2002–ի Աստուածպետական Ծառայութեան Դպրոց
1 Մարդոց մեծամասնութիւնը խօսելու կարողութիւնը թեթեւի կ’առնէ։ Սակայն, խօսիլը Եհովային մէկ պարգեւն է։ Անիկա մեզի կը թոյլատրէ որ ուրիշներու հետ հաղորդակցինք եւ մեր գաղափարներն ու զգացումները արտայայտենք։ Ամենէն կարեւորը, անով կրնանք մեր Աստուածը փառաբանել։—Սաղմ. 22։22. Ա. Կորն. 1։4-7
2 Տղամարդիկ, կիներ ու երախաներ Աստուածպետական Ծառայութեան Դպրոցին մէջ կը մարզուին, Եհովայի անունը ծանուցանելու համար։ (Սաղմ. 148։12, 13) 2002–ի դպրոցի յայտագիրը, սուրբ գրային նիւթերու մեծ այլազանութիւն մը կը ծածկէ, որոնցմէ կրնանք անհատապէս օգտուիլ եւ ծառայութեան մէջ գործածել։ Դպրոցին համար պատրաստուելով եւ անոր մէջ մասնակցութիւն բերելով, որպէս Աստուծոյ Խօսքը ուսուցանողներ մեր գիտութիւնը եւ հմտութիւնները կրնանք աւելցնել։—Սաղմ. 45։1
3 Աստուածաշունչը Կարդացէք Ամէն Օր. Եթէ Աստուածաշունչ մը ձեռքի տակ պահենք, կրնանք մեր ունեցած ազատ ժամանակը օգտագործել զայն կարդալու համար։ Մեր մեծամասնութիւնը օրուան ընթացքին քանի մը ազատ վայրկեաններ ունի, զորս կրնանք այս կերպով գործածել։ Որքա՜ն օգտակար է ամէն օր առնուազն մէկ էջ կարդալ, ինչ որ բաւարար է դպրոցի յայտագրին մէջ ուրուագծուած Աստուածաշունչի ընթերցանութեան յայտագրին հետ քայլ պահելու համար։—Սաղմ. 1։1-3
4 Աստուածաշունչը լաւ ընթերցելու կարողութիւնը կրնայ մեզի օգնել որ մեր ունկնդիրներուն սրտին հասնինք եւ զանոնք մղենք Եհովան փառաբանելու։ Թիւ 2 Նշանակումը ունեցող եղբայրները պէտք է իրենց նշանակումը բարձրաձայն կարդալով կրկին անգամ փորձ ընեն։ Դպրոցի տեսուչը գովասանք եւ ընթերցանութիւնը բարելաւելու համար թելադրութիւններ պիտի տայ։
5 Պատճառաբանել Գիրքը Գործածեցէք. Թիւ 3 եւ 4 Նշանակումները հիմնուած են Պատճառաբանել գրքին վրայ։ Մեզմէ շատեր պէտք է ջանան այս գործնական օգնականը աւելի յաճախ գործածել դաշտի ծառայութեան մէջ։ Քոյրերը պէտք է թաղամասին համար գործնական եղող մատուցման կերպեր գործածեն։ Դպրոցի տեսուչը պէտք է մասնայատուկ ուշադրութիւն ընծայէ թէ անոնք ի՛նչպէս կ’ուսուցանեն եւ Սուրբ Գրութիւնները կը գործածեն։
6 Կը մաղթենք որ Աստուածպետական Ծառայութեան Դպրոցը մեր բոլորին օգնէ, որ խօսելու մեր աստուածատուր պարգեւը շարունակենք գործածել, բարի լուրը ծանուցանելու եւ մեր մեծ Աստուածը՝ Եհովան՝ փառաբանելու համար։—Սաղմ. 34։1. Եփ. 6։19