Մեր Հաւատքը Բարի Գործերու կը Մղէ Մեզ
1 Հաւատքը մղեց Նոյը, Մովսէսն ու Ռախաբը որ գործի լծուին։ Նոյ տապանը շինեց։ Մովսէս Փարաւոնի պալատին մէջ կեանքի ժամանակաւոր առաւելութիւնները լքեց։ Ռախաբ լրտեսները պահեց, ապա անոնց հրահանգներուն հնազանդեցաւ, իր ընտանիքը փրկելով։ (Եբր. 11։7, 24-26, 31) Մեր հաւատքը ի՞նչ բարի գործեր ընելու կը մղէ մեզ ներկայիս։
2 Վկայել. Հաւատքը մեզ կը մղէ խօսելու մեր հոյակապ Աստուծոյն եւ յաւիտենական երջանկութեան համար անոր ըրած կարգադրութիւններուն մասին։ (Բ. Կորն. 4։13) Երբեմն, կրնանք վարանիլ վկայութիւն մը տալու։ Սակայն, եթէ ‘ամէն ատեն Տէրը մեր առջեւը դնենք’, կը զօրանանք եւ մեր վախը կը փարատի։ (Սաղմ. 16։8) Ապա, մեր հաւատքը մեզ կը մղէ բարի լուրը բաժնելու ազգականներու, դրացիներու, գործակիցներու, դասընկերներու եւ ուրիշներու հետ, ամէն յարմար առիթով։—Հռովմ. 1։14-16
3 Միասնաբար Հաւաքուիլ. Ժողովներու կանոնաւորաբար ներկայ գտնուիլը հաւատքէն առթած ուրիշ բարի գործ մըն է։ Ի՞նչպէս։ Անիկա ցոյց կու տայ մեր համոզումը, թէ Յիսուս մեզի հետ ներկայ է Աստուծոյ սուրբ հոգիին միջոցաւ, երբ քրիստոնէական ժողովներուն իրարու քով կը հաւաքուինք։ (Մատթ. 18։20) Անիկա ցոյց կու տայ մեր փափաքը ‘լսելու թէ Հոգին ի՛նչ կ’ըսէ ժողովքներուն’։ (Յայտ. 3։6) Մեր ստացած հրահանգները լուրջի կ’առնենք, քանի որ հաւատքի աչքով կը տեսնենք թէ մեզի սորվեցնողը մեր Մեծ Ուսուցիչը՝ Եհովան է։—Եսայ. 30։20, ՆԱ
4 Մեր Ըրած Ընտրութիւնները. Անտեսանելի իրողութիւններու հանդէպ զօրաւոր համոզումը մեզ կը մղէ որ հոգեւոր բաները մեր կեանքին մէջ առաջին տեղը դնենք։ (Եբր. 11։1) Ասիկա յաճախ կը պարփակէ նիւթական զոհողութիւններ ընել։ Օրինակ, երէց մը շահաբեր աշխարհիկ գործի պատեհութիւն մը մերժեց, քանի որ անիկա պիտի նշանակէր ժողովներէն բացակայիլ, ընտանիքէն հեռու ըլլալ, եւ իր ռահվիրայական ծառայութիւնը դադրեցնել։ Թող որ մենք ալ մեր լման վստահութիւնը Աստուածաշունչի տուած երաշխիքին վրայ դնենք, թէ Եհովա անհրաժեշտ բաները պիտի հայթայթէ անոնց, որոնք կը շարունակեն ‘առաջ խնդրել Աստուծոյ թագաւորութիւնը եւ անոր արդարութիւնը’։—Մատթ. 6։33
5 Մեր կեանքին վրայ հաւատքին բանեցուցած զօրաւոր ազդեցութիւնը ուրիշներու կողմէ աննկատ չի մնար։ Արդարեւ, մեր հաւատքը համայն աշխարհին ծանօթ է։ (Հռովմ. 1։8) Հետեւաբար, թող որ բոլորս ալ բարի գործերով ցոյց տանք թէ մեր հաւատքը կենդանի է։—Յակ. 2։26