Henanadai Mauana

● Nega ibounai ruma tauna ita lou henia neganai, Society ena tanobada ibounai gaukarana durua monina be mai eda ura ida do ita abia dae herevana ita gwauraia loulou be maoro, a?

 Lasi. August 1999 Iseda Basileia Gaukara pepana ena hereva ta, “Iseda Buka Bona Magasin Ita Gaukaralaia mai Aonega Ida,” ia gwau: “Nega haida, reana iseda gaukara tanobada ibounai dekenai durua herevana do ita gwauraia be auka.” Unai bamona ia vara neganai, ita laloa namonamo be gau badana. Ita ura taunimanima ese iseda gaukara idia lalo-pararalaia, ia be momokani Baibel hadibaia gaukarana bona moni haboua gaukarana lasi. Ita be moni noia taudia lasi. Inai dala badadia haida ita laloatao be namo.

 Kamonai taudia dekenai buka bona magasin ita rakatania negana ginigunana ai, namona be ita hahedinaraia goevagoeva edena bamona iseda gaukara be taunimanima edia kontribusen monina amo idia durua. Bema ita laloatao, buka bona magasin be kamonai taudia eiava iseda buka bona magasin idia ura duahia taudia sibona dekenai ita henia, vadaeni unai gauna do idia laloa.

 Ita vadivadi neganai, kamonai taudia haida be edia ura hegeregerena kontribusen monina idia henia. Ma haida be buka bona magasin edia davana idia henanadailaia. Do ita hadibadia iseda gaukara be moni haboua gaukarana lasi, to kamonai taudia dekenai iseda buka bona magasin ita henia davana lasi. Danu, ita hadibadia bema ta ia ura ena kontribusen moni amo inai tanobada ibounai gaukarana ia durua, unai be ena ura hegeregerena ia karaia diba.

 Nega ta ta ai, nega maorona dekenai, bema lou henia tauna ese durua karana ta ia do henia lasi, namona be ita ese Society ena tanobada ibounai gaukarana durua dalana ita herevalaia diba.

 Herevana kamonai taudia dekenai buka bona magasin ita henia davana lasi, to ita laloatao, iseda buka bona magasin idia printaia bona siaia be mai edia davana. Ita diba, Dirava ena lauma ese iena hesiai taudia bona haroro gaukara dekenai idia davaria kamonai taudia do ia hagoadaia, edia ura hegeregerena tanobada ibounai dekenai idia karaia gaukarana durua kontribusen moni do ita henia totona.