Hagoadaia Iesu Idia Tohotohoa Totona
1 Korinto Ginigunana 3:6 ai, Paulo ia torea: “Lau ese uhe lau hadoa. Apolo ese ranu dekenai ia dairia. To Dirava ese unai hadoa gauna ia hatubua.” Unai hereva amo Paulo ese iena tadikaka ia durudia, bena idia diba Iesu ena kwarana dagina henunai idia gaukara hebou mai lalo-tamona danu be gau badana. Unai amo idia diba, hadoa bona dairia gaukarana dekenai idia karaia gaudia be mai anina bada.
2 Unai hahemauri gaukarana be hari inai nega lalonai do idia karaia haorea. Ita be Keristen taudia dainai, taunimanima be Iesu idia gavaia taudia ai ita halaodia be iseda maduna badana. (Kara 13:48) Bema Tau Hereadaena bukana oi gaukaralaia dainai taunimanima idia kamonai, oi lou henidia neganai dahaka do oi herevalaia?
3 Bema buka ia abia tauna oi vadivadi henia lou, inai bamona oi hereva diba:
◼ “Guna ita herevahereva hebou neganai, Iesu Keriso be edena bamona tauna ita herevalaia, bona oi dekenai mai moale ida Tau Hereadaena bukana lau henia. Iesu ena hadibaia dalana bona ena kara oi laloa neganai, dahaka oi laloa bada?” Naria ia haere totona. Karoa 113 dekenai oi kehoa, bona Iesu ena haheitalai manau karana dekenai oi herevalaia. Filipi 2:8 oi duahia, Paulo be Iesu ena manau karana edena bamona ia laloa oi hahedinaraia totona. Bena wiki ta ta ai Baibel stadi karaia karana ena namo diba habadaia dalana dekenai oi herevalaia.
4 Reana inai hamatamaia hereva oi ura:
◼ “Tanobada ai ia noho neganai Iesu be ita ia laloa bada dainai ia karaia gaudia be vanegai ita herevelaia. Dahaka oi laloa; hisihisi bada idia ania vadaeni taudia be edena bamona do ia durua?” Haere oi naria. Karoa 133 itaia, bona paragraf 5 oi kikilaia. Karoa 133 ai laulau oi hahedinaraia, bona Dirava ena ura be tanobada dekenai do idia karaia guba dekenai idia karaia bamona neganai mauri be do edena bamona oi herevalaia. Diba ita habadaia ena namo oi kikilaia.
5 Bema nega ginigunana oi vadivadi henia tauna be buka ta ia abia lasi, reana inai bamona oi hereva matamaia:
◼ “Lau laloa ita ruaosi be lalo-tamona inai dekenai; hari taunimanima momo be tau ta idia abia hidi bona iena kara idia tohotohoa. Iesu Keriso be ita ese ita tohotohoa be namo tauna hereadaena. Iesu ena kara lau stadilaia neganai mai anina bada gauna ta lau dibaia, bona lau ura oi danu unai lau kikilaia. [Tau Hereadaena bukana karoa 40 itaia, bona Iesu be hebogahisi karana dekenai dahaka ia hadibaia oi herevalaia.] Lau ia hahelaloatao momokani ma haida unai bamona lau kara henidia be gau badana.” Mataio 5:7 duahia. Bema hari ia kamonai namonamo, Tau Hereadaena bukana eiava Dirava ese Ita Ia Laloa Eiava? buklet oi hariharilaia toho.
6 Eiava oi ura maoromaoro inai bamona do oi hereva:
◼ “Guna lau mai neganai, Iesu dekenai diba ita abia be gau badana ita kikilaia. Unai bamona diba ita abia ena anina be Ioane 17:3 ese ia gwauraia, ‘Mauri hanaihanai be inai.’ Unai diba be edena bamona ita abia diba?” Haere oi naria. Iseda Baibel stadi karaia dalana bona edena bamona ta ia abia diba oi herevalaia.
7 Paulo ia gwau gogoa gaukarana ia karaia tauna dekenai “Dirava ese ta ta edia gaukara davana do ia henia, edia hekwarahi hegeregerena.” (1 Kor. 3:8) Bema ita hekwarahi bada taunimanima be Iesu murinai idia raka taudia ai ita halaodia totona, momokani, iseda ahuna be do ia bada.
This article is repeated in km 12/99.