Ծառայութեան ժողովին ի՛նչպէս պատրաստուիլ
1. Ծառայութեան ժողովին նպատակը ի՞նչ է, եւ ի՞նչպէս կրնանք լաւագոյն օգուտը քաղել։
1 Ծառայութեան ժողովին նպատակն է՝ մեզ արդիւնաբեր ծառայութեան մը համար զինել։ Անիկա գլխաւորաբար կը կեդրոնանայ Թագաւորութեան բարի լուրը քարոզելուն, աշակերտելուն եւ աստուածային դատաստանին մօտալուտ գործադրութիւնը ծանուցանելուն վրայ (Մատ. 28։20. Մար. 13։10. Բ. Պետ. 3։7)։ Այս կարեւոր ժողովէն լաւագոյն օգուտը կը քաղենք, երբ լաւ պատրաստուած եւ մասնակցելու յօժար ենք։
2. Ի՞նչպէս կրնաս դասախօսութիւն մը մտիկ ընելու համար պատրաստուիլ։
2 Դասախօսութիւն։ Ընդհանրապէս, դասախօսին կը նշուի դասախօսութեան աղբիւրը։ Կրնաս նշանակուած նիւթը աչքէ անցընել, ի ներառեալ նշուած համարները, ապա խորհրդածել թէ տեղեկութիւնները ի՛նչպէս կրնաս ծառայութեանդ մէջ կիրարկել։
3. Հարց–պատասխանով քննարկութեան մը համար ի՞նչպէս կրնանք պատրաստուիլ։
3 Հարց–պատասխանով քննարկութիւն։ Այս բաժինը նկատի պիտի առնուի գրեթէ Դիտարան–ի ուսումնասիրութեան պէս, բացման ու փակման խօսքերը հակիրճ ըլլալով։ Իւրաքանչիւր պարբերութեան գլխաւոր կէտերը ընդգծէ, եւ պատրաստուէ համառօտ ու իմաստալից պատասխաններ տալու։
4. Ներկաներուն մասնակցութիւնը պահանջող քննարկութեան համար ի՞նչպէս կրնանք պատրաստուիլ։
4 Ներկաներուն մասնակցութեամբ քննարկութիւն։ Այս բաժինը պիտի ներկայացուի որպէս դասախօսութիւն, բայց երբեմն դասախօսը ներկաներուն մասնակցութիւնը պիտի խնդրէ։ Եթէ գլխաւոր կէտերը ընդգծես եւ նշուած համարները բանաս, կրնաս ուղղուած հարցումներուն պատասխանել։ Այս բաժինը ներկայացնող եղբայրը ամէն ջանք պիտի թափէ, որ ներկաներուն մասնակցութեամբ գլխաւոր կէտերը ծածկէ։
5. Ի՞նչ բան մեզի պիտի օգնէ ցուցադրութիւններէն լաւագոյն օգուտը քաղելու։
5 Ցուցադրութիւններ։ Կարգ մը բաժիններ գործնական ցուցադրութիւններ պիտի պարփակեն, ցոյց տալու համար թէ նկատի առնուած տեղեկութիւնը ի՛նչպէս տեղական թաղամասին մէջ կրնայ գործածուիլ։ Երէցներէ, փորձառու հրատարակիչներէ կամ ռահվիրաներէ պիտի խնդրուի, որ ցուցադրութիւններ ներկայացնեն։ Այս բաժնին համար կրնաս նախապատրաստուիլ՝ մտածելով թէ նիւթը ի՛նչպէս պիտի ներկայացուի։ Երբ ներկայացումի նմոյշ մը ցուցադրուի, նկատի առ թէ ի՛նչպէս կրնաս զայն իւրացնել եւ տարբեր տանտէրներու յարմարցնել։ Վստահ եղիր որ հետդ ունենաս ցուցադրութեան մէջ գործածուելիք հրատարակութիւնը կամ պարբերաթերթը։ Ընտանեկան պաշտամունքին ընթացքին, թերեւս օգտակար գտնես այս ներկայացումներէն ոմանք փորձ ընել։
6. Ծառայութեան ժողովին պատրաստուելու կարգ մը պատճառները ի՞նչ են։
6 Ծառայութեան ժողովը աւելի հաճելի կ’ըլլայ, երբ նախապատրաստուած ենք ու ներկայացուելիք ընտիր ցուցմունքները կ’ակնկալենք։ Այսպէս պիտի կարենանք ա՛լ աւելի փոխադարձ քաջալերութիւն վայելել (Հռով. 1։11, 12)։ Ծառայութեան ժողովին պատրաստուելու համար ժամանակ յատկացնելով, աւելի լաւ սպառազինուած պիտի ըլլանք որ մեր յանձնարարութիւնը կատարենք (Բ. Տիմ. 3։17)։