Mai Edia Gau Lasi Taudia Ita Durua

¹ Iehova ese lauma dalanai iseda dabu gaudia durua totona “hesiai tauna mai ena kamonai” amo gau idauidau ia henia. (Mat. 24:​45-47) Unai gaudia momo be buka, Baibel, Gima Kohorona bona Awake! volium, vidio, kaset teipi, bona kompiuta disket, Baibel ita tahua totona. Iehova ese ia henia gaudia be hanaihanai idia hegeregere, bona gau ta ia negea kava lasi.

² Unai gaudia ibounai be moni bada herea amo idia karaia. Tanobada hegegemadai dekenai idia noho tadikaka ese unai moni idia henia. Unai be ia momokani, badina orea ese dala ia karaia davana lasi dalanai buka bona magasin ita hariharilaia, unai dainai gaukara ena davana ibounai be kontribusen amo idia karaia.

³ Ita Durua Diba Dalana: Paulo ena sisiba herevana ita abia dae diba, bona ‘mai edia gau lasi taudia ita durua.’ (Roma 12:13) Tanobada ibounai gaukarana be moni dalanai ita durua neganai, iseda tadikaka tanobada hegegemadai lalonai ita durua. Unai idia laloa dainai, haida ese edia lalona idia hadaia hua ta ta ai edia moni ena kahana ta amo tanobada ibounai gaukarana idia durua, Kingdom Hall ena davana idauidau idia durua hegeregerena. Idia diba unai moni be buka bona magasin karaia totona sibona lasi, to gaukara ena kahana ibounai ia durua totona.

⁴ Danu, ma haida ita durua diba bema ita abia diba gaudia totona oda ita karaia neganai, haida sibona ita oda karaia. Bona Society ese ia karaia davana bada gaudia ita oda neganai unai ita laloatao be gau badana. Unai gaudia haida be vidio, CD-ROM, buka badadia, Gima Kohorona bona Awake! volium, bona kaset teipi sabskripsen. Do ita gaukaralaia momokani gaudia sibona ita oda karaia​​—nega haida ruma bese taudia ibounai ese gau tamona idia gaukaralaia diba​​—bona unai kara ese iseda tadikaka ma gabu haida dekenai do ia durua, idia danu ese lauma gaudia idia abia, idia gini goada totona bona edia gabu dekenai sivarai namona harorolaia gaukarana do idia habadaia diba.​—Heb. 13:16; Fil. 2:4.

⁵ Kingdom Hall dekenai Society ena tanobada ibounai gaukarana durua totona ita henia kontribusen monina bona buka bona magasin idia abia kamonai taudia ese idia henia monina ese haroro gaukara dekenai ita hariharilaia buka bona magasin edia davana ena kahana idia karaia. To, ita laloa diba lasi taunimanima ma haida ese ita gaukaralaia gaudia, hegeregere ane bukadia, Yearbook, bona Baibel, edia davana idia durua. Iehova ena taunimanima ese edia davana ena kahana badana idia karaia. Unai dainai, pablisa momo idia laloa bema bisinesi ta ese unai gaudia ia karaia edia davana be hida, bena unai hegeregerena kontribusen idia henia. Bema iseda kontribusen be hegeregere lasi unai davana karaia totona, orea ese tanobada ibounai gaukarana ia habadaia dalana do ita koua.

⁶ Iesu ese ia hahedinaraia taunimanima ese iena hahediba taudia do idia diba momokani badina ta ta idia lalokau henia. (Ioa. 13:​34, 35) Tauanina dalanai iseda harihari bada karana amo, bona sibona iseda namo ita dadaraia dalanai mai edia gau lasi taudia ita durua karana amo, ita hahedinaraia diba ita be Keristani taudia momokanidia.