‘Ia Karaia Gaudia be Ia ida Nega Tamona Idia Lao’

TADIKAKA Theodore Jaracz, Iehova ena Witnes taudia edia Hakaua Oreana ena memba ta, be Wednesday daba, June 9, 2010 ai ia mase bona iena mauri lagani be 84. Ia bona ena adavana Melita edia headava laganidia be 53 bona taihu Melita be ia mauri noho. Tadikaka Jaracz ena kakana hahine bona ena natudia toi danu be idia mauri noho.

Tadikaka Jaracz be September 28, 1925, Pike County, Kentucky, U.S.A. dekenai ia vara, bona August 10, 1941 ai ena mauri lagani be 15 neganai bapatiso ia abia. Lagani rua murinai, ena mauri lagani be 17 neganai, regula painia gaukara ia hamatamaia. Unai nega amo ema bona ena mase, ia be lagani 67 lalonai ful-taim hesiai gaukara ia karaia.

Lagani 1946 ai, Tadikaka Jaracz ena mauri lagani be 20 neganai, Gilead Sikuli ena klas namba seven dekenai ia lao. Gradueisen murinai, Tadikaka Jaracz be Cleveland, Ohio, United States ai loaloa naria gaukara ia karaia. Lagani 1951 ai, ia idia siaia Australia ena brens opesi ena gaukara ia naria totona. Lagani 1983 Yearbook of Jehovah’s Witnesses ia gwau, Tadikaka Jaracz “ese unai tano ai tadikaka taihu ia hagoadaia badina ia be tiokratik dalana ia badinaia bona haroro gaukara ia gunalaia namonamo tauna.”

United States dekenai ia giroa lou murinai, December 10, 1956 ai Tadikaka Jaracz be taihu Melita Lasko ia adavaia. Idia headava murinai United States ena gabu momo ai sekit bona distrik gaukara idia karaia. Lagani 1974 ai, Tadikaka Jaracz be Iehova ena Witnes taudia edia Hakaua Oreana ena memba tauna ta ai ia lao.

Tadikaka Jaracz be mai ena lalona ibounai ida Iehova ia hesiai henia bona tiokratik gaukara idauidau ia laloa bada, unai do ita laloaboio lasi. Ia be ena adavana ia lalokau henia bona ma haida edia namo ia atoa guna tauna. (1 Kor. 13:​4, 5) Ia be taunimanima ia hebogahisi henidia bona maka tamona ai ia kara henidia. Danu, haroro gaukara ia karaia goadagoada karana amo ia hahedinaraia ma haida ia lalokau henia.

Ena be Betele famili bona tanobada hegegemadai idia noho tadikaka be Tadikaka Jaracz ena mase dainai idia hebogahisi, to moale gauna be lagani momo lalodiai ia be Iehova ia badinaia. Ita diba momokani ia be Iehova ia ‘badinaia ela bona ia mase, bona ena kwalimu ahuna, mauri’ ia abia vadaeni. (Apok. 2:10) Danu, ita diba ‘ia karaia gaudia be ia ida nega tamona idia lao.’​—⁠Apok. 14:​13, NW.