Inai Oi Laloatao, A?

Vanegai ena Gima Kohorona haida oi duahidia neganai oi moale, a? Namona be henuai idia noho henanadai oi haerelaidia:

▫ Hari inai negai, kongregesen ese gorere taudia bona buruka taudia be edena bamona idia durudia diba?

Aposetolo edia negai, ogogami vabudia edia ladadia be Keristen kongregesen ena lista ta ai idia toredia. (1 Timoteo 5:​9, 10) Unai hegeregerena, hari inai negai elda taudia ese gorere taudia bona buruka taudia, heduru ai idia dabu taudia, edia ladadia be lista ta ai do idia toredia be namo reana. Elda taudia sibodia lasi, to ita ibounai ese gorere taudia bona buruka taudia durudia daladia ita tahua be namo. Kongregesen taudia iboudiai be unai idia diba be namo. (1 Timoteo 5:​4-8)​—8/15, rau 28-9.

▫ Baibel ena sivarai lalonai davara gauna ta ese Iona ia hadonoa. Unai sivarai ita dadaraia badina ia be koikoi gauna, eiava?

Lasi, lakaradonodono eiava kwalaha kurokurona ta ese tau ta ia hadonoa diba. Ma danu, Iesu ese Iona ena sivarai ia hamomokania. (Mataio 12:​39, 40)​—8/15, rau 32.

▫ Lauma garidia dainai meamea edia nadi bona toni idia gaukaralaia taudia be dahaka dika idia davaria diba?

Gaukaralaidia taudia be idia lalohadai namonamo taudia bamona idia karaia lasi, to idia laloa edia toni gaukaralaia karana amo hekwakwanai idia hanaia diba. Gaukaralaia taudia be noho namo koikoi dekenai idia noho. Babalau edia nadi bona toni siahuna ia abidadama henia tauna be ia itaia diba lasi demoni siahudia dekenai iena mauri ia henia.​—9/1, rau 4.

▫ Headava ia noho daudau totona heduru gaudia hani be dahaka?

Idia ura bada do idia kamonai, sori herevana idia gwauraia diba, lalona hagoadaia herevadia idia henia noho diba, bona lalokau ai edia imana amo idia daua toho heheni diba. (1 Korinto 13:​4-8; Efeso 5:33; Iakobo 1:19)​—9/1, rau 20.

▫ Iehova be hetoho idia davaria taudia dekediai haheauka ia henidia diba dalana ta be dahaka?

Ia karaia dalana ta be iena Hereva, Baibel lalonai, haheauka taudia edia sivarai ia torea. (Roma 15:4) Unai ita lalodia neganai, goada ita abia ita haheauka totona, bona danu ita diba edena dala ai ita haheauka diba.​—9/15, rau 11-12.

▫ Dirava badinaia karana be dahaka?

Dirava badinaia karana anina be Iehova ita matauraia eiava ita badinaia badina ita ura ita hamoalea, herevana hetoho dikadia ita abia, to ita karaia badina iseda kudouna amo Dirava ita lalokau henia.​—9/15, rau 15.

▫ Iehova ena hebogahisi be edena bamona ita laloa be maoro?

Namo lasi ita laloa Dirava ena hebogahisi bada be gau maragina. Namona be Paulo bamona ita laloa bona iseda kara dika ita tuari henia amo ita hahedinaraia unai ita laloa bada. (1 Korinto 9:27) Unai dala ai do ita hahedinaraia, ena be ita hekwarahi, to ita ura momokani kara maorona ita karaia.​—10/1, rau 23.

▫ Lalokau kara ena lista dekenai dahaka dainai Paulo ese hebogahisi ia torea guna?

Taunimanima idia gwau bema hebogahisi ia noho lasi, bema idia haheauka heheni lasi, Keristen taudia idia hebamo heheni namonamo diba lasi. Unai be momokani, badina ita ibounai be ita goevadae lasi, bona iseda kara dika bona kerere karadia dainai haida ita habadudia. Unai dainai, haheauka be gau badana tadikaka idia lalokau heheni totona.​—10/15, rau 21.

▫ Keristen ginigunadia ese Dirava ena ladana idia gaukaralaia, a?

Hamomokania herevadia idia noho dainai haere be oibe. Iesu ese ena hahediba taudia ia hadibadia Dirava be inai bamona idia guriguri henia totona: “Oiemu ladana do ai hahelagaia.” (Mataio 6:9) Bona tanobada dekenai ena haroro gaukara ia haorea neganai, ia ese ena guba Tamana ia guriguri henia, ia gwau: “Tanobada dekenai oi henia lau dekenai taudia be oiemu ladana lau hadibaia vadaeni idia dekenai.” (Ioane 17:6) Septuagint Baibel gunadia dekenai, Dirava ena ladana be Heberu leta hani o Tetragrammaton amo idia torea.​—11/1, rau 30.

▫ Dahaka Baibel sivarai ese idia hahedinaraia eda kerere dainai ita karaia karadia be mai anina eda mauri dekenai?

King Saulo ese sisiba ia dadaraia, bona ena kerere idia momo daekau, ela bona Dirava ena badu ai ia mase. (1 Samuel 15:​17-29) To, ena be David ia kara kerere bona ia kara dika, to ia helalo-kerehai, mata-hakani ia abia dae bona Iehova ia badinaia noho. Unai Baibel sivarai amo ita diba iseda kara kerere ita gwauraia hedinaraia neganai, unai ese ita ia durua Dirava ita turana henia namonamo, bena unai amo mauri hanaihanai do ita abia diba. (Salamo 32:​1-5)​—11/15, rau 29-30.

▫ Idia vara kava gau dikadia eiava ma gau ta ia vara dainai, iena taunimanima ese hisihisi idia davaria neganai, Iehova ese edena dala amo ia durudia?

Iehova ese idia vara kava gau dikadia ia koua lasi eiava hoa karana ta amo ia durudia lasi, to taunimanima momo idia diba namonamo lasi gauna ia gaukaralaia​—lalokau. Oibe, Iehova ese iena taunimanima ia lalokau henidia, bona mai goada danu idia lalokau heheni totona ia hadibadia namonamo, unai dainai, idia totona ia karaia karadia be hoa karadia bamona. (1 Ioane 4:​10-12, 21)​—12/1, rau 10.