Inai Oi Diba, A?
Dahaka dainai Iesu ia gwau, “tau ta ese uaina matamata be kopina gunana dekenai do ia udaia lasi”?
▪ Baibel negadiai, animal edia kopina amo idia karaia puse idia gaukaralaia uaina idia udaia totona. (Iosua 9:13) Uaina pusena be nani ena natuna o ia bada vadaeni nani edia kopina amo idia karaia. Unai idia karaia totona, ia mase vadaeni animal ena kwarana bona aena idia utua bona ena hidio idia kokia namonamo, unai amo ena bogana anina idia hadikaia lasi. Unai murinai ena kopina be dina dekenai idia hakaukaua bona varo amo matu ibounai idia turia, to ena aiona o aena kahana idia turia lasi, unai amo uaina idia inua diba. Idia turia lasi kahana be varo ta amo idia kwatua.
Gabeai, uaina puse matamatana be ia auka. Unai dainai, uaina puse gunana dekenai uaina matamatana idia udaia lasi. Badina uaina puse gunana lalonai uaina matamata idia udaia neganai, unai puse gunana ena kopina do ia makohi. To, puse matamatana lalonai uaina matamatana idia udaia diba. Unai dainai, Iesu be iena negai taunimanima idia diba momo karana ta ia herevalaia. Ia ese uaina puse gunana lalonai uaina matamatana idia udaia neganai ia vara gauna ia gwauraia, ia gwau: “Uaina ese kopina do ia makohia, vadaeni uaina do ia bubua negea bona kopina danu do ia dika. To uaina matamata be kopina matamata dekenai do idia udaia, vadaeni ruaosi do idia namo.”—Luka 5:37, 38.
Roma taudia ese Paulo idia guia neganai daidia be “ala-ala taudia”?
▪ Kara bukana ena hereva bamona, Ierusalema ena dubu helaga dekenai hepapahuahu ia vara neganai, Roma tuari biaguna ta ese aposetolo Paulo be dibura ruma ai ia atoa, badina ia laloa Paulo be gavamani gwau-edeede henia “ala-ala taudia 4000” ia gunalaia tauna. (Kara 21:30-38) Unai ala-ala taudia amo dahaka ita dibaia?
Inai Greek herevana, “ala-ala taudia” be Latin gado herevana sicarii amo idia abia, anina be “sica gaukaralaia taudia” o kaia idia gaukaralaia. Histori torea tauna Flavius Josephus ia gwau Sicarii be Iuda oreana ta, bona unai orea be Roma taudia ia inai henia bona gavamani ia dagedage henia.
Josephus be Sicarii orea ia herevalaia neganai, ia gwau, “Idia be siti lalonai bona dina dekenai edia inai taudia idia alaia mase; nega momo moale negadiai bona hutuma huanai idia noho neganai, edia dabua lalonai be kaia idia hunia, unai amo edia inai taudia idia gwadaia mase.” Edia inai taudia idia moru bena idia mase neganai, Sicarii orea taudia be idia badu koikoi, unai amo taunimanima do idia diba lasi unai taudia be idia ese idia alaia. Josephus ma ia gwau, lagani 66-70 C.E. ai unai Sicarii oreana ese Iuda taudia idia gunalaia bona Roma taudia idia tuari henia. Unai dainai, Roma tuari gunalaia tauna be mai ena maoro unai orea dikana ia ura gunalaia tauna be dibura ruma ai ia atoa totona.
[Picture on page 21]
Uaina puse Gunana
[Picture on page 21]
Ala-ala tauna ena laulau