Dirava Ena Lalokau Lalonai Do Oi Noho!
“Lauegu lalokau taudia e, . . . Dirava ena lalokau lalonai do umui noho, . . . mauri hanaihanai umui dekenai do ia henia.”—IUDA 20, 21.
1, 2. Edena dala ai Dirava ena lalokau lalonai oi noho diba?
IEHOVA be tanobada ia lalokau henia bada dainai, iena Natuna tamona ia siaia, unai amo idia abidadama henia taudia be mauri hanaihanai do idia abia diba. (Ioane 3:16) Ita dekenai lalokau hereadaena ia hahedinaraia unai! Bema oi be Iehova ena hesiai tauna ta, oi ura Iehova ese unai bamona oi do ia lalokau henia hanaihanai.
2 Hahediba tauna Iuda ese Dirava ena lalokau lalonai oi noho diba dalana ia herevalaia. Ia gwau: “Emui abidadama helagana ena latanai emui mauri do umui haginia goada. Lauma Helaga ena siahu dekena amo do umui guriguri noho. Dirava ena lalokau lalonai do umui noho. Nega ibounai iseda Lohiabada Iesu Keriso do umui naria noho, mai abidadama danu. Badina be umui diba, ia ese iena bogahisihisi dainai, mauri hanaihanai umui dekenai do ia henia.” (Iuda 20, 21) Dirava ena hereva oi stadilaia bona sivarai namona oi harorolaia neganai, oiemu abidadama helagana—Keristani hahediba herevadia unai—oi haginia goada. Dirava ena lalokau lalonai oi noho totona, gau badana be “Lauma Helaga ena siahu dekenai” do oi guriguri. Danu, mauri hanaihanai oi abia totona, Iesu Keriso ena mauri davalaia boubouna oi abidadama henia be gau badana.—1 Ioane 4:10.
3. Dahaka dainai haida be hari Iehova ena Witnes taudia lasi?
3 Guna Dirava idia abidadama henia taudia haida be hari Dirava ena lalokau lalonai idia noho lasi. Idia ese kara dika dalana idia abia hidi dainai, hari idia be Iehova ena Witnes taudia lasi. Unai ia vara lasi totona, edena bamona oi kara be namo? Hari do ita stadilaia point idauidau ese oi do idia durua, kara dika oi dadaraia bona Dirava ena lalokau lalonai oi noho totona.
Oi Hahedinaraia Dirava Oi Lalokau Henia
4. Dirava badinaia karana be mai anina bada, a?
4 Dirava badinaia karana amo oi hahedinaraia, oi be Iehova oi lalokau henia. (Mataio 22:37) Aposetolo Ioane ia gwau: “Dirava ita lalokau henia ena anina be inai: Dirava ena taravatu do ita badinaia. Iena taravatu be metau lasi.” (1 Ioane 5:3) Dirava badinaia karana oi manadalaia neganai, unai ese oi do ia hagoadaia hedibagani do oi hanaia bena do oi moale. Salamo torea tauna ia gwau: “Inai bamona taudia be idia moale momokani: Idia ese kara dika taudia edia sisiba, bona edia laloa idia abia dae lasi. . . . inai taudia ese, Lohiabada ena Taravatu dekenai idia moale.”—Salamo 1:1, 2.
5. Iehova oi lalokau henia neganai, unai ese edena bamona oi do ia durua?
5 Iehova oi lalokau henia dainai, unai ese oi do ia durua Iena ladana ia hadikaia kara dikana ta oi karaia lasi totona. Aonega Herevadia bukana torea tauna ta, Aguru be inai guriguri ia gwauraia: “Ogogami o kohu momo lau dekenai do oi henia lasi. To egu hitolo hegeregerena sibona, aniani lau dekenai do oi henia. Badina bema egu aniani bona kohu momo idia noho neganai, sedira lau be inai bamona do lau gwau garina, ‘Lohiabada be daika?’ O sedira bema lau ogogami neganai do lau henaoa, bona egu Dirava ena ladana do lau hahemaraia garina.” (Aonega Herevadia 30:1, 8, 9) Emu lalona do oi hadaia ‘Dirava ladana do oi hahemaraia lasi’ totona. To, namona be hanaihanai oi hekwarahi emu kara namodia amo Dirava ena ladana oi hanamoa totona.—Salamo 86:12.
6. Dahaka do ia vara bema mai emu ura ida kara dika oi karaia?
6 Kara dika oi dadaraia totona, hanaihanai oiemu lalokau guba Tamana ena heduru totona do oi guriguri henia. (Mataio 6:13; Roma 12:12) Dirava ena sisiba do oi badinaia noho, unai amo Ia ese emu guriguri do ia kamonai. (1 Petero 3:7) To, bema mai emu ura bada ida kara dika oi karaia, dika bada herea do oi davaria, badina Dirava ese gwau-edeede taudia edia guriguri be ori ta amo ia koua bamona, bena do ia kamonai lasi. (Lalohisihisi ena Ane 3:42-44) Unai dainai, namona be oi manau bona kerere ta oi karaia lasi, unai amo Dirava ese oiemu guriguri do ia kamonai.—2 Korinto 13:7.
Oi Hahedinaraia Iesu Keriso Oi Lalokau Henia
7, 8. Iesu ena sisiba oi badinaia dainai, edena dala ai kara dika oi dadaraia diba?
7 Iesu Keriso ena taravatu oi badinaia karana amo oi hahedinaraia, oi be Iesu oi lalokau henia, badina unai ese oi do ia durua kara dika oi dadaraia totona. Iesu ia gwau: “Bema umui ese lauegu taravatu do umui badinaia, vadaeni egu lalokau dekenai do umui noho, lau hegeregerena, egu Tamana ena taravatu lau badinaia, vadaeni iena lalokau dekenai lau noho.” (Ioane 15:10) Iesu ena hereva oi badinaia neganai, edena dala ai unai ese oi ia durua diba Dirava ena lalokau lalonai oi noho totona?
8 Iesu ena hereva oi badinaia neganai, unai ese oi do ia durua kara maoromaoro taravatudia oi dogoatao auka totona. Dirava ena taravatu Israela taudia dekenai ia gwau: “Oi heudahanai lasi.” (Esodo 20:14) To, Iesu ese inai hakaua herevana ia gwauraia: “Tau ta ese hahine ta do ia itaia noho matana dekenai, ela bona iena lalona dekenai do ia ura dikadika, iena kudouna dekenai unai tau be ia heudahanai vadaeni.” (Mataio 5:27, 28) Aposetolo Petero ia gwau, Keristani taudia ginigunadia edia kongrigeisen lalonai, haida “edia matana ese nega ibounai hahine idia tahua noho” bona “manoka taudia edia lalona idia ania.” (2 Petero 2:14) To, bema Dirava bona Keriso oi lalokau henidia bona edia hereva oi badinaia, bona oi ura lasi emu hetura karana namona idia ida oi hadikaia, unai ese oi do ia durua matabodaga karadia oi dadaraia totona.
Iehova Ena Lauma Helaga ese Oi Ia Hakaua be Namo
9. Bema ta be kara dika ia karaia noho, lauma helaga dekenai dahaka do ia vara?
9 Namona be Dirava ena lauma helaga totona oi guriguri bona lauma helaga ena hakaua dalana oi badinaia. (Luka 11:13; Galatia 5:19-25) Bema oi ese kara dika oi karaia noho, Dirava ese ena lauma helaga be oi amo ia kokia diba. Davida be Bataseba ida ia kerere murinai, Dirava ia noia ia gwau: “Oiemu vairana dekena amo lau do oi lulua lao lasi, bona oiemu Lauma Helaga, be lau dekena amo do oi kokia lasi.” (Salamo 51:11) To, King Saulo be ia helalo-kerehai lasi dainai, Dirava ena lauma helaga ia haboioa. Saulo ia kara dika badina ia ese boubou gauna ia gabua bona Amaleka taudia edia king bona mamoe, nanigosi, bona boromakau ia aladia mase lasi. Unai dainai, Iehova ese ena lauma helaga be Saulo amo ia kokia.—1 Samuela 13:1-14; 15:1-35; 16:14-23.
10. Dahaka dainai kara dika karaia lalohadaina oi dadaraia be namo?
10 Kara dika karaia lalohadaina oi dadaraia be gau badana. Aposetolo Paulo ia gwau: “Keriso ena hereva momokani ita diba murinai, bema iseda ura dekenai kara dika ita karaia noho, boubou gauna ta lasi ese unai dika do ia gwauatao diba.” (Heberu 10:26-31) Bema mai emu ura ida kara dika oi karaia loulou bona “boubou gauna ta lasi ese unai dika do ia gwauatao,” unai be dika bada herea!
Oi Hahedinaraia Ma Haida Oi Lalokau Henia
11, 12. Edena dala ai lalokau bona hemataurai karana ese ta do ia durua matabodaga karadia ia dadaraia totona?
11 Ma haida lalokau henia karana ese oi do ia durua matabodaga karadia oi dadaraia totona. (Mataio 22:39) Unai bamona lalokau karana ese emu kudouna do ia gimaia, unai amo oi be ma ta ena adavana do oi hegahusi henia lasi. Badina, hegahusi karana ese heudahanai karana ia havaraia diba. (Aonega Herevadia 4:23; Ieremia 4:14; 17:9, 10) Kara maoromaoro tauna Iobu oi tohotohoa be namo. Ia ese iena adavana sibona ia laloa bada bona hahine ma ta ia itaia noho lasi.—Iobu 31:1.
12 Headava be helaga dainai oi matauraia neganai, unai ese oi do ia durua kara dika badadia oi dadaraia totona. Dirava ese headava bona mahuta hebou karana ia karaia natudia havaraia totona. (Genese 1:26-28) Namona be ita laloatao, tauanina ena hehuni kopina amo mauri tauna ta ia vara diba, bona mauri be helaga. Sihari kava bona heudahanai taudia be Dirava idia gwau-edeede henia, mahuta hebou karana bona headava idia matauraia lasi, bona sibona edia tauanina idia hadikaia. (1 Korinto 6:18) To, Dirava bona dekena taudia lalokau henia karana sibona lasi, to Dirava badinaia karana ese ta do ia durua kara dika ia dadaraia totona, unai amo Keristani kongrigeisen amo do idia atoa siri lasi.
13. Matabodaga tauna ese edena dala ai “dava bada gaudia” ia hadikaia?
13 Kara dika lalohadai ita koudia be gau badana, badina ita ura lasi iseda lalokau taudia dekenai lalohisihisi ita havaraia. Aonega Herevadia 29:3 ia gwau: “Ariara hahine danu ia noho hebou tauna ese, iena moni [“dava bada gaudia,” NW ] ia negea kava noho.” Oibe, ia helalo-kerehai lasi heudahanai tauna ese iena hetura karana Dirava bona ena ruma bese taudia ida ia hadikaia. Iena hahine be mai ena maoro edia headava ia hadokoa totona. (Mataio 19:9) Herevana daika ia kerere, to headava idia parara neganai, ia kerere lasi adavana, edia natudia bona ma haida dekenai lalohisihisi bada do ia havaraia. Oibe, matabodaga karana ese dika bada ia havaraia diba dainai, namona be unai kara mirona ita dadaraia momokani.
14. Aonega Herevadia 6:30-35 ena hereva amo dahaka ita dibaia?
14 Heudahanai karana ese ia havaraia hekwakwanai be gau ta ese ia hanamoa diba lasi dainai, matabodaga ena ura dikana ita koua be namo. Aonega Herevadia 6:30-35 dekenai ia gwau, reana ia hitolo dainai ia henaohenao tauna be taunimanima ese do idia hebogahisi henia, to taunimanima ese heudahanai tauna do idia inai henia badina iena lalohadai be dika. “Ia ese sibona ena mauri ia hadikaia ore noho.” Mose ena Taravatu lalonai heudahanai tauna be do idia alaia mase. (Levitiko 20:10) Heudahanai tauna be sibona ena matabodaga urana ia hagugurua dainai, ma haida dekenai lalohisihisi ia mailaia. Unai dainai, heudahanai karana amo ia helalo-kerehai lasi tauna be Dirava ena lalokau lalonai ia noho lasi bona Keristani kongrigeisen amo do idia atoa siri.
Lalomamina Ia Goeva Noho
15. “Auri siahu” ese iseda lalomamina ia gabua neganai dahaka ia vara?
15 Iehova ena lalokau lalonai ita noho totona, namo lasi iseda lalomamina be kara dika dekenai ia manada. Gau badana be ita ese tanobada ena matabodaga karadia do ita dadaraia, bona mai aonega ida iseda turadia, ita duahia bukadia, laulau eiava miusiki do ita abia hidi namonamo. Paulo ese inai sisiba ia henia: “Nega gabeai tau haida ese Iesu badinaia kara do idia rakatania, lauma koikoidia do idia kamonai henia, bona lauma dikadia edia hadibaia hereva do idia abia dae. Inai hadibaia hereva be koikoi taudia ese do idia gwauraia. Edia laloa maoromaoro dalana idia hamasea vadaeni, auri siahu herea ese edia lalona ia gabua dikadika bamona.” (1 Timoteo 4:1, 2) Kara dika ita karaia loulou neganai, unai ese iseda lalomamina do ia hamasea. Unai be hegeregere “auri siahu herea” ese iseda kopina ia gabua bona hemami varovaro idia mase dainai, hisihisi ita mamia diba lasi. Unai bamona lalomamina ese aposteit taudia bona iseda abidadama idia hadikaia diba daladia amo ita do ia gimaia lasi.
16. Dahaka dainai lalomamina ia goeva be mai anina bada?
16 Hahemauri ita abia totona iseda lalomamina ia goeva be gau badana. (1 Petero 3:21) Iesu ena boubou rarana ita abidadama henia dainai, iseda lalomamina be ia goeva, “vadaeni Mauri Diravana ena hesiai gaukara do ita karaia diba.” (Heberu 9:13, 14) Bema mai iseda ura ida kara dika ita karaia, iseda lalomamina do ia miro dainai, ita hegeregere lasi Dirava ena hesiai gaukara ita karaia totona. (Tito 1:15) To, Iehova ena heduru amo, lalomamina goevana ita abia diba.
Kara Dika Dadaraia Daladia Ma Haida
17. ‘Iehova oi abidadama henia mai emu kudouna ibounai danu’ ena namo be dahaka?
17 Idaunegai Israela tauna Kaleba hegeregerena, ‘Iehova oi abidadama henia mai emu kudouna ibounai danu.’ (Deuteronomi 1:34-36) Dirava ena ura oi badinaia be namo, bona “lauma dikadia edia pata” ai oi aniani lasi. (1 Korinto 10:21) Aposteit karana dadaraia. Iehova ena pata dekenai idia noho lauma aniani sibona oi ania, unai amo hahediba taudia koikoidia bona lauma dikadia ese oi do idia hakaua kerere lasi. (Efeso 6:12; Iuda 3, 4) Emu abidadama hagoadaia karadia hegeregere Baibel stadi karana, hebou mai karana, bona haroro gaukara oi laloa bada. Bema mai emu kudouna ibounai ida Iehova oi badinaia bona ena gaukara oi karaia goadagoada, do oi moale momokani.—1 Korinto 15:58.
18. Dirava oi gari henia neganai, dahaka do oi karaia?
18 ‘Dirava do oi tomadiho henia, mai hemataurai bona mai gari danu.’ (Heberu 12:28) Dirava oi gari henia karana ese oi do ia durua, gwau-edeede dalana oi dadaraia totona. Unai gari karana ese oi do ia durua Petero ena sisiba oi badinaia totona, ia be horoa Keristani tadikaka dekenai ia gwau: “Dirava dekenai umui guriguri henia neganai, ia be emui Tamana umui gwauraia, ani? Ia ese taunimanima edia toana ia laloa lasi, ibounai be hegeregere ia vairanai. Ia ese ita ta ta iseda kara do ia tahua. Unai dainai namona be inai tanobada dekenai umui noho neganai, Dirava ena vairanai mai gari danu do umui noho.”—1 Petero 1:17.
19. Dahaka dainai Dirava ena Hereva amo oi dibaia gaudia be nega ibounai oi badinaia be namo?
19 Dirava ena Hereva amo oi dibaia gaudia be nega ibounai oi badinaia be namo. Unai ese oi do ia durua kara dika badana oi dadaraia totona, badina oi be sibona emu lalona oi hadibaia lou ela bona ia manada, bona maoro bona kerere edia toana ia diba namonamo tauna ta ai oi lao diba. (Heberu 5:14) Inai nega dikana lalonai, namona be aonega tauna bamona ita noho bona ‘nega do ita haorea kava lasi,’ to iseda hereva dalana bona kara do ita naria namonamo. ‘Iehova ena ura gaudia sibona do oi tahua’ bona unai oi badinaia noho.—Efeso 5:15-17; 2 Petero 3:17.
20. Dahaka dainai ma haida edia kohu ura dikadika karana ita dadaraia be namo?
20 Ma haida edia kohu ura dikadika karana oi dadaraia. Taravatu Ten lalonai taravatu ta ia gwau: “Taunimanima ta ena ruma dainai oi mama henia lasi. Iena adavana totona do oi mama [“hegahusi,” BHğ] henia lasi, o iena hesiai tauna, o iena hesiai hahine, o iena boromakau, o iena doniki, o iena kohu ta totona do oi mama henia lasi.” (Esodo 20:17) Unai taravatu ese tau ta ena kohu hegeregere, ruma, adavana, hesiai taudia, animal bona ma gau haida ia gimaia. To, Iesu ese mai anina bada hereva ta ia gwauraia, ia hahedinaraia ma haida edia kohu ura dikadika karana ese tau ta ia hadikaia diba.—Mareko 7:20-23.
21, 22. Keristani tauna ta ese kara dika ia dadaraia totona, dahaka ia karaia diba?
21 Emu lalona dekenai ura dikana ia vara neganai, namona be kara haida oi karaia unai ura dikana oi koua toho totona. Hahediba tauna Iamesi ia gwau: “Dibagani ena badina korikori be, tau ta sibona ena ura dainai, kara dika ta ese ia veria noho, bona ia koia noho. Vadaeni iena ura dikadia be idia rogorogo bamona, unai murinai kara dika ia havaraia. Bona kara dika ia tubu bona ia bada neganai, mase ia havaraia.” (Iamesi 1:14, 15) Haheitalai be, bema tau ta be guna inuinu kekero karana ia manadalaia, reana lalona ia hadaia iena ruma dekenai kekero muramuradia do ia atoa lasi. Eiava, bema Keristani hahine ta be gaukara gabuna dekenai murimuri tau ta ese ia ura tura henia, unai hedibagani ia dadaraia totona, reana gaukara opesi ia haidaua eiava gaukara matamatana ia abia be namo.—Aonega Herevadia 6:23-28.
22 Kara dika ena dala dekenai oi raka hamatamaia lasi. Ma ta hegahusi henia ese sihari kava eiava heudahanai karadia ia havaraia diba. Bema tau ta be gau maragidia dekenai hereva koikoidia ia gwauraia, unai ese ia do ia hagoadaia gau badadia dekenai ia koikoi totona. Bema tau ta be gau maragidia ia henaoa matamaia, unai ese ena lalomamina ia hadikaia diba, bena gabeai, ia be gau badadia do ia henaoa diba. Oibe, ena be ta ese nega kwadogina sibona lalonai aposteit lalohadai ta ia abia matamaia, to unai lalohadai ese ia veria diba aposteit tauna ai ia lao totona.—Aonega Herevadia 11:9; Apokalupo 21:8.
Bema Kara Dika Oi Karaia Vadaeni
23, 24. Sivarai Iharuana 6:29, 30 bona Aonega Herevadia 28:13 ese edena dala ai ita idia hagoadaia diba?
23 Taunimanima ibounai be goevadae lasi taudia. (Hadibaia Tauna 7:20) To bema oi be kara dika badana ta oi karaia vadaeni, King Solomona ese Iehova ena dubu helagana kehoa dinana ai ia gwauraia gurigurina ese oi ia hagoadaia diba. Solomona ia gwau: “Unai neganai edia guriguri do oi kamonai. Bema oiemu Israela taudia ese, mai lalohisihisi momokani danu be Dubu Helaga dekenai edia imana idia duduia neganai, edia guriguri do oi kamonai. Guba dekena amo do oi kamonai, edia kara dika do oi gwauatao, bona idia be oi ese do oi durua. Badina be oi sibona ese taunimanima ibounai edia laloa oi diba noho. Idia ta ta dekenai edia kara, edia kara hegeregerena durua do oi henia.”—2 Sivarai 6:29, 30.
24 Oibe, Iehova be iseda kudouna ia diba bona Ia be kara dika gwauatao Diravana. Aonega Herevadia 28:13 ia gwau: “Oiemu kara dika oi hunia noho neganai, namo ta do oi davaria lasi. Oiemu kara dika do oi gwauraia hedinarai, bona dika do oi rakatania, unai neganai Dirava ese oi do ia bogahisihisi henia.” Bema mai helalo-kerehai ida emu kara dika oi gwauraia hedinarai bona kara dika oi rakatania, Dirava ese oi dekenai hebogahisi ia hahedinaraia diba. To, bema emu hetura karana Iehova ida be oi hadikaia vadaeni, dahaka ese oi ia durua diba Dirava ena lalokau lalonai oi noho totona?
Edena Bamona Do Oi Haere?
• Edena dala ai Dirava ena lalokau lalonai ita noho diba?
• Edena dala ai Dirava bona Keriso lalokau henia karana ese ita ia durua kara dika ita dadaraia totona?
• Edena dala ai ma haida lalokau henia karana ese ita ia durua matabodaga karadia ita dadaraia totona?
• Kara dika dadaraia daladia ma haida be dahaka?
[Picture on page 7]
Iuda ese ita dekenai Dirava ena lalokau lalonai ita noho dalana ia hadibaia
[Picture on page 9]
Headava taudia idia parara neganai, ia kerere lasi adavana bona natudia idia lalohisihisi bada
[Picture on page 10]
Kaleba hegeregerena, oi ura ‘Iehova oi abidadama henia mai emu kudouna ibounai danu,’ a?
[Picture on page 11]
Kara dika oi dadaraia totona, nega ibounai oi guriguri