Dahaka Dainai Nega be Bada Lasi?

NEGA. Reana unai hereva ena anina ita gwauraia hedinarai be auka, to ita diba toana be hanaihanai iseda nega be bada lasi. Ita diba ia hanaia haraga. Oibe, nega momo ita maumau, “Nega ia heau haraga.”

To, reana England ena ane karaia tauna Austin Dobson ena hereva ia maoro, ia be lagani 1877 ai, ia gwau: “Oi gwau nega ia heau, a? To lasi! Madi, Nega ia noho, to ita lao.” Lagani 1921 ai Dobson ia mase bona hari ita gwau diba kahirakahira lagani 80 ia lao vadaeni; to nega ia do noho.

Nega Bada Ia Noho

Baibel ese taunimanima ia Havaraia Tauna ia herevalaia, ia gwau: “Oi be nega ibounai, hanaihanai, Dirava oi noho, idaunegai bona gabeai danu. Ororo do oi karaia lasi neganai, tanobada bona motumotu oi do karaia lasi neganai, oi be unai bamona, bona unai bamona do oi noho ela bona hanaihanai.” (Salamo 90:⁠2) Eiava The New Jerusalem Bible ia hereva bamona, “nega hanaihanai amo ela bona nega hanaihanai oi be Dirava.” Unai dainai, nega be do ia noho Dirava ia noho hegeregerena​—⁠ela bona hanaihanai!

Dirava be nega hanaihanai do ia gaukaralaia, to taunimanima be idau, Baibel ese idia ia herevalaia, ia gwau: “Oiemu badu ese aiemai tanobada maurina ia hakwadogia noho. Momokani, aiemai mauri ia doko haraga, hahodi tamona bamona. Aiemai mauri lagani be 70 sibona. Bema ai be goada neganai sedira lagani 80 do ai abia, to inai lagani ibounai lalonai, hekwarahi bona lalohisihisi ai abia noho. Aiemai mauri be idia ore haraga, vadaeni ai boio.”​—⁠Salamo 90:​9, 10.

Dahaka dainai hari mauri ia kwadogi, ena be Baibel ese ia hahedinaraia goevagoeva Dirava ena ura be taunimanima do idia mauri hanaihanai. (Genese 1:​27, 28; Salamo 37:⁠29) Dahaka dainai taunimanima edia mauri laganidia be Dirava ena ura hegeregerena lasi, to nega namodia lalonai danu idia momo herea edia mauri dinadia be 30,000 idia hanaia lasi? Dahaka dainai taunimanima edia nega be bada lasi? Unai dika be dahaka ese eiava daika ese ia havaraia? Baibel ese haere namona ia hahedinaraia goevagoeva.a

Nega Ia Ore Haraga

Buruka taudia idia hamomokania diba, vanegai laganidia lalonai iseda mauri dalana ia haraga sisina. Toretore hahine ta, Dr. Sybille Fritsch, ia gwau idia hanaia lagani 200 lalonai, pura ta ta ai iseda gaukara horadia be 80 amo idia diho lao 38 dekenai, “to unai ese iseda maumau herevadia ia haorea lasi.” Ia hahedinaraia ita maumau noho: “Nega be lasi; nega be moni bamona; ita ura bada nega ita abia hodahoda ita ura abia hegeregerena; mauri lalonai ita bisi momokani.”

Taunimanima ese idia havaraia gaudia matamatadia ese uru gunadia idia laloa lasi daladia idia kehoa. To, kara momo ita karaia diba daladia idia noho neganai, nega ia noho lasi ita karaia totona, unai ese iseda hemami ia hadikaia. Hari, tanobada ena kahana momo dekenai, taunimanima ese sediual aukana idia badinaia, gaukara ta haorea ena nega amo gaukara ma ta haorea ena nega dekenai ita hanaia. Daba 7:00 ai Tamana be gaukara dekenai ia lao, daba 8:30 ai Sinana be natudia ia hakaua sikuli dekenai, daba 9:40 ai Tubuna tau be doketa dekenai ia lao, bona adorahi 7:30 ai mai anina bada hebouna dekenai ita lao. Gaukara ta amo ma gaukara ta dekenai ita heau lalonai, ita be nega bada lasi laga-ani totona. Bona ita ese dina ta ta ena hekwarahi, ita heau lao heau mai karana, ita maumauraia.

Iseda Nega Sibona Ia Kwadogi Lasi

Dirava ena Inai Tauna, ena koikoi karana amo taunimanima edia mauri ia hakwadogia tauna, Satani Diabolo, be sibona ena gwau-edeede karana dainai dika ia davaria. (Galatia 6:​7, 8 itaia.) Apokalupo 12:12 ese guba dekenai Mesia Basileiana ena vara negana ia herevalaia murinai, ita dekenai helaro ia henia, ia gwau: “Guba e, bona guba lalonai noho taudia e! Unai kara dainai do umui moale bada! To tanobada bona davara, madi o, nega dika bada do umui davaria! Badina be Satani ese umui dekenai ia lao vadaeni, mai ena badu dikadika. Ia badu, badina ia diba iena nega be ia kwadogi sibona.”

Baibel negadia duahia dalana maorona bona Baibel ena peroveta herevadia idia guguru dalana ese idia hahedinaraia hari ita be unai ‘nega kwadogina’ ena dokona negana lalonai ita noho. Ita moale bada, badina ita diba Satani ena nega be kahirakahira do ia ore! Ia do idia guia murinai, kamonai taudia be idia namo idia lao ela bona do idia goevadae, bona matamanai Iehova ia ura idia abia mauri hanaihanai do idia abia. (Apokalupo 21:​1-4) Unai negana lalonai, nega be lasi dainai do ita hekwarahi lasi.

Mauri hanaihanai​—⁠do oi mauri noho ela bona hanaihanai​—⁠ena anina oi laloa diba, a? Nega be lasi dainai oi karaia diba lasi gaudia ese oi do idia hahekwarahia lasi. Bema oi ura ma nega oi abia, kerukeru, eiava pura vaira, eiava lagani vaira do idia noho​—⁠oibe, nega hanaihanai be oiemu vairanai do ia noho!

Hari Aonega Dalanai Iseda Nega Ita Gaukaralaia

Satani ia lalo-parara taunimanima ia veria diba negana be ia ore gwauraia dainai, ia ese gau idauidau momo ia havaraia, bena taunimanima be nega lasi Dirava ena Basileia, ia lohia vadaeni gauna, ena sivarai namona idia kamonai totona. Unai dainai, namona be Dirava ia henia sisiba ita badinaia, ia gwau: “Umui emui kara do umui naria namonamo. Aonega taudia bamona do umui noho, kavakava taudia bamona lasi. . . . Emui nega do umui haorea kava lasi, badina hari nega be nega dikana. Unai dainai do umui kavakava lasi, to Lohiabada ena ura gaudia sibona do umui tahua.”​—⁠Efeso 5:​15-17.

Gau badana be iseda nega be aonega dalanai anina bada gaudia dekenai ita gaukaralaia, to do ia noho daudau moalena idia havaraia lasi gaudia dekenai iseda nega ita negea kava lasi! Namona be Mose bamona ita laloa, ia be mai ena kudouna ibounai ida Iehova ia noia, ia gwau: “Aiemai mauri ena kwadogi mani ai dekenai do oi hadibaia, bona unai dekena amo aonega do ai davaria.”​—⁠Salamo 90:⁠12.

Momokani, hari inai negai taunimanima ibounai idia bisi bada. To, Iehova ena Witness taudia ese oi idia hagoadaia oiemu nega namona oi gaukaralaia Dirava ia ura oi karaia gaudia oi dibaia totona bona unai amo iena Basileia henunai mauri hanaihanai do oi abia diba. Bema pura ta ta hora tamona lalonai Baibel oi stadilaia namonamo, ‘Iehova ia ura gaudia oi tahua’ totona, reana oi ese inai hereva idia guguru negana do oi itaia: “Kara dika do oi rakatania, kara namo do oi karaia, vadaeni tano dekenai do oi noho namo hanaihanai. Kara maoromaoro taudia ese, Dirava ia henidia tano dekenai do idia noho ela bona hanaihanai.”​—⁠Salamo 37:​27, 29.

[Footnote]