Gaukara Badana Ena Iduara Dekenai Idia Gini

“GAUKARA helulu lalohadaina ia noho lasi. Iboudiai idia ura ma iboudiai do idia kwalimu.” Unai hereva amo Richard bona Lusia ese Watchtower Bible School of Gilead ena klas namba 105 dekenai idia noho stiuden taudia idia herevalaia. Ma idia gwau: “Ai iboudiai ai idau momokani, to ai dekenai, stiuden taudia ta ta be dava bada gaudia bamona.” Edia sikuli turana, Lowell, be unai bamona ia laloa danu bona ma ia gwau: “Ai ibounai be idau dainai, ai ta ta ai ura henia bada.”

Momokani, September 12, 1998 ai, edia sikuli idia haorea klas taudia be idauidau. Stiuden taudia haida be painia gaukara idia karaia, Kingdom pablisa taudia be momo lasi gabudia ai; ma haida be edia noho gabuna kahirakahira hesiai gaukara idia karaia mai edia kamonai ida. Idia haida, Mats bona Rose-Marie bamona, be sikuli dekenai idia do mai lasi neganai, nega daudau idia hekwarahi bada English gado idia dibaia namonamo totona. Stiuden taudia momo be idia maragi negana amo misinari gaukara idia laloa. Tadikaka ta bona ena adavana be nega 12 aplikesen idia atoa; klas namba 105 lalonai idia vareai totona boiboi pepana idia abia neganai idia moale dikadika!

Pura 20 lalonai diba idia abia, unai nega ia heau haraga. Edia riviu pepana ginigabena bona edia hereva ginigabena idia henia negana ia mai haraga, bona sikuli haorea program ena dina ia ginidae.

Program ena seamani, Albert Schroeder, Iehova ena Witness taudia edia Hakaua Oreana tauna ta, ese klas taudia ia hadibaia lou idia be “Baibel hadibaia gaukarana badana ena iduara dekenai idia gini,” guna Gilead sikuli dekenai idia lao taudia 7,000 do idia bamoa. Ia gwau, siahu negana lalonai, stiuden taudia ese moale idauna idia abia, idia be nega daudau misinari gaukara idia karaia taudia ida idia hedavari, badina unai misinari taudia be intenesenel hebouhebou dekenai idia lao bona hedikwota idia vadivadi danu.

Bena Tadikaka Schroeder ese Max Larson, Bethel Operations Committee tauna ta, ia boiria. Ena hereva ena sinado be “Mauri Hanaihanai Dekenai Ia Hakaua Lao Edukeisen.” Tadikaka Larson ese Aonega Herevadia 1:5 ena hereva ia gwauraia, ia gwau: “Inai aonega herevadia danu ese, aonega taudia idia durua diba, bona sikuli bada taudia edia diba idia habadaia diba.” Diba be gau badana, anina idia havaraia misinari taudia ai idia lao totona. Edia gaukara idia diba namonamo taudia be king taudia edia vairanai idia gini. (Aonega Herevadia 22:29) Hua ima lalonai diba idia abia murinai, stiuden taudia idia hegeregere King badadia, Iehova Dirava bona Keriso Iesu, edia gaukara idia karaia.

David Olson, Service Department tauna ta, ena hereva ena sinado be “Iehova Ena Kudouna Umui Hamoalea.” Ia henanadai: “Goevadae lasi taudia be dahaka idia karaia diba Dirava ena kudouna idia hamoalea totona?” Haere be dahaka? Idia be mai edia abidadama, kamonai, bona moale ida ia idia badinaia diba. Iehova ia ura ena taunimanima ese ia idia hesiai henia gaukarana idia moalelaia. Mai eda moale ida Dirava ena ura ita karaia neganai, ena kudouna ita hamoalea. (Aonega Herevadia 27:11) Tadikaka Olson ese Gilead klas namba 104 taudia rua, misinari tadikaka bona ena adavana, edia revareva ia duahia. Edia gaukara matamatana idia moalelaia, a? Edia kongregesen idia herevalaia, idia gwau: “Pablisa taudia be 140 bona hebou dekenai idia mai taudia edia averes be 250 ia lao 300. Haroro gaukara be namo herea. Lau be stadi hani lau hakaua bona egu adavana be stadi hani ia hakaua, bona idia haida be hebou idia lao henia vadaeni.”

Lyman Swingle, Hakaua Oreana tauna ta, ena hereva ena sinado be “Namona be Umui Abia Hahenamo Umui Lalodia Namonamo.” Gilead dekenai diba idia abia dainai, stiuden taudia ese hahenamo momo idia abia. Unai edukeisen ese stiuden taudia ia durua edia diba idia habadaia, Iehova ena orea idia laloa bada, bona kara namodia, hegeregere manau karana, idia habadaia totona. Tadikaka Swingle ia gwau: “Iniseniai umui mai, ma haida ese umui idia hadibaia bona umui kamonai neganai, umui be manau karana umui dibaia,” bena ma ia gwau: “Hari gabu umui rakatania bona umui hegeregere momokani Iehova hanamoa karana umui karaia.”

Daniel Sydlik, Hakaua Orea tauna ma ta, ena hereva ena sinado be “Emui Moale be Bada​—Badina be Dahaka Umui Lalo-Hekwarahi?” Ia hagoadaia, hekwakwanai idia vara neganai, Baibel ena hakaua herevadia idia tahua. Mataio karoa 6 ena siri haida ia herevalaia bona unai amo Tadikaka Sydlik ia hahedinaraia edena bamona unai idia karaia diba. Bema abidadama ia manoka, reana gau maragidia, hegeregere aniani bona dabua, dainai ita lalo-hekwarahi. To, Iehova ia diba dahaka gaudia ita abia be namo. (Mataio 6:​25, 30) Lalo-hekwarahi ese dina ta ta edia hekwarahi ia habadaia. (Mataio 6:​34) To danu, gau haida ita laloa hegaegae be namo. (Luka 14:28 itaia.) Tadikaka Sydlik ia gwau: “Iesu ese mai aonega ida vaira negana ita laloa karana ia gwauraia dika lasi, to mai aonega lasi ida vaira negana ita lalo-hekwarahilaia karana ia gwauraia dika.” Ma ia gwau: “Gaukara ese lalo-hekwarahi ia hanamoa. Bema gau ta ita lalo-hekwarahilaia, namona be hereva momokani ita herevalaia matamaia.”

Hadibaia Taudia Edia Bamahuta Sisiba

Unai murinai, Gilead sikuli ena hadibaia taudia toi ese hereva idia henia. Karl Adams ese hereva ia henia guna, ena sinado be “Dahaka Oi Henia Lou Iehova Dekenai?” Ena hereva be Salamo 116 amo, reana Iesu be ia do mase lasi hanuaboina ai unai ane ia abia. (Mataio 26:30) Iesu be dahaka ia laloa inai hereva ia gwauraia neganai: “Lohiabada dekenai dahaka do lau henia, iena hariharibada ibounai lau dekenai ena davana”? (Salamo 116:12) Reana Iehova ese ia dekenai ia henia goevadae tauanina ia laloa. (Heberu 10:5) Dina ta murinai, unai tauanina do ia henia boubou gauna bamona, unai amo ena lalokau ena bada ia hamomokania. Idia hanaia hua ima lalonai, klas namba 105 taudia ese Iehova ena namo idia mamia. Vadaeni, edia misinari gaukara lalonai do idia gaukara goadagoada karana amo, edia lalokau Dirava dekenai do idia hahedinaraia.

Mark Noumair, hereva ia henia Gilead hadibaia tauna iharuana, ese stiuden taudia ia sisiba henia, ia gwau “Kara Maoro Umui Karaia Noho.” Iosepa be hesiai tauna bamona Aigupito dekenai idia hoihoilaia murinai, lagani 13 lalonai idia maoro lasi karadia ia haheaukalaia. Ma haida edia kerere dainai, Dirava hesiai henia karana ia rakatania, a? Lasi, ia ese kara maoro ia karaia noho. Bena, Dirava ese ia abia hidi negana ai, unai hahetoho amo ia ese Iosepa ia ruhaia. Karaharaga, dibura ia noholaia maurina ia rakatania bona king ena ruma dekenai ia noho matamaia. (Genese, karoa 37-​50) Hadibaia tauna ese ena stiuden taudia ia nanadaia: “Bema emui misinari gaukarana lalonai umui laloa gaudia do umui davaria lasi, gaukara do umui hadokoa, a? Do umui dara-doko bona gaukara do umui rakatania, a? Eiava do umui haheauka, Iosepa ia haheauka bamona?”

Dokonai, Gilead Sikuli ena registra tauna, Wallace Liverance, ese klas taudia ida ia herevahereva namonamo. Hereva ena sinado be “Pavapava Bona Basileia Umui Harorolaia.” Stiuden taudia haida ese ruma-ta-ruma-ta, sitoa-ta-sitoa-ta, bona dala dekenai idia haroro neganai idia abia ekspiriens idia gwauraia. Ma haida idia hahedinaraia edena dala ai gado idaudia taudia idia haroro henia. Bona ma haida ese idia hahedinaraia edena dala ai tomadiho idaudia taudia idia haroro henia. Sikuli idia haorea taudia iboudiai idia ura misinari hesiai gaukara badana do idia karaia.

Nega Daudau Misinari Gaukara Idia Karaia Taudia Idia Moale

Unai murinai idia karaia hereva, ena sinado be “Misinari Gaukara amo Idia Abia Moalena,” be Robert Wallen ese ia henia. Unai hereva lalonai hedikwota dekenai idia gaukara taudia hani, vanegai sibona, nega daudau lalonai misinari gaukara idia karaia taudia ida hebamo namona idia moalelaia taudia, ia henanadai henia. Unai misinari taudia idia gwau gado matamata idia dibaia, mauri dalana idauna idia abia dae, eiava guna idia manadalaia lasi siahu idia manadalaia be auka. Danu, nega haida edia hanua idia laloa dainai ia vara lalohisihisi idia haheaukalaia. Nega haida idia gorere. To unai gau iboudiai lalonai, misinari taudia idia lalo-goada noho, bona edia haheauka amo hahenamo idia abidia. Haida be taunimanima momo herea idia durua Iehova idia dibaia totona. Ma haida be dala idauidau ai heduru idia henia, edia tano dekenai Basileia haroro gaukarana ia bada ia lao totona.

Hereva ginigabena ia henia tadikakana be Carey Barber, Hakaua Oreana tauna ta. Ia ese “Dirava Ia Gwauraia Mauri Dalana” hebouhebouna ena program ena kahana badadia ia riviulaia. Helai taudia ia nanadaia: “Hebouhebou ena program ese oiemu turana karana Iehova ida be edena bamona ia durua?” Hereva henia tauna ese Dirava ena dala ita badinaia karana amo ita abia hahenamo be tanobada ena dala idia badinaia taudia idia davaria dika gaudia ida ia hahegeregerea. Ia ese Mose ena kerere Meriba dekenai ia herevalaia bona ia sisiba henia, ia gwau: “Ena be tau ta ese lagani momo lalonai Iehova ia hesiai henia mai ena kamonai ida, to Iehova ena taravatu maorona ia hadikaia karana maragina danu Ia ese ia laloa.” (Numera 20:​2-​13) Namona be gabu ibounai dekenai Dirava ena hesiai taudia ese edia hesiai gaukara ena hahenamo do idia dogoatao auka masemase!

Nega ia ginidae stiuden taudia ese edia kosi haorea pepadia idia abia. Bena, klas tauna ta ese stiuden taudia idia abia dibana dainai edia tanikiu revarevana ia duahia. Ane ginigabena bona mai kudouna ibounai ida idia henia guriguri murinai, kosi haorea program ia ore. To, klas namba 105 taudia dekenai, unai be matamana negana sibona, badina unai misinari matamatadia be “gaukara badana ena iduara dekenai idia gini.”

[Box on page 23]

Klas Taudia

Edia tano idauidau: 9

Idia lao henia tanodia idauidau: 17

Klas taudia iboudiai: 48

Tatau mai edia adavadia: 24

Edia mauri lagani ena averes: 33

Lagani hida hereva momokani lalonai, edia averes: 16

Lagani hida ful-taim hesiai gaukara idia karaia, edia averes: 12

[Box on page 24]

Idia ese Ful-Taim Hesiai Gaukara Idia Abia Hidi

Klas namba 105 tauna ta, Ben, ia gwau: “Lau matamata neganai, painia gaukara lau laloa lasi.” Ma ia gwau: “Lau laloa, diba idauna bona mauri dala idauna taudia sibona ese painia gaukara idia karaia diba. To haroro gaukara lau ura henia matamaia. Bena dina ta lau lalo-parara, ta be painia gaukara ia karaia ena anina be haroro gaukara ia karaia badabada. Unai negana ai lau diba painia gaukara do lau karaia diba.”

Lusia ia gwau: “Emai ruma dekenai ful-taim hesiai gaukara taudia ai laloa bada.” Misinari taudia idia vadivadi neganai ena kongregesen taudia idia moale bada karana ia laloa lou. Ia gwau: “Lau tubu neganai, ai ibounai ai abia dae ful-taim hesiai gaukara do lau karaia.”

Theodis ena mauri lagani be 15 neganai, ena sinana ia mase. Ia gwau: “Unai negana ai, kongregesen taudia ese lau idia durua bada, unai dainai sibona lau nanadaia, ‘Edena kara amo lau hahedinaraia diba edia kara lau laloa bada?’ ” Unai dainai ful-taim hesiai gaukara bona hari misinari gaukara ia karaia matamaia.

[Picture on page 25]

Watchtower Bible School of Gilead Ena Klas Namba 105

Henuna lista ai, laini edia namba be vairana kahana amo ia daekau murina kahana, bona laini ta ta ai idia gini taudia edia ladana be laurina kahana amo ela bona idibana kahana

(1) Sampson, M.; Brown, I.; Heggli, G.; Abuyen, E.; Desbois, M.; Pourthié, P. (2) Kassam, G.; Lindberg, R.; Dapuzzo, A.; Taylor, C.; LeFevre, K.; Walker, S. (3) Baker, L.; Pellas, M.; Woggon, E.; Böhne, C.; Asplund, J.; Haile, J. (4) Pourthié, T.; Whittaker, J.; Palmer, L.; Norton, S.; Gering, M.; Haile, W. (5) Walker, J.; Böhne, A.; Groenveld, C.; Washington, M.; Whittaker, D.; Abuyen, J. (6) Gering, W.; Washington, K.; Pellas, M.; Desbois, R.; Heggli, T.; Asplund, Å. (7) Woggon, B.; LeFevre, R.; Taylor, L.; Brown, T.; Groenveld, R.; Palmer, R. (8) Norton, P.; Sampson, T.; Baker, C.; Lindberg, M.; Kassam, M.; Dapuzzo, M.