Palani Karaia Guna!
1 Iehova ena orea ese tiokratik gaukaradia edia program ia karaia hanaihanai, iseda lauma gaudia ibounai ita abia totona. Lauma gaudia laloa bada karana ese ita ia doria bena idia hegaegaelaia gaudia ibounai, hegeregere sekit o distrik naria taudia edia vadivadi, hebouhebou, bona iseda kongregesen ai idia hegaegaelaia gaudia ma haida amo namo ita abia momokani. (Mat. 5:3) To, haida ese unai lauma gaudia momo edia namo idia reaia, badina ma palani haida idia karaia vadaeni. Dahaka ita karaia unai ia vara lasi totona? Edena bamona do ita hamomokania gaukara idaudia ese “gau namodia” idia koua lasi?—Fil. 1:10.
2 Mai Aonega ida Palani Ita Karaia be Gau Badana: Aonega Herevadia 21:5 ia gwau: “Mai haheauka danu ia gaukara noho tauna ena [palani], ese anina ia havaraia bada noho, to laloa haraga taudia be do idia ogogami.” Lauma dalanai “anina” ita havaraia totona, palani ita karaia namonamo guna be namo, bona idia hegaegaelaia vadaeni tiokratik gaukaradia ita laloaboio lasi. Namona be sibona eda ura gaukaradia totona ita atoa negana ese lauma hahenamo do ita abia negana ia hadikaia lasi. Bema sibona eda ura gaudia karaia totona palani ita karaia haraga bona do idia vara tiokratik gaukaradia ita laloa lasi, toana be lauma dalanai do ita “ogogami.”
3 Oi Reaia Lasi! Ita ibounai ese vaira negana totona palani ita karaia, unai be laga-ani, bisinesi ena laolao, varavara ida vadivadi, bona ma gau haida. Oi do gwauhamata lasi o emu palani oi do hamomokania lasi neganai, do idia vara lauma gaukaradia oi itaia namonamo guna. Bema oi davaria sekit naria tauna be do ia mai o hebouhebou ta idia hegaegaelaia negana be do oi noho lasi negana lalonai, namona be oi hekwarahi emu palani do oi haidaua unai lauma gaudia idia abia neganai do oi noho totona. Ita idia hadibaia namonamo guna, dahaka gau badadia be idia hegaegaelaia vaira negana totona. Emui kongregesen ai idia noho elda taudia ese emui kongregesen totona idia palanilaia gaudia be oi idia hamaoroa diba.
4 Do idia vara gaudia ita lalohadailaia guna bona mai anina bada gaudia totona palani ita karaia guna neganai, iseda ‘kara ibounai be do idia namo momokani. . . . Dirava ese hanamoa bona hairai do ia abia totona.’—Fil. 1:11.