Mauri Sivaraina

Iehova ese Ita Dekenai Haheauka Bona Hesiku Lasi Karana Ia Hadibaia

ARISTOTELIS APOSTOLIDIS ESE IA SIVARAILAIA

Caucasus Ororodia edia not kahana ena ororo maragidia dekenai Pyatigorsk ia noho, ia be ena ranu lohilohi gabudia bona keru bada lasi dainai momo idia diba Russia ena siti ta. Lagani 1929 ai, unuseniai idia heau mauri Greek taudia dekenai lau vara. Lagani 10 idia lao murinai, Stalin ena lalohadai idia abia dae taudia ese idia karaia taunimanima hadikaia karadia, gari bada, bona bese idauna taudia hamasea ore karadia idia ore murinai, heau mauri taudia ai ai lao lou, badina ai idia doria Greece dekenai ai lao totona.

PIRAIÉVS, Greece dekenai, ai lao murinai, inai hereva “heau mauri taudia” ena anina ai dekenai be ia idau momokani. Ai mamia momokani ai be unai gabu taudia lasi. Ena be egu kakana bona lau emai ladana be taunimanima idia diba momo Greek aonega taudia rua edia ladana hegeregerena, Socrates bona Aristotle, to nega momo unai ladadia idia gaukaralaia lasi. Taunimanima iboudiai be ai idia gwauraia Russia taudia maragidia.

Tanobada Tuarina Iharuana ia vara bona nega sisina murinai, egu lalokau sinana ia mase. Ia be emai ruma ena badina bamona, bona ena mase be gau dikana ta. Nega sisina daudau ia gorere dainai, ruma gaukara momo karaia totona lau ia hadibaia. Gabeai egu mauri lalonai lau dibaia gaudia lau gaukaralaia.

Tuari Bona Ai Idia Ruhaia Negana

Tuari, Nazi taudia ese tano idia biagua negana, bona America bona ia idia bamoa tanodia edia tuari taudia ese hanaihanai idia negea bomu dainai, dina ta ta be dina ginigabena bamona. Ogogami, hitolo, bona mase be idia bada idia lao. Egu mauri lagani be 11 neganai, ai toi durua totona tamana ida lau gaukara goada matamaia. Greek gado be sisina sibona lau diba dainai, bona tuari ia vara, bona tuari murinai idia vara gaudia dainai, lau sikuli namonamo lasi.

October 1944 lalonai, Germany taudia ese Greece idia biagua negana ia ore. Daudau lasi murinai, Iehova ena Witnes taudia lau davaria. Baibel ena helaro namona Dirava ena Basileia henunai ese helaro lasi bona hisihisi negana lalonai egu kudouna ia hamarerea. (Salamo 37:29) Dirava ese maino tanobada ai noho hanaihanai maurina ia gwauhamatalaia bona unai ese egu lalona ia hanamoa momokani. (Isaia 9:⁠7) Lagani 1946 ai, egu tamana bona lau be Iehova dekenai emai gwauhamata ai hamomokania bona bapatiso ai abia.

Murina lagani lalonai, Piraiévs dekenai idia haginia kongregesen iharuana dekenai egu gaukara ginigunana lau abia, unai be magasin gaukara hegaegaelaia tauna (gabeai magasin naria tauna) ena gaukara. Emai teritori ena bada be Piraiévs amo ia diho lao Eleusis dekenai bona ena daudau be kilomita 50 bamona. Unai neganai, Dirava ese lauma amo ia horoa Keristani taudia momo be unai kongregesen lalonai idia gaukara. Idia danu lau gaukara bona idia amo diba lau abia dainai lau moale bada. Hanaihanai edia haroro gaukara ai idia davaria hekwakwanai badadia ena sivarai idia gwauraia dainai edia hebamo lau moalelaia. Edia mauri sivaraina ese ia hahedinaraia, mai abidadama ida Iehova ita hesiai henia totona ita haheauka bona ita hesiku lasi be mai anina bada. (Kara 14:22) Lau moale bada badina unai gabu dekenai hari Iehova ena Witnes taudia edia kongregesen be 50 ia hanaia!

Ia Vara Kava Hekwakwanai Ta

Gabeai, Patras siti dekenai ia noho matamata Keristani hahine goadana namona ladana Eleni lau diba namonamo. Lagani 1952 ia do ore lasi neganai ai maoheni. To, hua haida murinai, Eleni ia gorere bada. Doketa taudia idia davaria iena harana lalonai tiuma ta ia noho bona ia dika herea. Maoromaoro opereisen ia abia be namo. Ai hekwarahi bada murinai Athens dekenai doketa ta ai davaria bona​​—⁠ena be unai neganai dala momo idia noho lasi​​—⁠ia ura ai abia dae hahediba herevadia ia badinaia bona rara lasi opereisen ia karaia. (Levitiko 17:​10-​14; Kara 15:​28, 29) Opereisen murinai, doketa taudia idia laloa reana lau adavaia gwauraia kekeni ena vaira noho maurina do ia namo, to idia gwau unai gorere do ia dika ia lao lou diba danu.

Unai dainai dahaka do lau karaia be namo? Iena mauri ia idau dainai, egu gwauhamata lau makohia bona maduna lasi tauna bamona do lau noho, eiava? Lasi! Lau ura egu oibe ena anina be oibe sibona, badina ai maoheni neganai, lau gwauhamata henia vadaeni. (Mataio 5:​37) Lalohadai ma ta lau abia lasi. Eleni ena kakana ese ia naria bona ia namo sisina, bona December 1954 lalonai ai headava.

Lagani toi murinai, Eleni ia gorere lou, bona unai doketa tamona ese opereisen ma ta ia karaia. Hari tiuma kokia momokani totona harana ena lalona momokani dekenai ia gaukara. Unai dainai, egu adavana ena tauanina ena kahana ta ia mase bona ia herevahereva diba namonamo lasi. Hari ai ruaosi ai davaria hekwakwanai matamatadia idia auka momokani. Egu adavana dekenai gaukara maragidia danu be hekwakwanai badadia bamona. Iena gorere ia bada ia lao dainai, emai dina ta ta gaukarana ai haidaua bada be gau badana. Unai ibounai lalonai, haheauka bona hesiku lasi karadia be mai anina bada.

Egu sinana amo lau dibaia gaukara idauidau be hari lau dekenai mai anina bada. Aniani karaia gaudia ibounai be daba momokani ibounai dekenai lau hegaegaelaia bona Eleni ese ia nadua. Nega momo vadivadi taudia ai boiria, idia be ful-taim hesiai gaukara idia karaia taudia, emai Baibel stadi taudia, bona kongregesen dekenai idia noho ogogami tadikaka bona taihu. Idia ibounai idia gwau unai aniani ena mamina be namo herea! Emai ruma ia namo bona miro lasi totona Eleni bona lau be ruma gaukara ai karaia hebou. Lagani 30 unai bamona ai hekwarahi noho.

Ia Gorere to Ena Ura Ia Bada

Lau bona ma haida be ai itaia egu adavana ena lalokau Iehova dekenai bona ena ura bada ena hesiai gaukara dekenai be gau ta ese ia hamaragia diba lasi neganai, unai ese emai kudouna ia hamarerea. Gabeai, Eleni ia hekwarahi loulou dainai, ia hereva sisina diba. Ia ura bada Baibel amo sivarai namona be dala dekenai idia loaloa taudia dekenai ia herevalaia. Bisinesi gaukara totona lau lao neganai, ia lau abia lao danu bona motuka be hanaihanai taunimanima idia raka gabuna dekenai lau atoa. Motuka ena iduara ia kehoa bona idia raka hanai taudia ia boiria, Gima Kohorona bona Awake! idia abia totona! Nega ta ai, hora rua lalonai kopi 80 ia henia. Kongregesen dekenai idia noho magasin gunadia be nega momo ia haorea. Eleni be hanaihanai dala ma haida ai ia haroro danu.

Egu adavana ena gorere laganidia lalonai, hanaihanai hebou dekenai lau ida ia mai. Hebouhebou badana eiava maragina ta ia reaia lasi, herevana Greece dekenai Iehova ena Witnes taudia idia dagedage henia dainai gabu daudau dekenai ai lao danu. Ena be gau haida ia karaia diba lasi, to mai moale ida Austria, Germany, Cyprus, bona tano ma haida ena hebouhebou dekenai ia lao. Iehova ena hesiai gaukara lalonai maduna ma haida lau abia neganai nega haida Eleni dekenai unai be ia auka, to unai neganai danu ia maumau lasi bona ia totona lau amo gau momo ia noia lasi.

Unai hekwakwanai be lau dekenai nega daudau lalonai haheauka bona hesiku lasi karana ia hadibaia. Nega momo Iehova ena heduru lau mamia. Tadikaka bona taihu idia hekwarahi dala idauidau dekenai ai idia durua totona bona doketa taudia ese ai idia durua namo herea. Unai lagani aukadia lalonai, ena be ai davaria hekwakwanai dainai ful-taim moni gaukarana lau karaia diba lasi, to mauri durua gaudia dekenai ai dabu lasi. Hanaihanai Iehova ena ura bona ena hesiai gaukara ai atoa guna.​​—⁠Mataio 6:​33.

Momo be ai idia nanadaia dahaka gaudia be unai nega aukadia lalonai ai idia durua. Hari lau laloa lou neganai, lau diba sibona emai Baibel stadi, mai kudouna ibounai ida Dirava guriguri henia, hebou lao henia hanaihanai, bona haroro gaukara goadalaia karadia ese emai haheauka bona hesiku lasi karana idia hagoadaia. Hanaihanai Salamo 37:​3-5 dekenai idia noho hagoadaia herevadia ai laloatao, ia gwau: “Lohiabada dekenai do oi abidadama, bona kara namo do oi karaia, . . . Oiemu moale be Lohiabada dekena amo do oi tahua, . . . Oiemu mauri be Lohiabada ena imana dekenai do oi atoa. Ia dekenai do oi abidadama, vadaeni ia ese oi do ia durua.” Ai dekenai mai anina bada siri ma ta be Salamo 55:​22, ia gwau: “Oiemu laloa hekwarahi be Lohiabada dekenai do oi henia, bona ia ese idia dekena amo oi do ia durua.” Emai lalo-hekwarahi be Iehova dekenai ai henia sibona lasi to ia dekenai ai rakatania danu, natuna be ena tamana ia abidadama henia momokani bamona.​​—⁠Iamesi 1:⁠6.

Lagani 1987, April 12 ai, egu adavana be emai ruma vairanai ia haroro neganai, auri iduara metauna ta be ena murinai ia koua, raka gabuna dekenai ia negea diho, bona dika bada ia davaria. Unai dainai lagani toi lalonai ia mase bamona. Lagani 1990 matamana kahanai ia mase.

Egu Diba Hegeregerena Iehova Lau Hesiai Henia

Lagani 1960 ai, Nikaia, Piraiévs dekenai kongregesen ena naria tauna totona lau idia abia hidi. Unai nega amo, Piraiévs dekenai idia noho kongregesen ma haida dekenai lau gaukara danu. Ena be lau be natudia lasi, to lauma dalana ai egu natudia ai idia lao taudia momo be hereva momokani dekenai idia gini goada noho totona lau durua diba dainai lau moale. Idia haida be kongregesen elda taudia, hesiai taudia, painia taudia, bona Betele famili ena memba taudia.

Lagani 1975 ai Greece dekenai demokratik gavamani idia abia murinai, Iehova ena Witnes taudia be edia hebouhebou idia abia diba, bona uda lalonai idia hunia lasi. Tano ma haida ai hebouhebou hegaegaelaia gaukarana lalonai ai haida ai abia dibana be hari mai anina bada. Unai dainai, lagani momo lalodiai lau moale, badina hebouhebou idauidau edia komiti lalonai lau gaukara diba.

Bena, lagani 1979 lalonai, Athens ena kahana ta dekenai, Greece ena Assembly Hall ginigunana haginia totona palani idia karaia. Lau idia abia hidi unai hegaegae bona haginia gaukara badana dekenai heduru lau henia totona. Unai gaukara dekenai danu, haheauka bona hesiku lasi karadia be mai anina bada. Lagani toi lalonai sibona idia henia tadikaka bona taihu handred momo ida ai gaukara hebou karana ese ai huanai lalokau heheni karana goadana bona lalo-tamona ia havaraia. Hanaihanai mai egu kudouna ibounai ida unai gaukara lau laloa noho.

Lauma Dalanai Idia Dabu Dibura Taudia Lau Durua

Lagani haida murinai, dala matamata ta ia kehoa. Korydallos dekenai, egu kongregesen ena teritori kahirakahira ai, Greece ena dibura badana ta ia noho. April 1991 amo, lau be pura ibounai unai dibura vadivadi henia totona idia abia hidi Iehova ena Witnes taudia edia haroro tauna. Unuseniai kamonai dibura taudia ida Baibel stadi bona Keristani heboudia lau karaia diba. Idia momo be edia mauri lalonai gau badadia idia haidaua, bona unai amo idia hamomokania Dirava ena Hereva ena siahu be bada. (Heberu 4:​12) Dibura naria taudia bona dibura taudia be unai kara dekenai idia hoa bada. Lau ida Baibel idia stadilaia dibura taudia haida idia ruhaia bona hari idia be sivarai namona harorolaia taudia.

Nega ta lalonai taunimanima idia diba momo drag hariharilaia taudia toi ida lau stadi. Lauma dalanai idia goada idia lao bona August ihuanai​​—⁠unai be Greece ena siahu momokani huana ta​—⁠edia Baibel stadi dekenai idia mai neganai, edia adena huina idia kokia, edia huina idia duaria namonamo, bona siedi bona neketai idia karaia! Dibura ena dairekta, gadi badana, bona gaukara taudia haida be edia opesi amo idia heau haraga, unai idia itaia totona. Unai dekenai idia hoa bada!

Ekspiriens namona ma ta be hahine taudia edia dibura rumana dekenai ia vara. Ala-ala dainai hanaihanai dibura dekenai do ia noho hahine ida Baibel stadi ta lau hamatamaia. Taunimanima be ena dagedage karadia idia diba. To, daudau lasi murinai ia dibaia Baibel ena hereva momokani ese ena kara ia haidaua bona momo idia gwau ia be mamoe ai ia lao laiona ta bamona! (Isaia 11:​6, 7) Dibura ena dairekta hahinena be haraga herea ia ia matauraia bona abidadama henia. Lau moale badina lau itaia lauma dalanai ia goada bona Iehova ia gwauhamata henia.

Gorere Bona Buruka Taudia Lau Durua

Egu adavana be ena gorere ia haheaukalaia daudau lau itaia dainai, ita huanai idia noho gorere bona buruka taudia edia dabu gaudia lau laloa bada. Iseda buka idauidau ese unai bamona taudia dekenai iseda lalokau heduruna ita henidia totona ita idia hagoadaia negadia ibounai egu lalona idia veria. Unai bamona hereva lau laloa bada bona lau haboudia. Lagani haida idia ore murinai, egu faila dekenai rau handred mai kahana lau haboudia vadaeni​​—⁠Gima Kohorona, July 15, 1962, ena hereva “Consideration for Older Persons and Afflicted Ones” amo lau matamaia. Unai gaudia momo ese idia hahedinaraia namona be kongregesen ta ta be gorere bona buruka taudia durua totona heduru henia daladia idia hegaegaelaia.​​—⁠1 Ioane 3:​17, 18.

Emai kongregesen lalonai idia noho gorere bona buruka taudia edia dabu gaudia henia totona elda taudia be sibona idia henia tadikaka bona taihu edia grup ta idia haboua. Volantia taudia be orea idauidau dekenai ai haridia​​—⁠hegeregere dina ai heduru idia henia diba taudia, hanuaboi lalonai heduru idia henia diba taudia, motuka amo ma haida idia abia loaloa diba taudia, bona dina ibounai edia hora 24 lalonai idia gaukara diba taudia. Unai taudia ginigabedia be heduru idia henia haraga diba.

Unai bamona hekwarahi ese namo ia havaraia. Hegeregere, sibona ia noho gorere taihu ta dekenai dina ta ta ena vadivadi idia karaia neganai, idia davaria ia be foloa latanai ia hekure bona gau ta ia diba lasi. Ia kahirakahira ia noho taihu ta mai ena motuka ai hadibaia. Unai gorere taihu be kahirakahira ai ia noho hospital dekenai ia abia lao haraga momokani​​—⁠miniti 10 sibona lalonai! Doketa taudia idia gwau unai ese unai taihu ia hamauria.

Gorere bona buruka taudia ese unai grup ena memba taudia dekenai idia hahedinaraia tanikiu karana ese moale ia havaraia. Dirava ena nega matamata henunai unai tadikaka bona taihu ida mauri namona lau abia diba helarona ese egu lalona ia hagoadaia. Bona lau diba idia abia hisihisi lalonai idia haheauka totona heduru idia abia be egu hahenamo ma ta.

Hesiku Lasi Karana ese Ahuna Ia Havaraia

Hari Piraiévs ena kongregesen ta dekenai elda gaukara lau karaia. Ena be lau buruka bona gorere momo, to lau moale badina kongregesen gaukaradia lau karaia noho.

Idia ore vadaeni laganidia lalonai, tohoa gaudia, hekwarahi aukadia, bona idia vara kava gaudia dainai, lau goada bona hesiku lasi be gau badana. To, Iehova be hanaihanai unai hekwakwanai hanaia totona lau dekenai goada ia henia. Hanaihanai lau mamia salamo torea tauna ena hereva be momokani, ia gwau: “Lau gwau: ‘Lau be lau moru noho.’ Unai neganai Lohiabada e, oiemu lalokau bada ese lau ia abia isi lou. Egu lalona ia hekwarahi momo neganai, oi ese lau oi hagoadaia, bona egu lauma oi hamoalea noho.”​​—⁠Salamo 94:​18, 19.

[Picture on page 25]

Egu adavana, Eleni ida, ena opereisen iharuana ia abia murinai lagani 1957 ai

[Picture on page 26]

Nuremberg ena hebouhebou ai, Germany dekenai, lagani 1969 ai

[Picture on page 28]

Gorere bona buruka taudia idia durua tadikaka bona taihu