World Cup Gadara ese Taunimanima Ia Hatamonaia Diba, A?​—Baibel be Dahaka Ia Gwau?

November 20, ia lao December 18 2022 ai, taunimanima faiv bilioni bamona be FIFA World Cup do idia itaia. Momo idia laloa unai bamona gadara itaia totona idia mai karana ese taunimanima ia durua bona lalotamona ia havaraia.

• “Spot gadara be mai ena siahu, tanobada ia senisia diba. Unai gadara ese taunimanima ia hagoadaia. Gadara be mai ena siahu taunimanima ia hatamonaia totona.”​—Nelson Mandela, South Africa ena presiden gunana.

• “Football . . . ese taunimanima ia hatamonaia dainai idia mamia idia be mai edia helaro, idia moale, bona taunimanima idia lalokau henia, bona edia ura be tamona.”​—Gianni Infantino, FIFA ena presiden.a

World Cup o spot gadara ma haida ese unai ia hagugurua diba, a? Maino bona lalotamona helarona ia noho, a?

Gadara ese taunimanima ia hatamonaia, a?

Inai lagani ena World Cup gadara dainai taunimanima ese social bona politikol lalonai, taunimanima edia maoro, bese, bona moni ena hekwakwanai totona idia hepapahuahu.

To, momo idia laloa intanesinol spot gadara, hegeregere World Cup ese taunimanima dekenai moale ia havaraia. Herevana taunimanima ese spot gadara idia ura henia bada, to idia do ia hatamonaia diba lasi. Danu, unai bamona hapararaia karana ese ia hahedinaraia ita be “dina gabedia ai” ita noho.​—2 Timoteo 3:1-5.

Tanobada ia hatamonaia helaro korikorina

Baibel ese tanobada ai do ia vara lalotamona ena helaro korikorina ia herevalaia. Ia gwauhamata taunimanima ibounai be mai lalotamona ida guba gavamani ta, idia gwauraia “ Dirava ena Basileia” henunai do idia noho.​—Luka 4:43; Mataio 6:10.

Unai Basileia ena King, Iesu Keriso, do ia itaia tanobada ibounai dekenai maino ia noho. Baibel ia gwau:

• “Kara maoromaoro do ia bada, bona maino do ia bada herea.”​—Salamo 72:7.

• “Ia ese heduru totona idia noinoi ogogami taudia do ia hamauria  .  Ia ese hisihisi bona dagedage karadia amo idia do ia hamauria.”​—Salamo 72:12,14.

Hari danu, Iesu ena hahediba herevadia ese taunimanima milioni tano 239 lalonai ia hatamonaia. Haida inai henia o dadaraia karana idia hadokoa. Diba ma haida totona atikol ladana “Inai Henia Karana Ita Hadokoa” duahia.