Wii tuut Yeehoowa unser kepeete antworte?

1-2. Was khene mer uns als mool iwer unser kepeete frooe?

HOST tuu tich xon kefroot ep Yeehoowa tayn kepeete am antworte is? Wën yaa, tuu pist net aleen. Fiile priiter un xwestere hon xon kesaat tas se sich soo was kefroot hon, hauptseechlich wën se torich xlime propleeme kang sin. Wën meyer layte, khan es xweyer sin se mërke wii Yeehoowa unser kepeete antworte tuut.

² Warom khene mer uns sicher sin tas Yeehoowa ti kepeete fon sayn tiiner antworte tuut? (1 Yo. 5:15) Warom khan es als mool aus siin tas Kot unser kepeete net antworte tuut? Wii meecht Yeehoowa unser kepeete hayt antworte? In tiise artikel, xpreche mer too triwer.

KOT TUUT NET IMER ANTWORTE WII MER UNS FOER XTELE

3. Warom wil Yeehoowa hon tas mer tsu tëm peete?

³ Ti Piipel lost uns sicher tas Yeehoowa uns aarich liipt un tas mer weyert fer tëm hon. (Axeu 2:7; 1 Yo. 4:10) Tes weeche tuut eyer uns in laate sayn hilef im kepeet ferlange. (1 Phe. 5:6, 7) Tee wil uns helfe ticht pay tëm plaype un aach unser propleeme aus hale.

4. Wii wise mer tas Yeehoowa ti kepeete fon sayn tiiner antworte tuut? (Kuk aach tas pilt.)

⁴ Ti Piipel xprecht ofts iwer wii Yeehoowa ti kepeete fon sayn tiiner keantwort hot. Khanst tuu tich een payxpiil traan tenke? Eene is te kheenich Tawi. Torich sayn leepe, hat eyer fiile kefeerliche faynte un tee hot ofts Yeehoowa sayn hilef im kepeet ferlangt. Een mool, hot eyer aan kehal: “Oo Yeehoowa, heer mayn kepeet; horich mich wën ich tich hilef aan hale. Weeche tayn troyheet un kerechtichkheet, tuu mich antworte.” (Psal. 143:1) Tawi hot tsu Yeehoowa kepeet fer tëm pefraye un Kot hot tëm keantwort. (1 Sam. 19:10, 18-20; 2 Sam. 5:17-25) Tes weeche khont Tawi mit sicherheet saan: “Yeehoowa is ticht pay ale woo tëm aan ruufe.” Meyer khene uns aach sicher too tefun sin! (Psal. 145:18)

5. Hot Yeehoowa ti kepeete fon sayn friirixe tiiner imer keantwort in te aat wii se sich foer kextelt hate? Kep een payxpiil. (Kuk aach tas pilt.)

⁵ Khan sin tas Yeehoowa unser kepeete net antworte tuut in te aat wii mer uns foer xtele. Tas is mim aphostel Phaul pasiirt. Tee hot tsu Kot ferlangt “een taarn ins flayx” wech hoole. Phaul hot 3 mool spetsiifix too triwer kepeet. Meecht Yeehoowa tiise kepeet keantwort hon? Ia, awer net wii Phaul sich foer kextelt hat. Xtats te propleem wech nëme, hot Yeehoowa tëm ti neetich kraft kep fer Tëm wayter troy tiine. (2 Kor. 12:7-10)

6. Warom khan es als mool aus siin tas Yeehoowa unser kepeete net antworte tuut?

⁶ Meyer khene aach een antwort kriin woo mer uns net foer kextelt hate. Awer meyer khene uns sicher sin tas Yeehoowa kenau wise tuut was peser fer uns is. Fer uns helfe, khan eyer “fiil mee mache wii mer ferlange orer wii mer uns foer xtele khene”. (Ëfe. 3:20) Tes weeche khan sayn antwort fer unser kepeete in een xtun orer in een aat khome woo mer uns net foer kextelt hate.

7. Warom khan es neetich sin unser kepeete ënere? Kep een payxpiil.

⁷ Im xtant mise mer unser kepeete ënere wën mer Yeehoowa sayn wile peser ferxteen. Kuk mool tas payxpiil fon Martin Poetzinger. Klaych noo sayn hayrat, is eyer in een nasistix konsentratsyoon khamp in kexpërt kep. Am aanfang, hot eyer tsu Yeehoowa ferlangt tëm fom konsentratsyoon khamp pefraye, wayl soo khent eyer sayn fraa uf phase un noch mool preetiche. Awer noo 2 woche, hot es net aus kesiin tas Kot tëm pefraye teet. Tes weeche hot eyer aan kefang se peete: “Yeehoowa, pite, tsaych mich was tuu wilst tas ich mache sol.” Tan hot eyer aan kefang se tenke iwer was ti anere priiter im khamp am mit mache waare. Fiile fon tëne hon sich ketanke kemacht mit sayn aychne fraae un khiner. Too hot te pruuter Poetzinger kepeet: “Yeehoowa, tanke xeen fer mayn naye flicht. Helf mich ti priiter ferxtërke un uf muute.” In te neekste 9 yoore woo eyer in te khëmp keplip is, hot eyer kraat tas kemacht!

8. Was sole mer net ferkese wën mer peete?

⁸ Meyer sole uns nii ferkese: Yeehoowa hot een tsiil un eyer tuut tas in te tsayt woo eyer pextimt hot, erfiile. Tepay in tiise tsiil, is al ti propleeme wech nëme woo uns soo fiil phayn hayt pringe — soo wii natuer unklike, krankheete un toot. Yeehoowa erfiilt sayn tsiil torich sayn Raych. (Tan. 2:44; Apo. 21:3, 4) Awer pis tiise tsayt khomt, lost Yeehoowa tas Satanaas ti welt rechiirt.b (Yoo. 12:31; Apo. 12:9) Wën Yeehoowa al ti propleeme fon te mënxheet hayt resolwiire teet, khent es aus siin tas Satanaas een kuute rechiirente fer ti welt is. Awer, opwool mer waarte mise Yeehoowa etliche fon sayn ferxpreche erfiile, es wil net saan tas eyer uns oone hilef lost. Was macht eyer fer uns hayt helfe? Wole mer tas yets siin.

WII TUUT YEEHOOWA TI KEPEETE HAYT ANTWORTE?

9. Wii khan Yeehoowa uns helfe wën mer ëntxlise mache mise? Kep een payxpiil.

⁹ Tee kept uns kluucheet. Yeehoowa ferxprecht uns ti neetich kluucheet kepe fer kuute ëntxlise mache. Hauptseechlich wën mer ëntxlise mache woo unser kanse leepe petrefe khene — tsum payxpiil, ep mer uns hayrate tuun orer net — mise mer Yeehoowa sayn kluucheet hon. (Tya. 1:5) Kuk mool ti speryens fon een letich xwester woo Maria heest.c Tii waar wii een rekulaar pyoneerin froo am tiine wii se een pruuter khëne kelërnt hot. Tii saat: “Woo xtërker unser fraayntxaft kep is, woo xtërker sin unser xpiirunge eene noom aner kep. Ich wust tas ich must een ëntxlus mache. Ich hon fiil too triwer kepeet. Ich must Yeehoowa sayn oryentiirunge hon, awer ich wust aach tas Yeehoowa teet net te ëntxlus fer mich mache.” Maria tenkt tas Yeehoowa sayn kepeet fer kluucheet kriin, keantwort hot. Wii se unersuuchunge in unser puplikatsyoone kemacht hot, khont se spetsiifixe artikele fine woo se keholef hon sayn frooche antworte. Tii hot aach keheert ti kluuche aanreete woo sayn troy mama tëne kep hot. Tiise aanreete hon se keholef sayn xpiirunge noo kuke. Tsum xlus, khont Maria een kluuch ëntxlus mache.

10. Tëm noo Filiper 4:13, was macht Yeehoowa fer sayn tiiner helfe? Kep een payxpiil. (Kuk aach tas pilt.)

¹⁰ Tee kept uns ti kraft fer aus hale. Soo wii eyer mim aphostel Phaul kemacht hot, tuut Yeehoowa uns ti neetich kraft kepe fer ti proope aus hale. (Lees Filiper 4:13.)d Kuk wii Yeehoowa eene pruuter, woo Benjamin heest, keholef hot xwiirichkheete aus hale. Torich neekst sayn kanse yunge yoore, hon Benjamin un sayn familye in auslënter khëmp in Afrika keleept. Benjamin saat: “Ich hon imer tsu Yeehoowa kepeet. Ich hon tëm kraft ferlangt fer se mache was tëm kefale teet. Yeehoowa hot mayn kepeete keantwort: tee hot mich inerlich friit, koraaj fer wayter preetiche, un puplikatsyoone kep fer ticht pay tëm plaype.” Tee saat noch: “Ti speryense fon anere priiter un xwestere leese un lërne wii Yeehoowa se keholef hot aus hale, hot mayn pextimung fer troy plaype ferxtërkt.”

11-12. Fer unser kepeete antworte, khan Yeehoowa ëntxlise unser priiter un xwestere penutse. Wii soo? (Kuk aach tas pilt.)

¹¹ Tee penutst unser priiter un xwestere. In te nacht foer Yeesus sayn leepe ap kep hot, hot eyer hërtsliche kepeete kemacht. Yeesus wolt net hon tas ti layt tenke teete tas eyer een ferfluucher weyer. Tes weeche hot eyer tsu Yeehoowa aan kehal net lose tas pasiire. Awer Yeehoowa hot tas net kemacht. Xtats tas, hot Eyer Yeesus torich een engel keholef, woo Eyer kexikt hot fer tëm ferxtërke. (Luk. 22:42, 43) Un wii meecht Yeehoowa uns hayt helfe? Fiilaycht tuut een pruuter uns aan ruufe orer pesuuche un tas khan uns uf muute. Meyer al khene oportuniteete suuche fer een kuute wort fer unser priiter un xwestere aan piite. (Xpr. 12:25)

¹² Kuk mool ti speryens fon een xwester woo Miriam heest. Phaar woche noom toot fon sayn man, waar Miriam aleen tehëm. Tii hot sich traurich un tiifsinich kexpiirt. Tii khont net noo lose se prile un must mit yemant fertseele. “Ich hat khee kraft fer yemant aan ruufe — saat se. — Soo hon ich tsu Yeehoowa kepeet. Wii ich noch am prile un am peete waar, hot yemant mich aan keruuft. Es waar een elteste, een liipe fraaynt.” Tiise elteste un sayn fraa hon Miriam fiil ketreest. Miriam is sich sicher tas Yeehoowa tiise pruuter uf kemuut hot tëne aan ruufe.

13. Yeehoowa khan penutse tii woo tëm net tiine fer unser kepeete antworte. Kep een payxpiil woo tas tsaycht.

¹³ Tee khan layt penutse woo tëm net aan peete. (Xpr. 21:1) Als mool tuut Yeehoowa ti kepeete fon sayn tiiner in tiise aat antworte. Tsum payxpiil: Neemias hot fer te kheenich Artaxërxes ferlangt fer tsurik tsu Yeruusalem keen fer se helfe ti xtat noch mool uf paue. Yeehoowa hot te kheenich uf kemuut tas aan nëme. (Nee. 2:3-6) Hayt khan Yeehoowa aach tii woo tëm net aan peete uf muute uns helfe wën mer es prayche.

14. Wii hot Soo Hing sayn speryens tich uf kemuut? (Kuk aach tas pilt.)

¹⁴ Een xwester woo Soo Hing heest, hot kexpiirt tas Yeehoowa se keholef hot torich een tokter. Soo Hing sayn soon tuut weeche phaar mentaale krankheete layte. Wën tee een xlim unfal mit kemacht hot, hon Soo Hing un sayn man sayn aarwayt kelos fer tëm uf phase. Tii hon too teweeche fiil ekonoomixe propleeme mit kemacht. Soo Hing hot kesaat tas tii kexpiirt hot tas se net mee aus hale khent. Tii hot sayn hërts fer Yeehoowa uf kemacht un sayn hilef ferlangt. Te tokter hot ëntxlist een aat fine fer tii un sayn familye helfe. Tes weeche hon se hilef fon te rechiirung kriit un aach een plats fer se woone woo se petsaale khonte. Xpeeter, hot Soo Hing kesaat: “Meyer hon kesiin wii Yeehoowa uns keholef hot. Tee is wërklich een ‘Heerer fon kepeete’.” (Psal. 65:2)

KOT SAYN ANTWORTE SUUCHE UN AAN NËME, FERLANGT KLAAPE

15. Was hot een xwester keholef se mërke tas Yeehoowa sayn kepeete keantwort hot?

¹⁵ Ofts, sin unser kepeete net keantwort in een wunerlich aat. Awer ti antworte woo mer kriin, sin kraat was mer prayche fer troy tsu unser himlixe Fater plaype. Soo, hal tayn aue uf un mërk wii Yeehoowa tayn kepeete antworte tuut. Een xwester woo Yoko heest, hot ketenkt tas Yeehoowa sayn kepeete net keantwort hot. Awer too hot se aan kefang uf xraype was se fer Kot ferlangt hat. Noo een tsayt, hot se sayn heftche noch mool noo kekukt. Tii hot kemërkt tas Yeehoowa ti meyerste fon sayn kepeete keantwort hat, soo kaar etliche woo tii ferkes hat. Yawool, noo un noo mise mer xtil hale un triwer noo tenke iwer wii Yeehoowa unser kepeete antworte tuut. (Psal. 66:19, 20)

16. Mit was se tuun hot mit kepeet, wii khene mer unser klaape tsayche? (Hepreeyer 11:6)

¹⁶ Meyer tsayche unser klaape net ploos wën mer peete, awer aach wën mer ti antwort aan nëme, ekaal was tas is. (Lees Hepreeyer 11:6.)e Kuk mool Mike un Chrissy sayn payxpiil. Tiise pheyerche wolt in Petël tiine. Mike saat: “Meyer hon ti petitsyoon fiil mools aus kefiilt un meyer hon noo un noo tsu Yeehoowa too triwer kepeet. Awer meyer sin nii in kelaat kep.” Noch soo, hate Mike un Chrissy een sicherheet: Yeehoowa wust ti pest aat fer tëne penutse in sayn aarwayt. Tii hon wayter kemacht was se khonte. Tii hon wii rekulaar pyoneere ketiint woo ti neetichkheet kreeser waar un aach ti paueray proyëkte fon te Orkanisatsyoon pay kextan. Hayt, tiint Mike in te reesenter aarwayt mit sayn fraa. Tee saat: “Yeehoowa hot net imer unser kepeete keantwort wii mer uns foer kextelt hate. Awer tee hot se keantwort! Un ti aat wii eyer tas kemacht hot, waar peser wii mer uns foer xtele khente.”

17-18. Tëm noo Psalm 86:6, 7, fon was khene mer uns sicher sin?

¹⁷ Lees Psalm 86:6, 7.f Te psalmist Tawi waar sich sicher tas Yeehoowa sayn kepeete keheert un keantwort hot. Tuu khanst tich aach sicher too tefun sin! Ti payxpiile in tiise artikel lose es taytlich: Yeehoowa khan uns kluucheet un kraft fer aus hale kepe. Fer uns helfe, khan eyer penutse unser priiter un xwestere orer soo kaar tii woo tëm net hayt tiine.

¹⁸ Yeehoowa tuut net imer unser kepeete antworte wii mer uns foer xtele. Awer meyer wise tas eyer se antworte tuut. Tee tuut uns kepe kraat was mer prayche un in te xtun woo mer es prayche. Tes weeche tuu wayter mit klaape peete. Say tich sicher tas Yeehoowa tich uf phase tuut un, in te nay welt, tuut eyer “te wunx fon ales was lepeentich is [erfiile]”. (Psal. 145:16)