Ntụleghachi A Ga-eme n’Ụlọ Akwụkwọ Ije Ozi Ọchịchị Chineke

A ga-eji ọnụ zaa ajụjụ ndị na-esonụ n’Ụlọ Akwụkwọ Ije Ozi Ọchịchị Chineke n’izu ga-amalite na December 26, 2005. Onye nlekọta ụlọ akwụkwọ ga-eduzi ntụleghachi ga-ewe minit 30 dabere n’ihe ndị a tụlere n’ihe omume ndị e mere n’izu November 7 ruo December 26, 2005. [Ihe Ịrịba Ama: N’ebe ndị a na-enweghị ebe e zoro aka na ha ná ngwụsị ajụjụ ọ bụla, ọ ga-adị mkpa ka i mee nnyocha nke gị iji chọta azịza ha.—Lee akwụkwọ Ụlọ Akwụkwọ Ije Ozi, peeji nke 36-37.]

NKÀ OKWU

1. Gịnị ka anyị pụrụ ime iji hụ na ndụmọdụ anyị na-enye ‘dabeere n’ịhụnanya’? (Faịl. 9) [be-IB p. 266]

2. Olee ụzọ ndị anyị pụrụ isi ‘dụsie ọdụ ike site n’ozizi na-enye ezi ndụ’? (Taị. 1:9) [be-IB p. 267 para. 1-2]

3. Gịnị mere o ji dị mkpa ka anyị mee ka okwu anyị bụrụ nke na-agba ume, oleekwa otú anyị pụrụ isi mee nke a? [be-IB p. 268 para. 1-3, igbe]

4. Dị ka Mozis mere, olee otú anyị inyere ndị ọzọ aka icheta ihe Jehova mewooro ndị ya ga-esi mee ka e nwee obi ike? (Deut. 3:28; 31:1-8) [be-IB p. 268 para. 5–p. 269 para. 2]

5. N’ihi gịnị ka iji obi ụtọ na-ekwu banyere ihe ndị Jehova na-eme ugbu a na ihe ndị ọ ga-eme n’ọdịnihu ga-eji bụrụ ihe na-agba ume nye ndị na-ege anyị ntị? [be-IB p. 270-271]

IHE OMUME NKE 1

6. Olee otú anyị pụrụ isi gbaa ndị kwere ekwe ibe anyị ume? [w03-IB 5/15 p. 22 para. 5–p. 23 para. 2]

7. Olee ụdị inye ihe na-amasị Chineke? [w03-IB 6/1 p. 5 para. 2]

8. Olee otú mmadụ na-esi amụta ịhụ n’anya? [w03-IB 7/1 p. 4 para. 1; p. 5 para. 4]

9. Olee ụzọ ndị dị irè anyị pụrụ isi na-emere ndị ọzọ ihe ọma? (Gal. 6:9, 10) [w03-IB 7/15 p. 7 para. 2-3]

10. Kwuo ụkpụrụ nduzi atọ dabeere na Bible bụ́ ndị pụrụ inyere anyị aka ime mkpebi ndị amamihe dị na ha. [w03-IB 10/15 p. 4, 5]

ỌGỤGỤ BIBLE KWA IZU

11. Na Jehova ekweghị ka Devid rụọ ụlọ nsọ ahụ ọ̀ na-egosi na Jehova akwadoghị agha ndị ahụ Devid lụrụ? (1 Ihe 22:6-10)

12. N’ekpere Solomọn kpere mgbe ọ na-arara ụlọ nsọ ahụ nye, olee otú o si gosi na Jehova na-eleba anya, ọ bụghị nanị ná mkpa ndị ohu ya dị ka otu ìgwè kamakwa na ọ na-eleba anya ná mkpa onye nke ọ bụla na-atụ egwu ya? (2 Ihe 6:29, 30)

13. Olee ihe ndị bụ́ “mkpi” ahụ a kpọtụrụ aha ná 2 Ihe E Mere 11:15?

14. Ebe ọ bụ na Beasha malitere ịchị “n’afọ nke atọ nke Esa” ma chịa nanị afọ 24, olee otú anyị pụrụ isi mee ka nke a kwekọọ n’ihe e kwuru bụ́ na Beasha bịara “imegide Juda” “n’afọ nke iri atọ na isii nke Eze Esa”? (1 Eze 15:33; 2 Ihe 16:1)

15. Olee otú 2 Ihe E Mere 20:22, 23 si kọwaa nnọọ n’ụzọ doro anya, ihe gaje ime ụwa Setan?

Ị̀ Na-eji Mpempe Akwụkwọ Ịkpọ Òkù Maka Nzukọ Ọgbakọ Eme Ihe?

Otu ụbọchị, otu nwata nwoke dị afọ 11 hụrụ mpempe akwụkwọ e ji kpọsaa okwu ihu ọha a ga-ekwu, nke isiokwu ya bụ banyere hel. O mesịrị kọwaa, sị: “Nke a kpaliri mmasị m nke ukwuu, ebe ọ bụ na o yiri ka m na-emekarị ihe na-ezighị ezi. Nke a na-emekwa ka m na-echegbukarị onwe m banyere ịga na hel nke na-ere ọkụ mgbe m nwụrụ.” Nwata nwoke ahụ gara gere okwu ihu ọha ahụ. E mere ya baptizim ihe dị ka otu afọ mgbe nke ahụ gasịrị, bụ́ mgbe a mụụrụla ya Bible ruo ọtụtụ ugboro. Otú ahụ ka Karl Klein, bụ́ onye mesịrị jee ozi ọtụtụ afọ dị ka onye so n’Òtù Na-achị Isi nke Ndịàmà Jehova, si malite ozi ya dị ka Onye Kraịst. Ihe mere ihe a nile ji malitedị amalite bụ mpempe akwụkwọ ịkpọ òkù maka nzukọ ọgbakọ ahụ ọ hụrụ.

Mpempe akwụkwọ ịkpọ òkù a ka nọgidere bụrụ ngwá ọrụ dị irè e ji agba àmà taa. Ọtụtụ ndị nkwusa achọpụtawo na ha inye ya mmadụ bụ ụzọ magburu onwe ya isi kọwaa onwe ha ma malite mkparịta ụka. Ndị nne na nna pụrụ ime ka ụmụaka ha na-ekere òkè n’ozi site n’ịgwa ha ka ha nye ya onye ha bịara n’ụlọ ya izi ozi ọma. Ndị nkwusa bụ́ ndị na-eji akwụkwọ ozi agba àmà pụrụ iji ya mee ka a mara banyere nzukọ ọgbakọ site n’itinyekọta ya na akwụkwọ ozi ha na-ede. N’eziokwu, inye ndị ị na-amụrụ Bible na ndị ọzọ nwere mmasị mpempe akwụkwọ ịkpọ òkù bụkwa ụzọ dị mfe isi kpọọ ha òkù ịbịa nzukọ ọgbakọ anyị.

N’ihu mpempe akwụkwọ a, a kọwara nke ọ bụla n’ime nzukọ ọgbakọ n’ụzọ dị nkenke. Ebe ọ bụ na e deghị adres Ụlọ Nzukọ Alaeze na oge ndị e ji enwe nzukọ na ya, ọ ga-adị mkpa ka i dee ha mgbe ọ bụla ị na-enye ya mmadụ. E nwere ebe ị ga-ede ha ma ọ bụrụ na ị chọrọ. Ị̀ na-eji mpempe akwụkwọ a eme ihe nke ọma n’ozi gị?