Աստուածաշունչը. անզուգական գիրք մը

Անիկա կոչուած է աշխարհի բարձրագոյն տպաքանակ ունեցող գիրքը, իսկ ասիկա շիտակ է։ Աստուածաշունչը որեւէ ուրիշ գրքէ աւելի կը կարդացուի եւ գուրգուրանքի առարկայ է։ Մինչեւ այսօր, անոր տպաքանակը (ամբողջովին կամ մասամբ) կը կարծուի ըլլալ չորս միլիառ օրինակ, աւելի քան 2,000 լեզուներով։

Աստուածաշունչի շրջաբերութենէն աւելի հետաքրքրականը, սակայն, աստուածային հեղինակութիւն ունենալու անոր դաւանութիւնն է։ «Բոլոր գիրքը Աստուծոյ շունչն է», գրեց քրիստոնեայ Պօղոս առաքեալ։ (Բ. Տիմոթէոս 3։16) Ասիկա ի՞նչ կը նշանակէ։ «Աստուծոյ շունչն է» արտայայտութիւնը (Յունարէն, թէ·ոպնեւ·ստոս) բառացիօրէն կը նշանակէ «Աստուծոյ կողմէ փչուած»։ Անոր յարակից Յունարէն բառ մը, բնէօմա, կը նշանակէ «ոգի»։ Հետեւաբար, դաւանութիւնը այն է որ Աստուծոյ սուրբ հոգին մարդկային գրողները մղեց, կարծես թէ անոնց վրայ փչելով, այնպէս որ եղած արդիւնքը ճշմարտապէս կրնայ կոչուիլ Աստուծոյ Խօսքը, եւ ոչ թէ՝ մարդոց։ Արդարեւ, Աստուածաշունչը ուսումնասիրողներէն շատեր կը հիանան անոր ընդհանուր ներդաշնակութեան վրայ, անոր գիտական ճշգրտութեան վրայ, անոր գրողներուն պարկեշտութեան եւ անկեղծութեան վրայ, իսկ ամենակարեւորը, անոր կատարուած մարգարէութիւններուն վրայ. այս բոլորը համոզած են միլիոնաւոր տրամաբանող ընթերցողներու որ այս գիրքը մարդոցմէ գերիվեր աղբիւրէ մըն է։a

Սակայն, Աստուած ո՞րքան մօտէն առաջնորդեց Աստուածաշունչի գրութիւնը։ Ոմանք կ’ըսեն թէ ան Աստուածաշունչը բառ առ բառ գրել տուաւ։ Ուրիշներ կ’ըսեն թէ ան միայն Աստուածաշունչին մէջ գտնուած գաղափարները ներշնչեց, եւ ոչ թէ՝ բառերը։ Իրականութեան մէջ, սակայն, կարելի չէ ներշնչումը միմիայն մէկ մեթոտի սահմանափակել, քանի որ «բազմաթիւ կերպերով Աստուած մեր հայրերուն խօսեցաւ մարգարէներուն միջոցաւ»։ (Եբրայեցիս 1։1, Նոր Աշխարհաբար Թարգմանութիւն. բաղդատել՝ Ա. Կորնթացիս 12։6։) Յաջորդ յօդուածին մէջ, պիտի քննենք այն կերպերը որոնցմով Աստուած խօսեցաւ Աստուածաշունչը գրող շուրջ 40 մարդոց։

[Ստորանիշ]