Watchtower Educational Center ese Misinari Taudia Ia Siaia Lao
WATCHTOWER Bible School of Gilead be gabu idauidau ai kosi ia karadia vadaeni. Lagani 1943 bona 1960 padadiai, ruma ta South Lansing, New York, U.S.A. dekenai, klas 35 lalonai, stiuden taudia tano 95 amo ese hahediba idauna idia abia. Unai murinai, lagani 28 bamona lalonai, unai sikuli be hedikwota badana, Brooklyn, New York, dekenai idia karaia. Bena lagani 1988 amo ela bona 1995 ena matamana kahana, Gilead Sikuli be Wallkill, New York, dekenai idia karaia.
Unai lagani lalodiai unai sikuli ena kosi ma haida be tano idaudia ai idia karaia. Iena hahekau henunai hahediba kosidia toi be Mexico ai idia karaia, ima be Germany ai idia karaia, bona rua be India ai idia karaia; idia ta ta edia lata be pura 10. Lagani 1987 amo ema, Hesiai Gaukarana Hadibaia Sikulina ena kosi be tano 34 lalonai idia karaia. Pura 8 lalonai idia ese idia hegeregere uhaudia idia hadibaia. Gilead Sikuli ena gabu matamatana, Watchtower Educational Center, Patterson, New York, dekenai, klas namba 99 taudia be pura 20 lalonai idia sikuli. Unai kosi lalonai idia ese Baibel ibounai idia stadilaia, Iehova ena Witness taudia hari inai negai edia orea sivaraina idia herevalaia, bona tisa taudia ese misinari gaukarana idau tanodia ai idia sisibalaia idia dekenai.
September 2 ai, unai klas namba 99 taudia be edia kwalimu pepadia idia abia. Ruma matamatana ta ai, Watchtower Educational Center dekenai, idia be hora toi lalonai idia hebou. Unai ruma ia honudae. Taunimanima ma haida be Betele rumadia ai, Patterson, Wallkill dekenai, bona Brooklyn dekenai idia hebou, program ena hereva be telefon amo idia kamonaia. Unai be moale dinana, kosi idia haorea taudia bona edia varavara bona turadia edia, bona unai sikuli ena ruma matamatadia idia haginia taudia handred momo edia danu.
Hakaua Oreana tauna ta, Carey Barber ese ena hereva ia hamatamaia neganai, ia ese unuseniai idia karaia gaukarana ena anina ia herevalaia. Ia gwau: “Inai gabu be Dirava ena hereva hahedibalaia gabuna badana. Iniseniai idia karaia hahediba gaukarana ena bada ese matamana amo ema bona hari tanobada ai idia karaia hahediba gaukaradia idauidau edia bada do ia hereaia.” Ma ia gwau, hahine ena garana bona gaigai ena garana idia tuari heheni karana do idia habadaia momokani negana be kahirakahira. (Genese 3:15) Ia hahedinaraia, Dirava ena Hereva idia diba goevagoeva bona idia badinaia taudia sibodia mo be ia mai noho hisihisina badana negana ai do ia vara tuarina badana amo do idia roho mauri.
Ia gwau: “Hari ai karaia hahediba gaukarana ese Iehova ena orea taudia tanobada hegegemadai ia durua, lo taudia ai do idia lao bona Aonega Herevadia 1:1-4 ena hereva hegeregerena, aonega bona sisiba do idia diba, lalo-parara do idia diba, bona aonega, lalo-maoromaoro, hahemaoro goevagoeva, kara maoromaoro, bona laloa namonamo karana ia henia sisibana do idia abia dae totona.” Unai heduru lauma dalana ai ese ita ia naria namonamo!
Sikuli Taudia Idia Sisiba Henidia
Unai hereva murinai, hereva kwadogidia ima amo sikuli idia haorea taudia idia haroro henidia. Harold Jackson, guna Gilead Sikuli ai stiuden ia hadibadia to hari hedikwota ai Brooklyn dekenai ia gaukara tauna, ese klas taudia ia hamaorodia, ia gwau, “Emui Lalo-Namo Goevana Umui Dogoatao.” Lloyd Barry, lagani momo herea lalonai misinari gaukarana ia karaia vadaeni bona hari ia be Hakaua Oreana tauna ta, ese “Iehova Ena Hesiai Lao Henia mai Manau ida Dalana” ia herevalaia. Ia ese sikuli taudia ia hamaoroa, edia gabu matamatadia, bona idia ida misinari gaukarana do idia karaia taudia ma haida, bona kongregesen matamatadia, bona do idia gaukara tanodia ai idia noho taudia do idia manadalaia totona, do idia manau be mai anina bada.
Karl Adams, hari inai negai Gilead Sikuli gaukarana ia karaia tauna ta, ese inai hereva ia gwauraia: “Abidadama ese Oi Do Ia Hakaua, Dahaka Do Oi Karaia Totona?” Ia hamaorodia, namona be idia ese Israela taudia, edia noho tano gagaena ai idia maumauraia bona idia ura Aigupito do idia lou henia taudia, edia kara do idia tohotohoa lasi, to namona be Aberahamo ena kara do idia tohotohoa; ia ura lasi Uru, Kaldea taudia edia hanua ta, do ia lou henia, to ia ese Dirava ena Basileia ia naria, hekwakwanai do ia haoredia totona. (Esodo 16:2, 3; Heberu 11:10, 15, 16) Ulysses Glass, sikuli ena rejistra tauna, ese ena hereva ladana “Emu Hahenamo Oi Lalodia” lalonai, Asapa sivaraina Salamo 73 dekenai ia gaukaralaia, sikuli taudia sisiba henidia totona. Bona Albert Schroeder, Hakaua Oreana ena Hadibaia Komiti tauna ta, ena hereva ena sinado be “Iehova ese Ia Henia.” Ia gwau Iehova ese ia henia gauna ta be Gilead Sikuli, bona ia amo haroro gaukarana badana bona taunimanima be hahediba taudia ai halaoa gaukarana badana ia karaia.
Gabeai, Watch Tower Society ena presiden, Milton Henschel, ese “Tauanina Tamona Ena Kahana Taudia” herevana ia gwauraia neganai, hebou taudia idia hakala namonamo. Ia ese Roma karoa 12 ia duahia hedinarai bona ia herevalaia momo. Ia gwauraia herevana ta be inai: “Namona be ita laloatao iseda tadikaka kongregesen lalonai be iseda turana momokani.” Ma ia gwau: “Namona be nega ibounai ita laloatao ita ta ta ibounai be Iehova ena, bona namo lasi iseda tadikaka ita maumauraia eiava ita gwau henidia, to namona be nega ibounai ita durudia. Keristani kongregesen be lauma dalana ai ia lalo-tamona dalana ita naria neganai, ita be siboda ita durua.” Ia hahedinaraia, misinari rumadia ai aniani hegaegaelaia neganai unai bamona heduru be edena bamona do idia hahedinaraia diba, badina be reana misinari iboudiai be aniani tamona idia ania diba lasi. Ma ia hamaorodia, edia Keristani bamodia ogogamidia ida haroro gaukarana do idia karaia neganai, namo lasi do idia gwau henidia, to namona be do idia durudia. Tadikaka Henschel ia gwau, bema ita heduru heheni bona ita hagoadaia heheni momokani, “Iehova be unai dainai ita do ia lalokau henia.” Unai be sisiba namo hereana, sibodia edia tano do idia rakatania bona idau tanodia ai do idia gaukara misinari taudia totona!
Klas Taudia Dibaia Namonamo
Klas namba 99 ena stiuden taudia 48 edia mauri laganidia edia averes be 32, bona ful-taim hesiai gaukarana idia karaia laganidia edia averes be 11 bamona.
Edia kosi haorea program lalonai, tadikaka ese idia haida ia henanadai henidia, unai amo hebou taudia ese unai sikuli taudia haida idia dibaia diba. Nikki Liebl, United States hahinena, bona Simon Bolton, England tauna, ese edia ekspiriens idia herevalaia. Iehova idia abidadama henia, idia laloa edia tauanina durua gaudia do ia henidia, to gau haida ese edia abidadama ia tohoa. Ful-taim haroro gaukarana idia tahua guna lalonai, Iehova ena heduru idia davaria.
Isabelle Kazan ena gado korikori be France gado; ia gwau Arabia gadona ia dibaia, iena tano ai unai gado idia gadolaia taudia do ia haroro henidia totona. Lagani 1987 ai ia haroro henidia matamaia neganai, Paris lalonai, grup maragina tamona lalonai, Arabia gadona idia gadolaia tadikakadia hani, bona ia bona ma taihu ta be idia noho, idia ruaosi ese unai gado idia dibaia noho. (Idia hekwarahi bada. Pura ta ta iboudiai hora 8 lalonai edia Gima Kohorona idia hegaegaelaia, hebou dekenai haere do idia henia diba totona.) Edia hekwarahi be mai anina, a? Hari, France lalonai, Arabia gadona gadolaia Witness taudia edia sekit be ima. Stiuden tauna ma ta, Miko Puro, ia gwau sikuli dekenai France gado ia dibaia, bena unai ese ia durua, iena tano, Finland, dekenai Africa amo idia heau mauri taudia ia haroro henidia totona, bona do ia durua, ena misinari gaukara gabuna, Benin, ai danu. Bonny Bowes ese ena hekwarahi, France gado manadalaia hekwarahina, ia herevalaia. Unai gado ia dibaia, Quebec, Canada ai, do ia haroro namonamo totona. Bona Bjarki Rasmussen, Denmark tauna ta, ese ia bona ena hahine edia ekspiriens haida, lagani momo lalodiai Faeroe Motumotudia ai idia haroro neganai idia abia gaudia, ia herevalaia. Oibe, unai misinari taudia matamatadia be ful-taim haroro gaukarana idia manadalaia vadaeni taudia.
Kosi idia haorea taudia idia hamaoroa do idia siaidia lao tano 19 dekenai—Africa ai, Central bona South America ai, Eastern Europe ai, bona Orient ai. Klas gunadia idia haorea taudia be tano 200 mai kahana lalodiai idia gaukara vadaeni. Idia momo be edia gaukara gabudia ai idia do gaukara noho. Inai misinari taudia matamatadia be idia ida Basileia harorolaia gaukarana do idia habadaia, ela bona tanobada ena kahana ibounai dekenai.—Kara 1:8.
[Pictures on page 25]
Watchtower Educational Center ena sikuli daiutuna lalonai idia abia laulaudia
[Picture on page 26]
Watchtower Bible School of Gilead Ena Klas Namba 99
Henu listana ai, laini edia namba be vairana kahana amo ela bona murina kahana, bona laini ta ta ai idia gini taudia edia ladana be lauri kahana amo ela bona idiba kahana.
(1) Heffey, S.; Riley, E.; Mortensen, D.; Honable, A.; Bolton, J.; Poole, J.; Siimes, G.; Sousa, L. (2) Pashnitski, B.; Shepherd, D.; Pashnitski, W.; Järvinen, J.; Paulsen, K.; Rasmussen, E.; Schewe, C.; Olsson, L. (3) Paulsen, E.; Samsel, T.; Bowes, B.; Harris, E.; Kazan, I.; Liebl, N.; Sousa, P.; Puro, J. (4) Lager, K.; Lager, V.; Golden, K.; Bolton, S.; Johnson, M.; Johnson, S.; Liebl, A.; Rasmussen, B. (5) Harris, D.; Samsel, W.; Schewe, O.; Heffey, R.; Kazan, L.; Riley, T.; Järvinen, O.; Puro, M. (6) Mortensen, D.; Golden, R.; Honable, L.; Shepherd, M.; Bowes, R.; Siimes, T.; Poole, E.; Olsson, J.
[Pictures on page 27]
Edia gaukara gabudia ai idia do noho taudia: (lauri kahana) Charles Leathco bona ena adavana, Fern, Gilead ena klas ginigunana bona klas namba 6 taudia, Brazil ai; (henuai) Martha Hess, Gilead ena klas namba 7 hahinena, Japan ai