Ita Hegeregere Bona Ita Hegaegae Vadaeni Ma Haida Ita Hadibaia Totona
1 Iehova ese ena gwaukau tauna ai Mose ia abia hidi neganai, Mose ia laloa ia hegeregere lasi Dirava ena hereva be Farao dekenai do ia gwauraia. (Eso. 4:10; 6:12) Ieremia ia hahedinaraia ia laloa ia hegeregere lasi Iehova ena peroveta tauna ai do ia lao, Dirava dekenai ia gwau ia hereva diba lasi. (Ier. 1:6) Ena be matamanai idia laloa idia hegeregere lasi, to unai peroveta taudia rua idia hamomokania idia be Iehova ena gari lasi witness taudia. Dirava dainai idia hegeregere.
2 Hari inai negai, Iehova ita tanikiu henia badina ita be mai eda durua gaudia mai gari lasi ida iseda haroro gaukarana ita karaia totona. (2 Kor. 3:4, 5; 2 Tim. 3:17) Mekaniki tauna mai ena tulu ibounai bamona, ita hegaegae vadaeni iseda haroro gaukarana be mai diba ida ita karaia. January dekenai ita ese rau 192 buka gunadia do ita hariharilaia (Hadibaia Herevadia itaia). Ena be unai lauma tulu be matamata lasi, edia Baibel herevadia be mai anina hari bona unai buka ese taunimanima do idia durua hereva momokani idia diba totona. Herevana edena buka oi hariharilaia, iniseniai idia noho herevadia do oi gaukaralaia diba.
3 Edukeisini herevana ita gaukaralaia diba taunimanima be Dirava ena Hereva do idia laloa totona. Herevahereva be inai bamona do oi hamatamaia diba:
◼ “Hari inai negai, taunimanima ese edukeisini namona idia abia be namo idia herevalaia badabada. Dahaka oi laloa, ta ese edena bamona edukeisini do ia abia be namo moale bada ia abia bona mauri dekenai ia kwalimu totona? [Haere naria.] Dirava dekenai diba idia abia taudia be namo idia abia ela bona hanaihanai. [Aonega Herevadia 9:10, 11 duahia.] Inai buka maragina [oi hariharilaia bukana ena ladana gwauraia] ese Baibel ia herevalaia. Ia ese mauri hanaihanai dekenai ita ia hakaua dalana tamona ena badina ia hahedinaraia.” Buka lalonai ia noho haheitalai ta hahedinaraia. Davana maorona ai buka hariharilaia bona lou henia herevalaia.
4 Ia ida Baibel edukeisini ena namo oi herevalaia ruma tauna dekenai oi giroa lou neganai, reana oi gwau:
◼ “Guna lau vadivadi neganai, Baibel ena edukeisini be mauri hanaihanai ena badina ita herevalaia. To momokani, Baibel amo diba ita abia totona ita hekwarahi be namo. [Aonega Herevadia 2:1-5 duahia.] Taunimanima momo idia davaria Baibel ena kahana haida idia lalo-pararalaia be auka. Lau ura ai gaukaralaia momo dalana ta lau hahedinaraia, unai amo taunimanima ai durua Baibel ena hereva badadia idia diba totona.” Guna oi rakatania bukana gaukaralaia, kahana namona kehoa bona Baibel stadi dalana hahedinaraia. Bema ruma tauna ia ura stadi ia abia, oi hadibaia do oi giroa neganai stadi durua gauna, Diba ese Mauri Dekenai Ita Ia Hakaua Lao bukana, do oi mailaia.
5 Taunimanima momo be tanobada ena natudia milioni momo edia hisihisi idia laloa bada. Reana ruma tauna oi durua diba Dirava ese edena bamona unai hekwakwanai ia laloa dalana ia diba totona oi gwau:
◼ “Lau laloa oi ese nius oi itaia neganai, idia ese tanobada hegegemadai idia hitolo, idia gorere, bona ta ese ia naria lasi natudia idia herevalaia. Dahaka dainai natudia idia laloa bada orea idauidau be hegeregere lasi unai hekwakwanai idia kokia? [Haere naria.] Dirava be taunimanima edia namo sibona ia ura. Baibel lalonai natudia bona taunimanima badadia totona ia karaia gwauhamatana mani oi itaia. [Apokalupo 21:4 duahia.] Inai buka [ladana gwauraia] ese Dirava do ia karaia tanobadana ia herevalaia, unai tanobadana lalonai hisihisi be lasi.” Bema ia hegeregere, Paradaiso ena laulau ta hahedinaraia bona herevalaia. Buka hariharilaia bona lou henia herevalaia.
6 Bema nega ginigunana ai natudia edia hisihisi oi herevalaia, oi giroa lou neganai reana inai bamona do oi hereva:
◼ “Vanegai lau mai neganai, oi gwau famili idia parara, hitolo, gorere, bona dagedage karadia dainai hisihisi idia davaria natudia oi laloa bada. Baibel amo natudia eiava tatau bona hahine be gorere, hisihisi, eiava mase dainai idia hekwarahi lasi tanobadana ena sivarai ita duahia ese iseda mamina ia hanamoa. Isaia bukana ena peroveta herevana ta ese tanobada maurina namona ia hahedinaraia.” Isaia 65:20-25 duahia bona herevalaia. Diba bukana amo Baibel stadi do umui hamatamaia herevalaia.
7 Tomadiho idia laloa taudia momo be idia guriguri dainai, unai oi herevalaia diba inai dala amo:
◼ “Iseda mauri lalonai, ita momo be hekwakwanai ita davaria bona unai dainai Dirava ita guriguri henia heduru ita abia totona. To, momo idia laloa edia guriguri ena haere idia abia lasi. Toana be taunimanima vairanai maino totona idia guriguri tomadiho gunalaia taudia edia guriguri danu be ta ese ia kamonai lasi. Unai bamona ita gwau diba badina tuari bona dagedage karadia dainai taunimanima idia do lalohisihisi noho. Momokani Dirava ese iseda guriguri ia kamonai henia, a? Bema ia kamonai, dahaka dainai toana be guriguri momo edia haere ia henia lasi? [Haere naria.] Salamo 145:18 ia hahedinaraia dahaka do ita karaia bena iseda guriguri edia haere do ita abia. [Siri duahia.] Badina tamona be, Dirava ita guriguri henia neganai namona be iseda guriguri be momokani bona ena Hereva, Baibel ena hereva momokani hegeregerena.” Oi hariharilaia bukana hahedinaraia, bona guriguri ena anina ia herevalaia dalana gwauraia.
8 Guriguri oi herevalaia tauna dekenai oi giroa lou neganai, reana inai hereva oi tohoa diba:
◼ “Guna iseda kiki guriguri dekenai lau moalelaia. Lau diba Iesu ena hereva, edena gaudia ita gurigurilaia be maoro herevana, ese oi do ia durua.” Mataio 6:9, 10 duahia, Iesu ese ena guriguri lalonai ia herevalaia gau badadia oi hahedinaraia. Diba bukana ena karoa 16, “Dirava Kahirakahira Oi Lao Diba Dalana,” herevalaia, bona nanadaia bema stadi dalana oi hahedinaraia diba.
9 Dirava ena diba be ma haida dekenai ita herevalaia gaukarana dekenai, ita henanadai diba, “Inai gaukara karaia totona daika ia hegeregere?” Baibel ese ia hahedinaraia ita be hegeregere.—2 Kor. 2:16, 17.