Mai Gari Lasi ida Hereva

¹ Hari, gabu haida dekenai, pablisa taudia idia davaria taunimanima be edia ruma dekenai idia noho lasi dainai hereva henidia be ia auka ia lao. Momo idia gwau ruma-ta-ruma-ta gaukara idia karaia neganai, edia teritori dekenai ruma rua rua amo ta ta dekenai taunimanima be lasi. Unai dainai, edia gaukara ese anina bada ia havaraia lasi.

² Lagani haida gunanai, Sunday dekenai taunimanima momo be edia ruma ai idia noho badina be idia laloa unai be laga-ani dinana. Hari momo ese unai kara idia badinaia lasi. Taunimanima momo be moni gaukara idia karaia, idia lao sitoa, eiava moale gabudia idia lao dainai, ruma dekenai idia noho lasi. Unai dainai Sunday danu, ruma-ta-ruma-ta gaukara lalonai taunimanima davaridia be auka.

³ Taunimanima be edia ruma dekenai idia noho lasi neganai, ena anina be ma gabu ta dekenai idia noho. Iseda tahua gauna be taunimanima ida ita hereva dainai, namona be ita davaria taudia ita hereva henia​—dala ai, maketi ai, eiava gaukara gabuna ai. Paulo be vaia “ia davaria taudia” ia haroro henidia. (Kara 17:17) Paulo ena nega ai, unai bamona haroro gaukarana be anina namona ia havaraia, bona hari iseda nega lalonai danu unai gaukara ese anina namona ia havaraia.

⁴ Ruma ta ruma ta dekenai ita lao neganai, idia raka loaloa taudia, bona reana ta idia naria taudia ita itaia. Bema ita kiri henidia bona mai moale ida ita hanamodia, unai amo herevahereva ita hamatamaia diba. Bema edia ruma be kahirakahira ia noho, reana ita gwau diba idia ita davaria lasi edia ruma ai, to ita moale hari idia ida ita herevahereva diba. Bema ita naria lasi to mai goada ida taunimanima ita hereva henidia, ekspiriens namodia do ita moalelaia diba.

⁵ Mai Gari Lasi Oi Hereva Neganai, Anina Ia Havaraia: Tadikaka ta ia gwau basi idia naria taudia, idia raka loaloa taudia, eiava motuka dekenai idia helai taudia dekenai ia lao. Moale toana be ena vairana bona gadona amo ia hahedinaraia, dekena tauna namona ia ura ia vadivadi neganai ia hereva henia hegeregerena. Unai dala amo buka bona magasin momo ia hariharilaia bona Baibel stadi haida ia hamatamaia danu.

⁶ Tadikaka ma ta bona ena adavana be ruma ta ruma ta dekenai idia lao neganai, aniani amo ia honu baege ta ia huaia hahine ta idia itaia. Idia herevahereva matamaia bona ia idia hanamoa ia hekwarahi ena famili ia naria namonamo dainai. Bena idia nanadaia: ‘To daika be taunimanima durua gaudia ia henia diba?’ Unai amo hereva momokani ia ura henia matamaia. Herevahereva kwadogina murinai, idia ia boiria ena ruma dekenai, bona Baibel stadi idia hamatamaia.

⁷ Sunday eiava ma dina ta ai ruma-ta-ruma-ta gaukara oi karaia neganai, bema oi davaria taunimanima momo be edia ruma dekenai idia noho lasi, mai gari lasi danu​—dala dekenai, eiava ma gabu ta ai​—oi davaria taudia oi hereva henidia be namo, ani? (1 Tes. 2:2) Unai amo emu hesiai gaukara ese anina bada do ia havaraia bona emu hesiai gaukara amo moale bada herea do oi mamia.