Ծառայութեան Ժողովը Մեզ Կը Պատրաստէ Ամէն Բարի Գործերու
1 Ծառայութեան Ժողովին նպատակն է մեզ մղել ու պատրաստել աւելի լման կերպով բաժին բերելու քարոզելու եւ աշակերտելու գործին մէջ։ (Բ. Տիմ. 3։17) Սակայն, եթէ ժողովին համար պատշաճօրէն չնախապատրաստուինք կամ մեր սորվածը կիրարկելու մէջ թերանանք, օգուտները ամենանուազը պիտի ըլլան։
2 Առաջուընէ պատրաստելը ձեզի պիտի օգնէ որ թելադրութիւնները աւելի լման կերպով իւրացնէք։ Գործածուելիք գրականութիւնները վերաքաղ ըրէք եւ զանոնք ձեր հետ բերէք, որպէսզի կարենաք դասախօսին հետեւիլ ու մասնակցիլ։ Ուշադիր ունկնդիր մը եղէք եւ հետագայ գործածութեան համար նոթագրեցէք։
3 Վերակացու տեսուչը ուշադրութեամբ վերաքաղ կ’ընէ ժողովին յայտագիրը։ Ատակ, որակելի երէցներ եւ օգնական ծառաներ կը նշանակուին ժողովին բաժինները պատրաստելու։ (Կազմակերպուած էջ 70, Արաբ.) Քիչ երէցներ եւ օգնական ծառաներ ունեցող ժողովքները կրնան որակելի ուրիշ եղբայրներ նշանակել իրենց օժանդակելու համար։ (Թագաւորութեան Ծառայութիւնը 12/76, Հարցումի Տուփ, Արաբ.) Իւրաքանչիւր դասախօս պէտք է իր բաժինը լիովին պատրաստէ, հայթայթուած ուղղութեան սերտօրէն կառչի եւ վստահ ըլլայ որ որոշուած ժամանակէն աւելի չառնէ։
4 Ժողովը սովորաբար կը սկսի ծանուցումներով։ Նշանակուած եղբայրը պէտք է առաջուընէ կապ պահէ վերակացու տեսուչին հետ, որպէսզի գիտնայ ինչ տեղեկութիւններ պէտք է յիշուին։ Անոնք կրնան պարփակել Ընկերութենէն նամակներ կամ ծառայութեան կարգադրութիւններուն մասին վերյիշեցումներ կամ ամսական տեղեկագիրներ։ Կրնանք տեղեկանալ թէ հիւանդներ կան որոնց պէտք է այցելենք կամ մանրամասնութիւններ լսել ժողովքային գործունէութիւններու մասին որոնք ապագային համար ծրագրուած են։ Լաւ ուշադրութիւն ընծայեցէք որպէսզի տեղեակ ըլլաք ու պատրաստ՝ ձեր բաժինը կատարելու։
5 Երբ բաժին մը պահանջէ ունկնդիրներուն մասնակցութիւնը, նախապատրաստուեցէք նիւթը կարդալով ու համարները բանալով։ Մտածեցէք թէ ինչպէ՛ս կը ծրագրէք թելադրութիւնները կիրարկել եւ ի՛նչ մեկնաբանութիւններ պիտի ընէք ուրիշները քաջալերելու։ Թերեւս կարենաք խրատին գործնական արժէքը լուսաբանել հակիրճ փորձառութիւն մը պատմելով։
6 Երբ ցուցադրութիւն մը կայ, փորձեցէք դուք ձեզ երեւակայել նոյնանման պարգաներու մէջ եւ մտածեցէք թէ ի՛նչ պիտի ըսէիք։ Նկատեցէք գործածուած պատճառաբանութիւնները եւ տրամաբանական զարգացումը։ Փորձեցէք վերյիշել ինչ որ ըսիք երբ վերջին անգամ նման պարագայի մը մէջ էիք եւ մտածեցէք թէ ինչպէ՛ս ցուցադրուած կէտերը կրնան ձեզի օգնել որ աւելի լաւ արդիւնքներ ձեռք ձգէք ապագային։
7 Ցուցադրութիւններուն եւ հարցազրոյցներուն մասնակցողները պէտք է առաջուընէ լաւ փորձ ընեն։ Իւրաքանչիւրը պէտք է գիտնայ թէ ի՛նչ պիտի ըսէ կամ ընէ բեմին վրայ։ Փորձ չեղած բաժինները սովորաբար ունկնդիրները չեն մղեր կամ քաջալերել։ Ոմանք պատրաստուած կու գան իրենց բաժինը փորձ ընելու Դիտարանի Ուսումնասիրութենէն ետք, այնպէս որ կարենան բեմին վրայ փորձ ընել ու բարձրախօսի գործածութեան հոգ տանող եղբայրներուն թոյլ տալ որ գիտնան ինչ բան պէտք պիտի ըլլայ։
8 Երբեմն յայտագիրը պիտի պարփակէ դասախօսութիւն մը որ ժողովքի մասնայատուկ մէկ կարիքը նկատի կ’առնէ կամ՝ Դիտարանի այժմէական յօդուած մը։ Ուշի ուշով մտիկ ըրէք, խրատը լուրջի առէք եւ ջանացէք կիրարկել զայն։
9 Կ’ուզենք «ամէն բարի գործերու համար պատրաստուած» ըլլալ։ (Բ. Տիմ. 2։21) Ծառայութեան Ժողովը Եհովայի ըրած հայթայթումներէն մէկն է մեզի օգնելու որ ատիկա ընենք։ Հաւատարմօրէն ներկայ գտնուիլը եւ անկեղծօրէն ջանալը որ գործածենք ինչ որ կը սորվինք, վստահաբար պիտի օգնեն մեզի որպէսզի կարենանք ‘մեր ծառայութիւնը լիովին կատարել’։—Բ. Տիմ. 4։5