Boiridia Mai, Tau Hereadaena Murinai Do Idia Raka
1 Mataio 5:14 ai, Iesu be iena hahediba taudia ia hamaorodia: “Umui be tanobada taudia ibounai edia diari.” Iesu murinai idia raka taudia edia maduna be taunimanima ibounai dekenai Iehova ena Basileia bona Ia ese Iesu amo ia karaia hahemauri abia dalana idia herevalaia. December lalonai, Tau Hereadaena buka be mai moale ida do ita hariharilaia toho, unai maduna ita laloa noho dainai. Reana do oi ura inai buka hariharilaia daladia haida oi tohoa.
2 Emu ladana oi henia murinai, reana inai bamona oi hereva diba:
◼ “Iesu ena kara toana tanobada ai ia noho neganai, be taunimanima momo ese idia lalohadailaia vadaeni. Dahaka oi laloa; edena dala ai ia be ma haida hegeregerena lasi? [Haere oi naria.] Inai buka namona, Tau Hereadaena, ese iena mauri bona haroro gaukara lalonai idia vara gaudia haida, bona ena kara toana ia sivarailaidia. Idia duahia murinai, haida edia hemami be hegeregere Iesu idia bamoa, iena hisihisi idia mamia, bona idia noho ia haroro neganai.” Buka dekenai laulau ginigunana bona ena hereva kwarana oi hahedinaraia. Bena hamatamaia herevadia oi davaria, bona hereva kwarana, “Ia Oi Dibaia be Namo,” henunai paragraf iharuana dekenai idia noho herevadia oi duahia. Unai murinai, buka oi hariharilaia toho, davana be K3.00.
3 Eiava inai bamona oi hereva diba:
◼ “Kerisimasi dainai, taunimanima momo be Iesu idia laloa noho. To tanobada lalonai gau dikadia momo idia vara dainai, haida be Iesu ese ita ia laloa bada eiava idia daradaralaia. Dahaka oi laloa?” Haere oi naria. Tau Hereadaena bukana karoa 24 dekenai oi kehoa, bona Iesu be tanobada dekenai ia mai ena badina oi kikilaia. Bena Ioane 15:13 oi duahia bona Iesu ena lalokau ma haida dekenai oi hahedinaraia. Magasin matamatadia, buklet ta, eiava pepapepa ta oi abidia mai danu, badina bema buka idia abia lasi neganai oi henidia toho diba.
4 Hereva henia dalana ma ta be inai:
◼ “Matamata taudia momo be ena kara do idia tohotohoa diba tauna idia tahua, to tau namona idia davaria be auka herea. Taunimanima iboudiai dekenai, Iesu Keriso be haheitalai goevadaena. [1 Petero 2:21 oi duahia.] Iena mauri lalonai, ena guba Tamana ia tomadiho henia be gau ginigunana. Oi laloa mauri be do edena bamona bema taunimanima ma haida ese iena kara idia tohotohoa?” Haere oi naria. Karoa 133, paragraf 11 dekenai oi lao; unai ese iena kara namodia ia herevalaia. Tau Hereadaena bukana be edena bamona ita ia durua diba iseda Keristen karana ita hanamoa totona oi kikilaia.
5 Reana do oi ura inai bamona hereva oi gaukaralaia:
◼ “Tau ta be Iesu Keriso ena ladana ia gwauraia neganai, momo idia laloa ia be beibi ta eiava ia hisihisi bona kahirakahira do ia mase tauna ta. Iesu ena vara bona ena mase sibona idia laloa. Nega momo, dahaka dahaka ia karaia iena mauri ibounai lalonai idia laloa lasi. Gunaguna ema bona hari tanobada idia noholaia taudia iboudiai dekenai, Iesu ese ia karaia gaudia be mai anina. Unai dainai, ia ese dahaka dahaka ita dainai ia karaia ita dibadia namonamo be gau badana.” Ioane 17:3 oi duahia. Tau Hereadaena ena hamatamaia hereva ena rau ginigunana oi davaria, bona paragraf namba 4 oi duahia. Buka abia bona stadilaia daladia oi kikilaia.
6 Dahaka oi hariharilaia, bona kamonai taudia edia ladana bona adres oi torea, lou henia oi karaia diba totona. Dala ia do noho neganai, kudou-maoro taudia do ita tahua goadagoada, bona do ita durudia idia be iseda Hahemauri Tauna, Iesu Keriso, murinai idia raka taudia ai do idia lao.—Mat. 16:24.
This article is repeated in km 12/98, 12/99.