Chèche vin pi maton nan travay predikasyon an: Temwayaj nan entèfòn

Rezon ki fè sa enpòtan: Nou ka pè bay temwayaj nan entèfòn. Ki sa nou ka fè pou nou pa kite pwoblèm sa a ralanti zèl nou genyen pou nou fè bèl aksyon? Nou dwe sonje lè nou bay temwayaj nan entèfòn se ka sèl mwayen nou genyen pou nou rive touche kèk moun ak bon nouvèl la (Wom. 10:14). Eksperyans yo montre gen moun ki rive bay yon bon temwayaj grasa entèfòn. (Gade Annuaire 2011, p. 65 § 2–p. 66 § 1 ak Annuaire 2000 p. 54, § 3.) Ann egzamine kèk konsèy yo bay pi ba a.

Fason pou nou fè l:

Prepare yon prezantasyon ki tou kout, epi ekri l yon kote dekwa pou n ka li l dirèkteman pou moun nou jwenn nan entèfòn nan. Sa ka fè nou gen plis asirans. Nan kòmansman konvèsasyon an, esplike moun nan poukisa nou pase vizite l. Si yo bay non moun nan nan yon ànyè telefòn, itilize non l. Pou fini, di moun nan nou ta renmen ba li yon feyè oubyen yon peryodik k ap ba li plis enfòmasyon sou sijè a (oubyen di l nou ta renmen kite l nan pòt kay li pou li).
Toujou gen yon pwennvi pozitif. Se pou nou souri epi fè jès pandan n ap pale, fè kòmsi nou te fasafas ak moun nan.
Se pou nou rilaks epi pale sou ton yon konvèsasyon. Pale byen klè ak yon volim ki apwopriye. Evite fè poz ki pa nesesè, men pinga nou pale twò vit.
Montre nou gen bon jijman. Nan gwo bilding yo, ka gen plizyè entèfòn. Petèt nou ka annik chwazi sonnen nan twa entèfòn konsa, epi make nimewo entèfòn nou te sonnen yo, apre sa nou mèt ale. Moun ki rete nan bilding nan ka vin pè si yo wè nou rete twòp nan antre a epi n ap sonnen chak entèfòn.

Eseye sa a pandan mwa a:

Pandan adorasyon an fanmi an, fè repetisyon kote de moun k ap fè demonstrasyon an dozado.