Dirava Kahirakahira Oi lao

Burukadia Do Idia Matamata Lou Negana

DAIKA ia ura ia buruka bena ena tauanina ia makuku, matana idia dika, taiana idia kudima, bona aena idia manoka? Reana do oi laloa: ‘Dirava ese ita ia havaraia ena badina be eda matamata negana ita moalelaia sisina, bona do ita buruka dainai ita gari, a?’ Lasi, unai be Dirava ena ura lasi. To, Iena lalokau dainai dala ia karaia taunimanima idia buruka lasi totona! Iobu 33:​24, 25 ena hereva mani oi laloa.

Iehova ese ia lalokau henia abidadama tauna, Iobu, dekenai ia vara gauna mani oi laloa. Iobu be ia diba lasi, Satani be ena badinaia karana ia hepapahuahulaia, ia gwau Iobu be sibona ena namo ia laloa dainai Dirava ia badinaia. Iehova ia diba Iobu do ia gini goada, danu ia diba Iena siahu amo do idia vara dika gaudia ia hanamoa lou diba, unai dainai Satani ia koua lasi Iobu ia tohoa totona. Bena Satani ese “toto dika herea dekena amo Iobu ia hahisia, iena aena dekena amo ela bona iena kwarana dekenai.” (Iobu 2:⁠7) Iobu ena tauanina be gaigai maragidia amo ia honu, bona ena kopina ai toto momo idia vara, idia korema, bona kopina idia kokia kava. (Iobu 7:5; 30:​17, 30) Ia davaria hisihisi oi laloa diba, a? To, Iobu be Iehova ia abidadama henia noho, ia gwau: “Harihari ia lao bona do lau mase, egu laloa maoromaoro, bona egu kerere lasi, do lau gwauraia noho.”​​—⁠Iobu 27:⁠5.

To Iobu be kerere badana ta ia karaia. Ia laloa kahirakahira do ia mase neganai, sibona ena kara maoromaoro ia hamomokania toho, “ia sibona maoromaoro ia gwauraia, to ia ese Dirava be maoromaoro ia gwauraia lasi.” (Iobu 32:⁠2) Dirava ena hereva gwauraia tauna, Elihu, ese Iobu ia sisiba henia. Danu, Elihu ese Iobu dekenai Dirava amo ia mai sivarai namona ta ia gwauraia: “Unai tau [Iobu] do umui hamauria, guri [mase guria gabuna] lalonai do ia diho lasi. Lau ese iena davana karaia totona, dala ta lau davaria vadaeni. Unai neganai unai tau ena tauanina, be do ia matamata lou, eregabe tauna bamona, bona iena uhau ena goada dinadia be ia davaria lou.” (Iobu 33:​24, 25) Unai hereva dainai Iobu ena helaro ia goada. Ia be hisihisi do ia abia hanaihanai lasi ela bona mase. Bema ia helalo-kerehai, Dirava ese ena dika davana karaia boubouna do ia abia dae bona ena hisihisi idauidau amo do ia ruhaia.a

Iobu be mai manau ida sisiba ia abia dae bona ia helalo-kerehai. (Iobu 42:⁠6) Iehova ese Iobu ena dika davana karaia boubouna ia abia dae bona ena dika ia gwauatao, bena ia hanamoa bona davana namona ia henia. Iehova ese “Iobu ena mauri ma ia hanamoa lou bada. Iena gorere ia ore murinai, iena noho be namo bada, to iena noho gunana be namo bada lasi.” (Iobu 42:​12-17) Iobu ena gorere dikana ia ore, bona ena tauanina ia “matamata lou, eregabe tauna bamona” neganai, ia abia hemamina mani oi laloa!

Dirava ese Iobu ena dika davana karaia boubouna ia abia dae, to unai boubou gauna ena namo ia noho daudau lasi, badina Iobu be goevadae lasi tauna bona gabeai ia mase. Ita totona mauri davana karaia boubou namo hereana ta ia noho. Iehova be mai ena lalokau ida ena Natuna, Iesu, ia henia, iseda mauri davana karaia boubouna ai ia lao totona. (Mataio 20:28; Ioane 3:16) Unai boubou gauna idia abidadama henia taudia ibounai be tanobada paradaisona ai mauri hanaihanai do idia abia. Unai nega ai, Dirava ese burukadia edia hisihisi idauidau do ia haorea. Do oi roho mauri bona burukadia idia “matamata lou” negana oi itaia totona, diba ma haida oi abia be namo.

[Footnote]