Bebendar Nganti Nengeri ke Tetap Nya

1. Nitih ku Jesus, nama utai deka nyadi ngagai Jerusalem?

BEBERAPA hari sebedau Jesus mati, iya meri siti jaku benabi ngagai bala murid iya. Jesus madah Jerusalem deka “dikelulung bala soldadu.” (Luk. 21:20) Lebuh bala murid iya meda bala soldadu nya, sida patut enggau jampat ninggalka Judea.—Luk. 21:​21, 22.

2. Nama jaku lalau ke diberi Rasul Paul ngagai orang Kristian ke diau ba Judea enggau Jerusalem?

² Beberapa taun sebedau bala soldadu Rome ngelulung Jerusalem, Rasul Paul nulis siti surat ngagai orang Kristian ke diau ba Judea enggau Jerusalem. Surat nya ngundan pesan ti penting. Kemayaharitu, surat nya dikumbai bup Hebrew. Dalam surat nya, Paul meri jaku lalau ke ulih nulung orang Kristian besedia napi penusah ke deka datai. Nama utai ke deka nyadi? Jerusalem deka dirusakka. Enti sida deka selamat, sida patut ninggalka rumah sereta pengawa dagang sida. Bekaul enggau Jerusalem, Paul nulis: “Ba ditu kitai nadai nengeri ke tetap, tang kitai enggau pengabis ati nganti nengeri ti deka datai.”—Heb. 13:14.

3. Nama “nengeri ke bisi pugu ti tegap,” lalu nama kebuah kitai bebendar nganti iya?

³ Lebuh orang Kristian milih ninggalka Jerusalem enggau Judea, mayuh orang engka ngumbai sida beli sereta ngeleseka sida. Tang pemutus nya nyelamatka nyawa sida! Kemayaharitu, orang engka ngumbai kitai beli laban enda ngulihka mayuh duit, sereta enda bepanggai ba mensia kena mutarka penanggul ba dunya. Nama kebuah kitai ngaga pemutus nya? Laban kitai nemu, enda lama da agi, Perintah Petara deka ngerusakka dunya ti jai tu. Kitai bebendar nganti Perintah Petara laban kitai nemu nya meh “nengeri ke bisi pugu ti tegap.”a (Heb. 11:10; Mat. 6:33) Tiap iti anak tajuk ba artikel tu deka berandauka: (1) Baka ni jaku lalau Paul nulung orang Kristian ba abad keterubah bebendar nganti Perintah Petara, (2) baka ni Paul nulung sida besedia sebedau pengerusak Jerusalem, sereta (3) baka ni jaku lalau iya ulih nulung kitai kemayaharitu.

ARAPKA JEHOVAH LABAN IYA ENDA SEKALI-KALI NINGGALKA NUAN

4. Nama kebuah Jerusalem penting ba orang Kristian?

⁴ Jerusalem nya nengeri ti penting ke orang Kristian. Raban gempuru Kristian ti keterubah ditumbuhka ba nengeri nya kena taun 33 M., lalu raban ti ngiring mega diau ba nengeri nya. Nambahka nya, mayuh orang Kristian bisi rumah sereta reta tengkira ba nengeri nya. Taja pia, Jesus nangkan bala murid iya, sida patut ninggalka Jerusalem enggau Judea.—Mat. 24:16.

5. Baka ni Paul nulung orang Kristian besedia napi utai ke deka nyadi ngagai Jerusalem?

⁵ Kena nulung orang Kristian besedia ninggalka Jerusalem, Paul nulung sida faham agi pasal asai ati Jehovah bekaul enggau nengeri nya. Paul ngingatka sida, Jehovah enda agi ngena bala imam ba Rumah Sembiang tauka nerima korban ke diberi ba dia. (Heb. 8:13) Pia mega, mayuh orang ari nengeri nya udah nulak Messiah. Nyadi, orang enda ibuh agi ngagai Jerusalem kena nyembah Jehovah. Ketegal nya, Jerusalem enggau Rumah Sembiang deka dirusakka.—Luk. 13:​34, 35.

6. Nama kebuah orang Kristian begunaka jaku lalau ke diberi Paul ba Hebrew 13:​5, 6?

⁶ Lebuh Paul nulis surat ngagai orang Kristian ke bebansa Hebrew, mayuh orang rindu diau tauka ngabas nengeri Jerusalem. Siku penulis Rome ari jeman nya madahka: “Jerusalem siti nengeri ti amat tebilang ba Timur.” Ninting taun, orang Judah ari mayuh bengkah endur deka datai beberapa kali ngagai Jerusalem kena ngintu pengerami. Pengawa tu ngemansangka ekonomi ba nengeri nya. Ketegal nya, sekeda orang Kristian bulih penguntung lalu bulih mayuh duit. Engka nya kebuah Paul madah ngagai sida: “Awakka pengidup kita bibas ari pengerindu ke duit. Tang, puas ati meh enggau utai ke dikemisi diri.” Udah nya, iya nyebut ayat Bup Kudus pasal semaya Jehovah ngagai tiap iku nembiak Iya, ke madah: “Aku enda sekali-kali ninggalka nuan, lalu Aku enda sekali-kali ngelengkaka nuan.” (Bacha Hebrew 13:​5, 6; U-dat. 31:6; Mas. 118:6) Orang Kristian ba Jerusalem enggau Judea begunaka semaya tu. Nama kebuah? Laban enda lama pengudah nerima surat ari Paul, sida patut ninggalka rumah, pengawa dagang, sereta mayuh ari reta tengkira sida. Udah nya, sida mega patut nelebaka diri ba endur ti baru, lalu tu ulih nyadi siti cabaran ke sida.

7. Nama kebuah kitai patut belajar arapka Jehovah enggau pengabis iya ari diatu?

⁷ Utai ke ulih dipelajarka kitai: Nama deka nyadi enda lama da agi? “Penusah ti Besai” deka berengkah, lalu dunya ti jai tu deka dirusakka. (Mat. 24:21) Baka orang Kristian ba abad keterubah, kitai mesti mengkang bejaga sereta besedia. (Luk. 21:​34-36) Maya Penusah ti Besai, kitai engka patut ninggalka sekeda tauka semua utai ke dikemisi kitai. Maya nya, kitai patut arap enggau pengabis ati, Jehovah enda sekali-kali ninggalka kitai. Indah diatu, sebedau Penusah ti Besai berengkah, kitai ulih nunjukka pemesai pengarap kitai ba Jehovah. Tanya diri empu: ‘Kati pemutus enggau pelan ke digaga aku nunjukka aku enda bepanggai ba duit, tang ba Petara ke besemaya deka nyaga aku?’ (1 Tim. 6:17) Teladan orang Kristian ba abad keterubah ulih nulung kitai mengkang tetap ati maya Penusah ti Besai. Taja pia, “Penusah ti Besai” tu deka balat agi ari penusah ke kala ditapi orang Kristian. Nyadi, baka ni kitai nemu nama utai ke patut digaga lebuh Penusah ti Besai nya berengkah?

NGASIKA SIDA KE NGIRING

8. Nama iring ke diberi Jesus ngagai bala murid iya?

⁸ Beberapa taun pengudah nerima surat Paul, orang Kristian meda bala soldadu Rome ngelulung nengeri Jerusalem. Lebuh utai nya nyadi, orang Kristian nemu, nya meh maya iya sida patut ngerarika diri ari Jerusalem enggau Judea. Enda lama da agi, nengeri Jerusalem deka dirusakka. (Mat. 24:3; Luk. 21:​20, 24) Tang kini sida patut ngerarika diri? Jesus semina madah: “Awakka orang ke diau ba Judea rari ngagai bukit.” (Luk. 21:21) Ba kawasan nya, bisi mayuh bukit tauka gunung. Nyadi, baka ni sida nemu ni bagi gunung ke deka dituju sida?

9. Nama kebuah orang Kristian engka bisi berunding pasal ni bagi gunung ke patut dituju sida? (Peda mega peta.)

⁹ Perundingka sekeda gunung ke ulih dituju orang Kristian maya nya: Kawasan gunung Samaria, kawasan gunung Galili, Gunung Hermon enggau kawasan gunung Lebanon, sereta kawasan gunung seberai Sungai Jordan. (Peda peta.) Sekeda ari nengeri ba kawasan gunung nya baka ke likun. Ambika chunto, nengeri Gamla ba atas gunung ti tinggi sereta tusah dituju. Sekeda orang Judah ngumbai nengeri tu endur ti pemadu selamat, tang orang Rome nyerang sereta ngerusakka nengeri nya, lalu mayuh orang ke diau ba Gamla mati.b

10-11. (a) Nama chara ke engka dikena Jehovah ngiring orang Kristian maya nya? (Hebrew 13:​7, 17) (b) Nama penguntung ke diulih orang Kristian ketegal ngasika sida ke ngiring? (Peda mega gambar.)

¹⁰ Jehovah engka ngiring orang Kristian nengah sida ke ngiring ba raban gempuru. Siku pakar sejarah ke benama Eusebius madahka, Petara ngiring sekeda bala menyadi lelaki ba Jerusalem lalu ngasuh orang Kristian ninggalka Jerusalem, lalu mupuk ngagai Pella, siti nengeri ba kawasan Perea. Pella, siti nengeri ti sesuai ke dituju orang Kristian maya nya. Nengeri nya enda jauh ari Jerusalem, lalu pejalai ngagai Pella enda tusah. Pia mega, mayuh orang ke diau ba nengeri nya ukai orang Judah. Nyadi, sida enda belaban enggau orang Rome.—Peda peta.

¹¹ Orang Kristian ke ngasika “sida ke ngiring” ngerarika diri ngagai kawasan gunung lalu mansang ngagai Pella. (Bacha Hebrew 13:​7, 17.) Ulah sida ti ngasi nya udah nyelamatka sida. Ketegal sida bebendar “nganti nengeri ke bisi pugu ti tegap,” iya nya Perintah Petara, Jehovah enda ninggalka sida.—Heb. 11:10.

12-13. Baka ni Jehovah ngiring bala nembiak Iya ba maya ti tusah?

¹² Utai ke ulih dipelajarka kitai: Jehovah ngena sida ke ngiring meri iring ti nyemetak ngagai bala nembiak Iya. Bisi mayuh chunto dalam Bup Kudus ke nunjukka baka ni Jehovah udah ngena bala lelaki ti tetap ati kena ngiring bala nembiak Iya ba maya ti tusah. (U-dat. 31:23; Mas. 77:20) Kemayaharitu mega, kitai meda bukti ke nunjukka Jehovah ngena sida ke ngiring meri iring ngagai bala nembiak Iya.

¹³ Ambika chunto, lebuh pandemik COVID-19 berengkah, bala menyadi lelaki ke ngiring meri iring ngagai raban gempuru. Bala tuai gempuru nerima iring pasal baka ni bala menyadi ulih begempuru sereta nyembah Jehovah. Beberapa bulan pengudah pandemik nya berengkah, kitai bisi konvensyen dalam lebih ari 500 bansa jaku. Bala menyadi ulih meda program konvensyen nya nengah Internet tauka TV, tauka ninga nengah radio. Konvensyen ke baka tu nadai kala nyadi sebedau tu. Ba maya nya mega, kitai seruran nerima utai ke diguna kitai ba pengarap. Ketegal nya, kitai mengkang beserakup. Nyadi, kitai ulih yakin, enda ngira nama penguji ke ditapi kitai dudi hari, Jehovah deka terus nulung sida ke ngiring ngambika ngaga pemutus ti manah. Kelimpah ari arapka Jehovah sereta ngasika iring ke datai ari Iya, nama agi sifat ke deka nulung kitai besedia sereta ngereja utai ti betul maya Penusah ti Besai?

AYANKA PENGERINDU SERETA PEMANAH ATI

14. Nitihka Hebrew 13:​1-3, nama sifat ke patut diayanka orang Kristian sebedau pengerusak Jerusalem?

¹⁴ Lebuh Penusah ti Besai berengkah, kitai patut lebih agi ngayanka pengerindu ngagai pangan diri. Maya nya, kitai patut neladan orang Kristian ke diau ba Jerusalem enggau Judea. Sida seruran ngayanka pengerindu ngagai pangan diri. (Heb. 10:​32-34) Tang beberapa taun sebedau Jerusalem dirusakka, sida patut “rinduka pangan diri baka diri menyadi” sereta ‘rindu ngelaluka orang’ enggau mayuh agi.c (Bacha Hebrew 13:​1-3.) Kitai mega patut ngayanka pengerindu ngagai bala menyadi enggau lebih agi seraya kitai majak semak enggau pengujung dunya ti jai tu.

15. Nama kebuah orang Kristian bebansa Hebrew patut ngayanka pengerindu sereta pemanah ati pengudah sida ngerarika diri?

¹⁵ Bala soldadu Rome ngelulung nengeri Jerusalem lalu enda memukai ninggalka nengeri nya. Ketegal nya, orang Kristian ulih ngerarika diri, tang sida semina ulih mai mimit aja utai. (Mat. 24:​17, 18) Sida patut nulung pangan diri lebuh ba pejalai ngagai kawasan gunung. Lalu lebuh sida datai ba Pella, sida patut nulung pangan diri ngiga endur diau sereta kereja. Mayuh bala menyadi amat begunaka pemakai, gari, sereta endur diau. Lebuh bala menyadi sama bela nyukung pangan diri sereta bekunsika utai ti dikemisi sida, sida ulih nunjukka sifat pengerindu ti dalam ngagai pangan diri sereta rindu ngelaluka orang.—Tit. 3:14.

16. Baka ni kitai ulih ngayanka pengerindu ngagai bala menyadi ke begunaka tulung? (Peda mega gambar.)

¹⁶ Utai ke ulih dipelajarka kitai: Pengerindu meransang kitai nulung bala menyadi lebuh sida begunaka tulung. Ambika chunto, mayuh menyadi enggau gaga ati nulung bala menyadi ke ngerarika diri ari menua sida ketegal perang sereta bencana alam. Sida nyediaka utai ke diguna bala menyadi tu kena beridup, lalu meransang sida terus nyembah Jehovah. Siku menyadi indu ari Ukraine, ke patut ninggalka rumah iya ketegal perang, madahka: “Kami udah meda baka ni Jehovah ngena bala menyadi ngiring sereta nyaga kami. Sida udah ngelaluka kami lalu nulung kami enggau amat manah ba Ukraine, ba Hungary, sereta diatu ba Jerman.” Au, kitai gawa begulai enggau Jehovah lebuh kitai ngayanka pemanah ati ngagai bala menyadi sereta nyediaka utai ke diguna sida.—J-lam. 19:17; 2 Kor. 1:​3, 4.

17. Nama kebuah kitai patut ngayanka pengerindu sereta pemanah ati ngagai bala menyadi kitai ari diatu?

¹⁷ Maya Penusah ti Besai, kitai patut lebih agi nulung pangan diri ari ke digaga kitai diatu. (Hab. 3:​16-18) Diatu, Jehovah benung ngelatih kitai chara ngayanka pengerindu sereta pemanah ati. Dua iti sifat tu amat beguna ba maya ti tusah nya.

NAMA UTAI KE DEKA NYADI DUDI HARI?

18. Baka ni kitai ulih neladan orang Kristian ke ngerarika diri ari Jerusalem?

¹⁸ Orang Kristian ke ngasi sereta ngerarika diri ngagai kawasan gunung ulih selamat lebuh Jerusalem dirusakka. Taja pan sida patut ninggalka semua utai, tang Jehovah nyaga sida. Iya enda kala ninggalka sida. Nama ulih dipelajarka kitai ari teladan sida? Kitai enda nemu semua utai ke deka nyadi dudi hari. Tang kitai nemu jaku tangkan Jesus ke ngasuh kitai besedia deka ngasi. (Luk. 12:40) Kitai mega ulih nitihka utai ke dipelajar kitai ari surat Paul ngagai orang Kristian ke bebansa Hebrew. Pia mega, Jehovah Empu udah besemaya, Iya enda sekali-kali ninggalka kitai tauka ngelengkaka kitai. (Heb. 13:​5, 6) Nyadi, aram meh kitai bebendar nganti Perintah Petara, iya nya “nengeri ke tetap,” lalu ngasaika berekat ke deka dibai Perintah nya belama iya.—Mat. 25:34.