“Ai Oi Hamaoroa, Unai Gaudia Be Edena Negai Do Idia Vara?”

1. Aposetolo taudia bamona ita danu ita ura dahaka ita diba?

IESU ena hesiai gaukara tanobada ai be kahirakahira do ia ore, bona ena hahediba taudia idia ura vaira negana ai do idia vara gaudia idia diba. Unai dainai, iena mase dinana be ia kahirakahira neganai, ena aposetolo taudia foa ese idia nanadaia: “Unai gaudia be edena negai do idia vara, bona do oi noho negana bona inai nega oromana ena dokona ena toana be dahaka?” (Mat. 24:3; Mar. 13:3) Iesu ena haere be Mataio karoa 24 bona 25 ai ia herevalaia peroveta herevadia ese idia hahedinaraia. Unai peroveta herevadia lalonai Iesu ese do idia vara gaudia momo ia herevalaia. Iena hereva be mai anina bada ita dekenai, badina ita danu ita ura vaira negana ai do idia vara gaudia ita diba.

2. (a) Lagani momo lalodiai, orea idia gunalaia horoa tadikaka be dahaka idia stadilaia? (b) Edena henanadai toi edia haere do ita tahua?

² Lagani momo lalodiai, orea idia gunalaia horoa tadikaka be Iesu ena peroveta herevadia dina gabedia totona idia stadilaia. Idia ura unai peroveta herevadia edia guguru negana idia diba. Inai atikol lalonai ita ese unai peroveta herevadia dekenai diba matamata do ita herevalaia. Inai henanadai toi edia haere do ita tahua: (1) Edena negai “hisihisi badana” do ia matamaia? (2) Edena negai Iesu ese “mamoe” bona “nanigosi” do ia hahemaoro henidia? Bona (3) Edena negai Iesu do ia “mai” o ginidae?—Mat. 24:21; 25:31-33.

EDENA NEGAI “HISIHISI BADANA” DO IA MATAMAIA?

3. Guna iseda lalohadai hisihisi badana dekenai be dahaka?

³ Guna ita laloa, hisihisi badana be lagani 1914, Tanobada Tuarina Ginigunana ia vara neganai ia matamaia. Bona ita laloa lagani 1918 ai tuari ia doko neganai, Iehova ese “unai nega ia hakwadogia,” unai amo horoa orena taudia ese sivarai namona be bese ibounai dekenai idia harorolaia diba. (Mat. 24:21, 22) Danu ita laloa, unai haroro gaukara idia haorea murinai, Dirava ese Satani ena tanobada do ia haorea. Unai dainai, ita laloa hisihisi badana ena kahana be toi: Lagani 1914 ai ia matamaia, lagani 1918 ai Dirava ese ia “hakwadogia,” bona Aramagedono ai do ia ore.

4. Dina gabedia ena peroveta herevadia ita stadilaia murinai dahaka ita lalopararalaia?

⁴ aTo, dina gabedia ena peroveta herevadia ita stadilaia namonamo murinai, ita laloparara unai peroveta herevana ena kahana ta ena guguru negadia be rua. (Mat. 24:4-22) Nega ginigunana be aposetolo edia nega ai Iudea dekenai ia guguru. Bona iharuana be iseda nega ai tanobada hegegemadai do ia guguru. Unai ita lalopararalaia dainai, dina gabedia ena peroveta herevadia dekenai guna ita abia dae gaudia ita haidaua.—Maua ai futnout 1 itaia.

5. (a) Lagani 1914 ai dahaka ia vara? (b) “Hisihisi ena matamana” be edena negai ia vara gauna ida ita hahegeregerea diba?

⁵ Hegeregere, ita laloparara hisihisi badana be lagani 1914 ai ia matamaia lasi. Edena dala ai unai ita diba? Baibel ena peroveta herevadia ese idia hahedinaraia hisihisi badana ia matamaia neganai, tanobada besedia be ta ta do idia tuari henia lasi, to idia ese tomadiho koikoi ibounai do idia tuari henia. Unai dainai ita gwau diba, lagani 1914 ai idia vara gaudia be “hisihisi ena matamana sibona.” To, ia be hisihisi badana lasi. (Mat. 24:8) Unai “hisihisi ena matamana” be lagani 33 C.E. ia lao 66 C.E. ai Ierusalema bona Iudea dekenai ia vara gauna bamona.

6. Edena dala ai do ita diba hisihisi badana ia matamaia?

⁶ Edena dala ai do ita diba hisihisi badana ia matamaia? Iesu ia gwau: “Gabu ia hadikaia gau dika rohorohona, Daniela ese ia herevalaia gauna be helaga gabuna dekenai ia gini umui itaia neganai (duahia tauna ia laloa namonamo be namo), Iudea dekenai idia noho taudia be ororo dekenai do idia heau lao be namo.” (Mat. 24:15, 16) Lagani 66 C.E. ai, unai peroveta herevana be nega ginigunana ia guguru. Unai negai, Roma tuari oreana (“gau dika rohorohona”) ese Ierusalema bona ena dubu (Iuda taudia dekenai ia be helaga gabuna) ia tuari henia. Unai ese ia hamomokania, gau dika rohorohona be “helaga gabuna dekenai ia gini” vadaeni. Vaira negana ai, unai peroveta herevana be nega iharuana do ia guguru. Unai nega ai, United Nations (iseda negai ia noho “gau dika rohorohona”) ese Kerisendom (sibona idia gwauraia Keristani taudia dekenai ia be helaga gabuna) bona Babulonia Badana ibounai do ia tuari henidia. Apokalupo 17:16-18 ese unai tuari ia herevalaia danu. Unai tuari ese hisihisi badana do ia hamatamaia.

7. (a) Edena dala ai lagani 66 C.E. ai horoa Keristani taudia idia heau mauri? (b) Vaira negana ai dahaka do ia vara?

⁷ Iesu ma ia gwau: “Unai nega do ia hakwadogia.” Lagani 66 C.E. ai, unai peroveta herevana be nega ginigunana ia guguru. Unai nega ai, Roma tuari oreana ese ena tuari negana ia “hakwadogia.” Unai amo, Ierusalema bona Iudea ai idia noho horoa Keristani taudia ‘do idia mauri.’ (Mataio 24:22 duahia; Mal. 3:17) Vadaeni, vaira negana ai hisihisi badana lalonai dahaka do ia vara? United Nations ese tomadiho koikoi ibounai ia tuari henia negana be Iehova ese do ia “hakwadogia.” Unai amo United Nations ese tomadiho momokani be tomadiho koikoi ida do ia hadikaia ore lasi. Unai dala amo Dirava ena taunimanima ibounai be do idia roho mauri.

8. (a) Hisihisi badana ena kahana ginigunana ia ore murinai dahaka gaudia do idia vara? (b) Edena negai horoa orena tauna ginigabena be ena guba ahuna do ia abia? (Futnout mauana itaia.)

⁸ bIehova ese hisihisi badana ena nega ia hakwadogia murinai dahaka do idia vara? Iesu ena peroveta herevana ese ia hahedinaraia nega sisina lalonai gau haida do idia vara, bena gabeai Aramagedono do ia matamaia. Unai gaudia be Esekiela 38:14-16 bona Mataio 24:29-31 (duahia) ese idia herevalaia. (Maua ai futnout 2 itaia.) Hisihisi badana ena dokonai, Aramagedono do ia vara, unai be hegeregere lagani 70 C.E. ai Roma ese Ierusalema ia hadikaia ore bamona. (Mal. 4:1) Hisihisi badana be idau momokani, badina ena dokonai Aramagedono tuarina do ia vara—“tanobada ena matamaia negana amo ema bona hari, unai bamona hisihisi ta ia vara lasi.” (Mat. 24:21) Aramagedono ia ore murinai, Keriso ena Lagani 1,000 Lohia Negana do ia matamaia.

9. Edena dala ai Iesu ena peroveta herevana hisihisi badana totona, ese Iehova ena orea taudia ia hagoadaia?

⁹ Unai peroveta herevana ese ita ia hagoadaia bada. Dahaka dainai? Badina ita ia hadibaia herevana dahaka hekwakwanai ita davaria, to ita, Iehova ena orea taudia be hisihisi badana amo do ita roho mauri. (Apok. 7:9, 14) Danu, ita moale badina Aramagedono ai Iehova ese ena lohia siahuna do ia abia isi, bona ena ladana do ia hahelagaia.—Sal. 83:18; Ese. 38:23.

EDENA NEGAI IESU ESE “MAMOE” BONA “NANIGOSI” IA HAHEMAORO HENIDIA?

10. Guna ita ese mamoe bona nanigosi ena parabole be edena bamona ita lalopararalaia?

¹⁰ Iesu ena peroveta herevana ena kahana ma ta—mamoe bona nanigosi do ia hapararaia parabolena—do ia guguru negana mani ita herevalaia. (Mat. 25:31-46) Guna ita laloa, lagani 1914 ai Iesu ese taunimanima be mamoe eiava nanigosi bamona ia hahemaoro henia gaukarana ia matamaia. Unai dainai, ita laloa Basileia ena sivarai idia dadaraia bona hisihisi badana ia do matamaia lasi neganai idia mase taudia be nanigosi bamona taudia, bona do idia toreisi lou lasi.

11. Dahaka dainai Iesu be lagani 1914 ai hahemaoro gaukarana ia hamatamaia lasi?

¹¹ cLagani 1995 ai, Gima Kohorona ese Mataio 25:31 ena hereva ia tahua namonamo. Unai siri ia gwau: “Taunimanima ena Natuna be mai hairai ida ena aneru ibounai danu do ia mai neganai, ena terona hairaina latanai do ia helai.” Unai Gima Kohorona ese ia hahedinaraia, lagani 1914 ai Iesu be Dirava ena Basileia ena King ai ia lao, to ia be “bese iboudiai” hahemaoro henia totona ‘ena terona hairaina latanai ia do helai’ lasi. (Mat. 25:32; Daniela 7:13 sekea.) To mamoe bona nanigosi hahemaoro henia parabolena ese ia hahedinaraia, Iesu be Hahemaoro Tauna. (Mataio 25:31-34, 41, 46 duahia.) Lagani 1914 ai Iesu be bese iboudiai edia Hahemaoro Tauna ai ia do lao lasi, unai dainai taunimanima be mamoe eiava nanigosi bamona ia hahemaoro henia gaukarana be lagani 1914 ai ia matamaia lasi. (Maua ai futnout 3 itaia.) Vadaeni, edena negai Iesu ese hahemaoro gaukarana do ia hamatamaia?

12. (a) Edena negai Iesu ese bese iboudiai hahemaoro henia gaukarana do ia hamatamaia? (b) Mataio 24:30, 31 bona Mataio 25:31-33, 46 ese dahaka idia herevalaia?

¹² dIesu ena peroveta herevana dina gabedia totona ese ia hahedinaraia, tomadiho koikoi idia hadikaia ore murinai, Iesu ese bese iboudiai hahemaoro henia gaukarana do ia hamatamaia. Paragraf 8 ai ita itaia bamona, do idia vara gaudia haida be Mataio 24:30, 31 ese ia herevalaia. Unai siri oi stadilaidia namonamo neganai, do oi itaia Iesu ese ia perovetalaia gaudia haida be mamoe bona nanigosi parabolena lalonai ia herevalaia gaudia bamona. Hegeregere, taunimanima ena Natuna be mai hairai ida ena aneru ibounai danu do ia mai; bese iboudiai do idia hebou bona mamoe bamona taudia ese ‘edia kwarana do idia abia isi,’ badina “mauri hanaihanai” do idia abia. (Maua ai futnout 4 itaia.) To, nanigosi bamona taudia be “mai taitai danu edia kemena do idia botaia,” badina idia laloparara “do idia mase ela bona hanaihanai.”—Mat. 25:31-33, 46.

13. (a) Edena negai Iesu ese taunimanima be mamoe eiava nanigosi bamona do ia hahemaoro henia? (b) Unai diba matamatana dainai eda haroro gaukara be edena bamona ita laloa be namo?

¹³ Unai amo dahaka ita diba? Iesu be hisihisi badana negana ai do ia mai, bona bese iboudiai be mamoe o nanigosi bamona do ia hahemaoro henidia. Bena hisihisi badana ena dokona, Aramagedono ai, nanigosi bamona taudia do idia “mase ela bona hanaihanai.” Unai diba matamatana dainai eda haroro gaukara be edena bamona ita laloa be namo? Ita laloparara iseda haroro gaukara be mai anina bada. Hisihisi badana ia do matamaia lasi lalonai, nega ia noho taunimanima ese edia lalohadai idia haidaua bona “mauri ia lao henia” dala maragina dekenai idia raka totona. (Mat. 7:13, 14) Momokani, hari taunimanima haida be edia kara amo idia hahedinaraia idia be mamoe eiava nanigosi bamona. To namona be ita laloatao, mamoe bona nanigosi hahemaoro henia gaukarana be hisihisi badana ena nega ai do ia vara. Unai dainai, namona be ita gaukara goada momo ita durua Basileia ena sivarai idia kamonai bona abia dae totona.

EDENA NEGAI IESU DO IA “MAI,” O GINIDAE?

14, 15. Edena siri foa ese vaira negana ai, Iesu be Hahemaoro Tauna bamona do ia mai idia herevalaia?

¹⁴ Iesu ena peroveta herevana ita tahua namonamo murinai, eda lalohadai gau haida dekenai ita haidaua be namo, a? Inai peroveta herevadia ese haere do idia henia. Mani ita itaia.

¹⁵ eMataio 24:29–25:46 lalonai, Iesu be dina gabedia bona hisihisi badana ai do idia vara gaudia ia perovetalaia. Unai peroveta herevadia lalonai Iesu ese ena “mai” o ginidae negana be nega eit ia herevalaia. (Maua ai futnout 5 itaia.) Hisihisi badana ia herevalaia neganai, ia gwau: “Do idia itaia taunimanima ena Natuna be . . . ori latanai do ia mai.” “Emui Lohiabada ia mai dinana be umui diba lasi.” “Umui laloa lasi horana ai, taunimanima ena Natuna do ia mai.” Bona Iesu ese mamoe bona nanigosi parabolena ia gwauraia neganai, ia gwau: “Taunimanima ena Natuna be mai hairai ida . . . do ia mai.” (Mat. 24:30, 42, 44; 25:31) Unai siri foa ese vaira negana ai Iesu be Hahemaoro Tauna bamona do ia mai idia herevalaia. Iesu ena “mai” idia herevalaia siridia ma foa be dahaka?

16. Edena siri ma haida ese Iesu ena “mai” idia herevalaia?

¹⁶ Iesu be igui hesiai tauna mai ena kamonai bona kara maoromaoro ia herevalaia neganai, ia gwau: “Bema ena Biaguna ia mai bona ia itaia ia be unai bamona ia karaia, unai igui hesiai tauna do ia moale!” Rami-hebou kekenidia edia parabole ai Iesu ia gwau: “Vadaeni oela hoia totona idia lao noho lalonai, headava matamata tauna ia ginidae.” Moni ena parabole ai, Iesu ia gwau: “Nega daudau murinai, unai igui hesiai taudia edia biaguna ia mai.” Unai parabole tamona lalonai, biaguna ia gwau: “Lau giroa lou neganai, egu moni be atoa kau monina ida do lau abia.” (Mat. 24:46; 25:10, 19, 27) Unai siri foa be edena nega idia herevalaia?

17. Guna Mataio 24:46 ese ia herevalaia Iesu ena “mai” dekenai eda lalohadai be dahaka?

¹⁷ Guna eda pablikeisen ese idia hahedinaraia, unai siri foa be lagani 1918 ai Iesu ia mai o ginidae negana idia herevalaia. Hegeregere, Iesu ese ia herevalaia “igui hesiai tauna mai ena kamonai bona mai ena kara maoromaoro” mani ita laloa. (Mataio 24:45-47 duahia.) Guna ita laloa, siri 46 ese ia herevalaia Iesu ena “mai” be lagani 1918 ai ia vara. Unai nega ai, Iesu ia mai bona horoa taudia ia sekea, bema idia be Dirava idia badinaia noho o lasi. Bena lagani 1919 ai, igui hesiai tauna ia abia hidi Biaguna ena kohu ibounai ia naria totona. (Mal. 3:1) To, Iesu ena peroveta herevana ena kahana haida idia guguru negadia ita tahua namonamo murinai, ita laloparara eda lalohadai ita haidaua be namo. Dahaka dainai?

18. Iesu ena peroveta herevana ibounai ita stadilaia neganai, iena “mai” dekenai dahaka ita lalopararalaia?

¹⁸ Mataio 24:46 ena vairana siridia ese “mai” idia gaukaralaia neganai, anina be hisihisi badana lalonai Iesu do ia mai bese ibounai hahemaoro henia bona edia dika davana karaia totona. (Mat. 24:46, 30, 42, 44) Danu, paragraf 12 ai Mataio 25:31 ese Iesu ena “mai” ia herevalaia neganai, ia danu be unai vaira negana ai do ia vara hahemaoro karana ia herevalaia. Unai dainai ita gwau diba, Mataio 24:46, 47 ena hereva bamona, Iesu ia ginidae bona igui hesiai tauna ia abia hidi ena kohu ibounai do ia naria negana, be vaira negana ai hisihisi badana ena nega lalonai do ia guguru. Oibe, unai peroveta herevana ibounai ita stadilaia neganai, ia hedinarai goevagoeva Iesu ena “mai” idia herevalaia siri eit, be vaira negana ai hisihisi badana lalonai do ia vara hahemaoro negana idia herevalaia.

19. Inai stadi ai edena diba matamata ita abia, bona wiki vaira ena stadi ai edena henanadai do ita haerelaidia?

¹⁹ Ita herevalaia vadaeni gaudia amo, dahaka diba matamatana ita abia? Inai stadi ena matamanai ita herevalaia henanadai toi edia haere be inai: Ginigunana be, hisihisi badana be lagani 1914 ai ia matamaia lasi, to United Nations ese Babulonia Badana ia tuari henia neganai do ia matamaia. Iharuana be, Iesu ese mamoe bona nanigosi do ia hahemaoro henia karana be lagani 1914 ai ia matamaia lasi, to hisihisi badana ai do ia vara. Ihatoina be, Iesu do ia mai bona igui hesiai tauna ia abia hidi ena kohu ibounai ia naria negana be lagani 1919 ai ia vara lasi, to hisihisi badana ai do ia karaia. Unai dainai, ita gwau diba matamanai ita herevalaia henanadai toi edia haere be vaira negana ai do ia vara hisihisi badana idia herevalaia. Edena dala ai inai stadi amo ita abia diba matamatana ese ita do ia durua, igui hesiai tauna ena parabole ita lalopararalaia namonamo totona? Danu, edena dala ai inai diba matamata ese ita ia durua, dina gabedia totona Iesu ese ia gwauraia parabole ma haida ita lalopararalaia totona? Unai henanadai badadia be vaira wiki ena stadi ai do ita haerelaidia.