“Tanobada Taudia Huanai Kara Namodia Do Umui Karaia Noho”
1. Dahaka dainai hebouhebou negadiai kara namodia ita hahedinaraia be gau badana?
1 Lagani ta ta ai, iseda hebouhebou negadiai, ita ese murimuri taudia edia lalona ita veria. Unai dainai, gau badana be eda kara namo amo ita hahedinaraia ita be Dirava helagana ita tomadiho henia. (Lev. 20:26) Namona be iseda kara namo, dabua bona tauanina ena toana amo ita hahedinaraia ita be Keriso ena hesiai taudia korikoridia. Hari lagani ena rijinol o intanesinol hebouhebou ita lao neganai, edena dala ai ‘tanobada taudia huanai kara namodia do ita karaia noho,’ unai amo eda guba Tamana ita hanamoa diba?—1 Pet. 2:12.
2. Hebouhebou negadiai, edena dala ai kara namo ita hahedinaraia diba?
2 Kara Namo Hahedinaraia: Tadikaka ita lalokau henidia bona “murimuri taudia” ita kara namo henia neganai, ita hahedinaraia ita be tanobada ena laloa dalana ita dadaraia. (Kol. 3:10; 4:5; 2 Tim. 3:1-5) Hotel ai idia gaukara taudia ita matauraia, bona haheauka karana ita hahedinaraia be namo, herevana hekwakwanai idia vara. Danu kara namona ta ita karaia diba, hegeregere reana weita o ita ia durua tauna ta dekenai heduru moni sisina ita henia diba.
3. Tama sina ese dahaka idia laloatao be namo, bona dahaka dainai?
3 Namona be hebouhebou gabunai, aniani gabudiai, stoa, hotel o unai bamona gabudiai tama sina ese edia natudia do idia naria namonamo. (Aon. 29:15) Hotel ta ena biaguna be headava tau bona hahine ta dekenai ia gwau: “Ai be umui ai ura henia. Emui famili bona natudia be hereva idia kamonai bona idia hemataurai. Gaukara taudia ibounai be umui idia herevalaia, bona wikeni iboudiai iniseniai umui noho be namo.”
4. Hebouhebou negadiai, edena dabua ita hahedokilaia be namo?
4 Dabua Namodia: Hebouhebou negadiai, namona be hemataurai dabua namodia ita hahedokilaia, namo lasi tanobada ena sitaelo ita tohotohoa. (1 Tim. 2:9) Danu, namona be hebouhebou ena lapel kadi ita atoa, unai ese dala ia kehoa ma haida ita haroro henia totona. Hebouhebou ita lao neganai, eda toana bona kara namodia ese kudou-maoro taudia edia lalona ia veria diba, Baibel ena hahemauri sivaraina idia kamonai totona. To unai sibona lasi, ita ese Iehova do ita hamoalea danu.—Sep. 3:17.
[Box on pages 3-6]
2014 Hebouhebou Hadibaia Herevadia
◼ Nega: Dina ta ta ena miusiki be 9:20 a.m. ai do ia matamaia. Unai negai, ita ibounai be iseda helai gabunai ita helai vadaeni, unai amo program be dala maorona ai ita matamaia diba. Friday bona Saturday ena program be 4:55 p.m. ai do ia ore, bona Sunday be 3:35 p.m. ai do ia ore. Dina rua hebouheboudia dekenai, Saturday program be 5:30 p.m. ai do ia ore bona Sunday be 4:10 p.m. ai do ia ore.
◼ Intanesinol Hebouhebou: Tano haida ai be intanesinol hebouhebou do idia karaia. Laloatao, brens ofesi be hebouhebou gabuna ena helai gabudia, motuka atoa gabudia, bona hotel edia daiutu edia namba idia sekea namonamo guna, gabeai kongrigeisen haida bona tano idauidau amo idia mai tadikaka taihu idia invait. Bema pablisa ta idia invait lasi to intanesinol hebouhebou ta ia lao, reana do ia davaria speis be lasi. Bema emu moni ia hegeregere dainai oi ura idau gabu ma ta ena hebouhebou oi lao henia, namona be intanesinol hebouhebou oi abia hidi lasi.
◼ Motuka Atoa Gabuna: Hebouhebou gabudia dekenai motuka atoa gabudia idia noho, davana be lasi. Namona be motuka taria tadikaka ese hebouhebou ena lapel kadi idia atoa, motuka atoa gabuna idia abia totona. Motuka atoa gabudia haida be maragi dainai, mani emui kara atendan taudia edia hereva umui badinaia.
◼ Helai Gabudia: Ita ida motuka tamona ai ita guia taudia, o ruma tamona ai ita noho taudia, o eda stadi taudia edia namba hegeregerena, helai gabudia ita abia be namo. Buruka bona gorere taudia be mai edia helai gabudia. Bona edia naria taudia ta o rua be unai taudia badinai idia helai diba.
◼ Dina Tubua Aniani: Mani emui kara, dina tubua aniani umui abia lao. Namo lasi hebouhebou gabuna oi rakatania bona stoa dekenai oi lao aniani hoia totona. Helai gauna henunai oi atoa diba eski maragina oi gaukaralaia.
◼ Kontribusen: Iseda tanikiu karana ita hahedinaraia diba bema hebouhebou gabuna ai, Tanobada Ibounai Gaukarana ena kontribusen ita henia. Idia henia seke be “International Bible Students Association” o “IBSA” ena ladana dekenai idia torea diba.
◼ Muramura: Bema doketa ese emu muramura ia henia, vadaeni hebouhebou oi lao neganai emu muramura oi abia lao danu, badina unai bamona muramura be Medikol Heduru Dipatmen ai do idia noho lasi.
◼ Seifti Laloa Bada: Mani ita naria namonamo, namo lasi gadara o dedi karana amo bero ita davaria. Hebouhebou gabuna ita lao neganai, namona be tamaka maorodia ita karaia.
◼ Taia Idia Dika Taudia Durua Totona: Hebouhebou gabudia haida ai, FM frequency idia gaukaralaia taia idia dika taudia idia durua. Hebouhebou program ibounai umui kamonai totona, namona be mobael fon o reidio maragina umui mailaia.
◼ Mani Lou Henia (S-43) Fom: Mani Lou Henia fom oi gaukaralaia, hebouhebou negana ai oi haroro henia tauna ena ladana bona adres oi torea totona. Bema fom ta dekenai kamonai tauna ena ladana bona adres oi torea vadaeni, namona be Buka Gabuna naria tadikaka oi henia, o oi giroa lou neganai emu kongrigeisen seketere oi henia diba.
◼ Hotel: Inai bamona gabudiai, emu kara namodia amo Iehova ena ladana oi abia isi. Emu dabua karaia dalana amo oi hahedinaraia, oi be Iehova ena Witnes ta.
◼ Noho Gabudia:
(1) Bema mahuta gabudia oi ura abia, emu kongrigeisen be Ruma Naria Dipatmen amo fom ia abia neganai, karaharaga seketere oi hadibaia.
(2) Daiutu momo oi noia kava lasi, to do idia noho taudia edia namba hegeregerena oi noia, bona oi gwauraia taudia sibona be emu daiutu dekenai idia noho be namo.
(3) Bema emu noho gabuna oi haidaua, Ruma Naria Dipatmen oi hadibaia haraga be namo.—Mat. 5:37.
(4) Daiutu lalonai aniani umui nadua lasi. To idia abia hidi gabudia dekenai umui nanadu.
(5) Bema tadikaka edia ruma ai oi noho, aniani ena davana, nanadu bona ruma gaukara haida dekenai ruma taudia oi durua be namo.
(6) Bema tadikaka edia ruma ai oi noho, edia heabidae karana oi matauraia, bona oi abia hidi dinadia sibona oi noho be namo.—Aon. 25:17.
(7) Emu noho gabuna idia henia bona oi noho ela bona oi rakatania neganai, namona be Keristani kara namodia oi hahedinaraia. Taunimanima ese iseda hebogahisi, haheauka, bona laloa maoromaoro karana do idia laloa bada.
(8) Bema oi noho gabuna dekenai hekwakwanai ta ia vara, vadaeni Ruma Naria Dipatmen oi hadibaia bona oi do idia durua.
(9) Namona be nega ibounai tama sina ese edia natudia idia naria.
◼ Volantia Gaukara: Bema ta ia ura heduru ia henia, namona be hebouhebou gabunai Volantia Gaukara Dipatmen ia hadibaia. Mauri lagani 16 idia do abia lasi natudia ese heduru namona idia henia diba, bema edia tama sina eiava tadikaka o taihu badana ma ta ida idia gaukara hebou.