Kaivakuku Tomadiho Henia Kara Iboudiai Dadaraia

“Dirava ena dubu helaga bona kaivakuku be edena bamona idia hakapua tamona diba?”​—2 KORINTO 6:16.

1. Israel ena kalaga dubuna bona ena dubu ma haida ese dahaka idia laulaulaia?

IEHOVA be mai ena dubu to ia lalonai kaivakuku idia noho lasi. Mose ese ia haginia kalaga dubuna bona gabeai Ierusalem dekenai idia haginia dubudia be Iehova ena dubu idia laulaulaia. Idia haginia dubudia be “Helaga Momokani Gabuna,” Iehova ena lauma dubu badana idia laulaulaia. (Heberu 8:​1-5) Unai dubu dainai bona Iesu Keriso ia henia boubou karana dainai Dirava dekenai ita mai diba ita tomadiho henia totona.​—Heberu 9:​2-10, 23.

2. Dirava ena lauma dubu badana dekenai, daidia be du ai idia lao, bona hutuma bada herea taudia edia gabu be dahaka?

² Horoa Keristen taudia ta ta iboudiai be “Dirava ena dubu ena du ta” ai do idia lao, mai edia gabu guba dekenai. Heroda ia haginia dubuna lalonai Idau Bese edia ariara gabuna ese Iehova idia tomadiho henia taudia “hutuma bada herea” edia tomadiho gabuna ia laulaulaia; unuseniai “Dirava ena hesiai gaukara idia karaia noho.” Idia be mai edia abidadama Iesu ia henia boubou gauna dekenai, unai dainai Dirava vairanai idia be kara maoromaoro taudia bona “hisihisi bada herea” dekena amo do idia roho mauri diba.​—Apokalupo 3:12; 7:​9-15.

3, 4. Tanobada dekenai dahaka ese horoa Keristen taudia edia kongregesen ia laulaulaia, bona ia lalonai dahaka dika ia noho lasi be gau badana?

³ Tanobada dekenai idia noho Keristen horoa taudia edia kongregesen be kaivakuku lasi dubuna ma ta hegeregerena danu. “Lauma Helaga” idia abia taudia dekenai aposetolo Paulo ia gwau: “Umui be aposetolo taudia bona peroveta taudia idia haginia ruma, iena du latanai Dirava ese umui ia haginia noho. Inai ruma ena kona nadina be Keriso Iesu sibona. Keriso ese inai ruma ena kahana ibounai ia hagoadaia noho bona ia haboua tamona. Vadaeni ia ese ia haginia dainai, ruma be Lohiabada ena dubu helaga momokani do ia lao.” (Efeso 1:13; 2:​20-22) Unai abia hidi 144,000 taudia be “mauri nadidia” bamona, “Lauma Helaga ena ruma do [idia] lao . . . boubou helaga karaia taudia edia gaukara do [idia] karaia.”​—1 Petero 2:5; Apokalupo 7:4; 14:1.

⁴ Keriso henunai unai hahelaga taudia be “Dirava ena ruma” dainai, ia ura lasi unai dubu ia miro. (1 Korinto 3:​9, 16, 17) Paulo ena sisiba be inai: “Dirava idia abidadama henia lasi taudia danu do umui hakapua tamona lasi. Badina be edena bamona kara maoromaoro bona kara kerere idia turana diba? . . . Dirava ena dubu helaga bona kaivakuku be edena bamona idia hakapua tamona diba?” Horoa Keristen taudia, “siahu ibounai [Iehova]” ena taunimanima unai, be kaivakuku tomadiho henia kara idia dadaraia be gau badana. (2 Korinto 6:​14-18) Hutuma bada herea taudia be kaivakuku tomadiho henia kara iboudiai idia dadaraia be gau badana danu.

5. Keristen momokani taudia idia diba Iehova sibona idia tomadiho henia be maoro, unai dainai dahaka idia karaia?

⁵ Kaivakuku tomadiho henia karadia haida be hedinarai herea to ma kara haida be hehuni gaudia. Oibe, ita gwau diba lasi dirava tatau bona dirava hahinedia tomadiho henia karadia sibona be kaivakuku tomadiho henia karana danu. Iehova sibona lasi to ma gau ta eiava tau ta tomadiho henia karana be kaivakuku tomadiho henia karana. Iehova be guba bona tanobada edia Lohia dainai, ia mo sibona ita tomadiho henia be maoro. (Deuteronomi 4:24) Unai idia diba dainai, Keristen momokani taudia be Baibel ena sisiba idia badinaia bona kaivakuku tomadiho henia kara iboudiai idia dadaraia. (1 Korinto 10:7) Namona be Iehova ena hesiai taudia ese idia dadaraia kaivakuku tomadiho henia karadia haida do ita tahua.

Kerisendom Ena Kaivakuku Karana Idia Perovetalaia

⁶ Lagani 612 B.C.E. ai, Babulono dekenai igui hesiai lalonai ia do noho neganai, peroveta tauna Esekiel ese matahanai amo, Ierusalem dekenai Iehova ena dubu lalonai Dirava idia dadaraia Iuda taudia idia karaia kara dikadia ia itaia. Esekiel ese “vagege ena toana” ia itaia. Elda taudia 70 ese dubu lalonai bonana namo muramura idia gabua. Hahine be dirava koikoina totona idia taitai. Bona tatau 25 ese dina idia tomadiho henia. Unai Dirava dadaraia karana ena anina be dahaka?

7, 8. Reana unai “vagege ena toana” be dahaka, bona dahaka dainai Iehova ena badu ia havaraia?

⁷ Matahanai dekenai Esekiel ia itaia kara dikadia ese Kerisendom ena kaivakuku tomadiho henia karana idia laulaulaia. Hegeregere ia gwau: “Itaia! boubou patana ena ikoukou ena north kahanai unai vagege toana ia noho, ena vareai gabunai. Bona [Iehova Dirava] lau dekenai ma ia gwau: ‘Taunimanima ena natuna, oi ese idia karaia kara dika bada gaudia oi itaia?’ ”​—Esekiel 8:​1-6.

⁸ Reana unai kaivakuku vagege ena toana be Kanana taudia edia hahelaga duna, dirava hahine koikoina unai. Idia laloa unai hahine be edia dirava Baal ena adavana. Herevana unai toana be dahaka, to ia ese Iehova ena badu ia havaraia badina Israel ia veria Iehova mo sibona lasi idia tomadiho henia totona bona ena taravatu idia utua. Unai taravatu ia gwau: “Lau be Iehova emu Dirava. . . . Lau vairanai oi ese ma Dirava ta oi tomadiho henia lasi. Oi ese koroa kaivakuku laulauna ta eiava guba dekenai eiava tanobada latanai eiava tano henunai ranudia lalodiai idia noho gaudia ta ena laulau oi karaia lasi. Idia vairanai oi tomadiho lasi bona oi hesiai henidia lasi, badina lau, Iehova, emu Dirava be lau mo sibona oi tomadiho henia Diravana.”​—Esodo 20:​2-5, NW.

9. Kerisendom ese dahaka ia karaia dainai, Iehova ia badu?

⁹ Dirava ena dubu lalonai Dirava idia dadaraia Israel taudia ese vagege ena toana ta idia tomadiho henia karana be dika momokani. Unai hegeregerena, Kerisendom ena dubu lalodiai, ena be idia gwau Dirava sibona idia tomadiho henia, to Dirava hadikaia gaudia momo idia gaukaralaia. Danu, Dirava ena badu idia havaraia badina dubu biagudia ese Dirava ena Basileia idia dadaraia, idia gwau United Nations oreana sibona ese taunimanima ia durua diba​—unai “gau dika rohorohona . . . gabu helagana dekenai ia gini,” to unai be iena gabu lasi.​—Mataio 24:​15, 16; Mareko 13:14.

10. Esekiel ese dubu lalonai dahaka ia itaia, bona Kerisendom dekenai idia vara gaudia be edena bamona ita hahegeregerea diba?

¹⁰ Esekiel be dubu lalonai ia itaia vareai, bona ia gwau: “Itaia! tano dekenai idia rau gaudia bona animal mirodia iboudiai edia laulau idia noho, bona Israel ena bese ena kaivakuku bodagadia iboudiai danu, unai laulaudia be haba iboudiai latadiai. Bona Israel ena bese tatau badadia 70 . . . be idia vairanai idia gini, ta ta iboudiai mai edia bonana namo muramura gabua gauna edia imadia lalodiai, bona unai muramura ena bonana namo kwalahuna ia daekau lao noho.” Inai oi laloa! Iehova ena dubu lalonai, Israel ena elda taudia be dirava koikoidia dekenai bonana namo muramurana idia gabua unai dirava koikoidia edia laulau dikadia haba dekenai idia koroa. (Esekiel 8:​10-12) Unai hegeregerena, manu bona uda animal ese Kerisendom tanodia edia toana ai idia halaodia, bona taunimanima ese idia tomadiho henidia. Ma danu, dubu gunalaia taudia momo ese taunimanima hutuma idia hakaudia kerere, evolusen ena hahediba idia hadibaia, idia gwau taunimanima be animal amo idia vara. Baibel ia gwau Iehova Dirava ese taunimanima ia havaraia, to unai sivarai idia hadibaia lasi.​—Kara 17:​24-28.

11. Dahaka dainai Dirava dadaraia Israel hahinedia be Tammuz idia taitailaia?

¹¹ Iehova ena ruma ena iduara dekenai, Esekiel ese Dirava dadaraia Israel hahinedia ia itaia, idia be Tammuz totona idia taitai. (Esekiel 8:​13, 14) Babulono bona Suria taudia idia laloa Tammuz be tubutubu gaudia edia dirava, medu neganai tubutubu gaudia idia mauri bona siahu neganai idia mase. Idau negai, iena ladana ena leta ginigunana be tau bona ena toana be korosi toana bamona. Reana ita laloa unai be Kerisendom ena korosi toana idia hahelagaia kaivakuku tomadiho henia karana hegeregerena.

12. Esekiel ia itaia Dirava dadaraia Israel tatau 25 be dahaka idia karaia, bona unai hegeregerena Kerisendom dekenai dahaka ia vara?

¹² Dubu ena ariara dekenai, Esekiel ese Dirava dadaraia Israel tataudia 25 ia itaia, idia be dina idia tomadiho henia​—unai kara ese Iehova ena taravatu ia utua, ia gwau kaivakuku idia tomadiho henia lasi. (Deuteronomi 4:​15-19) Unai kaivakuku tomadiho henia taudia ese Dirava ena udu-baubau dekenai, rigi mirona idia duduia, reana unai rigi be tau ena usina ia laulaulaia. Vadaeni, ita hoa lasi Dirava ese edia guriguri ia haerelaia lasi neganai. Unai hegeregerena, “hisihisi bada herea” negana lalonai Kerisendom ena dubu ese ena heduru do idia tahua to do ia durudia lasi. (Mataio 24:21) Unai Dirava dadaraia Israel taudia idia gini bona Iehova ena dubu idia muri henia bona diari ia henia dinana idia vaira henia idia tomadiho henia totona, unai hegeregerena Kerisendom ese Dirava dekena amo ia mai diarina idia dadaraia bona hahediba koikoi herevadia idia hadibalaia, bona tanobada ena aonega idia hanamoa.​—Esekiel 8:​15-18.

13. Iehova ena Witness taudia be edena dala amo Esekiel ena matahanai lalonai ia itaia kaivakuku tomadiho henia karadia bamona idia dadaraia diba?

¹³ Iehova ena Witness taudia ese Kerisendom lalonai idia tomadiho henia kaivakuku gaudia idia dadaraia. Esekiel ese idau negai Ierusalem ia laulaulaia gauna ia itaia unai. Dirava hadikaia toadia ita hahelagadia lasi. “Gavamani” edia hereva ita matauraia, to iseda tomadiho Iehova dekenai ita laloa guna. (Roma 13:​1-7; Mareko 12:17; Kara 5:29) Iseda kudouna ibounai ida Dirava bona iena Basileia ita abia dae. Gau ibounai ia Havaraia Diravana bona ia havaraia gaudia edia sivarai ita abia dae, evolusen ena hahediba herevana ita abia dae lasi. (Apokalupo 4:11) Korosi ita hahelagaia lasi, aonega herevadia, eiava tanobada ena aonega ma haida ita hahelagaia lasi. (1 Timoteo 6:​20, 21) Kaivakuku tomadiho henia kara iboudiai ita dadaraia. Unai bamona kara haida be dahaka?

Kaivakuku Kara Ma Haida

¹⁴ Keristen taudia ese taunimanima ida unai haheitalai “dagedage gauna” idia tomadiho henia lasi. Aposetolo tauna Ioane ia gwau: “Dagedage gauna ta lau itaia, davara dekena amo ia daekau, iena doana be 10, bona iena kwarana be 7. Iena doana edia duduna dekenai be kwara gaudia, dagi toana, idia noho, ibounai 10. . . . Tanobada noho taudia ibounai . . . ese, unai dagedage gauna do idia tomadiho henia.” (Apokalupo 13:​1, 8) Animal ese “pavapava” eiava politikol siahudia idia laulaulaia diba. (Daniel 7:17; 8:​3-8, 20-25) Unai dainai haheitalai dekenai unai dagedage gauna ena kwarana 7 be tanobada ena siahu bada gavamanidia​—Aigupito, Asuria, Babulono, Media-Parasa, Greece, Roma, bona Anglo-America, unai be Britain bona United States of America. Kerisendom ena dubu gunalaia taudia ese taunimanima idia hakaudia “inai tanobada ena lohia,” Satana, ena politikol orea idia tomadiho henia totona, bona unai kara amo idia be Dirava bona Keriso edia ladana idia hadikaia. (Ioane 12:31) To Iehova ena Keristen hesiai taudia be politik amo idia gini siri bona Basileia idia abia dae, unai dainai kaivakuku tomadiho henia kara idia dadaraia.​—Iakobo 1:27.

15. Iehova ena taunimanima be tanobada edia dagi ai idia kwalimu taudia be edena bamona idia kara henidia, bona Witness tauna ta ena hereva be dahaka?

¹⁵ Danu, Dirava ena taunimanima be tanobada ena moale karadia eiava spot gadara dekenai idia kwalimu taudia be kaivakuku gaudia bamona idia tomadiho henidia lasi. Iehova ena Witness tauna ai ia lao murinai, miusik gadaralaia tauna ta ia gwau: “Moale karana dekenai muisik bona mavaru be ura dikana ia havaraia diba . . . Ane ia abia tauna be moale bona hebogahisi herevadia ia anelaia bona reana kamonai taudia idia laloa edia adavana dekenai unai kara idia noho lasi. Lau diba kekeni bona hahine be unai bamona muisik idia gadaralaia bona ane idia abia taudia idia ura henia bada. To haida idia laloa unai tauna bamona ai idia lao be namo, bona unai bamona idia laloa bada karana be hegeregere idia tomadiho henia bamona. Reana unai bamona miusik ai ia kwalimu tauna ta ena laulau be edia haba dekenai idia atoa bona ena dabua bona ena huina iduari dalana idia tohotohoa . . . Namona be Keristen taudia idia laloatao Dirava mo sibona idia gwauraia bada.”

16. Dahaka ese ia hamomokania kara maoromaoro anerudia be kaivakuku tomadiho henia kara idia dadaraia?

¹⁶ Oibe, Dirava sibona ita gwauraia bada eiava ita tomadiho henia be maoro. Ioane be “aneru ena aena badinai [ia] tui diho” ia tomadiho henia totona badina hoa gaudia ia dekenai ia hahedinaraia, to unai aneru ia ura lasi unai bamona ia karaia, bona ia gwau: “Unai bamona do oi karaia lasi. Lau be hesiai tauna, oi bamona, bona lau be oiemu varavara peroveta taudia edia gaukara hebou tauna danu. Bona lau be, inai buka ena hereva idia kamonai henia taudia ibounai edia gaukara hebou tauna danu. Dirava sibona do oi tomadiho henia.” (Apokalupo 22:​8, 9) Iehova ita gari henia, eiava ita matauraia bada, unai dainai ita ura ia mo sibona ita tomadiho henia. (Apokalupo 14:7) Unai dainai, Dirava ita matauraia momokani neganai unai ese ita ia naria bona ita be kaivakuku tomadiho henia karadia ita dadaraia.​—1 Timoteo 4:8.

17. Dahaka ita karaia kaivakuku tomadiho henia bamona sihari kava karadia ita dadaraia totona?

¹⁷ Sihari kava karadia be kaivakuku tomadiho henia karana bamona bona Iehova ena hesiai taudia ese unai kara idia dadaraia. Idia diba “heudahanai tauna bona matabodaga tauna bona kohu ura dikadika tauna be gabu lasi, Keriso bona Dirava edia Basileia lalonai. Kohu ura dikadika kara be hegeregere kaivakuku tomadiho henia kara bamona.” (Efeso 5:5) Unai be kaivakuku tomadiho henia kara bamona badina unai ura dikana ta idia laloa bada dainai. Sihari kava ena ura dikana ese Dirava ia gwauraia kara goeva karana ia hadikaia. Bema ta ese ena matana amo bona ena taiana amo miro gaudia ia tahua, ia ese ena hetura karana helaga Diravana, Iehova, dekenai ia hadikaia diba. (Isaia 6:3) Vadaeni, unai bamona kaivakuku tomadiho henia kara dadaraia totona, Dirava ena hesiai taudia be matabodaga karadia bona miusik dikadia idia dadaraia be gau badana. Namona be Baibel amo lauma dalanai idia ia hagoadaia gaudia idia tahua noho, bona hanaihanai “mauri matamata do [idia] atoa, dabua matamata [idia] atoa bamona. Inai mauri matamata dainai emui toana be Dirava ena toana bamona, ia ese ia karaia gauna. Inai mauri matamata ena kara be maoromaoro, helaga bona momokani.”​—Efeso 4:​22-24.

Mataganigani bona Kohu Ura Dikadika Kara Dadaraia

¹⁸ Danu, Keristen taudia be mataganigani bona kohu ura dikadika kara idia dadaraia badina unai kara be kaivakuku tomadiho henia kara haida bamona. Mataganigani kara be gau tau ura henia dikadika karana, bona kohu ura dikadika kara be ma tau ta ena kohu mataganigani henia karana. Iesu ese sisiba ia henia kohu ura dikadika karana ita karaia lasi totona, bona ia hahedinaraia mataganigani tauna ena kohu momo do idia durua lasi ia mase neganai, bona madi “Dirava dekenai ia be gau momo ia henia lasi tauna.” (Luka 12:​15-21) Mai ena maoro danu Paulo ese Keristen taudia ia sisiba henidia, ia gwau: “Tauanina ena ura . . . umui hamasea. . . . Kohu ura dikadika kara be hegeregere kaivakuku tomadiho henia kara bamona.”​—Kolose 3:5.

18, 19. (a) Mataganigani bona kohu ura dikadika karadia be dahaka? (b) Dahaka ita karaia mataganigani bona kohu ura dikadika karadia ita dadaraia totona?

¹⁹ Moni idia ura henia bada taudia, aniani bona inuinu bada idia ura taudia, eiava siahu bada idia tahua taudia edia ura be kaivakuku tomadiho henia kara bamona. Paulo ese ia gwauraia hegeregerena, mataganigani tauna be kaivakuku tomadiho henia tauna bamona, bona Dirava ena Basileia lalonai do ia vareai lasi. (1 Korinto 6:​9, 10; Efeso 5:5) Unai dainai, bema bapatiso idia abia vadaeni taudia be idia mataganigani unai be kaivakuku tomadiho henia kara bamona, unai dainai, Keristen kongregesen murimurinai idia atoa diba. To, Baibel ena hereva ita badinaia bona iseda lalona ibounai ida ita guriguri neganai, ita be mataganigani karana ita dadaraia diba. Hereva Lada-isidia 30:​7-9 ia gwau: “[Iehova Dirava] gau rua oiemu amo lau tahua. Mani, lau do mase lasi neganai unai gaudia lau oi hadibaia. Maoro lasi bona koikoi herevana lauegu amo oi kokia. Ogogami eiava taga bada lau oi henia lasi. Lau oi henia anianina mo do lau ania, idau lau bogakunu bona oi lau dadaraia, do lau gwau: ‘Iehova be daika?’ bona murinai do lau ogogami bona lau henaohenao bona egu Dirava ena ladana lau tuari henia.” Unai bamona lalohadai ita abia neganai ita ia durua mataganigani bona kohu ura dikadika karadia, kaivakuku tomadiho henia karana unai, ita dadaraia totona.

Sibona Tomadiho Henia Karana Dadaraia

²⁰ Danu, Iehova ena taunimanima be sibodia idia tomadiho henia karana idia dadaraia. Hari inai tanobada lalonai taunimanima be sibodia idia lalokau henia bona sibodia edia ura idia karaia karana be bada herea. Taunimanima momo be ladana bada bona dagi bada idia ura abia dainai kara koikoi momo idia karaia. Idia sibodia edia ura idia karaia, Dirava ena ura idia karaia lasi. To bema koikoi dalana amo ita sibona eda ura ita tahua bona taunimanima ita lohiaia bamona, ita sibona ita tomadiho henia totona, Dirava ita tura henia diba lasi. (Hereva Lada-isidia 3:32; Mataio 20:​20-28; 1 Petero 5:​2, 3) Ita be Iesu murinai ita raka dainai, ita be inai tanobada ena koikoi karadia ita dadaraia.​—2 Korinto 4:​1, 2.

20, 21. Iehova ena taunimanima be dahaka idia karaia sibodia tomadiho henia karana idia dadaraia totona?

²¹ Dirava ena taunimanima be ladana bada idia tahua lasi, idia be Paulo ena hereva idia badinaia, ia gwau: “Umui aniani o umui inuinu, o dahaka dahaka umui karaia neganai inai, gau ibounai do umui karaia Dirava hanamoa totona.” (1 Korinto 10:31) Ita be Iehova ena hesiai taudia dainai, ita siboda eda ura ita tahua lasi, unai be kaivakuku tomadiho henia kara bamona, to mai moale danu Dirava ena ura ita badinaia bona “hesiai tauna mai ena kamonai bona mai ena kara maoromaoro” oreana dekena amo hakaua herevadia ita badinaia, bona Iehova ena orea danu ita gaukara hebou.​—Mataio 24:​45-47.

Gima Noho!

²² Ita be Iehova ena taunimanima dainai, kaivakuku vairanai ita tomadiho lasi. Kaivakuku tomadiho henia hehuni bamona karadia ita dadaraia danu. Oibe, kaivakuku tomadiho henia kara iboudiai ita dadaraia be gau badana. Unai dainai Ioane ena sisiba ita abia dae, ia gwau: “Naria namonamo, dirava koikoidia garina.”​—1 Ioane 5:21.

22, 23. Kaivakuku tomadiho henia bamona kara iboudiai ita dadaraia totona, dahaka ita karaia?

²³ Bema oi be Dirava ena hesiai tauna ta, Baibel ese oi ia hadibaia dainai, namona be hanaihanai emu lalona ena mamina bona laloa maoromaoro karana oi karaia. (Heberu 5:14) Unai neganai inai tanobada ena kaivakuku tomadiho henia karadia ese oi do idia hadikaia lasi, to oi be abidadama Heberu memero toi bona idau negai abidadama Keristen taudia bamona. Oi be Iehova mo sibona do oi tomadiho henia, bona ia ese oi ia durua kaivakuku tomadiho henia kara iboudiai oi dadaraia noho totona.

Oiemu Lalohadai be Dahaka?

◻ Esekiel ena matahanai lalonai ia itaia kaivakuku karadia be edena bamona ita dadaraia diba?

◻ Apokalupo 13:1 ena “dagedage gauna” be dahaka, bona iseda kara ia dekenai be dahaka?

◻ Dahaka dainai ita gima noho moale bona spot karadia dekenai idia kwalimu taudia ita tomadiho henidia lasi totona?

◻ Dahaka ita karaia ita sibona ita tomadiho henia lasi totona?

◻ Dahaka dainai ita gima noho kaivakuku tomadiho henia karadia iboudiai ita dadaraia totona?

6. Matahanai amo Esekiel ese dahaka kara dikadia ia itaia?

14. Apokalupo 13:1 ia gwauraia “dagedage gauna” dekenai, Iehova ena hesiai taudia edia kara be dahaka?

[Pictures on page 26]

[Credit Line]

Artwork (upper left) based on photo by Ralph Crane/Bardo Museum