Edukeisini Oi Gaukaralaia Iehova Hanamoa Totona
“Sibona ena ura herevadia ia gwauraia tauna be sibona dekenai hanamoa dala ia tahua, to ia siaia Diravana dekenai hanamoa dala ia tahua tauna be momokani tauna, bona iena lalona dekenai koikoi ia noho lasi.”—IOANE 7:18.
EDUKEISINI be idaunegai momokani ia matamaia. Hadibaia Tauna Hereadaena, Iehova Dirava, ese ena Natuna roboana ia havaraia, bena daudau lasi hahediba karana ia matamaia. (Isaia 30:20; Kolose 1:15) Iena Natuna be mai ena dala Hadibaia Tauna Hereadaena ena amo diba do ia abia! Lagani tausen tausen, ita duahia diba lasi laganidia, lalonai, unai Natuna—gabeai ena ladana idia hatoa Iesu Keriso—be Tamana ida idia noho bona idia hetura namo herea. Unai nega lalonai edukeisini namo hereana ia abia—Iehova Dirava ese ena kara, ena gaukara, bona ena ura ia hadibalaia. Unai dainai, gabeai, tanobada ai ia noho neganai, Iesu ia gwau: “Kara ta danu lau sibona lau karaia lasi, to Tamana ese lau dekenai ia hadibaia hegeregerena lau hereva.”—Ioane 8:28.
2 Iesu ese unai edukeisini be edena bamona ia gaukaralaia? Lagani toi mai kahana lalonai tanobada ai ia haroro neganai, ia dibaia vadaeni herevadia be taunimanima ma haida ia hadibaia mai ena hesiku lasi. To, unai bamona ia karaia, ena ura badana ta hagugurua totona. Bona unai be dahaka? Mani Iesu ena hereva Ioane karoa 7 ai do ita tahudia, badina be unuseniai ia hahedinaraia iena hahediba herevadia be daika ena amo ia abia bona dahaka dainai ia hahediba.
3 Unai neganai idia vara gaudia mani ita laloa. Unai be October huana bamona, lagani 32 C.E. ai, lagani toi bamona Iesu ia bapatiso murinai. Iuda taudia be Ierusalema ai idia hebou, Au Raurau Ruma Maragidia Ariana totona. Aria ena dina ginigunadia ai, taunimanima ese Iesu idia herevalaia momo. Aria dinadia haida be idia ore, to haida be idia do noho neganai, Iesu be dubu helaga ia lao bena ia hadibaia matamaia. (Ioane 7:2, 10-14) Vaia ena kara hegeregerena, ia hamomokania ia be Hadibaia Tauna badana ta.—Mataio 13:54; Luka 4:22.
4 Ioane karoa Ioa 7 siri 15 ia gwau: “Vadaeni Iuda taudia idia hoa, idia gwau, ‘Inai tau be ia sikuli lasi, to edena bamona ia diba momo?’ ” Edia daradara ena badina oi lalo-pararalaia, a? Iesu be rabi taudia edia sikuli ai ia sikuli lasi, unai dainai idia laloa edukeisini ia abia lasi! To, Iesu ese Revareva Helagadia lalonai hereva ta ta ia davaria haraga diba bona ia duahia diba mai ena hekwarahi lasi. (Luka 4:16-21) Unai Galilea tauna, kamuta tauna unai, ese Mose ena Taravatu ia hahedibalaidia danu! (Ioane 7:19-23) Unai be edena bamona ia karaia diba?
5 Ioa 7 Siri 16 bona 17 ai ita duahia hegeregerena, Iesu ia gwau: “Lauegu hadibaia herevadia be lauegu lasi, to lau ia siaia Diravana ena. Tau ta bema ia ura Dirava ena ura ia karaia neganai, ia ese lauegu hadibaia herevadia do ia diba, Dirava dekena amo idia mai, o lau sibona dekena amo.” Idia ura diba daika ese Iesu ia hadibaia, bena ia hamaorodia goevagoeva Dirava ese ia hadibaia!—Ioane 12:49; 14:10.
6 Iesu ese ena edukeisini be edena bamona ia gaukaralaia? Ioane 7:18 ai Iesu ia gwau: “Sibona ena ura herevadia ia gwauraia tauna be sibona dekenai hanamoa dala ia tahua, to ia siaia Diravana dekenai hanamoa dala ia tahua tauna be momokani tauna, bona iena lalona dekenai koikoi ia noho lasi.” Iesu ese ena edukeisini be ‘aonega bada Diravana,’ Iehova, hanamoa totona ia gaukaralaia be maoro!—Iobu 37:16.
7 Unai amo Iesu ese ita ia hadibaia gauna mai anina bada be inai: Namona be edukeisini ita gaukaralaia, ita siboda hanamoa totona lasi, to Iehova hanamoa totona. Edukeisini gaukaralaia dalana ma ta ese unai dala ia hereaia lasi. Vadaeni, edena dala amo edukeisini oi gaukaralaia diba, Iehova hanamoa totona?
8 Edukeisini ena anina be ‘diba gaukaralaia dalana ta, eiava ima gaukarana ta, eiava gaukara idauna ta be sikuli lalonai hadibaia karana.’ Harihari, edukeisini maorona amo ita tahua gaudia hani, bona Iehova hanamoa totona idia ta ta ita gaukaralaia diba daladia, be mani ita laloa. Namona be edukeisini maorona ese ita ia durua (1) ita duahiduahi namonamo totona, (2) ita toretore namonamo totona, (3) iseda diba ita habadaia bona iseda kara ita hamaoromaoroa totona, bona (4) iseda mauri durua gaukaradia karaia daladia ita diba totona.
Duahiduahi Namonamo Dalana Dibaia
9 Gau ginigunana be duahiduahi namonamo dalana dibaia. Dahaka dainai ta ia duahiduahi namonamo diba be gau badana? The World Book Encyclopedia ia gwau: “Duahiduahi . . . be diba abia dalana ena matamana bona ta ena mauri durua karana badana ta. . . . Duahiduahi idia diba namonamo taudia be edia diba amo edia bese taudia idia durua, bena edia gaukara ese anina bada ia havaraia. Inai danu, idia sibodia edia mauri be mai anina bada bona idia moalelaia bada.”
10 Bema buka idauidau ita duahia dainai ‘iseda mauri be mai anina bada bona ita moalelaia bada’ diba, Dirava ena Hereva duahia karana ena hahenamo ese unai ia hereaia momokani! Unai bamona duahiduahi ese iseda darana bona iseda lalona ia kehoa, Iehova ena lalohadai bona ena ura do ita diba totona, bona unai gau ita lalo-pararalaidia goevagoeva neganai, iseda mauri be mai anina. Ma danu, Heberu 4:12 ia gwau: “Dirava ena hereva be ia mauri noho, bona ia be mai ena siahu.” Dirava ena Hereva ita duahia bona ita laloa dobu lalonai, unai hereva ese ita ia veria lao ia Havaraia Tauna kahirakahira dekenai, bona ita ia hagoadaia iseda kara do ita haidaua, ita do ia moale henia bada totona. (Galatia 5:22, 23; Efeso 4:22-24) Ita ia hagoadaia danu, ita duahia herevadia momokanidia namodia be ma haida dekenai do ita gwauraia hedinarai totona. Unai ibounai ese Hadibaia Tauna Hereadaena, Iehova Dirava, ia hanamoa. Unai be duahiduahi gaukaralaia dalana hereadaena!
11 Ena be ita matamata eiava ita buruka, to ita idia hagoadaia duahiduahi namonamo karana do ita dibaia, badina be duahiduahi be mai anina bada iseda Keristani maurina lalonai. Siboda eda stadi ita karaia namonamo, anina be Dirava ena Hereva ita duahia loulou sibona lasi, to Baibel sirina be Dina Iboudiai Buka Helaga Tahua bukana amo ita duahia, Gima Kohorona bona Noga! ita duahia, bona Keristani heboudia totona ita hegaegae. Bona Keristani haroro gaukarana be edena bamona? Ia hedinarai goevagoeva, haroro gaukarana, kamonai taudia lou henidia gaukarana, bona Baibel stadi karaia gaukarana karaia totona, gau badana be ta ia duahiduahi namonamo diba.
Toretore Namonamo Dalana Dibaia
12 Edukeisini maorona amo ita tahua gauna iharuana be ia ese ita do ia durua, toretore namonamo dalana do ita dibaia totona. Toretore amo iseda hereva bona iseda lalohadai be taunimanima ita hadibaia diba, bona unai hereva idia boio lasi. Lagani handred momo herea idia lao vadaeni, Dirava ese ena lauma amo Iuda tataudia 40 bamona ia hadibadia herevadia be idia ese pepa eiava animal kopina ai idia torea, bena unai toretore be Revareva Helagadia ai idia lao. (2 Timoteo 3:16) Momokani, unai toretore ese toretore oredia iboudiai ia hereaia! Unai nega amo Iehova ese unai hereva helagadia torea hanai loulou gaukarana ia naria dainai, ita abidia neganai idia maoro. Iehova ese ena hereva be taunimanima edia uduna amo ia halasia sibona lasi, to haida ia hasiahua, unai hereva do idia torea totona; unai ita moalelaia bada, ani?—Esodo 34:27, 28 itaia.
13 Idaunegai, Mesopotamia bona Aigupito ai, taunimanima haida sibodia, hegeregere toretore taudia, be idia toretore diba bona idia duahiduahi diba. To Israela ai, taunimanima iboudiai idia hagoadaia, toretore bona duahiduahi do idia dibaia totona; unai dala ai idia be bese idaudia amo idia idau. Deuteronomi 6:8, 9 ai Dirava ese Israela taudia ia hagania edia iduara dogoatao audia latanai do idia toretore. Ena be toana be unai ese kara ta ia laulaulaia, to ia hahedinaraia idia toretore diba. Memero kekeni idia maragi neganai, toretore dalana idia hadibalaidia. Diba taudia haida idia laloa, Gezer Kalenda, idaunegai Heberu gadona ena revareva hahedinaraia gaudia gunadia momokani ta, be sikuli merona ta ese ia torea, sibona ena helalotao tohoa totona.
14 To edena dala amo toretore karana ita gaukaralaia diba, anina namona havaraia totona? Dala badana be kongregesen heboudia, sekit bona distrik hebouheboudia, bona hebou ma haida dekenai hereva badadia ita torea. Ena be revareva ta be “revareva kwadogina,” to ia ese gorere tauna ta ena lalona ia hagoadaia diba, eiava ia amo tadikaka o taihu ta orea lalonai, ita ia kara namo henia eiava iena ruma ai ita ia abia dae tauna, ita tanikiu henia diba. (1 Petero 5:12) Kongregesen tauna ta ena lalokau tauna ta bema ia mase, revareva kwadogina eiava kadi ta amo ena lalona ita hagoadaia diba. (1 Tesalonika 5:14) Keristani taihuna ta, iena sinana be kensa dainai ia mase hahinena, ia gwau: “Egu turana ta ese revareva namona ia torea lauegu. Unai ese lau ia durua bada, badina be lau duahia loulou diba.”
15 Toretore gaukaralaia dalana namo hereana ta be, revareva ta do oi torea, ia amo Basileia herevana be taunimanima ta do oi hadibaia bona unai amo Iehova do oi hanamoa. Hereva momokani ura henia matamaia taudia haida be Witness taudia idia noho lasi gabudia ai idia noho, unai dainai nega haida ita tore henidia be namo. Gorere metauna dainai reana hua haida lalonai ruma ta ruma ta dekenai oi haroro be auka. Reana unai bamona negadiai revareva oi torea diba, taunimanima ta haroro henia totona.
16 Sivarai ta mani oi laloa. Lagani momo idia lao vadaeni, Witness hahinena ta ese niuspepa ta lalonai tau ta ena mase sivaraina ia duahia, bena ena vabu ia tore henia. Revareva lalonai Basileia sivaraina ia hamaorolaia. Vabu ese ia haere henia lasi. Vadaeni, lagani 21 mai kahana murinai, November 1994 lalonai, unai Witness hahinena ese revareva ta ia davaria, unai vabu ena natuna hahinena ese ia siaia. Revareva lalonai ia gwau:
17 “April 1973 lalonai, lauegu tamana ia mase murinai, oi ese egu sinana oi tore henia, ena lalona hagoadaia totona. Unai neganai egu mauri laganidia be 9. Sinagu ese Baibel ia stadilaia, to ia be Iehova ena hesiai hahinena ta ai ia do lao lasi. To, iena stadi ese dala ia kehoa hereva momokani do lau dibaia. Lagani 1988 ai—lagani 15 oiemu revareva ai davaria murinai—egu Baibel stadi lau hamatamaia. March 9, 1990 ai, bapatiso lau abia. Gunaguna oi torea revarevana dainai oi lau tanikiu henia bada, bona mai egu moale ida oi lau hamaoroa, oi hadoa uhedia be Iehova ena heduru amo idia tubu. Oi torea revarevana be sinagu ese lau ia henia, do lau naria totona, bona lau ura diba oi be daika. Lau ura bada inai revareva do oi davaria.” Gunaguna ena sinana ia tore henia Witness hahinena ese ena revareva ia davaria, ia lalonai be ena adres bona ena telefon namba ia torea danu. Unai Witness hahinena—revareva amo Basileia helarona be ma haida ia do hadibaia noho hahinena—ese vabu ena natuna ia rini henia neganai ia hoa bada!
Diba Habadaia, Kara Maoromaoro Goadalaia, Bona Lauma Dalanai Goada Karaia
18 Edukeisini maorona amo ita tahua gauna ihatoina be ia ese ita do ia durua, iseda diba do ita habadaia bona iseda kara do ita hamaoromaoroa totona. Baibel negadiai idia laloa memero kekeni edia diba habadaia bona kara maoromaoro hadibalaidia gaukarana be edia tamadia sinadia edia maduna badana. Idia ese edia natudia be duahiduahi bona toretore idia hadibaia sibona lasi, to unai ia hereaia gauna, Dirava ena Taravatu, edia kara iboudiai lalonai do idia badinaia taravatuna, idia hadibaia danu. Unai hegeregerena, edia tomadiho karadia edia taravatu, headava ena taravatu, ruma bese taudia idia kara heheni dalana taravatudia, mahuta hebou karana taravatudia, bona edia dekena taudia kara henia dalana taravatudia idia hadibaia. Unai bamona edukeisini ese ia durudia, edia diba do idia habadaia bona kara maoromaoro do idia goadalaia totona sibona lasi, to lauma dalanai do idia goada idia lao totona danu.—Deuteronomi 6:4-9, 20, 21; 11:18-21.
19 Hari inai nega be edena bamona? Sikuli dekenai edukeisini namona ita abia be gau badana. Unai ese ita ia durua, iseda diba do ita habadaia totona. To edukeisini be edeseniai ita abia diba, kara maoromaoro do ita dibaia bona lauma dalanai do ita goada ita lao totona? Keristani kongregesen lalonai tiokratik edukeisini ita abia diba; unai bamona edukeisini be tanobada ena gabu ma ta dekenai ita abia diba lasi. Ita siboda be Baibel bona Baibel idia gwauraia bukadia stadilaia karana amo, bona kongregesen heboudia, sekit hebouheboudia, bona distrik hebouheboudia dekenai idia hahedibalaia herevadia amo, diba hereadaena—Dirava ena hahediba—ita abia hanaihanai diba, davana lasi! Ia ese dahaka be ita ia hadibaia?
20 Baibel ita stadilaia matamaia neganai, ena hahediba herevadia badadia, “diba hamatamaia gaudia,” ita dibaia. (Heberu 6:1) Ita stadi noho lalonai, “aniani korikori”—hereva momokani dobudia—ita dibaia. (Heberu 5:14) Unai sibona lasi, to Dirava ena taravatu danu ita dibaia; iena ura hegeregerena do ita noho dalana be ita idia hadibaia. Hegeregere, ‘tauanina hamiroa karadia’ amo ita siri diba dalana ita dibaia, bona siahu taudia bona taunimanima edia tauanina bona edia kohu matauraia karana ita dibaia. (2 Korinto 7:1; Tito 3:1, 2; Heberu 13:4) Ma danu, gabeai ita diba iseda gaukara lalonai ita koikoi lasi bona ita gaukara goadagoada be gau badana, bona mahuta hebou karana taravatudia Baibel lalonai badinaia karana ena namo danu ita dibaia. (1 Korinto 6:9, 10; Efeso 4:28) Unai taravatu be iseda mauri lalonai badinadia karana ai ita goada ita lao neganai, lauma dalanai ita tubu daekau, bona Dirava ita tura henia karana be ia dobu ia lao. Inai danu, Dirava badinaia karana amo ita be taunimanima namodia ai ita lao, herevana ita be edeseniai ita noho. Bona reana unai ese ma haida do ia ha-uradia, hahediba ia henia Diravana, Iehova Dirava, do idia hanamoa totona.—1 Petero 2:12.
Gaukara Karaia Daladia Dibaia
21 Edukeisini maorona amo ita tahua gauna namba 4 be ia ese ita do ia durua, gaukara karaia daladia do ita dibaia totona. Baibel negadiai tama sina ese gaukara idauidau be edia natudia idia hadibaia. Edia kekeni be ruma gaukaradia idia hadibadia. Aonega Herevadia 31:10-31 bukana ena karoa ginigabena ese ia hahedinaraia unai gaukara be idauidau bona momo. Unai hegeregerena, kekeni be varo idia karaia diba, dabua idia hatua diba, idia nanadu diba, ruma taudia naria gaukarana idia diba, bona kohu bona tano hoihoilaia gaukaradia idia diba danu. Tama ese sibodia edia gaukara be edia natudia memerodia idia hadibaia, biru gaukarana eiava ruma haginia gaukarana eiava ima gaukarana ma ta. Iesu ia ubua tauna, ena tamana Iosepa unai, ese kamuta gaukarana ia hadibaia; unai dainai, ia be “kamuta tauna ena natuna” idia gwauraia sibona lasi, to “kamuta tauna” idia gwauraia danu.—Mataio 13:55; Mareko 6:3.
22 Hari inai negai danu, edukeisini maorona ese memero kekeni ia hahegaegaea, gabeai sibodia edia famili do idia naria totona. Aposetolo Paulo ena hereva 1 Timoteo 5:8 ai ese idia hahedinaraia ta ese sibona ena famili ia naria karana be maduna helagana ta. Ia gwau: “Bema tau ta ese iena varavara ia naria lasi, o iena ruma taudia ia ubua lasi neganai, ia ese iena abidadama Keriso dekenai ia negea vadaeni. Iena dika ese abidadama lasi murimuri tauna ena dika ia hanaia vadaeni.” Unai dainai, namona be edukeisini ese memero kekeni ia hahegaegaea, do idia abia madunadia do idia huaia bona gaukara goadagoada taudia ai do idia lao totona.
23 Tanobada ena edukeisini ede badana ita tahua be namo? Reana tano idauidau ai ena bada be idauidau. To, bema ta ese moni gaukarana ta do ia abia totona, gavamani ese ia gwauraia sikuli laganidia lalonai ia abia dibana be hegeregere lasi, namona be iena tamana bona sinana ese idia hakaua, inai do ia laloa namonamo totona: Edena kosi ma ta do ia karaia be namo, bona bema ia karaia, unai ena namo bona ena dika be dahaka. To, bema toana be ta ese sikuli ena kosi ma ta do ia karaia be namo, dahaka totona do ia karaia be maoro? Taga eiava hahenamo abia totona, eiava sibona ena ladana abia isi totona ia karaia be maoro lasi. (Aonega Herevadia 15:25; 1 Timoteo 6:17) Iesu ena kara sivaraina amo ita dibaia gauna mani oi laloa—namona be edukeisini ita gaukaralaia, Iehova do ita hanamoa totona. Bema sikuli ena kosi ma ta ita karaia, namona be unai ena badina be, unai amo iseda moni do ia hegeregere, Keristani haroro gaukarana lalonai Iehova ena hesiai do ita lao henia badabada diba.—Kolose 3:23, 24.
24 Unai dainai, namona be tanobada ena edukeisini maorona ita tahua namonamo. Namona be Iehova ese ena orea lalonai ia henia noho edukeisinina ita tahua badabada. Bona edukeisini ia abia namonamo tauna hereadaena, Iesu Keriso, ena amo ita dibaia gauna ita laloaboio lasi be namo. Gauna be inai: Namona be edukeisini ita gaukaralaia, ita siboda do ita hanamoa totona lasi, to hadibaia taudia iboudiai ia hereaia Tauna, Iehova Dirava, do ita hanamoa totona!
Emu Haere be Dahaka?
◻ Iesu ese ena edukeisini be edena bamona ia gaukaralaia?
◻ Dahaka dainai ita duahiduahi namonamo diba be gau badana?
◻ Edena dala amo toretore karana ita gaukaralaia diba, Iehova hanamoa totona?
◻ Edena dala amo Dirava ena hahediba ese ita ia durua, do ita kara maoromaoro bona lauma dalanai do ita goada ita lao totona?
◻ Edukeisini maorona amo dahaka gaukara idia hahedibalaia danu be namo?
[Study Questions]
1. Edukeisini be edena negai bona edena dala amo ia matamaia?
2-4. (a) Ioane karoa 7 ia gwau, lagani 32 C.E. ai Iesu be Au Raurau Ruma Maragidia Ariana dekenai ia do ginidae lasi neganai dahaka ia vara, bona ia ginidae murinai dahaka ia vara? (b) Dahaka dainai Iuda taudia ese Iesu ena hahediba karana idia daradaralaia?
5, 6. (a) Iesu ia gwau ia hadibaia herevadia be daika ena amo? (b) Iesu ese ena edukeisini be edena bamona ia gaukaralaia?
7, 8. (a) Edena dala amo edukeisini ita gaukaralaia be namo? (b) Edukeisini maorona amo ita tahua gaudia hani be dahaka?
9. Dahaka dainai ta ia duahiduahi namonamo diba be gau badana?
10. Dirava ena Hereva duahia karana ese ita be edena bamona ia durua, iseda mauri ena anina ia bada bona ita moalelaia bada totona?
11. Siboda eda stadi ita karaia namonamo, anina be dahaka dahaka ita karaia?
12. (a) Badina be dahaka toretore namonamo dalana ita dibaia be gau badana? (b) Edena toretore ese toretore oredia iboudiai ia hereaia?
13. Dahaka ese ia hahedinaraia Israela taudia idia toretore diba?
14, 15. Edena dala amo toretore karana ita gaukaralaia diba, anina namona havaraia totona?
16, 17. (a) Dahaka sivarai ese ia hahedinaraia, Basileia sivaraina be revareva amo harorolaia karana ese namo ia havaraia? (b) Unai bamona ekspiriens ta oi gwauraia diba, a?
18. Baibel negadia ai, tama sina ese edia natudia edia diba habadaia bona kara maoromaoro hadibalaidia gaukarana be edena bamona idia karaia?
19. Edukeisini be edeseniai ita abia diba, kara maoromaoro do ita dibaia bona lauma dalanai do ita goada ita lao totona?
20. Dirava ena hahediba amo dahaka ita dibaia, bona dahaka anina ia havaraia?
21. Baibel negadiai, edena gaukara be memero kekeni idia hadibalaidia?
22, 23. (a) Namona be edukeisini ese memero kekeni be dahaka totona ia hahegaegaedia? (b) Bema toana be ita ese sikuli ena kosi ma ta do ita karaia be namo, dahaka totona do ita karaia be maoro?
24. Iesu ena amo ita dibaia gauna, ita laloaboio lasi be namo gauna, be dahaka?
[Box on page 13]
Heduru, Tisa Taudia Edia
“Dirava Hanamoa mai Moale Ida” Distrik Hebouheboudia dekenai, lagani 1995/96 ai, Watch Tower Society ese buklet matamatana ta ladana Jehovah’s Witnesses and Education ia halasia. Unai buklet ena rau iboudiai be 32, bona ia lalonai be laulau mai edia kala momo. Society ese ia printaia, tisa taudia durua totona. Ema bona hari, gado 58 ai idia printaia vadaeni.
Dahaka dainai buklet ta idia printaia, tisa taudia edia? Idia ura do idia durudia, Iehova ena Witness taudia edia natudia, idia sikuli noho memerodia bona kekenidia unai, ese idia abia dae herevadia do idia lalo-pararalaia namonamo totona. Buklet ena anina be dahaka? Dala namona ai ia ese iseda lalohadai inai kara dekenai ia gwauraia hedinarai goevagoeva: sikuli ena kosi ma haida karaia karana, vara dinadia bona Kerisimasi moalelaia karana, bona pepa saluti henia karana. Unai buklet ese danu tisa taudia ia hamaorodia, ita ura iseda natudia ese edia sikuli gaukarana do idia goadalaia, bona ita ura tisa taudia ida do ita gaukara hebou, bona iseda natudia hadibaia gaukarana do ita durua.
Hari Education buklet be edena bamona ita gaukaralaia be namo? Tisa taudia durua totona idia printaia, unai dainai namona be tisa taudia bona sikuli naria taudia ita henidia. Iseda ura be ia ese idia iboudiai do ia durua, iseda lalohadai bona ita abia dae herevadia do idia lalo-pararalaia totona, bona do idia diba dahaka dainai ita gwau kara haida amo ita gini siri be maoro. Tama sina be edia natudia edia tisa ida idia herevahereva neganai, hari buklet idia gaukaralaia be namo.
[Picture on page 10]
Idaunegai Israelana ai, edukeisini idia laloa bada