Pioneer Gaukara Oi Karaia Lou Diba, A?
1 Idia ore lagani ima lalodiai, regular pioneer taudia tausen momo ese edia pioneer gaukara idia rakatania. Oi be idia ta, a? Bema oibe, reana pioneer gaukara namona oi rakatania be mai ena badina. Reana hekwakwanai ta ia vara bona oi be dala lasi hamaoromaoroa totona. Unai hekwakwanai ia do noho, a? Bema guna oi gorere, emu moni ia hegeregere lasi, eiava emu ruma bese ena maduna dainai pioneer gaukara oi rakatania, to hari unai hekwakwanai idia ore, a? Oiemu mauri lalonai gau haida oi haidaua diba bena oi hegeregere regular pioneer gaukara do oi karaia lou bona ena hahenamo do oi abia lou totona, a? Do oi karaia lou ena lalohadai oi abia, a?
2 Oi diba vadaeni, bema oi ura pioneer gaukara dekenai do oi kwalimu, oi hegaegae namonamo bona sediual namona oi karaia be gau badana. Ena be emu nega be bada lasi moale karadia oi karaia totona, to oi laga-ani negadia be oi moalelaidia bona idia be mai anina. (Her. 19:17; Kara 20:35) Haroro gaukara oi goadalaia neganai, unai ese oi ia durua bena tanobada taudia edia kara oi tohotohoa lasi, idia be sibodia edia namo idia tahua, bona mauri durua gaudia momo idia tahua. Iehova ia gwauhamata, ia gwau bema oi sibomu emu namo oi tahua lasi bona Basileia ena namo oi tahua guna, ia ese lauma dalanai taga tauna ai oi do ia halaoa. Bema mai emu kudouna ibounai ida Iehova ena hesiai gaukara oi karaia, do oi moale bada bona lalo-maino do oi davaria.—Her. 10:22; Kol. 3:23, 24.
3 Haida sibona idia abia hidi ful-taim haroro gaukara namona idia karaia totona, a? Lasi—ura taudia iboudiai idia karaia diba. Iehova dekenai ita gwauhamata vadaeni dainai, bema gau ta ese ita ia koua lasi, namona be ita Keristen taudia iboudiai be ful-taim hesiai gaukarana karaia totona do ita lalohadailaia namonamo.—Mar. 12:30.
4 Bema oi gorere dainai, bona Baibel ia gwauraia hegeregerena oiemu maduna oi huaia dainai, oi be dala lasi harihari pioneer gaukara oi karaia totona, oi lalohisihisi lasi badina Iehova ia diba bona ia lalo-parara. Oiemu goada hegeregerena oi gaukara neganai, ia ese oiemu abidadama karana dainai oi do ia hanamoa. (1 Kor. 4:2; 2 Kor. 8:12) To, bema harihari oi be mai emu dala pioneer gaukara do oi karaia lou totona, namona be kongregesen naria tauna dekenai oi lao bona aplikeisen pepana oi abia, ani?
5 Oiemu Ruma Bese Taudia Idia Heduru Diba, A? Reana pioneer gaukara oi rakatania badina ruma bese ena maduna oi huaia dainai. To harihari oiemu ruma bese taudia ma haida idia hegeregere idia heduru totona, bona oi be pioneer gaukara do oi karaia lou diba, a? Nega haida, bema heduru sisina oi abia maduna ta oi huaia totona, pioneer gaukara oi karaia lou diba dalana ia kehoa.
6 Ruma bese lalonai, taunimanima idia gaukara hebou bona heduru ma haida idia henia neganai, reana pioneer gaukara do oi karaia lou diba. Edia heduru dalana be reana moni amo eiava motuka amo, bona oi danu idia haroro hebou diba. Reana dala ma haida amo oi idia durua diba danu. Bema oi be dala lasi unai pioneer gaukara namona do oi karaia lou totona, reana ruma bese ma ta lalonai tau ta oi durua diba pioneer gaukara do ia karaia diba totona.
7 Namona be ruma bese taudia ese unai kara do idia heboulaia, ani? Ruma bese lalonai, iboudiai idia gaukara hebou neganai, reana idia ta ia pioneer diba. Bema ma ta be pioneer gaukara ia hamatamaia, ena ruma bese taudia iboudiai be ia idia durua dainai, pioneer gaukara idia durua unai. Unai bamona lalokau karana ese teritori dekenai Basileia harorolaia gaukarana ia durua, bona lauma dalanai unai ruma bese taudia ia hatamonaia diba danu.—Luka 6:38; Fil. 2:2-4.
[Questions]
1. (a) Haida ese pioneer gaukara idia rakatania ena badina maorodia haida be dahaka? (b) Bema edia hekwakwanai idia ore dahaka idia karaia diba?
2. (a) Pioneer gaukara dekenai do ita kwalimu totona, dahaka ita karaia? (b) Pioneer gaukara ita karaia neganai, unai ese ita edena bamona ia naria? (c) Pioneer gaukara ita karaia neganai, dahaka hahenamo do ita davaria?
3. Daidia ese pioneer gaukara karaia totona do idia lalohadailaia namonamo?
4. Bema oi gorere dainai, bona Baibel ia gwauraia hegeregerena maduna oi huaia dainai, harihari pioneer gaukara oi karaia diba lasi, namona be oiemu hemami be edena bamona?
5. Pioneer gaukara do oi karaia lou diba totona, daidia ese oi idia durua diba?
6. Ruma bese lalonai ta ese pioneer gaukara do ia karaia totona, ena ruma bese taudia be edena bamona idia durua diba?
7. Ruma bese lalonai, bema ta idia durua diba pioneer gaukara ia karaia totona dahaka hahenamo idia davaria diba?