Ma Haida Vairanai Oi Kara Namo, A?

‘Lau laloa lasi dahaka idia laloa!’ Badu eiava lalo-hisihisi neganai, reana oi davaria unai hereva oi gwauraia. To unai boga-auka mamina ia ore murinai, reana oi laloa momo. Dahaka dainai? Badina ita momo be ma haida ese edena bamona ita idia laloa be ita laloa momo.

MOMOKANI, haida edia hemami ita laloa be namo. Bona ita be Keristani taudia, Iehova Dirava ena bapatiso hesiai taudia, unai dainai haida ese ita edena bamona idia laloa be dala maorona ai ita laloa momo be namo. Oibe, ita be “ibounai ese edia matana dekenai . . . idia itaia” taudia. (1 Korinto 4:⁠9) Korinto Iharuana 6:​3, 4 ai, aposetolo Paulo ena sisiba namona ita davaria, ia gwau: “Ai ura lasi taunimanima idia gwau aiemai gaukara ia dika. Unai dainai ai ese taunimanima hadikaia kara ta ai karaia lasi, lasi momokani! To aiemai kara ibounai dekena amo ai hedinaraia ai be Dirava ena hesiai taudia.”

Vadaeni, ma haida vairanai ita kara namo ena anina be dahaka? Anina be haida vairanai ita sibona ita abia isi eiava ita karaia diba gaudia dainai haida edia hemataurai ita veria, a? Lasi. To 1 Petero 2:​12 ena hereva ita badinaia be namo, ia gwau: “Dirava idia diba lasi taudia edia vairanai, kara namodia do umui karaia. . . . Emui kara namodia idia itaia neganai, idia ese Dirava do idia hanamoa, Keriso do ia giroa mai dinana dekenai.” Keristani taudia idia kara namo amo idia hahedinaraia idia be Keristani taudia momokanidia! Unai ese ita lasi to Dirava do ia hanamoa. To, ma haida vairanai ita kara namo ese ita dekenai danu namo ia mailaia. Oi dekenai namo ia mailaia daladia toi mani ita laloa.

Adavana Namona ai Oi Lao Diba

Hegeregere, mani headava ita laloa. Ia be harihari gauna Iehova Dirava amo, ia amo “famili ibounai, guba dekenai bona tanobada dekenai, . . . [be] edia ladana idia abia.” (Efeso 3:15) Reana oi ura nega ta do oi headava. Bema unai bamona, emu kara namo amo oi hahedinaraia adavana namona ai oi lao diba, a? Oibe, oi do headava lasi neganai ma haida ese idia abia dae oi be Keristani tau o hahine namona, a?

Tano haida ai unai be ruma bese ese idia laloa gauna badana. Hegeregere, Ghana dekenai, bema taunimanima rua idia ura headava, edia kastom be idia ura headava taudia ese edia tama sina idia hadibaia. Bena idia ese ruma bese taudia ma haida idia hadibaia. Bena tau ena ruma bese be edia dekena taudia amo kekeni ena kara do idia tahua. Bema tama sina idia laloa unai kekeni be hegeregere, kekeni ena ruma bese do idia hadibaia edia natuna ia ura edia kekeni ia adavaia. Bena kekeni ena ruma bese taudia ese unai headava totona gwaumaoro idia do henia lasi neganai tau ena kara idia tahua. Ghana edia hereva ta be, “Idia diba taudia oi nanadaia guna, gabeai oi headava.”

West tanodia ai, nega momo ta ese sibona ena adavana ia abia hidi tanodia, be edena bamona? Unuseniai danu, aonega karana be lo Keristani tauna eiava hahinena ese ia ura adavaia tauna idia diba namonamo taudia, hegeregere tama sina eiava idia lo turadia, edia lalohadai ia tahua. Ruma Bese Ena Moale Havaraia Dalana bukana ia gwau, hahine matamatana be inai bamona henanadai ia henia diba: “ ‘Taunimanima vairanai inai tau ena ladana be edena bamona? Ena turana be daidia? Sibona ena ura ia biagua, a? Buruka taudia be edena bamona ia kara henia? Ena ruma bese be edena bamona? Edena bamona ia kara henidia? Moni be edena bamona ia laloa? Ia inuinu kekero, a? Ena hemami ese ena kara ia biagua, reana ia dagedage danu, a? Kongregesen lalonai dahaka maduna ia abia, bona edena bamona ia huaia? Ia lau matauraia momokani diba, a?’​​—⁠Levitiko 19:32; Aonega Herevadia 22:29; 31:23; Efeso 5:​3-5, 33; 1 Timoteo 5:8; 6:​10; Tito 2:​6, 7.”a

Tau ese ia ura adavaia Keristani kekenina ena kara do ia tahua be namo danu. Baibel ena sivarai hegeregerena, Boasi be Ruta, gabeai ia adavaia hahinena, ena kara be unai bamona ia tahua. Ruta ese ia nanadaia: “Dahaka dainai lau, idau bese hahine, oi ese lau dekenai oi laloa namo, bona lau dekenai oi bogahisihisi henia?” Boasi ia haere: “Oiemu sivarai lau kamonai.” (Ruta 2:​10-​12) Oibe, Boasi sibona ese ia itaia Ruta be abidadama, gwauhamata badinaia, bona gaukara goadagoada hahinena bona ma haida amo iena sivarai namodia ia kamonai danu.

Unai hegeregerena, oiemu kara ese haida do ia hadibaia oi be adavana namona ai do oi lao diba eiava lasi. Vadaeni unai kara dekenai, ma haida vairanai oi kara namo, a?

Gaukara Tauna Namona ai Oi Lao Diba

Gaukara gabuna be ma gabu ta emu kara namona oi hahedinaraia dainai namo oi abia diba. Moni gaukara idia tahua taudia be momo herea. Idia gwau-edeede, idia leiti hanaihanai, bona idia koikoi gaukara taudia be nega momo gaukara amo idia hadokoa. Kampani haida ese edia gaukara idia diba namonamo taudia idia hadokoa danu moni bada idia negea lasi totona. Idia gaukara lasi taudia ese gaukara matamata idia tahua neganai, do idia davaria kampani matamatana taudia ese iena gaukara gunana biagudia dekenai do idia nanadaia edia gaukara dalana, lalohadai gaukara dekenai, bona diba be edena bamona. Gaukara biagudia ese Keristani taudia momo idia abia dae badina idia kara namo, hegeregere hemataurai idia hahedinaraia, edia dabua edia toana be namo, ma haida idia kara namo henidia, bona Keristani kara namodia ma haida idia hahedinaraia.

Kara maoromaoro be unai bamona karana ta​​—⁠gaukara biagudia momo ese idia laloa bada karana. Aposetolo Paulo bamona, ita ura “nega ibounai kara maoromaoro” ita karaia. (Heberu 13:18) Ghana dekenai maini kampani ta ai henaohenao karadia maragidia be idia karaia loulou. Auri idia huria gabuna ia gunalaia tauna, Witnes tauna ta, ese ena gaukara ia haboioa lasi to haida idia hadokoa. Dahaka dainai? Unai kampani biagudia ese lagani momo lalonai ena kara maoromaoro idia itaia dainai. Ia gaukara goadagoada bona ena biagudia ia matauraia be momo idia diba danu. Oibe, ena kara maoromaoro dainai ena gaukara ia haboioa lasi!

Keristani tauna ese gaukara gabudiai dahaka kara ma haida ia karaia diba, ia idia abia dae totona? Oi dekenai idia henia gaukarana dekenai emu diba oi habadaia. (Aonega Herevadia 22:29) Oi gaukara goadagoada bona gaukara hanaihanai. (Aonega Herevadia 10:4; 13:⁠4) Oiemu biaguna bona emu gaukara ia gunalaia tauna oi matauraidia. (Efeso 6:5) Gaukara biagudia ese idia tahua karadia be, leiti lasi, kara maoromaoro, gaukara anina ia vara, bona gaukara goada, bona unai kara namodia dainai gaukara oi davaria diba ena be gaukara be momo lasi.

Kongregesen Dagi Abia Tauna ai Oi Lao Diba

Hari inai negai, Keristani kongregesen idia gunalaia lo Keristani tatau idia noho be mai anina bada. Dahaka dainai? Isaia ia peroveta: “Oiemu palai ruma do oi habadaia.” (Isaia 54:⁠2) Unai peroveta herevana ia guguru dainai, Iehova ena tanobada ibounai kongregesen ia tubu.

Unai dainai, bema oi be Keristani tauna ta, emu kara namo amo edena bamona oi hahedinaraia oi be hegeregere unai bamona maduna do oi huaia? Mani tau matamata Timoteo ena haheitalai oi laloa. Luka ia gwau tadikaka “ibounai Lusitera bona Ikonio dekenai, idia gwau Timoteo be tau namona.” Oibe, unai tau matamana ia kara namo dainai siti idaudia rua ai ena sivarai be namo. Unai dainai Paulo ese Timoteo ia boiria ena loaloa hesiai gaukara ai do ia bamoa.​​—⁠Kara 16:​1-4.

Hari inai negai, edena bamona tau ta ese Dirava ia abia dae dalanai “ekalesia ena gunalaia tauna ena dagi do ia tahua” diba? Anina be taunimanima vairadiai sibona ena kara do ia herevalaia lasi, to unai maduna ia huaia totona mai anina lauma huahua do ia hahedinaraia. (1 Timoteo 3:​1-​10, 12, 13; Tito 1:​5-9) Danu, ia hahedinaraia “dagi namona ia ura henia,” bema haroro gaukara bona hahediba taudia halaoa gaukarana ia karaia goadagoada. (Mataio 24:14; 28:​19, 20) Edia kara namo amo idia hahedinaraia idia be maduna idia huaia diba Keristani tataudia mai lalo-momokani ida edia lauma tadikaka edia namo idia tahua. Aposetolo Paulo ena sisiba idia badinaia: “Bema Dirava ena taudia be mai edia gau lasi neganai, umui durudia. Bema idau taudia be umui dekenai idia mai neganai, emui ruma dekenai do umui abidia dae.” (Roma 12:13) Unai bamona karadia ia karaia neganai, Keristani tauna ese ia hahedinaraia momokani “ia be Dirava ena hesiai tauna.”

Nega Iboudiai

Ita gwau lasi ma haida vairanai ita kara namo ena anina be taunimanima edia matana dekenai sibona eiava idia ese ita idia “ura henia totona” kara namo ita karaia. Lasi. (Efeso 6:⁠6) Ena anina korikori be ita kara namo, hegeregere eda Havaraia Tauna, Iehova Dirava, ena taravatu bona ena hahegani ita badinadia namonamo, ia ese ita ia abia dae totona. Bema lauma dalanai oi tubu bona emu turana karana Iehova Dirava ida ia goada, ma haida ese do idia itaia emu ruma bese taudia, gaukara hebou taudia, bona Keristani bamodia oi kara henidia dalana ia namo ia lao. Emu gini goada bona laloa namonamo, abia hidi namona, maduna huaia namonamo, bona lalo-manau karana idia itaia diba. Unai dainai oi do idia lalokau henia bona matauraia bona, gau badana be, unai dainai Iehova Dirava ena lalo-namo oi abia diba badina ma haida vairanai oi kara namo!

[Footnote]

[Picture on page 19]

Tama sina momo be mai aonega ida edia natuna ese ia adavaia gwauraia tauna ena kara idia henanadailaia

[Picture on page 20]

Tadikaka ta ese ma haida edia namo ia laloa bada neganai do ia hahedinaraia hesiai gaukara ena hahenamo ia abia diba