Do Ia Noho Hanaihanai Siti Ita Naria Noho

1. Iesu ia gwau Ierusalema dekenai dahaka do ia vara?

IESU KERISO ena mase dinana ia kahirakahira lalonai, ia ese ena murinai idia raka taudia dekenai peroveta herevana ta ia gwauraia. Unai peroveta herevana be Ierusalema bona ena dubu idia hadikaia neganai, ia guguru. Ia gwau Ierusalema siti be ‘tuari oreadia ese do idia hagegea.’ (Luka 21:20) Iesu ese ena murinai idia raka taudia ia hamaoroa unai tuari oreadia—unai be Roma tuari oreadia—idia itaia neganai, unai gabu idia rakatania haraga be namo.—Luka 21:21, 22.

2. Aposetolo Paulo be Iudea bona Ierusalema ai idia noho Heberu Keristani taudia dekenai dahaka hadibaia hereva ia henia?

² Roma tuari oreadia ese Ierusalema idia do hagegea lasi bona lagani haida gunanai, Paulo ese revareva ta ia torea. Hari unai revareva idia gwauraia Heberu bukana. Unai revareva ai, Paulo ese Iudea bona Ierusalema ai idia noho Keristani taudia dekenai mai anina bada sisiba ia henia, unai ese idia do ia durua vaira nega ai do idia vara gaudia totona idia hegaegae diba. Vaira nega ai dahaka do ia vara? Ierusalema be do idia hadikaia. Bema unai Keristani taudia idia ura idia mauri, idia ese edia ruma bona bisinesi idia rakatania be namo. Unai dainai Paulo be Ierusalema siti ia herevalaia neganai, ia gwau: “Ita dekenai noho hanaihanai siti ta be lasi.” Bena ia gwau: “To mai iseda ura bada ida do ia mai gauna ita naria noho.”—Heb. 13:14.

3. “Siti mai ena badina aukana” be dahaka, bona dahaka dainai unai siti ita naria?

³ Keristani taudia be edia lalona idia hadaia Ierusalema bona Iudea idia rakatania neganai, haida ese idia gwauraia dika bona idia dekenai idia kiri, to unai abia hidi idia karaia dainai idia mauri. Hari inai negai danu taunimanima ese ita idia hevasehalaia badina ita be taunimanima dekenai ita tabekau lasi bona inai tanobada ai moni bona kohu momo maurina ita tahua lasi. To dahaka dainai unai abia hidi ita karaia? Badina ita diba inai tanobada oromana be do ia ore. Ita be “siti mai ena badina aukana” ita naria noho, unai be “do ia mai gauna,” Dirava ena Basileia.a (Heb. 11:10; Mat. 6:33) Inai atikol ena hereva kwarana ta ta henunai, inai gaudia do ita herevalaia: (1) Paulo ese ena sisiba amo Keristani taudia ginigunadia ia durua “do ia mai siti” totona do idia naria dalana, (2) Paulo ese vaira nega ai do idia vara gaudia totona idia ia hegaegaelaia dalana, bona (3) ena sisiba ese hari ita ia durua dalana.

IEHOVA DEKENAI OI TABEKAU, IA ESE OI DO IA RAKATANIA LASI

4. Dahaka dainai Keristani taudia dekenai Ierusalema be mai anina bada?

⁴ Keristani taudia dekenai Ierusalema be mai anina bada. Lagani 33 C.E. ai, unai siti ai Keristani kongrigeisen ginigunana ia matamaia, bona hakaua oreana be unuseniai ia noho. Ma danu, unai siti ai Keristani taudia momo be mai edia ruma bona mai edia kohu. To, Iesu ese ia murinai idia raka taudia ia hadibaia Ierusalema bona Iudea idia rakatania be namo.—Mat. 24:16.

5. Edena dala ai Paulo ese Keristani taudia ia durua Ierusalema dekenai do idia vara gaudia totona idia hegaegae?

⁵ Paulo ia ura Keristani taudia be Ierusalema idia rakatania totona idia hegaegae, unai dainai idia ia durua Iehova ese unai siti ia laloa dalana idia lalopararalaia totona. Paulo ese idia ia hadibaia Iehova be Ierusalema ai ia noho dubu helaga, hahelaga taudia, bona idia henia boubou gaudia ia abia dae lasi. (Heb. 8:13) Badina unai siti ai idia noho taudia ese Mesia idia dadaraia. Taunimanima be Ierusalema dekenai do idia lao lasi Iehova idia tomadiho henia totona, bona unai siti be do idia hadikaia.—Luka 13:34, 35.

6. Dahaka dainai Paulo ena sisiba Heberu 13:5, 6 be nega korikori ai Keristani taudia dekenai ia siaia?

⁶ Paulo ese Heberu Keristani taudia ia tore henia neganai, Ierusalema be taunimanima momo ese idia lao henia gabuna. Unai nega ai ia noho Roma toretore tauna ta ese Ierusalema ia gwauraia “ist kahana ena siti badana ta.” Lagani ta ta ai, gabu idauidau ai idia noho Iuda taudia be aria totona unai siti dekenai idia lao, bona unuseniai gau momo idia hoia diba. Bona unai dala amo Keristani taudia haida be moni momo idia abia diba. Reana unai dainai Paulo ese idia ia hamaoroa, ia gwau: “Namona be emui mauri dalana amo umui hahedinaraia, moni umui ura henia dikadika lasi, to umui dekenai idia noho gaudia be hegeregere.” Bena Baibel ai ia noho hagoadaia herevana, Iehova ese ia gwauraia gwauhamata unai, ia gwauraia: “Lau ese umui do lau negea lasi, bona umui do lau rakatania lasi.” (Heberu 13:5, 6 duahia; Deu. 31:6; Sal. 118:6) Namona be Ierusalema bona Iudea ai idia noho Keristani taudia ese unai gwauhamata idia laloatao. Dahaka dainai? Badina unai revareva idia abia bona daudau lasi murinai, edia ruma, edia bisinesi, bona edia kohu momo do idia rakatania. Bena do idia diba lasi gabuna ta dekenai do idia lao.

7. Dahaka dainai hari Iehova dekenai iseda abidadama ita hagoadaia be namo?

⁷ Ita dibaia gauna: Daudau lasi dahaka do ia vara? “Hisihisi badana” do ia matamaia bona inai tanobada oromana dikana do idia hadikaia ore. (Mat. 24:21) Keristani taudia ginigunadia bamona, namona be do ita noga noho bona ita hegaegae. (Luka 21:34-36) Hisihisi badana lalonai, ita danu be iseda kohu haida eiava ibounai do ita rakatania, bona ita abia dae Iehova ese ita do ia rakatania lasi. Hari danu, hisihisi badana ia do ginidae lasi neganai, dala ia noho ita hahedinaraia diba Iehova dekenai ita tabekau. Sibona oi nanadaia, ‘Egu kara bona tahua gaudia amo lau hahedinaraia lau be kohu bona moni dekenai lau tabekau lasi, to ia gwauhamata lau do ia naria Diravana dekenai lau tabekau, a?’ (1 Tim. 6:17) Oibe, ena be aposetolo taudia edia nega ai ia vara gaudia amo diba ita abia, to unai nega ai idia vara gaudia be hisihisi badana ai do idia vara gaudia ese ia hereaia. Unai dainai hisihisi badana ia matamaia neganai, edena dala ai unai nega ai do ita karaia gaudia do ita diba?

ITA IDIA HAKAUA TAUDIA ITA KAMONAI HENIA

8. Iesu ese ena hahediba taudia dekenai dahaka sisiba ia henia?

⁸ Heberu taudia be Paulo ena revareva idia abia bona lagani haida murinai, Keristani taudia idia itaia Roma tuari oreadia ese Ierusalema siti idia hagegea. Unai ia vara neganai, idia diba idia heau mauri be namo, badina Ierusalema do idia hadikaia. (Mat. 24:3; Luka 21:20, 24) To edeseni idia heau lao be namo? Iesu ia gwau: “Iudea dekenai idia noho taudia be ororo dekenai idia heau lao be namo.” (Luka 21:21) Unai gabu ai ororo momo idia noho. Unai dainai edena bamona do idia diba edena ororo dekenai do idia heau lao?

9. Dahaka dainai Keristani taudia idia daradara diba edena ororo dekenai do idia heau lao totona? (Mapu itaia danu.)

⁹ Mani Keristani taudia idia heau lao diba ororo haida mani ita laloa: Samaria ena ororo haida, Galilea ena ororo haida, Heremona Ororo, Lebanona ena ororo haida, bona Ioridane ai idia noho ororo haida. (Mapu itaia.) Taunimanima idia laloa unai ororo ataiai idia noho siti be heau mauri gabu namodia. Hegeregere, Gamla ena siti be ororo badana ta latanai ia noho bona ia auka tuari taudia ese idia abia totona. Iuda taudia haida idia laloa unai gabu dekenai idia heau mauri be namo. To, Gamla ai nega momo Iuda bona Roma taudia idia tuari, bona unuseniai idia noho taudia momo be unai tuari lalonai idia mase.b

10-11. (a) Iehova ese edena dala ai Keristani taudia ia hakaua? (Heberu 13:7, 17) (b) Keristani taudia be gunalaia taudia idia badinaia dainai, dahaka namo idia davaria? (Laulau itaia danu.)

¹⁰ Iehova ese kongrigeisen idia hakaua taudia ia gaukaralaia Keristani taudia ia hakaua totona. Histori torea tauna Eusebius ia gwau: “Ierusalema ena kongrigeisen ai idia noho Keristani taudia be Dirava ese ia abia hidi tatau haida amo hadibaia hereva idia abia; idia hadibaia. . . tuari ia do vara lasi neganai, Perea ena siti ta Pela dekenai do idia lao bona unuseniai do idia noho.” Toana be Pela dekenai idia lao be abia hidi maorona. Unai hanua be Ierusalema amo ia daudau lasi dainai unuseni idia lao haraga diba. Danu Pela ai idia noho taudia momo be Iuda taudia lasi, bona idia be Iuda taudia idia durua lasi Roma taudia idia tuari henia totona.—Mapu itaia.

¹¹ Ororo dekenai idia heau lao Keristani taudia be Paulo ena sisiba idia badinaia, ia gwau, kongrigeisen ai “umui idia hakaua taudia do umui kamonai henia.” (Heberu 13:7, 17 duahia.) Dirava ena taunimanima be kamonai karana idia hahedinaraia dainai idia roho mauri. Histori ese ia hamomokania “siti mai ena badina aukana”—Dirava ena Basileia—idia naria noho taudia be Dirava ese ia rakatania lasi.—Heb. 11:10.

12-13. Edena dala ai Iehova ese nega aukadia lalonai ena taunimanima ia hakaua?

¹² Ita dibaia gauna: Iehova ese hakaua taudia ia gaukaralaia ena taunimanima dekenai hakaua herevadia ia henia totona. Baibel ai sivarai momo ese idia hahedinaraia Iehova ese abidadama taudia ia gaukaralaia nega aukadia ai ena taunimanima idia hakaua totona. (Deu. 31:23; Sal. 77:20) Bona hari danu ita itaia Iehova ese hakaua taudia ia gaukaralaia noho ena taunimanima ia hakaua totona.

¹³ Hegeregere, COVID-19 pendemik ia matamaia neganai, kongrigeisen ai “hakaua taudia” ese hakaua herevadia idia henia. Elda taudia be hakaua herevadia idia abia, unai amo dala idia karaia tadikaka taihu be idia hebou bona Iehova idia tomadiho henia diba. Pendemik ia matamaia bona hua haida murinai, ita ese gado 500 mai kahana ai hebouhebou ita karaia, tadikaka bona taihu be Intanet, TV, bona reidio amo unai hebou idia moalelaia. Unai nega ai Iehova amo ia mai hakaua herevadia ita abia noho. Unai dainai ita ibounai be lalotamona ai ita noho. Namona be ita abia dae vaira nega ai do ita davaria hahetoho idauidau lalonai, Iehova ese hakaua taudia do ia durua noho abia hidi namodia idia karaia totona. Hisihisi badana totona ita hegaegae bona unai nega aukadia lalonai abia hidi namona ita karaia totona, namona be Iehova ita abidadama henia bona ena oda herevadia ita badinaia. Danu, unai nega aukana lalonai, dahaka kara ma haida ita hahedinaraia be namo?

TADIKAKA TAIHU LALOKAU HENIA BONA HEABIDAE KARANA HAHEDINARAIA

14. Heberu 13:1-3 hegeregerena, Ierusalema do idia hadikaia negana ia kahirakahira neganai, Keristani taudia ese dahaka kara haida idia hahedinaraia be namo?

¹⁴ Hisihisi badana ia matamaia neganai, namona be ta ta ita lalokau henia be gau badana. Unai nega ai, namona be ita ese Ierusalema bona Iudea ai idia noho Keristani taudia edia haheitalai do ita tohotohoa. Idia be hanaihanai ta ta dekenai lalokau idia hahedinaraia. (Heb. 10:32-34) To Ierusalema idia do hadikaia lasi bona lagani haida idia do noho lalonai, Keristani taudia be ‘tadikaka bamona do idia lalokau heheni’ bona “heabidae karana” do idia goadalaia be namo.c (Heberu 13:1-3 duahia.) Ita danu be inai tanobada oromana ena dokona kahirakahira ita noho dainai, ta ta dekenai lalokau karana ita hahedinaraia badabada be namo.

15. Heberu Keristani taudia idia heau mauri murinai, dahaka dainai ta ta dekenai lalokau bona heabidae karana idia hahedinaraia be namo?

¹⁵ Roma tuari oreadia ese Ierusalema idia hagegea bena karaharaga idia giroa lou. Unai dainai Keristani taudia be edia kohu sisina idia abia bona idia heau mauri. (Mat. 24:17, 18) Idia be ororo gabudia ai idia lao noho lalonai bona gabu matamata dekenai idia noho neganai, ta ta idia durua be namo. Unai nega ai, Keristani taudia be aniani bona dabua dekenai idia dabu, bona noho gabuna be lasi, unai dainai unai be nega namona ta ta dekenai lalokau idia hahedinaraia bona edia kohu idia haria bona ta ta idia durua karana amo heabidae karana idia hahedinaraia.—Tito 3:14.

16. Iseda tadikaka eiava taihu ta be heduru ia ura neganai, edena dala ai lalokau ita hahedinaraia diba? (Laulau itaia danu.)

¹⁶ Ita dibaia gauna: Lalokau karana dainai, ita ura iseda heduru idia ura tadikaka bona taihu dekenai heduru ita henia. Dirava ena hesiai taudia momo idia ura tadikaka taihu idia durua, badina tuari eiava disasta badadia dainai edia gabu idia rakatania. Idia ese tauanina dalanai heduru idia henia, bona idia hagoadaia Dirava idia hesiai henia noho totona. Ukraine taihu ta be tuari dainai ena gabu ia rakatania, ia gwau: “Iseda tadikaka ese ai idia hakaua bona durua karana amo Iehova ena imana ai mamia. Ukraine ai, Hungary ai, bona hari ai noho Germany dekenai, ai itaia tadikaka taihu ese ai idia welkam henia bona heabidae karana idia hahedinaraia.” Ita ese iseda tadikaka taihu dekenai heabidae karana ita hahedinaraia bona edia dabu gaudia ita henia neganai, ita be Iehova ida ita gaukara hebou.—Aon. 19:17; 2 Kor. 1:3, 4.

17. Dahaka dainai hari iseda tadikaka bona taihu dekenai lalokau bona heabidae karana ita hahedinaraia be mai anina bada?

¹⁷ Hisihisi badana lalonai, ta ta do ita durua be mai anina bada. (Hab. 3:16-18) Hari Iehova be treinini ia henia noho ta ta lalokau henia bona heabidae karana ita hahedinaraia totona. Unai kara be hisihisi badana negana ai ita hahedinaraia be mai anina bada.

VAIRA NEGA AI DO IA VARA GAUNA

18. Edena dala ai Ierusalema amo idia heau mauri Keristani taudia ita tohotohoa diba?

¹⁸ Histori ese ia hahedinaraia, Ierusalema idia hadikaia neganai, idia kamonai Keristani taudia be ororo gabudia dekenai idia heau lao dainai idia mauri. Idia be edia siti idia rakatania, to Iehova ese idia ia rakatania lasi. Edia haheitalai amo dahaka ita dibaia? Vaira nega ai do idia vara gaudia ita diba namonamo lasi, to Iesu ese ita ia hadibaia namona be ita hegaegae kamonai karana ita hahedinaraia totona. (Luka 12:40) Danu Paulo ese Heberu taudia dekenai ia siaia revareva ena sisiba ita laloa dobu bona badinaia diba. Bona Iehova ia gwauhamata ia ese ita do ia rakatania lasi. (Heb. 13:5, 6) Namona be hanaihanai do ia noho siti—Dirava ena Basileia—ita naria noho, bona do ia mailaia hahenamo idauidau do ita moalelaia ela bona hanaihanai.—Mat. 25:34.