Ի՛նչպէս կրնաս հոգեւոր նպատակակէտերուդ հասնիլ
1. Բազմաթիւ պատանի Քրիստոնեաներ ի՞նչ հոգեւոր նպատակակէտեր ունին։
1 Պատանի Քրիստոնեայ մը ըլլալով, անկասկած նպատակակէտերուդ կ’ազդեն՝ Եհովայի հանդէպ սէրդ եւ բոլոր Քրիստոնեաներուն ուղղուած Յիսուսի խօսքը թէ «առաջ խնդրեցէք Աստուծոյ թագաւորութիւնը»։ (Մատթ. 6։33) Թերեւս նպատակակէտդ է՝ ռահվիրայութիւն ընելով ծառայութիւնդ ընդարձակել կամ ծառայել հո՛ն, ուր Թագաւորութեան հրատարակիչներու աւելի մեծ կարիք կայ։ Ոմանց նպատակակէտն է՝ համաշխարհային շինարարական գործին մասնակցիլ, մասնաճիւղի մէջ ծառայել կամ միսիոնարական դաշտին մէջ աշխատիլ։ Ասոնք ի՜նչ իմաստալից ու գովելի նպատակակէտեր են։
2. Ի՞նչ բան կրնայ քեզի օգնել հոգեւոր նպատակակէտերուդ հասնելու։
2 Հոգեւոր նպատակակէտերդ գրի առնելը կ’օգնէ որ զանոնք իրագործես։ Դիտարան 15 Յուլիս 2004 թիւը (Անգլերէն) ըսաւ. «Վերացական գաղափար մը յստակ կը դառնայ ու ձեւ կ’առնէ, երբ զայն բառերովդ արտայայտես։ Ուստի տեղին է որ թուղթի մը վրայ գրես նպատակակէտերդ եւ զանոնք իրագործելու մեթոտը»։ Ասկէ զատ, կարճատեւ նպատակակէտերը կրնան քեզի օգնել յառաջդիմութիւնդ ստուգելու եւ կեդրոնացած մնալու, մինչ երկարատեւ նպատակակէտդ կը հետապնդես։
3. Նշէ՛ կարգ մը կարճատեւ նպատակակէտեր, որոնք կրնան անհատին օգնել մկրտութեան որակեալ ըլլալու։
3 Կարճատեւ նպատակակէտեր. Եթէ տակաւին մկրտուած չես, նկատի առ թէ ի՛նչ պէտք է ընես որ այս նպատակակէտին հասնիս։ Թերեւս հարկ կայ որ Աստուածաշունչի հիմնական ուսուցումները աւելի լաւ ըմբռնես։ Ուստի նպատակադրէ Աստուածաշունչը կը սորվեցնէ գիրքը ամբողջովին սերտել, նշուած բոլոր համարները բանալով։ (Ա. Տիմ. 4։15) Նաեւ նպատակ դիր՝ ամբողջ Աստուածաշունչը կարդալ, Ծննդոցէն մինչեւ Յայտնութիւն, ինչպէս Պէթէլականներն ու Գաղաադի աշակերտները կ’ընեն։ Անկէ ետք, Աստուածաշունչը ամէն օր ընթերցելու սովորութիւնը պահէ։ (Սաղմ. 1։2, 3) Ասիկա որքա՜ն պիտի նպաստէ որ հոգեւորապէս աճիս։ Աստուածաշունչի ընթերցանութեան եւ ուսումնասիրութեան իւրաքանչիւր նիստ՝ սրտագին աղօթքով սկսիր ու փակէ, եւ միշտ ջանա՛ սորվածդ կիրարկել։—Յակ. 1։25
4. Պէթէլի կամ միսիոնարական ծառայութեան երկարատեւ նպատակակէտը ունեցող Քրիստոնեան, ո՞ր կարճատեւ նպատակակէտերը կրնայ դնել։
4 Եթէ արդէն մկրտուած ես, ի՞նչ յաւելեալ նպատակակէտեր կրնաս հետապնդել։ Քարոզելու հմտութիւններդ բարելաւելու կարիք ունի՞ս։ Օրինակ, Աստուծոյ Խօսքը աւելի յաճախ գործածել դաշտի ծառայութեան մէջ։ (Բ. Տիմ. 2։15) Ի՞նչպէս կրնաս ծառայութիւնդ ընդարձակել։ Կարճատեւ նպատակակէտեր դիր, որոնք տարիքիդ ու պարագաներուդ յարմար են եւ քեզի պիտի օգնեն երկարատեւ նպատակակէտերուդ հասնելու։
5. Կարճատեւ նպատակակէտեր դնելը ի՞նչպէս եղբօր մը օգնեց որ Պէթէլի մէջ ծառայելու իր նպատակակէտին հասնի։
5 Երիտասարդի մը փորձառութիւնը. Երբ 19 տարեկան Թոնին Եհովայի Վկաներու մէկ մասնաճիւղը այցելեց, իր մէջ փափաք մը արթնցաւ որ Պէթէլի մէջ ծառայէ։ Սակայն ան քմահաճ կեանք մը կը վարէր ու Աստուծոյ չէր նուիրուած։ Ան որոշեց իր կեանքը ներդաշնակել Եհովայի ճամբաներուն հետ եւ նպատակադրեց մկրտուիլ։ Այս նպատակակէտը իրագործելէ ետք, ան ծրագրեց օժանդակ ռահվիրայ եւ ապա կանոնաւոր ռահվիրայ ըլլալ, օրացոյցին վրայ նշելով սկսելու թուականները։ Երեւակայէ անոր ուրախութիւնը երբ, որոշ ատեն մը ռահվիրայութիւն ընելէ ետք, Պէթէլի մէջ ծառայելու հրաւէր ստացաւ։
6. Ի՞նչ բան կրնայ քեզի օգնել հոգեւոր նպատակակէտերուդ հասնելու։
6 Դո՛ւն ալ կրնաս հոգեւոր նպատակակէտերուդ հասնիլ, մինչ Թագաւորութեան շահերը առաջին տեղը կը դնես։ «Քու գործերդ» աղօթքով Եհովայի առջեւ դիր եւ ամէն ջանք թափէ որ զանոնք իրագործես։—Առ. 16։3. 21։5