Tuu khanst te khampf keeche ti ferkheerte winxe kewine!

1. Keeche was mise meyer al khëmpfe?

HOST tuu xon een xtarke wunx kehat fer etwas mache woo Yeehoowa net kefalt? Wën yaa, say net oone muut. Ti Piipel saat: “Khee fersuuchung is iwer aych khom, woo net keweenlich fer ti kanse mënxe is.” (1 Kor. 10:13)a Tas wil saan tas ekaal was tayn xwacheet is, pist tuu net aleen. Anere sin aach too tekeeche am khëmpfe un mit Yeehoowa sayn hilef, khanst tuu tiise khampf kewine.

2. Was fer sorte fersuuchunge tuun etliche kriste un Piipel xtutënte mit mache? (Kuk aach ti pilter.)

² Ti Piipel saat aach: “Yeete eene is keproopt wën eyer fon sayn aychne wunx ketsoo un fersuucht is.” (Tya. 1:14) Tiise wersikel helft uns ferxteen tas unerxiitliche layt khene fon unerxiitliche tinge fersuucht sin. Tsum payxpiil, etliche kriste khene fersuucht sin was imoraalixes mache mit yemant fom aner sëks; anere mit yemant fom selwiche sëks. Etliche woo noo kelos hon pornokrafii kuke, khene im xtant, te xtarke wunx hon fer tas noch mool mache. Fiile woo noo kelos hon trooke in nëme orer tsu fiil alkohool trinke, khene was eenliches mit mache. Tas sin ploos etliche fersuuchunge woo phaar kriste un Piipel xtutënte mit mache. In unser leepe, hon meyer al, tsiimlich sicher, uns soo wii te aphostel Phaul kexpiirt, woo kexrip hot: “Wën ich tas richtiches mache wil, xteet in mich was xlecht is.” (Rom. 7:21)

3. Wii khan yemant sich xpiire wën eyer ofts keeche te selwich ferkheerte wunx khëmpft?

³ Wëns tuu ofts keeche te selwich ferkheerte wunx khëmpfe tuust, im xtant, tenkst tuu tas tuu xwach pist, es wil saan, tas tuu khee kraft host fer tas richtiches mache. Fiilaycht tenkst tuu aach tas es khee hofnung fer tich kept, wii wën Yeehoowa sich nii mit tich kefale teet ploos wayls tuu een ferkheerte wunx host. Awer say tich sicher tas tas net woer is. Fer tas peser ferxteen, wole mer 2 frooche in tiise artikel antworte: (1) Warom khanst tuu soo sorte xpiirunge hon? (2) Wii khanst tuu te khampf keeche ti ferkheerte winxe kewine?

SATANAAS SAYN PLAAN

4. (a) Was wil Satanaas tas mer tenke wën mer fersuucht sin? (b) Warom khene mer uns sicher sin tas mer khene keeche ti ferkheerte winxe khëmpfe?

⁴ Wën mer fersuucht sin, wil Satanaas hon tas mer tenke tas mer xwach sin. Yeesus hot tas taytlich kelos wii eyer sayn tisipele in kelërnt hot se peete: “Pring uns net in fersuuchung, awer mach uns fom Xlechter fray.” (Mat. 6:13) Satanaas saat tas ti mënxe tuun net Yeehoowa foliche wën se foer een fersuuchung sin. (Yoop 2:4, 5) Awer tenk mool noo: Satanaas selepst waar fon sayn aychne wunx fersuucht un waar net wilich fer troy tsu Yeehoowa plaype. Tee klaapt tas mer soo wii tee sin un tas mer klaych Yeehoowa im xtich lose tuun wën mer fersuucht sin. Satanaas hot soo kaar ketenkt tas eyer khent Kot sayn perfekt Soon fersuuche was ferkheertes mache! (Mat. 4:8, 9) Awer meecht es wërklich unmeechlich sin keeche ti ferkheerte winxe khëmpfe? Sicher net! Meyer xtime mim aphostel Phaul woo kexrip hot: “Fer ales sin ich xtark torich tee woo meer kraft kept.” (Fili. 4:13)

5. Was tsaycht tas Yeehoowa is sich sicher tas mer keeche ti ferkheerte winxe khëmpfe khene?

⁵ Anerste wii Satanaas, is Yeehoowa sich sicher tas mer khene uns fest keeche ti ferkheerte winxe xtele. Wii wise mer tas? Yeehoowa hot foer raus kesaat tas een kroos folek teet troy tsu tëm plaype un ti kroos tripulatsyoon iwerleepe. Tenk aan was tas petayt. Yeehoowa, woo net liie khan, saat tas een kroos numer layt, net ploos een kleen krup, tuut im Paratiis rin keen mit ways tsaych aan, es wil saan, mit een rayn xtel foer tëm. (Apo. 7:9, 13, 14) Es is taytlich tas fer Yeehoowa, sin mer net xwach. Tee wees tas mer khene keeche ti ferkheerte winxe khëmpfe.

6-7. Was noch wil Satanaas hon tas mer klaape wën mer fersuucht sin?

⁶ Satanaas wil aach hon tas mer klaape tas es khee hofnung fer uns kept, wii wën Yeehoowa sich nii mit uns kefale teet ploos wayl meyer ferkheerte winxe hon. Awer tenk mool noo: Satanaas tuut nii Yeehoowa kefale, tee tuut net fer imer leepe un tee wërt kans fernicht. Soo, es is fer tëm woo es khee hofnung kept. (Xee. 3:15; Apo. 20:10) Sicher is Satanaas aarich pees tas mer ti hofnung hon fer eewiche leepe kriin. Tes weeche, fersuucht eyer uns klaape mache tas mer soo wii tee sin un tas es khee hofnung fer uns kept. Awer tas is net woer. Ti Piipel lost uns sicher tas Yeehoowa wil uns helfe eewiche leepe kriin. Tee ‘winxt net tas yemant fernicht wërt, awer winxt tas al sich peroye’. (2 Phe. 3:9)

⁷ Soo, wën mer tenke tas mer xwach sin orer tas es khee hofnung fer uns kept in unser khampf keeche ti ferkheerte winxe, sin mer am tenke soo wii Satanaas es wil. Tas ferxteen, khan uns helfe unser pextimung ferxtërke fer uns fest keeche tëm xtele. (1 Phe. 5:8, 9)

WII TI SINT UNS PETREFT

8. In te Piipel, mit was hot tas wort “sint” se tuun? (Psalm 51:5) (Kuk aach “Tuu peser ferxteen”.)

⁸ Was noch khan uns klaape mache tas mer xwach sin un tas es khee hofnung fer uns kept? Ti sint woo meyer al fon unser eyerst mënxliche eltere keërpt hon.b (Yoop 14:4; lees Psalm 51:5.c)

9-10. (a) Wii hot ti sint Aatam un Ewa petrof? (Kuk aach tas pilt.) (b) Wii tuut ti sint uns petrefe?

⁹ Mërk mool wii ti sint Aatam un Ewa petrof hot. Noo Yeehoowa unfoliche, hon se sich ferxtekelt un fersuucht sayn khërper teke. Tas puuch Estudo Perspicaz saat too triwer: “Weeche ti sint, hon se sich xultich, ëngstlich un ferxeemt kexpiirt.” Aatam un Ewa khente nii een ticht fraayntxaft mit Yeehoowa noch mool hon. Ekaal was se mache teete, teete se sich imer xultich, ëngstlich un ferxeemt xpiire wayl se sintiche layt waare.

¹⁰ Kewis, sin mer net in te selwich situatsyoon wii Aatam un Ewa sayns. Tas is soo wayl tas fray khaaf opfer kilt net fer tëne. Awer tiise opfer khan uns helfe fertsayung fer unser sinte kriin un een ticht fraayntxaft mit Yeehoowa hon. (1 Kor. 6:11) Noch soo, hon mer ti sint un ti imperfektsyoon keërpt. Tes weeche tuun meyer uns aach xultich, ëngstlich un ferxeemt xpiire. Ti Piipel saat tas ti sint tuut wayter iwer ti mënxe hërxe. Un tas phast fer ale kaar, too tepay “tii woo net kesint hate kraat soo wii Aatam kesint hot”. (Rom. 5:14) Awer meyer prayche net tenke tas wayl mer ti sint keërpt hon, sin mer xwach orer tas es khee hofnung fer uns kept. Meyer khene tiise nekatiiwe xpiirunge ap xtose. Wii?

11. Wii sole mer uns aan xtele wën mer tenke tas mer xwach sin un warom? (Romaaner 6:12)

¹¹ Wën mer tenke: ‘Ich sin xwach’ orer ‘Ich khan net keeche tiise ferkheert wunx khëmpfe’, is es wii wën unser imperfektsyoon am “xpreche” weyer. Awer meyer sole tëne net heere. Warom? Wayl ti Piipel lërnt uns in tas mer mise net lose tas ti sint ‘wayter iwer uns rechiirt’. (Lees Romaaner 6:12.)d Tas wil saan tas mer khene raus suuche unser ferkheerte winxe net erfiile. (Kal. 5:16) Yeehoowa traut tas mer khene uns fest keeche ti fersuuchung xtele. Wën net, teet eyer tas net fon uns ferlange. (Teut. 30:11-14; Rom. 6:6; 1 The. 4:3) Tes weeche, is es taytlich tas mer khene keeche ti ferkheerte winxe khëmpfe.

12. Wii sole mer uns aan xtele wën mer tenke tas es khee hofnung fer uns kept un warom?

¹² Kraat soo, wën mer tenke: ‘Es kept khee hofnung fer mich’ orer ‘Yeehoowa kefalt sich net mit mich wayl ich ferkheerte winxe hon’, is es wii wën unser imperfektsyoon am “xpreche” weyer un meyer sole tëne net heere. Warom? Wayl ti Piipel lërnt uns in tas Yeehoowa ferxteet tas mer ti sint keërpt hon. (Psal. 103:13, 14) Tee ‘wees ales’ iwer uns, too tepay wii yeete eene fon uns fon te sint influentsiirt is. (1 Yo. 3:19, 20) Wën mer khëmpfe keeche te wunx fer tas ferkheertes mache un tëm net erfiile, khene mer een rayn xtel foer Yeehoowa hon. Warom khene mer uns too tefun sicher sin?

13-14. Lee aus warom aynfach ferkheerte winxe hon, petayt net tas Yeehoowa sich net mit uns kefalt.

¹³ Ti Piipel saat tas es kept een kroos unerxiit tswixich was ferkheertes winxe un was ferkheertes pratikiire. Meyer khene net imer kontroliire tas een ferkheerte wunx in unser khop khomt. Awer meyer khene unser aktsyoone kontroliire fer tiise ferkheerte wunx net erfiile. Tsum payxpiil, etliche kriste in Korinto hate friier homoseksualismus pratikiirt. Phaul hot kexrip: “Tas is was etliche fon aych waare.” Meecht tas petayte tas se nii mool te wunx hate fer homoseksualismus pratikiire? Tsiimlich sicher net, wayl ofts is es aarich xweyer noo lose soo sorte winxe hon. Awer ti kriste woo selepst kontrol hate un sayn winxe net erfiilt hon, hon Yeehoowa kefalt. Fer Yeehoowa sin se “kewext kep”. (1 Kor. 6:9-11) Tas selwiche phast fer tich.

¹⁴ Ekaal ti ferkheerte winxe woos tuu too tekeeche khëmpfst, tuu khanst tich fest foer tëne xtele. Soo kaar wëns tuu khanst net tëne kans ap kewine, khanst tuu selepst kontrol hon un net ‘te wunx fon tayn khërper un ketanke erfiile’. (Ëfe. 2:3) Soo, was fer sin etliche tinge woo tich helfe khene te khampf keeche ti ferkheerte winxe kewine?

WAS TUUT TICH HELFE TI FERSUUCHUNG AP XTOSE?

15. Fer te khampf keeche ti ferkheerte winxe kewine, warom mise mer eerlich mit uns selepst sin?

¹⁵ Fer te khampf keeche ti ferkheerte winxe kewine, must tuu eerlich mit tich selepst sin un tayn xwacheete erkhëne. Phas uf fer tich net mit “falxe aanunge” hinerkeen. (Tya. 1:22) Tsum payxpiil, yemant woo tsu fiil alkohool trinkt, khan aan fange se tenke tas sayn propleem net soo xlim is, fiilaycht am saan: ‘Ti anere tuun mee wii ich trinke.’ Orer yemant woo pornokrafii kukt, khan ti xult fer ti anere kepe, fiilaycht am saan: ‘Ich weyer net fersuucht pornokrafii kuke wën mayn fraa liiplicher mit mich weyer.’ Soo se tenke, khan es laychter fer tich lose was ferkheertes mache. Tes weeche, suuch net ausreete fer tayn feeler, noch net mool in tayn ketanke. Was tuu machst, is tayn responsapiliteet. (Kal. 6:7)

16. Wii khanst tuu tayn pextimung ferxtërke fer tas richtiches mache?

¹⁶ Es is net kenuuch ploos eerlich mit tich selepst sin iwer tayn xwacheete. Tuu must tayn pextimung ferxtërke fer tas richtiches mache. (1 Kor. 9:26, 27; 1 The. 4:4; 1 Phe. 1:15, 16) Tenk aan was fer sort fersuuchung un was fer momënt xweyerer fer tich sin. Tsum payxpiil, is es xweyerer fer tich een fersuuchung ap xtose wëns tuu miit pist orer wën es xpeet in te nacht is? Tuu tich foer perayte un ëntxlist was tuu mache tuust. Ti pest tsayt fer tas mache, is foer een fersuuchung khomt. (Xpr. 22:3)

17. Was khanst tuu mit Yoosef sayn payxpiil lërne? (Xeenesis 39:7-9) (Kuk aach ti pilter.)

¹⁷ Tenk iwer Yoosef sayn payxpiil. Wii Potifaar sayn fraa fersuucht hot sëks mit tëm mache, hot eyer klaych un taytlich “nee” fer tëne kesaat. (Lees Xeenesis 39:7-9.)e Was lërne mer too temit? Yoosef waar pextimt tas richtiches mache eep Potifaar sayn fraa fersuucht hot sëks mit tëm mache. Kraat soo, tuu khanst tayn pextimung ferxtërke fer tas richtiches mache eep een fersuuchung khomt. Soo, wëns tuu fersuucht wërst, wërts laychter fer tich tich aan xtele tëm noo te ëntxlus woos tuu xon kemacht host.

‘TUU WAYTER FER TICH SELEPST KUKE’

18. Was noch khanst tuu mache fer te khampf keeche ti ferkheerte winxe kewine? (2 Korinter 13:5)

¹⁸ Fer te khampf keeche ti ferkheerte winxe kewine, must tuu aach ‘wayter fer tich selepst kuke’. (Lees 2 Korinter 13:5.)f Tuu ofts tayn ketanke un aktsyoone noo kuke un mach ti neetiche ënerunge. Tsum payxpiil, soo kaar wëns tuu es hin kriist een fersuuchung ap xtose, khanst tuu tich frooe: ‘Wii lang hon ich kenom fer “nee” saan?’ Wëns tuu mërkst tas tuu net klaych “nee” kesaat host, say net pees mit tich selepst. Xtats tas, tenk aan was tuu mache khanst tas neekste mool fer tich ferpesere. Froo tich: ‘Khan ich ferkleene ti tsayt woo ich nëme fer een ferkheerte ketanke ap xtose? Tuut ti ferkniichung woo ich raus suuche es xweyer fer mich lose ti fersuuchung ap xtose? Wën imoraalixe pilter foer khome, tuun ich klaych noo lose tëne kuke? Ferxteen ich tas soo kaar wën ich mus selepst kontrol tsayche fer Yeehoowa foliche, wërt tas imer tas pestes fer mich?’ (Psal. 101:3)

19. Wii khene xlechte ëntxlise iwer kleene sache unser khampf keeche ti ferkheerte winxe noch xweyerer lose?

¹⁹ Wëns tuu tich selepst noo kukst, suuch net ausreete fer was ferkheertes mache. Ti Piipel saat: “Tas hërts is hinerlisticher wii yeete aner tings un is ausensich.” (Yee. 17:9) Yeesus hot kesaat tas fom hërts “xlechte ketanke” khome. (Mat. 15:19) Tsum payxpiil, yemant woo noo kelos hot pornokrafii kuke, khan noo een tsayt tenke tas es net kefeerlich is pilter kuke woo seksuaale winxe uf hetse, wayl es kept khee nakichkheet. Orer im xtant khan eyer tenke: ‘Es is net ferkheert se tenke iwer was ferkheertes mache soo lang wii ich tas net wërklich mache.’ Wën yemant soo tenkt, weyer es wii wën eyer ‘foer pleene teet ti luste fom flayx erfiile’. (Rom. 13:14) Was khanst tuu mache fer tas net pasiire lose? Phas uf mit tayn ëntxlise. Xlechte ëntxlise iwer kleener sache nëme tsu xlechte ëntxlise iwer kreeser sache, soo wii tas ferkheertes mache.g Tuu aach kwalkee xlechte ketanke ap xtose woo tich nëme khan ausreete suuche fer tas ferkheertes mache.

20. Was fer hofnung hon mer fer te futuer un was fer hilef hon mer xon yets?

²⁰ Wii mer kelërnt hon, Yeehoowa kept uns kraft fer uns fest keeche ti fersuuchunge xtele. Un noch, weeche sayn parmhërtslichkheet, hon mer ti hofnung fer eewiche leepe in te nay welt kriin. Es wërt aarich kuut sin Yeehoowa tiine mit een phuer hërts un ketanke! Pis tiise tsayt khomt, khene mer uns sicher sin tas mer net xwach sin un tas es hofnung fer uns kept in unser khampf keeche ti ferkheerte winxe. Mit Yeehoowa sayn seechen iwer unser aanxtrengung, khene mer tiise khampf kewine!