Edia Lalohadai be Dirava Ena Lalokau ida Idia Hahegeregerea Diba, A?

“AI GWAU Dirava ese ena noho hanaihanai palanina hegeregerena ena lalona ia hadaia guna taunimanima ta ta edena bamona do ia kara henidia. Badina be ia havaradia lasi iboudiai do idia hegeregere totona, to haida ese mauri hanaihanai do idia abia bona haida ese panisi hanaihanai do idia abia be ia gwauraia guna.”

Protestan tauna John Calvin ese ena lalohadai unai bamona ia gwauraia, buka ladana Institutes of the Christian Religion lalonai. Unai lalohadai ia abia, badina be ia laloa Dirava be gau iboudiai ia diba bona ia karaia taudia ese ena palani idia hakererea diba lasi bona idia dainai do ia haidaua lasi.

To Baibel ese momokani Dirava unai bamona ia gwauraia, a? Gau badana be inai: Unai lalohadai be Dirava ena kara hereadaena, lalokau, bona ena kara namodia ma haida ida idia hegeregere, eiava?

Dirava ese Vaira Gaudia Ia Gwauraia Guna Diba

Dirava ese vaira gaudia ia gwauraia guna diba. Ia be sibona inai bamona ia gwauraia: “Hamatamaia neganai lau ese dokona lau gwauraia. Gunaguna momokani lau ese, dahaka do ia vara lau gwauraia guna. Lau gwau lauegu ura, lauegu palani, be do ia gini noho, do ia moru lasi. Lau ura karaia gaudia ibounai be do lau karaia.” (Isaia 46:10) Idaunega amo Dirava ena ura hegeregerena ena peroveta herevadia idia torea; unai amo ia hahedinaraia gau haida idia do vara lasi neganai ia dibadia guna diba bona ia gwauraidia guna diba.

Unai hegeregerena, Belesasa, Babulonia ena king, ena nega ai, Daniela ese animal rua ia nihilaia, ta ese ta ena gabu ia abia. Iehova ese nihi ena anina ia hamaorolaia, ia gwau: “Unai mamoe tau oi itaia mai ena doana rua be Mede bona Parasa basileia edia toana. Unai nanigosi tau be Helene basileia ena toana.” (Daniela 8:​20, 21) Dirava ia diba guna dahaka be gabeai do ia vara, bona ena diba ia gaukaralaia; unai amo tanobada gavamanidia badadia edia kara ia hahedinaraia: Mede bona Parasa ese Babulonia Basileiana, unai negai ia lohia gavamanina, ena gabu do idia abia, bena gabeai Helene basileiana (Greece) ese.

Taunimanima ta ta perovetalaia herevadia danu idia noho. Peroveta tauna Mika ia gwau Mesia be Betelehema ai do ia vara. (Mika 5:2) Unai neganai danu Dirava ese ena diba, gabeai do idia vara gaudia dibalaia dibana, ia gaukaralaia. To unai ia karaia ena badina tamona be, Mesia do ia gwauraia. Unai ese ia hamomokania lasi ia ese taunimanima ta ta iboudiai dekenai do idia vara gaudia ia gwauraia hidi guna.

Baibel ese ia hahedinaraia nega haida Dirava ese gau ta diba guna dalana ia tahua lasi. Sodoma bona Gomora hadikaia ore negana be kahirakahira neganai, ia gwau: “Harihari do lau diho, lau itaia, lau kamonai sivarai be ia momokani o lasi. Do lau diba namonamo.” (Genese 18:21) Inai siri ese ia hahedinaraia goevagoeva, Dirava ese unai ia do tahua namonamo lasi neganai, ia diba guna lasi unai hanua taudia edia lebulebu karadia edia bada be edena bamona.

Momokani, Dirava ese gabeai do idia vara gaudia ia dibaia guna diba, to nega momo ena diba be unai bamona ia gaukaralaia lasi. Ia be siahu ibounai Diravana, unai dainai ena diba be iena ura hegeregerena ia gaukaralaia diba, goevadae lasi taudia edia ura hegeregeredia lasi.

Kerere Ia Hamaoromaorodia Diba Diravana

Calvin hegeregerena, haida idia gwau Dirava ese taunimanima ia do karaia lasi neganai edia moru dalana ia lalohadailaia guna bona idia do moru lasi neganai ia ese ‘do ia abia hidi taudia’ ia laloa guna. To, bema unai be momokani, Dirava ese mauri hanaihanai helarona be Adamu bona Heva ia henidia neganai ia koikoi unai, badina be ia diba unai helaro ena anina do idia abia diba lasi, ani? Inai danu, Baibel ibounai ese ia hakoikoia lasi herevana be inai: Dirava ese dala ia kehoa idia edia, iena hahegani do idia badinaia bona do idia mauri hanaihanai, eiava do idia dadaraia bona do idia mase.​—Genese, karoa 2.

To Adamu bona Heva edia kara dika ese momokani Dirava ena palani ia koua, a? Lasi, badina be idia kara dika murinai, maoromaoro Dirava ia gwau ia ese ‘garana’ ta do ia havaraia, Satani bona ena hesiai taudia haoredia totona; ma ia gwau tanobada dekenai gau iboudiai do ia hamaoromaoroa lou. Manumanu ta ta ese uma ena anina ibounai idia hadikaia diba lasi hegeregerena, Adamu bona Heva edia gwau-edeede ese Dirava do ia koua lasi; ia ese tanobada be paradaiso ai do ia halaoa.​—Genese, karoa 3.

Gabeai Dirava ese ia hahedinaraia ia ese Basileia gavamanina ta be King Davida ena tubuna ta do ia henia bona haida be unai basileia lalonai ia ida do idia lohia. Ia gwauraidia “Ataiai Momokani Dirava ena helaga taudia.”​—Daniela 7:18; 2 Samuela 7:12; 1 Sivarai 17:11.a

Dirava ese Edia Kara Edia Anina Ia Perovetalaia

Ena be Dirava ese taunimanima be gabeai do idia rakalaia dalana dibaia dalana ia abia hidi lasi, to edia kara namodia o dikadia edia anina ia perovetalaia. Bema mekaniki ta ese draiva ta ia hamaoroa ena motuka ia dika, bena bema kerere ia vara, mekaniki idia samania diba lasi; idia gwau diba lasi ia ese ia havaraia o ena vara dalana ia hegaegaelaia. Unai hegeregerena, Dirava ita samania diba lasi, ita gwau diba lasi taunimanima ta ta edia kara edia anina dikana ena vara dalana be ia ese ia hegaegaelaia.

Taunimanima ginigunadia ruaosi edia natudia edia sivarai ese unai ia hamomokania. Kaino ese ena tadina ia do alaia mase lasi neganai, Iehova ese Kaino dala rua ia hamaorolaia, ta do ia abia hidi. Ia ese kara dika be do ia halusia, eiava kara dika ese ia do ia biagua? Unai sivarai lalonai, gau ta lasi ese ia hahedinaraia Iehova ese dala ia karaia guna, Kaino ese dala kererena do ia abia hidi bona ena tadina do ia alaia mase totona.​—Genese 4:​3-7.

Gabeai, Mose ena Taravatu ese Israela taudia ia hadibaia, bema Iehova do idia rakatania bona idau bese hahinedia do idia adavaia, dika do idia davaria. Vadaeni, ia perovetalaia gauna be ia vara. King Solomona ia buruka neganai, ena adavana, idau bese hahinedia, ese ena lalona idia ania dainai, kaivakuku ia tomadiho henidia. (1 King Taudia 11:​7, 8) Oibe, Dirava ese ena bese taudia ia sisiba henia, to idia ta ta be do idia karaia karadia be ia ese ia gwauraia guna lasi.

Dirava ese ia abia hidi taudia edia davana namona be, guba ai Keriso ida do idia lohia hebou. Ia hadibadia namona be do idia haheauka noho, unai davana do idia reaia garina. (2 Petero 1:10; Apokalupo 2:​5, 10, 16; 3:11) Tomadiho hahedibalaia taudia haida be guna idia henanadai hegeregerena, Dirava ese ia abia hidi taudia bema idia boio diba lasi, dahaka dainai unai bamona ia sisiba henidia?

Dirava Ena Lalokau

Dirava ese taunimanima ia karaia, “ia sibona ena laulau bamona,” bona ura kwalimu ia henidia, lalokau dainai ia do idia matauraia diba bona ena hesiai do idia lao henia diba totona. (Genese 1:27) Ia ura lasi idia be masini hegeregeredia ia laloa guna karadia iboudiai do idia karaia. Bema lalokau do idia hahedinaraia mai edia lalo-parara bona mai edia ura kwalimu ida, Dirava ese samani herevadia kereredia do ia hakoikoia diba. Ia gwau: “Egu natuna e, do oi aonega, vadaeni do lau moale, bona unai dainai, bema tau ta ese lau ia gwauraia kerere neganai, lau ese iena hereva do lau halusia diba.”​—Aonega Herevadia 27:11.

Bema Dirava ese ena hesiai taudia be gunaguna ia gwauraia hidi vadaeni, reana ta ia diba lasi idia lalokau henia momokani eiava lasi, ani? Inai danu, bema Dirava ese haida edia kara namodia ia laloa lasi bena ia gwauraidia hidi guna hairai bona moale do idia abia, unai be iena kara maoromaoro hegeregerena lasi, ani? Bema haida be unai bamona ia kara namo henia, to ma haida ia gwauraia panisi hanaihanai do idia abia, “ia abia hidi taudia” ese edia lalona amo do idia tanikiu henia momokani lasi.​—Genese 1:27; Iobu 1:8; Kara 10:​34, 35.

Gau ginigabena be inai: Keriso ese ena hahediba taudia ia hagania sivarai namona be taunimanima iboudiai dekenai do idia harorolaia. To, bema Dirava ese do ia hamauridia taudia be ia abia hidi vadaeni, Keristen taudia edia haroro gaukara be anina lasi bona do idia goadalaia lasi, ani?

Dirava ese taunimanima edia toana ia laloa lasi to iboudiai ia lalokau henia; unai ese ia ha-uradia bada ia do idia lalokau henia. Ena lalokau ia hahedinaraia dalana badana be, ena Natuna ia bouboulaia, goevadae lasi taudia mai edia kara dika hamauria totona. Ena Natuna sibona mo ena kara ia diba guna, ma ta ena kara be unai bamona ia diba lasi, to unai ese ita ia hadibaia ia ese Iesu ena amo ena gwauhamata namodia be momokani do ia hamomokania. Unai dainai namona be ena Natuna do ita abidadama henia bona Dirava dekenai do ita raka kahirakahira lao. Idia ura edia ura kwalimu do idia gaukaralaia bona edia lalokau Dirava dekenai do idia hahedinaraia taudia iboudiai be hari inai negai ia ese ia boiridia ia ida do idia hetura heheni; namona be ena boiboi do ita abia dae, badina be unai amo do ita hahedinaraia ena lalokau ita laloa bada.

[Footnotes]

[Box on page 7]

EDIA OREA IA GWAURAIA HIDI GUNA

“Dirava ese ia diba guna taudia ia abia hidi, iena Natuna ena toana do idia abia, bona iena Natuna ena tadina do idia lao . . . Ia abia hidi guna taudia be ia ese ia boiridia. Bona inai ia boiridia taudia be ia gwauraidia idia be maoromaoro. Inai bamona ia gwauraidia maoromaoro taudia dekenai be iena hairaina danu ia henia.” (Roma 8:​29, 30) Inai hereva “abia hidi,” Paulo ese inai siri lalodiai ia torea, edena bamona ita laloa be maoro?

Unai hereva amo Paulo ese ia hahedinaraia lasi Dirava ese idia ta ta ia gwauraia hidi guna. Lagani 60 bamona idia lao vadaeni, buka ta ladana Dictionnaire de théologie catholique ese Paulo ena hereva (Roma, karoa 9-11) inai bamona ia gwauraia: “Katolik diba momo taudia momo idia laloa ia hahedinaraia lasi Dirava ese taunimanima ia gwauraia hidi guna, mauri hanaihanai do idia abia.” Unai buka ese M. Lagrange ena hereva ia gwauraia lou, ia gwau: “Ena hereva amo Paulo ese ia hahedinaraia lasi Dirava ese taunimanima ia gwauraia hidi guna, haida ese mauri hanaihanai do idia abia bona ma haida ese panisi hanaihanai do idia abia. Ia herevalaia gauna be inai: Dirava ese Idau Bese taudia ia boiridia Keristen tomadihona ena hariharibada do idia abia, to Iuda taudia ese idia kamonai henia lasi. . . . Ia ese orea ia gwauraidia, Idau Bese taudia edia bona Iuda taudia edia; taunimanima ta ta boiria karana ia herevalaia lasi.”​—Italiks be aiemai.

Vanegai, Baibel ta ladana The Jerusalem Bible lalonai, hari karoa (Ro 9-11) be unai bamona idia gwauraia, idia gwau: “T[aravatu] G[unana] ena hereva haida dainai, inai karoa lalodiai ia ese Israel ena ahuna hahemauri dalana havaraia karana lalonai ia gwauraia. Ia gwau lasi Dirava ese taunimanima ta ta ia gwauraia hidi guna, hairai o abidadama do idia abia.”

Roma karoa 8 ena siri ginigabedia danu be unai hegeregerena. Ita idia hadibaia lou Dirava ese orea ta ia lalohadailaia guna, taunimanima bogaragidia amo do ia boiridia, Keriso ida do idia lohia hebou. Do idia badinaia taravatudia danu ia laloa guna, to ia gwau guna lasi daika daika do ia abia hidi, badina be unai be ena lalokau bona ena kara maoromaoro hegeregeredia lasi.