Միշտ պատրաստ եղիր Աստուածաշունչի ուսումնասիրութիւն առաջարկելու

1. Մատթէոս 28։19, 20–ի մէջ նշուած Յիսուսի յանձնարարութիւնը կատարելու համար, ի՞նչ պէտք է ընենք։

¹ Յիսուս մեզի տուաւ ‘աշակերտելու եւ սորվեցնելու’ յանձնարարութիւնը (Մատ. 28։19, 20)։ Հետեւաբար, կ’ուզենք ամէ՛ն ատեն պատրաստ ըլլալ Աստուածաշունչի ուսումնասիրութիւն առաջարկելու, ոչ միայն այն մէկ օրը, որ մասնաւորաբար յատկացուած է Աստուածաշունչի ուսումնասիրութիւններ առաջարկելու։ Հետեւեալ թելադրութիւնները կրնան օգտակար ըլլալ։

2. Որո՞նց կրնանք Աստուածաշունչի ուսումնասիրութիւն առաջարկել։

² Զայն առաջարկէ։ Աստուածաշունչի ուսումնասիրութիւն մը ո՛րքան աւելի առաջարկենք, ա՛յնքան աւելի պատեհութիւններ պիտի ունենանք դաս մը հաստատելու (Ժող. 11։6)։ Ուղղակի մօտեցումը փորձա՞ծ ես։ Միացեալ Նահանգներուն մէջ ժողովք մը մէկ ամիս ջանաց ասիկա ընել։ Արդի՞ւնքը։ Անոնք 42 նոր ուսումնասիրութիւններ սկսան։ Մի՛ ենթադրեր թէ հետաքրքրուած անհատները, որոնց կ’այցելես, գիտեն որ աստուածաշնչական դասեր կը վարես։ Յաջորդ վերայցելութեան, ինչո՞ւ ուսումնասիրութիւն մը չառաջարկես։ Եթէ տանտէրը զայն մերժէ, խնդիր չէ. կրնաս շարունակել հետաքրքրութիւնը մշակել։ Դրացիներուդ, ազգականներուդ, գործակիցներուդ եւ դպրոցակիցներուդ հարցուցա՞ծ ես, թէ արդեօք կը փափաքի՛ն քու հետդ Աստուածաշունչը ուսումնասիրել։ Նաեւ կրնաս Աստուածաշունչի աշակերտներուդ հարցնել, թէ արդեօք բարեկամներ կամ ազգականներ ունի՛ն, որոնք կը սիրեն Աստուածաշունչը ուսումնասիրել։

3. Աստուածաշունչի ուսումնասիրութիւններ սկսելու համար ի՞նչ օգտակար գործիք ունինք, եւ ե՞րբ կրնանք զայն գործածել։

³ Օգտակար գործիք մը։ Աստուածաշունչի ուսումնասիրութիւններ սկսելու համար արժէքաւոր գործիք մըն է՝ Կը փափաքի՞ս ճշմարտութիւնը գիտնալ թերթիկը։ Զայն կրնաս տանտէրներուն տալ, այլ հրատարակութիւն մը ընդունի՛ն կամ ոչ։ Զայն կրնաս գործածել, երբ առեւտրական շրջանի մէջ կը ծառայես, փողոցի քարոզչութեան կը մասնակցիս, նամակներ կ’ուղարկես եւ վերայցելութիւններ կ’ընես։ Նաեւ կրնաս տունը չեղողներուն դրան առջեւ զայն ձգել։ Ինչո՞ւ զայն հետդ չկրես, երբ հանրային փոխադրամիջոց կը գործածես, գնում կ’ընես եւ գործի մէջ ես։ Անոր ետեւի էջը ամփոփօրէն կը բացատրէ Աստուածաշունչի ուսումնասիրութեան կարգադրութիւնը եւ կ’ակնարկէ Աստուածաշունչը կը սորվեցնէ գիրքին։

4. Ինչպէ՞ս կրնանք Ճշմարտութիւնը գիտնալ թերթիկը գործածել ուսումնասիրութիւն մը սկսելու։

⁴ Թերթիկը անհատին տալէ ետք, կրնաս առաջին էջի հարցումները մատնանշել ու հարցնել. «Այս հարցումներէն ո՞ր մէկը քեզ աւելի կը հետաքրքրէ»։ Յետոյ, պատասխանը թերթիկէն նկատի առ, եւ կարդա՛ կամ յարասէ վերջին էջը, որ Աստուածաշունչի ուսումնասիրութեան մեր կարգադրութիւնը կը բացատրէ։ Ապա ցոյց տուր, թէ այս նիւթին մասին ո՛ւր յաւելեալ տեղեկութիւն տրուած է Աստուածաշունչը կը սորվեցնէ գրքին մէջ, գիրքը ներկայացուր, ու վերադառնալու եւ քննարկումը շարունակելու կարգադրութիւններ ըրէ։

5. Ինչո՞ւ ամէն ատեն պատրաստ պէտք է ըլլանք Աստուածաշունչի ուսումնասիրութիւն առաջարկելու։

⁵ Մեր թաղամասին մէջ տակաւին կան անհատներ, որոնք կը տենչան գիտնալ, թէ Աստուածաշունչը իրապէս ի՛նչ կը սորվեցնէ։ Ամէն ատեն պատրաստ ըլլալով Աստուածաշունչի ուսումնասիրութիւն առաջարկելու, յաւելեալ պատեհութիւններ պիտի ունենանք վայելելու այն ուրախութիւնը, որ յառաջ կու գայ ուրիշներուն օգնելէն, որ կեանքի տանող ճամբուն մէջ քալեն (Մատ. 7։13, 14)։