Եհովայի հանդէպ սէրը կ’ոգեւորէ ճշմարիտ պաշտամունքը
Ասիկա է Աստուծոյ սէրը, որ անոր պատուիրանքները պահենք»։—Ա. ՅՈՎՀԱՆՆՈՒ 5։3
1, 2. Ի՞նչ շարժառիթով Եհովայի պէտք է ծառայենք։
ՃԱԲՈՆԷՆ՝ 80 այցելուներէ բաղկացած խումբ մը Գալիֆորնիոյ մէջ Եհովայի Վկաներու Համաժողովի Սրահ մը կ’այցելէր։ Կապոյտ անծեղներով, աղաւնիներով եւ հծծահաւերով լեցուն պարտէզին հաճելի միջավայրին մէջ, անոնք իրենք զիրենք աւելի մօտ կը զգային իրենց Մեծ Ստեղծիչին՝ Եհովա Աստուծոյ։ Անոնց ուղեցոյցը անմիջապէս անդրադարձաւ որ խումբին մէջ գրեթէ բոլորն ալ լիաժամ կը ծառայէին որպէս ռահվիրաներ։ Ուստի, հետագային, խումբին յաճախ եղած հարցում մը ուղղուեցաւ. «Ինչո՞ւ Ճաբոնի մէջ այսքան շատ ռահվիրաներ կան»։ Պահ մը լռութիւն տիրեց։ Ապա, երիտասարդ կին մը պատասխանեց. «Քանի որ Եհովան կը սիրենք»։
2 Եհովայի հանդէպ սէր. ահաւասիկ բանալին որ մեզ կը մղէ իր ծառայութեան մէջ նախանձախնդիր ըլլալու։ Ճիշդ է որ ամէն մարդ չի կրնար ռահվիրայութիւն ընել։ Արդարեւ, մեր աւելի քան չորս միլիոն Թագաւորութեան հրատարակիչներուն մեծամասնութիւնը տակաւին այս առանձնաշնորհումը չէ վայելած։ Սակայն շատեր որոնց պարագան կը ներէ, ասոր ձեռնարկած են։ Մնացեալներս ալ կրնանք ‘Եհովայի յուսալ ու բարութիւն ընել’, մեր սէրը ցուցաբերելով աշակերտելու գործին մասնակցելով։ (Սաղմոս 37։3, 4) Իսկ Եհովայի նուիրուած բոլոր երկրպագուները կրնան ռահվիրայութեան հոգին քաջալերել եւ սիրալիր կերպով թիկունք կանգնիլ ռահվիրաներուն։—Մատթէոս 24։14. 28։19
3. Ի՞նչ հակասութիւն նշմարելի է դաւանեալ Քրիստոնեաներուն եւ Եհովայի Վկաներուն միջեւ։
3 Կրօնքը իրենց կեանքին յաւելուածական մէկ մասը նկատող Քրիստոնէութիւն դաւանող շատերուն հակառակը, Եհովայի Վկաները Աստուծոյ հանդէպ անսահման սէր կը ցուցաբերեն, որ կը մղէ զիրենք ‘նախ թագաւորութիւնը ու անոր արդարութիւնը փնտռել’ու։ Ասիկա զոհողութիւն պահանջած է, զոհողութիւն մը որ կ’արժէ ընել։ (Մատթէոս 6։33. 16։24) Անիկա նախապէս Մովսէսի տրուած եւ Յիսուսի կողմէ կրկնուած առաջին մեծ պատուիրանին հետ ներդաշնակ է. «Մեր Տէր Աստուածը մէկ Տէր է. եւ քու Տէր Աստուածդ սիրես քու բոլոր սրտովդ եւ քու բոլոր անձովդ ու քու բոլոր մտքովդ եւ քու բոլոր զօրութիւնովդ»։—Մարկոս 12։29, 30. Բ. Օրինաց 6։4, 5
4, 5. Որո՞նք հաւատարիմ կը նկատուին եւ հաւատարմութիւնը ինչպէ՞ս ցոյց կը տրուի։
4 Եհովայի Վկաներու կեդրոնատեղիի անձնակազմերէն մէկը, վերջերս, 70 տարի լիաժամ ծառայութեան մէջ անցուցած Դիտարանի Ընկերութեան 98 ամեայ նախագահին՝ Ֆրանցին՝ ըսաւ. «Դուն, հաւատարմութեան գեղեցիկ օրինակ մը եղած ես, Եղբայր Ֆրանց»։ Իսկ Եղբայր Ֆրանցը պատասխանեց. «Այո՛. դուն ալ պէտք է հաւատարիմ ըլլաս»։ Ահաւասիկ հարցին կորիզը. Թագաւորութեան գործունէութեան որեւէ մարզի մէջ ալ ծառայենք, կրնանք հաւատարիմ ըլլալ։—Ա. Կորնթացիս 4։2. Գաղատացիս 3։9
5 Ճիշդ է որ շատեր կը փափաքին շատ աւելին ընել Եհովայի ծառայութեան մէջ, բայց սուրբ գրային պատասխանատուութիւնները, կամ առողջապահական խնդիրները կրնան որոշ չափով արգելք հանդիսանալ իրենց։ Անոնք որ ռահվիրայութիւն ընելու կարող չեն, սակայն, նուազ հաւատարիմ պէտք չէ նկատել։ Շատեր շատ ծանր փորձութիւններու ներքեւ հաւատարիմ մնացած են եւ յաճախ երկար տարիներ։ Այո, անոնք հաւատարիմ եղած են։ Անոնք Եհովայի հանդէպ սէր ցուցաբերած են եւ ժրաջանօրէն ծառայած են, իր աստուածպետական կարգադրութեան բոլոր սրտով թիկունք կանգնելով։ Անոնք սուր հետաքրքրութիւն ունեցած են ռահվիրայական գործունէութեան հանդէպ, քաջալերելով ուրիշները՝ յաճախ իրենց զաւակները որ ռահվիրայութիւնը իրենց կեանքին ասպարէզը դարձնեն, որ լաւագոյն ասպարէզն է։—Բաղդատել Բ. Օրինաց 30։19, 20
6, 7. Ա. Թագաւորաց 30։16–25–ի նախկին դրուագը ինչպէ՞ս կիրարկելի է ներկայիս։
6 Ներկայիս Աստուծոյ ժողովուրդին բոլոր անդամներուն միակամ գործունէութիւնը կարելի է պատկերացնել Ա. Թագաւորաց 30։16–25–ի պատմութիւնով։ Ամաղեկացիներու դէմ պատերազմի մը ընթացքին, «Դաւիթ արշալոյսէն մինչեւ հետեւեալ օրուան իրիկունը զանոնք զարկաւ» եւ շատ աւար առաւ։ Երբ բանակավայր վերադարձան, Դաւիթի ռազմիկներէն ոմանք խնդրեցին որ իրենց հետ բուռն պատերազմին չմասնակցողներուն որեւէ աւար չտրուի։ Բայց Դաւիթ պատասխանեց. «Այս բանին մէջ ո՞վ ձեզի մտիկ կ’ընէ. քանզի կարասիներուն քով նստողներուն բաժինը պատերազմի գացողներուն բաժինին հետ հաւասար պէտք է ըլլայ, հաւասարապէս պէտք է բաժնենք»։
7 Նոյն սկզբունքը կիրառելի է այսօր։ Ռահվիրաները մեր հոգեւոր պատերազմին ճակատը կը գտնուին։ Բայց ժողովքին մէջ մնացեալները բոլոր սրտով եւ հաւատարմօրէն թիկունք կը կանգնին։ 1991–ի ընթացքին, անոնց միակամ գործունէութեան հսկայ արդիւնքը ցոյց կը տրուի յաջորդող պարբերութիւններուն մէջ։
Ակնբախ Տեղեկագրութիւն մը
8. (ա) Համաշխարհային տեղեկագրութիւնը ի՞նչ ցոյց կու տայ ընդհանուր հրատարակիչներուն եւ Եհովայի ծառայութեան մէջ անոնց անցուցած ժամանակին մասին։ (բ) Տեղեկագրին վրայ նոր տեղ գրաւող երկիրներուն մասին ի՞նչ հետաքրքրական կէտեր կը նշմարէք։
8 Եհովայի բոլոր եռանդուն երկրպագուներուն համակ ջանքերը նպաստած են 1991–ի ընթացքին համաշխարհային խայտալի ընդլայնումի մը։ 4,278,820 Թագաւորութեան հրատարակիչներու հոյակապ նոր գագաթ մը արձանագրուած է. 6,5 % առ հարիւր յաւելում մը։ Ասոնք 951,870,021 ժամեր տրամադրեցին ծառայութեան մէջ (գրեթէ մէկ միլիա՜ռ)։ Իսկ այն մեծ ջանքը զոր նախապէս արգիլուած երկիրներու մեր եղբայրները թափած են եւ որ համաշխարհային տեղեկագրութեան մէջ տեղ կը գրաւեն, ինչպէս Եթովպիան, Խորհրդային Միութիւնը, Մոզամպիքը, Նիկարագուա, Չեխոսլովաքիան, Պուլկարիան, Րվանտան եւ Քամերուն։
9, 10. (ա) Ռահվիրաները ինչպէ՞ս դիմագրաւած են դժուար պայմանները։ (բ) Ռահվիրայական ծառայութեան մէջ մտնելու համար ի՞նչ քաջալերութիւն տրուած է։
9 Վերջին տարիներուն, ռահվիրայական հոգին տարածուած է համայն աշխարհի մէջ։ Նոյնիսկ այն երկիրներուն մէջ, ուր պաշտամունքի ազատութիւնը տակաւին վերջերս շնորհուեցաւ, ռահվիրայական շարքերը կ’ուռճանան։ Տնտեսական դառն վիճակները ետ չեն պահեր այս չարքաշ Վկաները որ իրենց բոլոր ունեցածը տան Եհովայի պաշտամունքին։ (Բաղդատել Բ. Կորնթացիս 11։23, 27։) Միջին հաշուով, ամէն ամիս Թագաւորութեան բոլոր հրատարակիչներու 14 % ռահվիրայութիւն ըրած են։ Ռահվիրաներու գագաթ թիւն է 780,202, որ ընդհանուր հրատարակիչներու 18 % կը կազմէ, ինչ որ հոյակապ է։
10 Ռահվիրաներուն ունեցած ուրախութիւնը դիտելով, ուրիշներն ալ կը քաջալերուին այս ծառայութեան ձեռնարկել։ Եթէ տակաւին ռահվիրայութիւն չէք ըներ, արդեօք Եհովայի հանդէպ ձեր սէրը պիտի մղէ՞ ձեզի ըսելու, ինչպէս կը կարդանք Եսայեայ 6։8–ի մէջ. «Ահաւասիկ ես. զի՛ս ղրկէ»։ Կամ, Աստուածաշունչի ձեր ժրաջան ուսումնասիրութեամբ, կրնա՞յ ըլլալ որ Աստուծոյ Խօսքը ձեր սրտին մէջ փափաք մը բոցավառէ, որպէսզի ռահվիրայական ծառայութեան մէջ մտնելու քայլ առնէք։ Նոյնիսկ փորձութեան ժամանակի մը մէջ, Եհովայի խօսքը ոգեւորեց Երեմիան որպէսզի չհեղգանայ։—Երեմեայ 20։9
Մարդկութեան Հանդէպ Սիրալիր Ծառայութիւն մը
11. Տան սուրբ գրային ուսումնասիրութեան գործունէութիւնը ինչպէ՞ս բարգաւաճած է։
11 Տարեկան տեղեկագրութեան աչքառու երեսակներէն մէկն է Տան սուրբ գրային ուսումնասիրութիւններուն թիւին աճումը. ամէն ամիս կանոնաւորաբար 3,947,261 ուսումնասիրութիւններ կը վարուին համայն աշխարհի մէջ։ Ասիկա սիրալիր կարգադրութիւն մըն է, որով Եհովայի Վկաները իրենց տունէ–տուն ծառայութեան մէջ գտած հետաքրքրութիւնը վառ կը պահեն։ Ուրախ ենք ամէն ազգի եւ ցեղի պատկանող անհատներուն հետ Աստուածաշունչի ուսումնասիրութիւն մը վարելով, Պօղոս առաքեալի ցուցաբերած նոյն ջանադրութեամբ աշխատելով։ ‘Հրեաներուն եւ Յոյներուն ամբողջական վկայութիւն տալը’ անկասկած բազմաթիւ ժամեր ճշմարտութիւնը ուսուցանել կը պահանջէր։ (Գործք 20։20, 21) Նոյնն է պարագան այսօր։ Եհովայի Վկաները կ’օգնեն ‘ամէն տեսակ մարդոց որ փրկուին եւ ճշմարտութիւնը ճանչնան’։—Ա. Տիմոթէոս 2։4
12–14. Եւրոպայէն ի՞նչ ուրախ տեղեկագրութիւն կը հասնի։
12 Որքա՜ն խայտալի է Արեւելեան Եւրոպայի Աստուածաշունչի ուսումնասիրութեան տեղեկագրութիւնը։ Տասնեակ տարիներէ ի վեր, հոն գտնուող մեր եղբայրները ստիպուած էին պզտիկ խումբերով հաւաքուիլ, բոլոր խումբին համար թերեւս Դիտարանի միայն մէկ մաշած արտատպուած օրինակ ունենալով։ Սակայն հիմա, Աստուածաշունչեր եւ սուրբ գրային գրականութիւններ կը տեղան այս երկիրներուն մէջ։ Ասիկա մեզի կը յիշեցնէ Սողոմոնի Երգերէն մէկը (Սաղմոս 2։4). «Զիս [հոգեւոր] խնճոյքին տունը բերաւ [Քրիստոս]։ Անոր դրօշը իմ վրաս սէր էր»։ Իրենց անձնական պարբերաթերթը ունենալով, շատեր լաւ կը զինուին ‘ճշմարտութեան խօսքը շիտակ բացատրել’ու համար։—Բ. Տիմոթէոս 2։15
13 Ռուսիոյ Սբ. Փէթըրզպուրկ քաղաքին մէջ 103 հրատարակիչներէ բաղկացած ժողովք մը, վերջերս տեղեկագրեց 300 տան սուրբ գրային ուսումնասիրութիւն։ Աստուածաշունչի այս ուսումնասիրութեան ջանքին որպէս արդիւնք, 53 նոր Վկաներ մկրտուեցան միայն ութ ամսուան մէջ։ Ժողովքին գրեթէ կէսը ճշմարտութեան եկած են ութ ամիսէն աւելի նուազ ժամանակի մը մէջ։ Իսկ անոնց հոգեւոր յառաջդիմութեան հոգ տանելու համար երէց չկայ, միայն մէկ օգնական ծառայ կայ։
14 Էսթոնիայի մէջ, ուսումնասիրող մը Թագաւորութեան հրատարակիչի մը հարցուց թէ կրնա՞ր իր բարեկամներէն ոմանք ուսումնասիրութեան հրաւիրել։ Երբ յաջորդ շաբաթ Վկան այդ տունը եկաւ, ան աւելի քան 50 անհատներ համախմբուած գտաւ։ Անշուշտ, մասնաւոր կարգադրութեան կարիքը կար այդ բոլոր հետաքրքրուած անհատներուն հոգ տանելու համար։
15. Յիշատակատօնին եւ մկրտութեան մասին ի՞նչ կրնայ ըսուիլ։
15 Ուսումնասիրողներէն շատեր Քրիստոնէական իրենց առաջին ընկերակցութիւնը վայելեցին Յիսուսի մահուան Յիշատակատօնին ներկայ ըլլալով։ Անցեալ տարի, առաջին անգամ ըլլալով՝ ներկաներուն թիւը 10,000,000–էն անցաւ. այս ուրախ առիթին համար համայն աշխարհի 66,207 ժողովքներուն մէջ, 10,650,158 անհատներ ներկայ գտնուեցան։ Լատին Ամերիկեան, Ափրիկեան եւ Արեւելեան Եւրոպայի բազմաթիւ երկիրներուն մէջ, ներկաներուն թիւը Թագաւորութեան հրատարակիչներուն երեք կամ չորս անգամն էր։ Հիմա պէտք է սկսինք այս տարուան Յիշատակատօնը պատրաստել, որ տեղի պիտի ունենայ Ուրբաթ, 17 Ապրիլին։ Կը յուսանք որ Յիշատակատօնին յաճախող մեծ թիւով նոր ուսումնասիրողներ պիտի շարունակեն յառաջդիմել մինչեւ մկրտութիւն։ Իսկ գալով մկրտութեան, 1991–ին, անգամ մը եւս տեսանք 300,000–է աւելի անհատներ որոնք իրենց կեանքերը Եհովա Աստուծոյ նուիրեցին, ջուրի մկրտութեամբ։
Աստուածային Ազատութիւն Սիրողները
16. «Ազատութիւն Սիրողներ» Նահանգային Համաժողովներէն ի՞նչ խայտալի տեղեկագրութիւններ կը հասնին։
16 1991–ի ծառայութեան տարուան յատկանշական երեսակներէն մէկը եղաւ «Ազատութիւն Սիրողներ» Նահանգային Համաժողովներու շարքը որ հիմա Հիւսիսային Կիսագունդին մէջ վերջացաւ, բայց տակաւին 1992–ին պիտի շարունակուի Հարաւային Կիսագունդին մէջ։ Առաջին անգամ ըլլալով, լման յայտագիրը տրուեցաւ Արեւելեան Եւրոպայի բազմաթիւ երկիրներուն մէջ, ուր մեր եղբայրները իրենց նոր գտած ազատութիւնը կը գործածեն Եհովայի փառաբանութեան համար։ Հոկտեմբերին (1991), 54 երկիրներու մէջ տեղի ունեցած 705 համաժողովներու ներկաներուն ընդհանուր թիւն էր 4,774,937։
17, 18. (ա) Եհովան պաշտողները ի՞նչ ազատութիւն կը վայելեն եւ կ’ակնկալեն վայելել։ (բ) Աստուածային ազատութիւնը ինչպէ՞ս տարբեր է աշխարհային ազատութիւններէն։
17 Յիսուս իր աշակերտներուն ըսաւ. «Ճշմարտութիւնը ձեզ պիտի ազատէ»։ (Յովհաննու 8։32) Ներկայիս Աստուածաշունչի ճշմարտութիւնը միլիոնաւորներ ազատագրած է Քրիստոնեայ Աշխարհի վարդապետութիւններէն։ Այս միլիոնաւորները սորված են թէ Եհովա, իր հայթայթած Յիսուսի քաւիչ զոհին շնորհիւ, կարելի պիտի դարձնէ որ մարդիկ «ապականութեան ծառայութենէն ազատուելով, Աստուծոյ որդիներուն փառաւոր ազատութեանը հասնին»։ (Հռովմայեցիս 8։19–22) Ի՜նչ հոյակապ ազատութիւն պիտի ըլլայ ատիկա. յաւիտեան ապրիլ դրախտ երկրի մը վրայ, Եհովայի սիրալիր կերպով որոշած պատշաճ սահմաններուն մէջ։—Եսայեայ 25։6–8. բաղդատել Գործք 17։24–26։
18 Եհովայի Վկաները հիմա իրենց վայելած ազատութիւնները եւ տակաւին Աստուծոյ նոր դրութեան մէջ աւելի առատօրէն զայն վայելելու ակնկալութիւնը Եհովա Աստուծոյ կը պարտին։ (Բ. Կորնթացիս 3։17) Անոնք քաղաքական կամ յեղափոխական որեւէ շարժումէ կախեալ չեն։ (Յակոբու 1։17) Այս մասին որեւէ թիւրիմացութենէ խուսափելու համար, Արեւելեան Եւրոպայի մէջ 1991–ի համաժողովներուն Եհովայի Վկաներուն կրած պաճերուն վրայ գրուած էին «Աստուածային Ազատութիւն Սիրողներ» փոխանակ պարզապէս «Ազատութիւն Սիրողներ»։
Եհովայի Հանդէպ Անսահման Սէր
19. Եհովայի հետ աղօթարար մտերմութիւնը ինչպէ՞ս կը պահէ մեզ։
19 Եհովայի հանդէպ մեր սէրը եւ իրեն վրայ մեր ունեցած վստահութիւնը պատճառ պիտի ըլլան որ աղօթքով իրեն կառչած մնանք։ Աղօթքի միջոցաւ Եհովայի հետ իրենց վայելած մտերմութիւնն է, որ մեր եղբայրներուն օգնած է շատ մը դժուարութիւններու եւ հալածանքներու տոկալու։ (Սաղմոս 25։14, 15) Մեծագոյն փորձութեան ընթացքին, Յիսուս աղօթքով իր Հօրը հետ մտերմութիւն պահեց։ (Ղուկաս 22։39–46) Եհովայի հետ աղօթքով այսպիսի մտերմութիւն մը, Ստեփանոսի ոյժ տուաւ իր մարտիրոսութեան հոգեվարքին տոկալու։ Երբ քարկոծուելով պիտի մահանար, երկինք նայելով ան ըսաւ. «Ահա կը տեսնեմ երկինքը բացուած ու Որդին մարդոյ [Յիսուս] Աստուծոյ աջ կողմը նստեր էր»։—Գործք 7։56
20–22. Փորձառութիւն մը ինչպէ՞ս ցոյց կու տայ թէ Աստուած մտիկ կ’ընէ աղօթքներու։
20 Ինչպէս Եհովայի Վկաները յաճախ փորձառութիւնը ունեցած են, Եհովա կը պատասխանէ այն աղօթքներուն որոնք իր կամքին հետ ներդաշնակ են։ Օրինակի համար, Ափրիկեան երկրի մը մէջ ուր Վկաներուն գործը արգիլուած է, մասնաւոր ռահվիրայ մը, որ երկրին հիւսիսային կողմը կ’երթար աթօպիւսով, մեծ պայուսակի մը մէջ Թագաւորութեան գրականութիւններ եւ թղթածրարներ ունէր ցրուելու համար։ Օթոպիւսի վարորդին օգնականը հարցուց եղբօր. «Ի՞նչ կայ պայուսակին մէջ»։ Եղբօրը բերնէն ելաւ՝ «Նամակներ»։
21 Ճամբու ընթացքին, օթոպիւսը սովորական ճամբու քննութեան կէտի մը հասած ատեն արագ անցաւ եւ ոստիկանները հալածեցին եւ կանգնեցուցին զայն, խորհելով որ մաքսանենգութիւն կ’ընէր։ Անոնք հրամայեցին որ բոլոր անցորդները իջնեն, բոլոր բեռները խուզարկելու համար։ Խա՛ռնիճաղանճ մը։ Եղբայրը քիչ մը հեռացաւ տրտնջացող ամբոխէն, ծնրադրելով աղօթեց Եհովայի։ Երբ վերադարձաւ, իւրաքանչիւր անցորդին բեռը բացուած եւ մանրամասն քննուած էր։ Երբ եղբօրը պայուսակը պիտի բացուէր, ան լռելեայն Եհովայէն օգնութիւն խնդրեց։
22 «Ասիկա որո՞ւն պայուսակն է եւ ի՞նչ կայ մէջը», պոռաց ոստիկանը։ Եղբայրը իր բերանը բանալէն առաջ, վարորդին օգնականը պատասխանեց եւ ըսաւ. «Նամակատունէ՝ նամակատուն գացող թղթատարական պայուսակ է»։ «Շատ լաւ», ըսաւ ոստիկանը։ Ան առաւ պայուսակը եւ օգնականին տուաւ։ «Հոգ տարէք որ շատ ապահով տեղ մը դրուի ճամբորդութեան ընթացքին», յանձնարարեց անոր։ Մասնաւոր ռահվիրան անգամ մը եւս ծունկի գալով շնորհակալութիւն յայտնեց աղօթքի Լսողին։—Սաղմոս 65։2. Առակաց 15։29
23. Եհովա ի՞նչ ցոյց տուած է եւ սակայն ինչո՞ւ երբեմն թոյլ կու տայ որ հալածանքը իր գագաթնակէտին հասնի։
23 Ասիկա չի նշանակեր, սակայն, որ Եհովայի երկրպագուները բոլորվին զերծ են չարիքներէ։ Որոշ պարագաներու, թէ՛ Աստուածաշունչի ժամանակներուն եւ թէ ներկայիս, Եհովա ցոյց տուած է թէ ինք կրնայ ազատել իր ժողովուրդը։ Բայց ուղղամտութեան հարցը լուծելու համար, ան երբեմն երեւութապէս թոյլ կու տայ որ հալածանքը իր գագաթնակէտին հասնի, ինչպէս եղաւ իր Որդւոյն պարագային։ (Բաղդատել Մատթէոս 26։39։) Ասկէ զատ, Եհովա ինքնաբերաբար իր ժողովուրդը չի պաշտպաներ արկածներէ, քաղաքացիական պայքարէ, կամ ոճիրէ, թէեւ Աստուածաշունչին վրայ հիմնուած գործնական իմաստութիւնը կրնայ արժէքաւոր ըլլալ։ (Առակաց 22։3. Ժողովողի 9։11) Փորձութենէ մը ազատագրուինք կամ ոչ, կրնանք վստահ ըլլալ որ մեր հաւատարմութիւնը պիտի վարձատրուի՝ եթէ հարկ ըլլայ նոյնիսկ յարութեամբ։—Մատթէոս 10։21, 22. 24։13
24. Եհովա սիրալիր ի՞նչ պարգեւներ հայթայթած է եւ մենք ինչպէ՞ս կրնանք ընդառաջել իր սիրոյն։
24 Եհովայի սիրալիր պարգեւները ի՜նչ հոյակապ են։ Մարդկութեան տուած պարգեւը, այսինքն, այս երկիրը ու անոր վրայ եղած բոլոր բաները, իր սիրոյն աչքառու մէկ արտայայտութիւնն է։ (Սաղմոս 104։1, 13–16. 115։16) Իսկ մարդկութիւնը մեղքէն եւ մահէն ազատելու համար իր Որդւոյն Յիսուս Քրիստոսի գթառատ պարգեւը իր սիրոյն մեծագոյն պարգեւը եղած է։ «Այս բանին մէջ Աստուծոյ սէրը մեր վրայ յայտնի եղաւ, որ Աստուած իր միածին Որդին աշխարհ ղրկեց, որպէսզի անոր միջոցով ապրինք։ Այս բանին մէջ է սէրը, որ ո՛չ թէ մենք սիրեցինք Աստուած, հապա որ անիկա մեզ սիրեց ու իր Որդին ղրկեց մեր մեղքերուն քաւութիւն ըլլալու»։ (Ա. Յովհաննու 4։9, 10) Այդ սիրոյն ընդառաջելով, թող որ համոզուինք, որ «ո՛չ մահը, ո՛չ կեանքը, ո՛չ հրեշտակները, ո՛չ իշխանութիւնները, ո՛չ զօրութիւնները, ո՛չ ներկայ բաները, ո՛չ գալու բաները, ո՛չ բարձրութիւնը, ո՛չ խորունկութիւնը եւ ո՛չ ուրիշ արարած կրնայ մեզ զատել Աստուծոյ սէրէն, որ Քրիստոս Յիսուս մեր Տէրոջմով է»։—Հռովմայեցիս 8։38, 39
Այս Յօդուածին Վերաքաղը
◻ Ի՞նչ կը նշանակէ հաւատարիմ ըլլալ։
◻ Գործունէութեան ո՞ր մարզերուն մէջ կրնանք Եհովայի հանդէպ սէր ցուցաբերել։
◻ Ծառայութեան տարուան տեղեկագրութեան ո՞ր երեսակները մասնաւորաբար հետաքրքրեց ձեզ։
◻ Եհովայի սիրալիր պարգեւներուն հանդէպ ինչպէ՞ս կրնանք մեր գնահատութիւնը ցոյց տալ։
[Շրջանակ՝ էջ 13]
ԻՆՉՈ՞Ւ ԱՅՍՔԱՆ ՇԱՏ ՌԱՀՎԻՐԱՆԵՐ
Կը տեղեկագրուի որ 2,600 տարիներ, Ճաբոնցիները իրենց կայսրերը ջերմեռանդօրէն պաշտեցին։ Միայն այս Ի. դարու պատերազմներուն մէջ, աւելի քան երեք միլիոն Ճաբոնցի ռազմիկներ իրենց կեանքերը զոհեցին, քանի որ անոնք կը խորհէին որ իրենց կայսր–աստուծոյ համար մեռնելէն աւելի մեծ պատիւ չկար։ Սակայն, Բ. Աշխարհամարտին ընթացքին, Պուտտա–Շինտոյական զինուորապաշտութինը յուսախաբութեան մատնուեցաւ եւ անկէ ետք կայսրը իր աստուածութենէն հրաժարեցաւ։ Ի՞նչ բան կրնար լեցնել կրօնական այս դատարկութիւնը։ Բարեբախտաբար, Եհովայի Վկայ միսիոնարներ եւ հետագային տեղացի Վկաներ սկսան տան սուրբ գրային ուսումնասիրութիւններ վարել շատերուն օգնելով որ ճշմարիտ Աստուածը՝ Եհովան գտնեն եւ իրենց կեանքերը իրեն նուիրեն։ Այս նուիրումը շատ մեծ նշանակութիւն ունի Ճաբոնցի Վկաներուն համար։ Եթէ անցեալին անոնք իրենց կեանքերը կայսր–աստուծոյ մը զոհելու պատրաստ էին, ներկայիս որքան աւելի մեծ նախանձախնդրութեամբ, իրենց ամբողջ կորովը կը մատուցանեն կենդանի Աստուածը եւ տիեզերքին Ստեղծիչը՝ Գերիշխան Տէր Եհովան պաշտելով որպէս ռահվիրաներ։
[Նկար՝ էջ 14]
Աստուածային ազատութիւն սիրողներ—Եհովայի երկրպագուներ համաժողովի ընթացքին Փրակայի մէջ, Օգոստոս 9–11, 1991