Լուրջ նկատողութեան արժանի տեսաերիզ մը

«Այս տեսաերիզը իրապէս քեզ կը մղէ խորհելու»։

«Ան ուղղակի սրտիս դպաւ»։

«Զգացումներս շարժեցան»։

¹ Պատանիները կը հարցնեն՝ ի՞նչպէս իսկական ընկերներ կրնամ ունենալ խորագրով տեսաերիզը առաջին անգամ դիտելէ ետք, վերոնշեալ հակազդեցութիւնը ունեցա՞ր։ Քանի մը տարի առաջ, երիտասարդ եղբայր մը դժուար պարագաներէ կ’անցնէր՝ իր ընտրած բարեկամներուն պատճառաւ։ Անոնք պատճառ եղած էին որ ճշմարտութեան հանդէպ իր հետաքրքրութիւնը պաղէր եւ Եհովայի հետ իր յարաբերութիւնը կորսնցնէր։ Ապա Իսկական ընկերներ տեսաերիզը լոյս տեսաւ։ Ան գրեց. «Մինչ տեսաերիզը կրկին ու կրկին անգամ դիտեցի, արցունքներս հոսեցան։ Եհովայի շնորհակալութիւն յայտնեցի՝ յարմար ժամանակին տրուած օգնութեան համար»։ Տեսաերիզը զինք մղեց իր կեանքին մէջ փոփոխութիւններ մտցնելու եւ լաւ բարեկամներ ընտրելու։ Ան աւելցուց. «Ակներեւ է թէ երիտասարդներուն ազդող բաներուն հետ քայլ կը պահէք»։ Ո՛վ ծնողներ ու պատանիներ, ինչո՞ւ ձեր յաջորդ ընտանեկան ուսումնասիրութեան ընթացքին այս տեսաերիզը անգամ մը եւս չդիտէք։ Իւրաքանչիւր հատուածի վերջաւորութեան զայն կեցուցէք, եւ բացէ ի բաց ու պարկեշտօրէն նկատի առէք հետեւեալ պարբերութիւններուն մէջ նշուած հարցումները։

² Նախաբան. Իսկական ընկերը ո՞վ է։—Առ. 18։24

³ Բարեկամութեան խոչընդոտներ. Ի՞նչպէս կրնաս անտեսուած ըլլալու զգացումը յաղթահարել։ (Փիլ. 2։4) Ինչո՞ւ անձնաւորութիւնդ բարելաւելու յօժար պէտք է ըլլաս, եւ ո՞վ կրնայ քեզի օգնել ասիկա ընելու։ Ի՞նչ բան կրնայ աւելի ընկերներ ունենալու առիթ բանալ, եւ զանոնք ո՞ւր կարելի է գտնել։—Բ. Կորն. 6։13

⁴ Աստուծոյ հետ բարեկամութիւն. Ի՞նչպէս կրնաս Եհովայի հետ սերտ յարաբերութիւն մշակել, եւ ասիկա ընելու համար ինչո՞ւ կ’արժէ ջանք թափել։ (Սաղմ. 34։8) Ո՞վ կրնայ Աստուծոյ հետ բարեկամութիւնդ ամրացնել։

⁵ Սխալ ընկերներ. Որո՞նք չար ընկերակիցներ են։ (Ա. Կորն. 15։33) Սխալ ընկերները ի՞նչպէս կրնան անհատը հոգեւորապէս կործանել։ Դինայի մասին աստուածաշնչական արձանագրութենէն ի՞նչ կը սորվիս։—Ծննդ. 34։1, 2, 7, 19

⁶ Արդի թատերախաղ. Առանձնութիւնը Թէրայի ի՞նչպէս ազդեց։ Ան աշխարհային պատանիներու հետ իր ընկերակցութիւնը ի՞նչպէս արդարացուց։ Անոնք զինք ի՞նչ վտանգներու ենթարկեցին։ Թէրայի ծնողքը ինչո՞ւ իր վտանգաւոր կացութիւնը չնկատեցին, բայց ի՞նչ մօտեցումով իրեն օգնեցին որ հոգեւորապէս ապաքինի։ Ռահվիրայ քոյր մը ի՞նչպէս ապացուցանեց թէ իսկական ընկեր մըն էր Թէրայի։ Քրիստոնեաները ինչո՞ւ Առակաց 13։20–ի եւ Երեմեայ 17։9–ի խօսքերուն պէտք է անսան։ Թէրա ի՞նչ կարեւոր դաս մը սորվեցաւ։

⁷ Եզրափակութիւն. Այս տեսաերիզէն ի՞նչ դասեր սորվեցար։ Ի՞նչպէս կրնաս զայն գործածել ուրիշներուն օգնելու։—Սաղմ. 71։17