai dainai Iehova ese ai ia hegaegaelaia sibona ai gini heduru lasi totona, guna ia ese lagani 1949 ena distrik hebouhebou dekenai ai ia hahegaegaelaia gavamani ese aiemai gaukara lagani 1950 dekenai idia taravatulaia hegeregerena.

West kahana amo ai parara dainai, ai sibona ese orea do ai haheaua noho. Aiemai Keristen tadikaka West Berlin dekenai ai tore henidia bona ai hamaorodia, West tadikakadia do idia lao diba dala badana East kahana dekenai do ai hedavari bona ai kiki hebou totona. Ai hedavari gabuna dekenai, aiemai motuka be koikoi dalanai ia dika karana ai hahedinaraia. Miniti haida murinai, West tadikakadia be edia motuka amo Bible buka bona magasin idia abia mai ai idia henia totona. Danu, lau moale badina idia ese lauegu Kingdom Ministry School bukana, lau torea noutbuk, bona egu Bible idia henia lau dekenai, unai gaudia lau rakatania idia dekenai polisi ese lau idia dogoatao garina. Lau moale bada herea badina lau abidia lou dainai! Lau diba momokani lasi to lagani gabedia lalodiai unai buka do lau gaukaralaidia bada.

Hehuni Dalanai Ai Sikuli

Dina haida murinai, ai idia hamaoroa East Germany ena gabu ibounai dekenai Kingdom Ministry School ena klas do ai hegaegaelaia. Hadibaia taudia hani idia abia hidi, unai taudia ta be lau. Aiemai haroro gaukara idia taravatulaia dainai, lau laloa edena bamona elda hadibaia gaukarana do lau karaia diba. Aiemai klas be hehuni dalanai ai karaia totona, lau laloa namona be unai klas be holide kampa bamona ai karaia.

Unai klas ta ta dekenai taunimanima be hani, bona lau be edia hadibaia tauna, bona aiemai aniani nadua tauna ta danu ia noho. Unai klas dekenai idia lao taudia edia adavana bona natudia danu idia abia lao. Unai dainai ai lao taudia ibounai be 15 ia lao 20 bamona. Idia kampalaia hanaihanai gabuna be ia namo momokani lasi, unai dainai lau bona egu ruma bese be unai gabu ai rakatania bona ai lao gabu namona ta ai tahua totona.

Nega ta, motuka amo hanua ta lalonai ai heau lao noho lalonai, dala maragina ta ai itaia ia lao au momo idia noho gabuna dekenai. Unai gabu toana be namo dainai, unai hanua ena biaguna lau itaia. Lau gwau: “Ai be gabu ta ai tahua, ai ura ruma bese haida bona ai be pura rua bamona gabu ta dekenai ai kampa. Ai ura ai sibona do ai noho, bona unai amo natudia be sibodia do idia loaloa diba. Ia namo unai au idia noho gabuna dekenai ai lao diba, eiava?” Gwaumaoro ia henia ai dekenai dainai ai hegaegae.

Unai gabu dekenai, aiemai palai rumadia ai haginidia, bona lauegu trailer rumana be edia bogaraginai ai atoa murimuri amo idia itaia lasi totona. Unai trailer be aiemai klas rum bamona ai gaukaralaia. Unai trailer lalonai hora 8 bamona ai stadi goadagoada dina ta ta 14 lalodiai. Loaloa taudia haida do idia mai garina dainai, trailer ena hekou gabuna dekenai, teibol bona helai gaudia haida ai atodia hegaegae. Bona nega haida vadivadi taudia haida idia mai! Unai nega lalonai aiemai ruma bese taudia edia heduru dainai ai moale.

Aiemai klas ai abia lalonai, aiemai ruma bese taudia be gadi taudia bamona ai idia naria noho. Dina ta dekenai, unai hanua ena biaguna, ia be Komiunis Pati taudia edia seketere ia raka mai noho ai noho gabuna dekenai. Aiemai gadi tauna ese switch ta ia gigia bona unai switch ena paua laini ia heau lao ai noho trailer dekenai, bona rege ia karaia. Maoromaoro trailer dekena amo ai heau lasi haraga bona teibol bona helai gaudia ai hegaegaelaia gabudia dekenai ai helai bona kasi gadara ai karaia noho. Inuinu ta ladana schnapps ena botolo ta danu ai atoa teibol dekenai, bona unai ese toana momokani ia hahedinaraia. Unai hanua biaguna be hetura dalanai ia mai ai ia vadivadi henia sibona bona ia giroa lao, daradara ena toana ia hahedinaraia lasi.

Lagani 1962 tubutubu gaudia idia vara lou negana amo ela bona lagani 1965 ena dokona negana ai, Germany ena gabu ibounai dekenai Kingdom Ministry School ena klas idia abia. Unai kosi ai abia lalonai, ai idia hadibaia edena bamona East Germany dalanai ia vara hekwakwanai ai haheaukalaia diba, bona elda tadikakadia idia hegaegaelaidia haroro gaukarana do idia naria totona. Unai klas idia lao henia totona elda taudia be edia laga-ani ena nega idia haorea, bona bema polisi ese idia davaridia neganai, dibura ruma dekenai idia atodia diba.

Sikuli amo Namo Ai Davaria

Tau badadia be aiemai gaukara dalana idia itaia noho, bona lagani 1965 dokona negana ai, elda taudia momo be unai sikuli idia haorea murinai, unai tau badadia be idia ura orea ena gaukara idia hadokoa. Idia ese Witness taudia edia gaukara idia gunalaia taudia 15 idia dogoatao. Edia gaukara idia hegaegaelaia namonamo dainai East Germany ena gabu ibounai dekenai unai witness taudia idia tahua. Taunimanima momo idia laloa Witness taudia edia gaukara be do ia doko. To Iehova ena heduru amo, unai kara ai haheaukalaia bona guna ai karaia gaukarana ai karaia noho.

Ai idia durua bada gauna be Kingdom Ministry School, bona aiemai hebamo karana klas dekenai ese ai ia hagoadaia momokani danu. Orea taudia ese gini goada karana idia hahedinaraia. Guna, orea dekena amo ai abia hakaua herevadia ai badinaia maoromaoro be gau badana!​—Isaia 48:17.

Hua gabedia lalodiai, ena be gavamani ena tau badadia ese aiemai gaukara idia koua toho, to unai ese aiemai gaukara ia hadokoa lasi. Nega sisina murinai, aiemai Kingdom Ministry School ai hamatamaia lou. Gavamani ena tau badadia ese aiemai gaukara ia hamatamaia lou karana idia itaia neganai, edia kara bona lalohadai idia haidaua. Iehova ia kwalimu unai!

Haroro Gaukara Dekenai Ai Goada

Unai neganai aiemai Kongregesen Buka Stadi ta ta dekenai taunimanima be 5 5 sibona. Ai ta ta be buka bona magasin ai abia buka stadi grup amo, bona haroro gaukara be unai buka stadi grup maragidia amo ai karaia. Ai gaukara hamatamaia negana amo Iehova ese hahenamo bada ia henia lau bona Regina dekenai bona Bible idia ura stadilaia taudia momo ai davaria.

Ruma ta ruma ta gaukara ai karaia neganai, ai naria namonamo, badina polisi taudia ese ai idia davaria neganai, ai do idia dogoatao. Ruma ta ai karaia murinai, ruma sisina momo ai hanaia bena ma ruma ta ai karaia. Ruma ta dekenai hahine ta ese ai ia boiria vareai ena ruma lalonai. Bible siri ena hereva badana ai kikilaia noho lalonai ena natuna mero ia raka vareai bona maoromaoro ai dekenai ia hereva.

Ia henanadai, ia gwau: “Umui emui Dirava be nega ta umui itaia, eiava? Lau ura umui dekenai lau hahedinaraia, lau itaia gaudia sibona dekenai lau abidadama. Ma gau iboudiai be koikoi sibona.”

Lau haere, lau gwau: “Unai lau abia dae diba lasi. Nega ta dekenai oiemu harana oi itaia, eiava? Gau ibounai oi karaia ese ia hahedinaraia oi be mai emu harana.”

Lau bona Regina ese ia dekenai gau haida ma ai herevalaidia ai itaia diba lasi to edia mamina ai abia gaudia, hegeregere paua ai abia. Unai mero matamatana ia kamonai namonamo bona ia bona ena sinana dekenai Bible stadi ai hamatamaia. Idia ruaosi be Witness taudia ai idia lao. Lauegu adavana bona lau ai stadi henidia taudia 14 be Witness taudia ai idia lao. Unai taudia 7 be ruma ta ruma ta gaukara dekenai ai davaridia bona oredia 7 be nega bona gabu idaudia dekenai ai haroro neganai ai davaridia.

Bema hanaihanai Bible stadi ai karaia taunimanima haida dekenai bena unai taudia ai abidadama henidia, vadaeni, ai boiridia mai hebou dekenai. Ai laloa momo gauna be stadi taudia ese Iehova ena taunimanima edia noho namona do idia hadikaia eiava lasi. Unai dainai, lagani ta eiava rua murinai, aiemai Bible stadi taudia ai boiridia mai hebou dekenai, bona nega haida nega daudau murinai ai boiridia mai hebou dekenai. Dagi sisina bada tau badana ta lau laloa, ia be Komiunis Pati ena tau badadia edia turana namona ta. Ia be lagani 9 Bible stadi ia karaia murinai idia boiria lao hebou dekenai! Hari unai tau be iseda Keristen tadikaka ta.

Gavamani Taudia ese Ai Idia Itaia Tao Noho

Lagani 1965 murinai siahu taudia ese ai idia dogoatao lasi, to maino dekenai ai noho lasi danu. Siahu taudia ese ai idia itaia tao noho. Unai neganai orea ena haheaua gaukara lau karaia momo, unai dainai siahu taudia ese lau idia raraia momo. Nega momo polisi taudia ese lau idia abia lao polisi sitesini dekenai, lau idia henanadai henia totona. Lau idia hamaoroa, idia gwau: “Namona be oiemu gaukara oi bamahuta henia. Oi lao dibura ruma dekenai.” To gabeai, nega ibounai lau idia siaia lao egu ruma dekenai.

Lagani 1972 lalonai, gavamani ena dagi bada taudia rua ese lau idia vadivadi henia, bona idia diba lasi to iseda orea idia gwauraia namo. Idia be aiemai kongregesen ena Gima Kohorona stadi herevadia idia kamonai. Mai badu danu idia hereva, idia gwau: “Unai magasin ena hereva be namo lasi ai dekenai.” Idia laloa momo, taunimanima be unai magasin do idia duahia neganai reana dahaka do idia laloa Komiunis kara dekenai. Idia gwau: “Unai magasin 5 milion o 6 milion idia hariharilaia, bona idia tubu daekau tanodia dekenai taunimanima idia duahia vadaeni. Unai magasin be anina lasi magasin edia sivaraidia bamona gauna lasi.” Sibogu dekenai lau gwau, ‘Emui hereva be momokani!’

Lagani 1972 ia ginidae neganai, aiemai haroro gaukara be lagani 22 lalodiai idia taravatulaia vadaeni, bona Iehova ese lalokau dalanai bona aonega dalanai ai ia naria. Ai ese iena taravatu ai badinaia namonamo, to lagani 18 ma do idia lao murinai, Iehova ena Witness taudia dekenai gwaumaoro do idia henia edia haroro gaukara idia karaia totona. Ai moale bada herea badina hari aiemai Dirava, Iehova, ai tomadiho henia mai moale danu bona harihari gavamani ese aiemai gaukara idia taravatulaia lasi!​—Helmut Martin ese unai sivarai ia gwauraia.