Lagani Fifti ai Idia Kwalimu Lasi

“AI, UNITED NATIONS TAUDIA, ESE EMAI LALONA AI HADAIA, AI ESE URU GABEDIA BE iseda mauri negana ai taunimanima edia lalona be nega rua ia hahisia bada herea gauna, tuari, ena dika amo do ai hamauria, bona emai abidadama, taunimanima edia ura kwalimu, edia namo, tatau bona hahine bona bese badadia bona maragidia be dala tamona amo kara henia dalana dekenai, do ai gwauraia lou . . .”​—United Nations ena palani pepana ena hamatamaia herevana.

OCTOBER 24, 1995, be United Nations oreana ena lagani namba 50. Hari inai negai unai orea ena memba Besedia 185 iboudiai ese ena taravatu bona ia tahua gaudia, matamanai ena palani pepana ai idia torea gaudia, idia abia dae. Gaudia be inai: bese iboudiai lalonai maino bona noho namona do ia naria; dagedage karadia, tanobada ena maino idia hadikaia gwauraia karadia, do ia koua; bese idauidau do ia durua do idia hetura heheni totona; taunimanima iboudiai edia ura kwalimu do ia naria, herevana idia be edena bese taudia, o idia be tatau eiava hahine, o edia gado be edena, o edia tomadiho be edena; bona bese iboudiai do ia durua, do idia gaukara hebou, bese iboudiai edia hekwakwanai, bisinesi bona taunimanima edia noho daladia ai idia vara hekwakwanaidia, do idia hamaoromaoroa totona.

Lagani 50 lalodiai United Nations oreana ia gaukara goada, tanobada ibounai lalonai maino bona noho namona havaraia totona. Haida idia gwau, reana ia ese tanobada ibounai tuarina ihatoina ena vara dalana ia koua, bona ia dainai niuklia bomu amo taunimanima hutuma hamasea karana be ia vara lou lasi. United Nations ese aniani bona muramura be memero kekeni milioni milioni ia henidia. Tano momo lalodiai taunimanima edia mauri ia hanamoa; ranu namona, gorere dikadia koua hekododia, bona ma gau haida ia henidia. Edia tano idia heautania taudia milioni milioni ese unai orea amo heduru idia abia.

United Nations oreana ena kwalimu karadia dainai, Nobel Peace Prize be nega ima idia henia. To, madi, tuari lasi tanobadana ia do vara lasi.

Maino Bona Noho Namona​—Ia Tahua to Ia Davaria Lasi

Ena be lagani 50 lalodiai maino bona noho namona ia tahua, to ia do davaria lasi. Vanegai, United States ena presiden be United Nations General Assembly vairanai ia haroro neganai, ena lalo-hekwarahi ia gwauraia hedinarai, ia gwau: “Inai nega be helaro amo ia honu bona gau momo dekenai ita kwalimu, to hadikaia ore karadia bona lalo-hekwarahi bada danu idia vara.”

Lagani 1994 dokonai, The New York Times niuspepana ia gwau: “Tuari badadia bona maragidia 150 bamona be idia vara noho, idia lalonai taunimanima tausen tausen idia mase​—ripoti momo idia hahedinaraia hanua taudia edia momo ese tuari taudia edia momo ia hanaia​—bona taunimanima tausen momo herea ese edia tano idia heautania.” The United Nations Department of Public Information ia gwau, lagani 1945 amo ema bona hari, taunimanima 20 milioni be tuari dainai idia mase. U.S. ena gwaukau hahinena United Nations dekenai, Madeleine Albright, ia gwau: “Bese haida idia tuari heheni neganai, edia dagedage karadia hari inai negai ese edia dagedage karadia gunadia be dala momo ai idia hanaia.” Dina ta ta iboudiai niusi ripotidia lalonai taunimanima edia ura kwalimu hadikaia karadia bona maka tamona amo taunimanima kara henidia lasi karadia idia herevalaia. Toana be bese momo idia haheauka heheni to idia hetura heheni lasi.

Britain ena gwaukau tauna United Nations dekenai, Sir David Hannay, ia gwau, “Ela bona lagani 1980 murinai toana be United Nations ia kwalimu lasi.” United Nations ena seketere-jeneral, Boutros Boutros-Ghali, be mai ena lalohisihisi ida ia gwau, orea ena memba Besedia haida ese maino naria karadia idia laloa maragi bona idia hesikulaia. Ma ia gwau memba momo ese “United Nations idia laloa bada lasi.”

Niusi Halasia Oreadia Edia Lalo-Ani

Ena be toana be United Nations be mai ena siahu bada, to nega momo politikol karadia bona niusi halasia oreadia ese ia karaia toho gaukaradia idia koua. Bema ena memba taudia ese idia durua lasi, United Nations be mai ena siahu lasi. To bema taunimanima ese gwaumaoro idia henidia lasi, UN ena memba taudia momo ese United Nations do idia durua lasi. Hegeregere, The Wall Street Journal niuspepana ia gwau: “Somalia bona Bosnia lalonai unai orea be dala badana ai ia lusi dainai, America taudia momo idia laloa moni ia negea kava sibona lasi, to dika ia havaraia diba danu.” Unai edia lalohadai ese America ena politikol taudia haida edia lalona ia ania, unai dainai idia gwau namona be U.S. ese United Nations idia henia monina be do idia hamaragia.

Nega haida niusi halasia oreadia ese United Nations idia gwau henia. Ena kara haida be inai bamona idia gwauraia: “idia hegeregere lasi,” “idia kara metairametaira,” bona “anina idia havaraia lasi.” Vanegai, The Washington Post National Weekly Edition niuspepana ia gwau: “United Nations be do kara metairametaira oreana, tanobada ai ia do hekwarahi noho.”

Niuspepa ma ta ia gwau, Seketere-Jeneral Boutros Boutros-Ghali ia gwau ena lalona ia hekwarahi bada, ala-ala bada be Rwanda ai ia vara dainai. Ia gwau: “United Nations sibona ia lusi lasi; tanobada besedia iboudiai idia lusi. Bona ita ibounai eda kara dainai idia lusi.” Lagani 1993 ai, TV ena niusi program ta ia gwau, United Nations ese “maino hadikaia karana badana​—bese momo ese niuklia tuari kohudia abia karana​—ia koua lasi.” Unai TV program ia gwau United Nations be “lagani momo lalodiai ia hereva sibona.”

Taunimanima momo ese idia vara gaudia idia moalelaia lasi dainai, United Nations ena dagi bada taudia idia laloa momo bona unai ese edia lalo-hekwarahi ia habadaia. Ena be idia lalo-hekwarahi, to United Nations ena lagani 50 moalelaia hebouna ai, toana be momo edia lalona idia goada lou bona idia laloa gaukara do idia hamatamaia lou. Gwaukau Hahinena Albright ese United Nations ena manoka ia gwauraia, to taunimanima momo edia lalohadai ia gwauraia danu, ia gwau: “Namona be ita karaia vadaeni karadia ita herevalaia noho lasi, to do ita karaia karadia ita herevalaia be namo.”

Oibe, tanobada dekenai dahaka do ia vara? Tuari lasi tanobadana do ia vara, a? Bema do ia vara, United Nations ese dahaka do ia karaia unai do ia vara totona? Bema oi be Dirava gari henia tauna, namona be inai bamona oi henanadai: ‘Dirava ese dahaka do ia karaia unai do ia vara totona?’

[Box on page 4]

EDIA HEKWARAHI

Tuari, ogogami, taravatu utua karadia, bona kara gagevadia bema idia noho, maino bona noho namona idia vara diba lasi. Vanegai, United Nations ese inai ripoti ia halasia.

Tuari: “Lagani 1989 bona 1992 padadiai tuari 82 idia vara. Idia 79 be sibodia edia bese edia, bona idia amo momo be edia tano besedia rua idia tuari heheni gaudia; idia lalodiai idia bero o idia mase taudia 10 10 amo 9 9 be tuari taudia lasi.”​—United Nations Department of Public Information (UNDPI)

Tuari kohudia: “ICRC [International Committee of the Red Cross] oreana ia gwau, kampani 95 tano 48 lalonai ese lagani ta ta iboudiai tuari taudia hamasea mainidia 5 milioni ia lao 10 milioni idia karaia.”​—United Nations High Commissioner for Refugees (UNHCR)

“Africa tanodia 18 lalonai maini 30 milioni be gabu idauidau ai idia noho.”​—UNHCR

Ogogami: “Tanobada hegegemadai, taunimanima ima ima amo ta ta​—anina be bilioni ta bona ma haida​—idia ogogami, bona lagani ta ta iboudiai taunimanima 13 milioni ia lao 18 milioni bamona be ogogami dainai idia mase.”​—UNDPI

Taravatu utua karadia: “Lagani 1980 amo ema bona hari, taravatu utua karadia, pulisi idia hamaorolaia karadia unai, be lagani ta ta iboudiai 5 pesen amo idia momo idia lao tanobada hegegemadai; USA lalonai, lagani ta ta iboudiai taravatu utua karadia 35 milioni idia karaia.”​—UNDPI

Kara gagevadia: “Gavamani bona bisinesi lalonai kara gagevadia be momo. Tano haida lalonai moni koikoilaia karadia dainai, unai tano taudia be lagani tamona ai idia davaria monidia amo 10 pesen ia boio.”​—UNDPI