Ո՛վ Պատանիներ, Ձեր Հոգեւոր Նպատակակէտերը Ի՞նչ Են
1 Եհովա գիտէ որ ուրախութիւն բերելու համար իմաստալից գործը եւ հասանելի նպատակակէտերը որքան կարեւոր են։ (Տես՝ Ծննդոց 1։28. 2։15, 19։) Ներկայիս, Եհովա իր ժողովուրդին տուած է քարոզելու եւ սորվեցնելու նշանակումը։ Նաեւ, ունինք Դրախտին մէջ յաւիտենական կեանքի հասնելու վերջնագոյն նպատակակէտը։ Միեւնոյն ժամանակ, կարիքը ունինք յառաջդիմական հոգեւոր նպատակակէտեր դնելու, եթէ չենք ուզեր մեր կորովը եւ միջոցները սխալ ուղղութեամբ առաջնորդել։—Ա. Կորն. 9։26
2 Իրապաշտ Նպատակակէտեր՝ Պատանիներու Համար. Հարկ է որ պատանիներ այնպիսի աստուածպետական նպատակակէտեր ունենան, որոնք իրենց անհատական հասողութեան ծիրին մէջ կը գտնուին։ (Ա. Տիմ. 4։15) Կարգ մը փոքրիկներ, նոյնիսկ կարդալ սորվելէ առաջ, Աստուածաշունչի գրքերուն անունները գոց սորված են։ Ընտանեկան ուսումնասիրութեան միջոցաւ, մանուկներ կը սորվին ժողովներու պատրաստուիլ, որպէսզի կարենան իմաստալից պատասխաններ տալու եւ Աստուածպետական Ծառայութեան Դպրոցին մէջ արձանագրուելու նպատակակէտերուն հասնիլ։ Մինչ զաւակներ իրենց ծնողներուն կ’ընկերակցին դաշտի ծառայութեան մէջ, անոնք կը սորվին վկայել ու կը յառաջանան դէպի չմկրտուած հրատարակիչ ըլլալու նպատակակէտին։ Ծնողներ իրենց զաւակներուն առջեւ նուիրումի ու մկրտութեան նպատակակէտը պէտք է դնեն։
3 Եթէ պատանի մըն ես, հոգեւոր նպատակակէտերդ ի՞նչ են։ «Քու Ստեղծիչդ երիտասարդութեանդ օրերուն մէջ յիշէ», իրապէս կարեւոր նպատակակէտերու վրայ կեդրոնանալով։ (Ժող. 12։1. Սաղմ. 71։17) Դպրոցական արձակուրդի ժամանակ, ինչո՞ւ օժանդակ ռահվիրայ չըլլաս։ Երբեք մտածա՞ծ ես որպէս կանոնաւոր ռահվիրայ՝ լիաժամ ծառայութեան ձեռնարկելու մասին։ Ի՞նչ կը խորհիս նոր լեզու մը սորվելու մասին, որպէսզի կարենաս շրջանիդ մէջ, կամ այլուր, օտարալեզու խումբի մը կամ ժողովքի մը օգնել։ Ներկայիս, Պէթէլականներէն, շրջուն տեսուչներէն կամ միսիոնարներէն շատեր լիաժամ ծառայութեան նպատակակէտը դրած էին, երբ տակաւին դպրոցական էին։ Ինչո՞ւ դուն ալ նոյնը չընես։
4 Մինչ մատղաշ տարիք մը ունիք, ջանացէք Յիսուսը ընդօրինակել։ Ան նոյնիսկ երբ 12 տարեկան էր, անվարանօրէն հոգեւոր նիւթերու մասին կը խօսէր։ (Ղուկ. 2։42-49, 52) Անձնական ուսումնասիրութիւն ընելու, ամէն օր Աստուածաշունչը կարդալու, եւ քրիստոնէական ժողովներու ու ծառայութեան մէջ հասուն Քրիստոնեաներու հետ կանոնաւորաբար ընկերակցելու օգտակար նպատակակէտերը դնելը, պիտի օգնէ ձեզի որ Յիսուսի պէս Աստուծոյ Թագաւորութեան մասին ուրիշներու սորվեցնելու հմտութիւնը ձեռք ձգէք։