1 Samyèl
1 Twouve, te gen yon mesye ki te rele Èlkana+ ki moun Ramatayimsofim*+, nan zòn ki gen mòn nan Efrayim+ nan. Li se pitit Jewowam, ki te pitit gason Eliyou, pitit gason Toyou, li menm ki te pitit gason Zouf. Li te moun Efrayim*. 2 Li te gen de madanm. Youn te rele Ana, e lòt la te rele Penina. Penina te gen pitit, men Ana pa t gen pitit. 3 Chak ane, mesye sa a te sot nan vil kote l rete a pou l monte al adore* Jewova, Chèf lame yo, nan Silo+, e pou l fè sakrifis pou li. Se la de pitit gason Eli yo, Ofni ak Fineyas+, t ap sèvi kòm prèt Jewova+.
4 Yon jou, pandan Èlkana t ap ofri yon sakrifis, li te bay Penina, madanm li, ansanm ak tout pitit gason l yo ak pitit fi l yo plizyè moso nan sakrifis la+. 5 Men, Èlkana te bay Ana yon moso espesyal, paske se Ana li te renmen. Sepandan, Jewova pa t pèmèt Ana fè pitit*. 6 Mete sou sa, lòt madanm Èlkana a te toujou ap fawouche Ana pou fè l fache paske Jewova pa t ba l pitit. 7 Chak ane, li te konn fè sa. Chak fwa Ana monte al lakay Jewova+, matlòt li a te tèlman nui l, li te konn kriye e li te konn ret san manje. 8 Men, Èlkana, mari l, di l: “Ana, poukisa w ap kriye e poukisa w pa manje? Poukisa w tris konsa?* Èske m pa vo plis pase dis pitit gason pou ou?”
9 Epi, apre yo fin manje e yo fin bwè nan vil Silo, Ana leve. Nan moman sa a, Eli, prèt la, te chita sou chèz la bò papòt tanp Jewova a*+. 10 Ana te tris anpil, li te pran priye Jewova+ e li t ap kriye san rete. 11 Epi, li fè yon ve, li di: “O Jewova, Chèf lame yo, si w wè tray sèvant ou an ap pase e ou sonje m, si w pa bliye sèvant ou an e ou bay sèvant ou an yon pitit gason+, m ap ba ou l, Jewova, pou l ka sèvi w pandan tout lavi l. Okenn razwa pap touche tèt li+.”
12 Pandan l te pase yon pakèt tan ap priye Jewova, Eli t ap gade bouch li. 13 Ana t ap pale nan kè l. Se sèlman bouch li ki t ap bat, moun pa t tande vwa l. Se sa k fè Eli te panse l te sou. 14 Eli di l: “Ki lè w ap sispann sou? Sispann bwè diven non!” 15 Lè sa a, Ana di l: “Non, mèt mwen. Mwen se yon fi ki anba gwo pwoblèm*. Mwen pa bwè ni diven ni okenn lòt bwason ki gen alkòl, se kè m m ap vide bay Jewova+. 16 Pa pran sèvant ou an pou yon move moun. Se paske mwen gen gwo tètchaje e mwen nan lapenn ki fè m kontinye ap pale konsa.” 17 Lè sa a, Eli di l: “Ale anpè! Se pou Bondye Izrayèl la ba w sa w mande l la+!” 18 Ana reponn: “Mwen swete pou sèvant ou an kontinye jwenn favè w.” Apre sa, l ale lakay li, li manje, epi figi l pa t tris ankò.
19 Annapre, yo leve granmmaten y al pwostène devan Jewova. Apre sa, yo retounen lakay yo nan Rama+. Epi, Èlkana te antre nan relasyon ak Ana, madanm li, e Jewova te sonje Ana+. 20 Anviwon ennan apre, Ana vin ansent. Li fè yon pitit gason, li rele+ l Samyèl*. Paske, li di: “Se Jewova mwen te mande l.”
21 Rive yon lè, Èlkana monte ak tout moun lakay li pou l al ofri sakrifis li abitye bay Jewova+ chak ane a e pou l bay ofrann pou ve li fè. 22 Men, Ana pa t monte+, paske li te di mari l: “Kou m sevre tigason an, m ap mennen l. Lè sa a, l ap vin devan Jewova e l ap rete la nèt+.” 23 Epi, Èlkana, mari l, di l: “Fè sa w panse ki pi bon an. Rete lakay jiskaske w sevre l. Mwen swete pou Jewova fè sa w di a rive!” Konsa, dam nan te rete lakay li pou l pran swen pitit gason l lan jiskaske l sevre l.
24 Kou l fin sevre l, li monte avè l Silo ansanm ak yon towo bèf ki gen twazan, yon efa* farin ak yon gwo bidon diven+, epi li ale lakay Jewova a+ ansanm ak tigason an. 25 Apre sa, yo touye towo bèf la e yo mennen tigason an bay Eli. 26 Lè sa a, Ana di: “Eskize m, mèt mwen. Menm jan li klè ou vivan, mwen fè sèman*, mèt mwen, mwen se dam ki te kanpe bò kote w isit la e ki t ap priye Jewova a+. 27 Se pou m te ka gen tigason sa a mwen t ap priye, e Jewova ban m sa m te mande l la+. 28 Kounye a, mwen bay* Jewova l. Pandan tout lavi l, se pou Jewova li ye.”
Epi, Èlkana pwostène kote l ye a devan Jewova.