Eda Haroro Gaukara Ita Karaia Namonamo Dalana​—Kamonai Tauna Ena Ladana Bona Gau Ma Haida Torea

Aposetolo Paulo be Timoteo ia hamaoroa: “Oi sibona bona emu hadibaia hereva dekenai oi naria namonamo.” (1 Tim. 4:16) Unai sisiba ese ia hahedinaraia, herevana hari sibona o lagani momo lalonai haroro gaukara ita karaia, to namona be ita gaukara goada eda gaukara ita hanamoa totona. Ita ese heduru ita abia totona, Iseda Basileia Gaukara ai kahana matamata ta do ia hedinarai, ena ladana be: “Eda Haroro Gaukara Ita Karaia Namonamo Dalana.” Atikol ta ta ese haroro gaukara ita karaia namonamo dalana ta bona badinaia dalana do ia herevalaia. Inai hua lalonai, namona be pablisa ibounai ita hagoadaia unai dala ita badinaia totona. Bena hua dokonai, unai dala ita badinaia ena ekspiriens haida be Hesiai Hebou ena kahana ta ai do ita herevalaia. Namona be inai hua lalonai, pablisa ibounai ita hagoadaia kamonai taudia edia ladana bona gau ma haida idia torea totona.

Dahaka Dainai mai Anina Bada? Iesu ese ita dekenai ia henia gaukarana ita hagugurua totona, namona be ita haroro sibona lasi, to ma gau haida ita karaia danu. Namona be kamonai taudia ita lou henia bona hereva momokani ita hadibaia, unai be hegeregere uhe ita hadoa bona gabeai ita giroa lou bena ranu amo ita dairia. (Mat. 28:19, 20; 1 Kor. 3:6-9) Anina be kamonai tauna ita tahua lou, badina ia ura diba gauna ita herevalaia, o guna ita herevalaia gauna ita habadaia. Unai dainai, kamonai taudia ita davaria neganai, edia ladana bona gau ma haida be eda noutbuk ai ita torea be namo.

Emu Noutbuk Torea Dalana:

• Namona be emu haroro baege ai, emu noutbuk bona peni idia noho, unai amo kamonai tauna ena ladana, adres, bona gau ma haida oi torea. Gau ibounai​—gunadia bona matamatadia​—oi torea namonamo. Kamonai tauna ida oi herevahereva murinai, maoromaoro gau ibounai oi torea.

• Kamonai tauna ena ladana, telefon namba, adres o e-mail adres oi torea. Danu, oi torea gauna ta be, ia bona ena famili ese dahaka heduru idia abia be namo?

• Oi torea gau haida be inai: Dahaka be kamonai tauna ida oi herevalaia? Edena Baibel siri oi duahia? Kamonai tauna ia gwau dahaka ia abia dae? Edena pablikeisen oi henia? Edena taim, dina, wiki, o deit ai oi vadivadi?

• Oi torea gau haida be inai: Wiki vairai oi lou henia neganai, dahaka do oi karaia? Oi gwauhamata dahaka do umui herevalaia? Edena negai do oi lou henia?

• Oi lou henia negadia ta ta ai, gau matamatadia oi torea. Emu noutbuk ai hereva momo herea oi torea be kerere lasi.

Hari hua lalonai, oi tohoa gauna be inai:

• Emu noutbuk ai kamonai tauna ena ladana bona gau ma haida oi torea neganai, namona be oi ia bamoa pablisa dekenai unai gaudia oi herevalaia danu.