Chị Ihi Ju Angịkịla

1. Ịyẹ tị́ du kọ kaa há angịnyị kị ka chị ihi jwaa? (Etu 22:1)

Ọ KAA háng ụka kị chị ihi jung? Ọ la gbagbịla nyori ọ háng. Ihi ojuju ri ọbaba ọhẹ ọlẹ ká angịnyị ehe la. Ahị kaa chị ọkẹkẹnị ụka ká angịkịla á chị ihi juhi. Lẹ ọ pwoku nyọlẹ ká ịBayịbụụ ya nyori, ‘ọ-ka chị ihi ju ọngịnyị hagụ okpoko onyoowuru lee okpoko ịgọm’!—Wa Etu 22:1.

2-3. Ịyẹ tị́ du kọọ lujwo nyọka chị ihi ju angịkịla ụka ọhẹ? Ẹlịyẹ ahị tị́ wẹẹ ka kụ ẹhị yẹ ẹ-ẹpwụ nya ang ọjẹ́jẹ ọlẹ?

² Ụka ọhẹ, ọ kaa lujwo nyọka chị ihi ju angịkịla. Ang ọhẹ ọlẹ ko du kọ kaa lịnyị ri, ahị kaa yẹ abwẹla ịtịpyọ nya angịkịla. Myị́myị́ iru nya angịnyị odehe alẹ á myị-ị̀ chị ihi ju angịkịla ka. Ahị tị ka datị pyii lẹ. Ịyẹ tị́ du? Chajị iJihova tịtọ kahị ka chị ihi ju “angịnyị ehe wuu.”—1 Pit. 2:17.

³ Ẹ-ẹpwụ nya ang ọjẹ́jẹ ọlẹ, ahị ka kụ ẹhị yẹ etu nyọka chị ihi ju angịkịla bala abwọlẹ kahị ka bwu họ ịnyị ẹ-ẹga nya (1) alugbiyegu nyahị, (2) aanahị ịlọjịra-jịra, bala (3) angịkịla ịlẹ kị kaa gbịgba ha iJihova ka. Ahị ka ya ẹla gụgụụgụ u-uhye nya abwọlẹ kahị ka bwu chị ihi ju angịkịla ẹ-ẹpwụ nya iwe-ahụrụ ilujwo.

ỊYẸ À TỊ́ RI ETU NYỌKA CHỊ IHI JU ANGỊKỊLA?

4. Ịyẹ à tị́ ri etu nyọka chị ihi ju angịkịla?

⁴ Ányị a tị́ ka bwu ya etu nya ihi ojuju? Ihi ojuju ri abwọlẹ kahị kaa kụ irya u-uhye nya angịnyị bala ụgbẹyị ọlẹ kahị kaa bwu kpaa ịnyịnyị. Ụka kahị yẹ nyori ọngịnyị la abwẹla ịnyịịla, lee ọ họ ang ịtụka-ịtụka ịhyẹ, lee ọ-la ọngịrị u-uhye nyahị, ahị kaa kpa angị ịlịnyị ụ-ụgbẹyị ọlẹ kọ ka mẹjẹ nyori ahị chị ihi jwaa. Ọ tị baba kahị ka họ ịnyị bwu ọkịlẹtụ nyahị.—Mat. 15:8.

5. Ịyẹ à tị́ ka guhi gbịla nyọka chị ihi ju angịkịla?

⁵ IJihova tịtọ kahị ka chị ihi ju angịkịla. Ọ-chụ pwokwita, ọ byihi nyị ju ihi nya “alegbeju nya ịgọmenti.” (Rom. 13:​1, 7) Angịhyẹ tị ka ya myị́ nyori, “M̀ nwụlanọ nyọka ju ihi nya angịnyị, kori kị kịnyaa la ọ-họ ang ọnyịịla.” Irya ọkụkụ ọlịịwẹ la kpakpa? Ehe. Ahị anchẹ nya iJihova jẹ́ nyori a-abwẹla nya angịnyị kem à du kahị kaa jwaa ihi ka. Ihi ojuju nyahị kpụnịrọ ang ọkịla ọlẹ kọ gụ ọọwa wẹẹ, kọ ri ọháha ọlẹ kahị la ẹ-ẹga nya iJihova bala ọ-tịtọ nyọka họ ẹla kpọọ ịpyọ.—Joch. 4:14; 1 Pit. 3:15.

6. Ọ chịkpẹẹ nyọka chị ihi ju ọngọlẹ kọ myị jung ihi ka? Ịyẹ tị́ du kahị ya ịnyị? (Yẹ ifoto ọla ẹbẹ nya ọgbanyẹ.)

⁶ Angịhyẹ ka kụ irya myị́ nyori, ‘Ọ chịkpẹẹ nyọka ju ihi nya ọngọlẹ kọ myị chị ihi jung ahụ ka?’ Ee. Kụ ẹhị yẹ ọ-chụ pwokwita ịhyẹ wẹẹ. Adịrahụ ịSọlụ ya ẹla hu ẹpẹpẹ ju iJonatan ọnyị nyamwụ ị-ịlahị nya angịkịla. (1 Sam. 20:​30-34) Kpọkpọọkpọ, iJonatan kịnyaa la o-ju adamwụ ihi bala ọ-bọọ ka ẹwụ gbee ka da ahyẹẹnụ ọlẹ ká ịSọlụ gbu. (Ehe. 20:12; 2 Sam. 1:23) Elayị Olegbeju Okiliya chị ẹla ba ịHana nyori nyị nwa ere juwa ya. (1 Sam. 1:​12-14) Tị wẹẹ, ịHana ya ẹla tọọ lihi-ihi, nanana nyori ọng myị́ ọng Isirẹlụ jẹ́ nyori Elayị nyị́ myị nwụ anyị nyamwụ ịtịpyọ rịrị jaabwọ kọ chịla kọ ka họ lala adaa bala ọngọkiliya ka. (1 Sam. 1:​15-18; 2:​22-24) Ịnyịnyị, alẹng ịhyẹ bwu Atẹnsị do ọlẹrụ ịPọlụ ido, juwa wụrwọọ nya “ọngọ jẹ́ ịngịngịhyẹ ka.” (Ụkụr. 17:18) Nanana nyori ọ lịnyị, ịPọlụ ya ẹla lihi-ihi taa. (Ụkụr. 17:22) Ọ-chụ pwokwita ịwẹ mẹjẹ nyori ọháha okpori-kpori ẹ-ẹga nya iJihova bala o-juhi nyọka họ ẹla wọọ ẹjẹ, ka guhi gbịla nyọka chị ihi ju angịkịla ụka wuu tụ́ ụka kọ dọmwụ lujwo wẹwẹ. Ahị ya ẹla u-uhye nya angịlẹ kahị ka chị ihi ju bala ang odudu kahị ka họ ịnyị wẹẹ.

CHỊ IHI JU ALUGBIYEGU NYANG

7. Ịyẹ tị́ du kọ ka lujwo hahị nyọka chị ihi ju alugbiyegu nyahị myị́?

⁷ Ang odudu kọ kaa lujwo. Ahị kaa bịrị ụka bala alugbiyegu nyahị yẹẹyẹẹ. Ọọwa du kahị kaa jẹ́ abwẹla ịnyịịla bala ịtịpyọ nyaa. Angịhyẹ tị ka la ẹdụrụ ọlẹ kọ ka lujwo hahị nyọka kpahị jwaa myị́, lee ị ka la uko ọchịchị kpoye-kpoye ịnyịnyị myị́. Alugbiyegu nyahị ịkịla tị dọmwụ ka họ ẹla lee o-ya ẹla ọlẹ kọ ka jụ́ụhị myị́. Ọkọkọ ká alugbiyegu ịhyẹ ka kụ́ lawụlẹ la okpunyi bala ọkẹkẹnị, ị kaa hu ẹpẹpẹ ju awụlẹ du kọ kaa ju ọmwụ nya o-wo lawụlẹ ka. Ọ tị du ká ọ-yẹ jula awụlẹ ọlam-ọlam kaa ji ka ịnyịnyị. Ahị ka jẹ́-ẹ chụ ugbiyegu kaka pwoku ịnyịrọ nya ọngịnyị. Ẹdụrụ ọhẹ ka du ká ịnyịrọ nya ọngịnyị ka họ ụkụrwọ jaabwọ kọ chịla ka myị́. Ụ-ụgbẹyị ọlịnyị-ịnyị, kori ká alugbiyegu á chị ihi ju awụlẹ ka, ọ ka du kị ka jẹ́-ẹ họ ụkụrwọ lawụlẹ ọlam-ọlam ka myị́. Ma jaabwọ ká ẹdụrụ lụmẹ-lụmẹ tị la utoji lẹ, ọ chịkpẹẹ ká alugbiyegu ka jẹ́ jaabwọ kị ka bwu chị ihi ju awụlẹ ịnyịnyị myị́.

8. Ịyẹ tị́ du kọ baba nyọka chị ihi ju alugbiyegu nyahị? (1 iTimoti 5:​4, 8)

⁸ Ịyẹ tị́ du kahị ka chị ihi jwaa? (Wa 1 iTimoti 5:​4, 8.) Ẹ-ẹpwụ nya ileta ọhọhẹ ọlẹ ká ịPọlụ da du kịla iTimoti, o ya ẹla u-uhye nya abwọlẹ ká alugbiyegu ka kpahị ju awụlẹ. Ọ ya nyori ang ọkpọnchị ọlẹ kọ du kahị ka chị ihi ju alugbiyegu nyahị ịnyị ri ọchajị nya ẹla nya Ohe ọhọhọ ọkọkọ nyori ahị tị́ ka họ ányị wẹẹ. Ọọwa ri ahị ka họ ịnyị chajị nya ọháha ọlẹ kahị la ẹ-ẹga nya iJihova bala ọ-yọọ lala ụpa nya ịgba ọgbagba nyahị ịnyịnyị. IJihova à ya ugbiyegu yeji lẹ. (Efe. 2:19; 3:​14, 15) Lẹ ụka kahị chị ihi ju alugbiyegu nyahị, iJihova ahị wẹẹ chị ihi ju ịnyịlẹhị lẹ, chajị ọwa à ri ọngọlẹ kọ dọmwụ nya ugbiyegu lẹ. Ọwẹ ri ẹlẹhẹ ọkpọnchị ọlẹ kọ du kahị ka chị ihi ju alugbiyegu nyahị!

9. Ányị ahụ bala ọrụ à tị́ ka bwu chị ihi ju awụlẹ? (Yẹ ifoto ịnyịnyị.)

⁹ Jaabwọ kahị ka bwu chị ihi jwaa. Ọrụ-ahụ ka chị ihi ju ahụ nyamwụ bwula ọ-mẹjẹ nyori ọ họ́ọ yẹẹyẹẹ ụka kị juwa ẹ-ẹga nya angịkịla bala ụka kị ji ụbwaa. (Etu 31:28; 1 Pit. 3:7) Ọ́ ka nyoo enyiri, chị oyoyi jwoo lee ọ-họ kọ ka yẹ ịlọmwụ lala ọngọ ju apyobwuna ka lẹ ka. Ọọnahị ọlẹng ọhẹ ká ẹnyị nyamwụ ri Ariel,a kọ kụ Argentina yẹkẹẹ: “Ahụ nyam kaa ya ẹla ọlẹ kọ ka jụ́m ụka ọhẹ ọọlajị nya ẹdụrụ nyamwụ. Ụka kọ lịnyị, m̀ kaa maga nyọka kpịtịya nyori ẹ-ẹla ọla irya nyamwụ à wẹ kọ ya ịlẹhị ka. M̀ tịị kụ irya ju ẹla ọlụpwụ nya 1 Ala ịKọrịntị 13:5 ịnyịnyị. Ọọwa kaa dam ụbwọ nyọka ya ẹla tọọ lihi-ihi ọkọkọ nyọka ya ẹla la agbama-agbama.” (Etu 19:11) Ahụ tị kaa chị ihi ju ọrụmwụ ụka kọ ya ẹla ọnyịịla nyamwụ ẹ-ẹga nya angịkịla. (Efe. 5:33) Ọ ka cheji ba hi ọ-ka kpọọ abyị la ọngịrị-ọngịrị, chị ụmwara ọlẹ kọ ka hu ẹpẹpẹ ju ọrụmwụ lee ọ-dọmwụ doo ido. Ọ baba kọ ka jẹ́ nyori abwẹla ịlịịwẹ lala ega ọchịchị ọlẹ kọ ka jẹ́-ẹ bịrị awụlẹ oyeye nyaa myị́. (Etu 14:1) Ọọnahị ọnyang ọhẹ bwu Italy ká ọrụmwụ la akama nya uko ọ-chị kpoye-kpoye yẹkẹẹ: “Ụka ọhẹ, ọ lam lala o-ri ayịbam nyị ja họ kpoye ẹ-ẹga nya iwe-ahụrụ nyamwụ ọwẹ. Lụka ọkpẹkpẹ, ẹla oyaya nyam bala abwọlẹ kam kaa bwu kpẹhị yọọ mẹjẹ nyori ḿ chị ihi jwoo ka. Ma, nyọlẹ kam dọmwụ nyọka yẹ jula angịlẹ kị kaa ya ẹla lihi-ihi ta angịkịla, ọọwa dam ụbwọ nyọka chị ihi ju ayịbam gụ olene.”

10. Ányị anjwo ikolobya bala ịyẹẹnọ à tị́ ka bwu mẹjẹ nyori ị chị ihi ju adaa bala ịnaa?

¹⁰ Anjwo ikolobya bala ịyẹẹnọ, anụ ju ihi nya ehile ịlẹ ká adanụ bala ịnanụ da hanụ ugbiyegu. (Efe. 6:​1-3) Anụ ya ẹla taa lihi-ihi. (Ehe. 21:17) Ụka ká adang bala ịnang á tị nwà ka ri angịgbahị lẹ, à ka chị ihi jwaa bwula ọ-daa ụbwọ ẹ-ẹga kọ baba. Maga nyịlẹhị-ịlẹhị nyọka kpahị jwaa. Kụ ẹhị yẹ ọ-chụ pwokwita nya María, ọlẹ ká adamwụ á ri Olibeenu nya iJihova ka wẹẹ. Ụka ọlẹ ká adamwụ jụ́ ẹdụrụ, ọ họ kọ ka lujwo ha María nyọka kpẹhị rịrọọ chajị nyọlẹ ká adamwụ kaa kpọọ ụ-ụgbẹyị ọtịpyọ. Ọ yẹkẹẹ: “M̀ raabwọ kám ka jẹ́-ẹ chị ihi ju adam bwu ọkịlẹtụ nyam. M̀ kụ irya nyori kori ká iJihova á ya am nyị chị ihi ju adam bala ịnam, aalẹ ọ ka jẹ́-ẹ ya ọngịrị ọlẹ kam baba nyọka họ ịnyị ham myị́. Nyọlẹ kọ nọ pyịnyẹng, m̀ wẹ ka jẹ́ nyori ọ baba kam ka chị ihi ju adam kori kọ dọmwụ yẹ abwẹla nyamwụ da ka wẹwẹ.” Kori kahị chị ihi ju alugbiyegu nyahị tụ́ ụka kọ lujwo wẹwẹ, ahị ka mẹjẹ nyori ahị ju ihi nya iJihova, ọngọlẹ kọ ya ugbiyegu yeji.

CHỊ IHI JU AANAHỊ ỊLỌJỊRA-JỊRA

11. Ịyẹ tị́ du kọ ka lujwo nyọka chị ihi ju aanahị ịlọjịra-jịra myị́?

¹¹ Ang odudu kọ kaa lujwo. Aanahị ịlọjịra-jịra kaa maga nyịlẹhị-ịlẹhị nyọka kpa ẹla ọla ịBayịbụụ họ ụkụrwọ, ma ụka ọhẹ, ị ka kpahị ụ-ụgbẹyị ọtịpyọ, kpẹhị ọtịpyọ yẹhị lee ọ-họ ẹla ọkịla ọlẹ kọ ka wụ́ụhị ẹjẹ myị́. Kori ká ọọnahị ọhẹ á họhị ‘ẹla o-hi ọnụ,’ ọ ka lahị ujwo nyọka chị ihi jwoo myị́. (Kol. 3:13) Ẹlịyẹ à tị́ ka jẹ́-ẹ dahị ụbwọ nyọka bọhụ?

12. Ịyẹ tị́ du kọ baba nyọka chị ihi ju aanahị ịlọjịra-jịra? (2 iPita 2:​9-12)

¹² Ịyẹ tị́ du kahị ka chị ihi jwaa? (Wa 2 iPita 2:​9-12.) Ẹ-ẹpwụ nya ileta oheeye ọlẹ ká iPita da, ọ ya nyori angịhyẹ ọọjịra-jịra lụka ọwẹ nyị juwa ya ẹla onyobyi rụ́ “angị la ihi-ihi,” kị ri angịgbahị nya ọjịra-jịra. Ányị alegu-ẹrụ ịla ọmyịmyị ịlẹ kị juwa yẹ angịịwa à tị́ họ? Ị́ ya ẹla ọtịpyọ ọhẹ-lọhẹ rụ́ angịwẹ kpong-kpong ka, ọọlajị nya ihi nya iJihova ojuju. Kụ irya ju ẹlẹwẹ wẹẹ! Alegu-ẹrụ ịlẹ kị la kpẹẹkpẹẹ á myị ya ẹla ọtịpyọ u-uhye nya angị la egbeju-ọngịrị ịwẹ ka. Ọkọkọ nyọọwa, ị tụụbwọ hi ẹlẹwẹ ju iJihova ụ-ụbwọ nyọka laa eje bala o-yalibyi laa. (Rom. 14:​10-12; kụ ẹhị yẹ iJudu 9.) Ahị ka jẹ́-ẹ jẹ́ ang bwu ẹga nya alegu-ẹrụ. Kori kahị chịla nyọka hu ẹpẹpẹ ju angị kaa tụ́ụhị pyịpyị ka aalẹ, áhị ka hu ẹpẹpẹ ju aanahị ịlọjịra-jịra ka gụ dọmwụ wẹẹ. Ọkọkọ nyọọwa, ahị ka ‘kpa ọkịlẹtụ nyahị wuu’ chị ihi jwaa. (Rom. 12:10) Ọ-họ ịnyị mẹjẹ nyori ahị chị ihi ju iJihova.

13-14. Ányị ahị tị́ ka bwu mẹjẹ nyori ahị chị ihi ju aanahị ịlọjịra-jịra? Ya ọ-chụ pwokwita ịhyẹ wẹẹ. (Yẹ ifoto ịnyịnyị.)

¹³ Jaabwọ kahị ka bwu chị ihi jwaa. Angịgbahị nya ọjịra-jịra, anụ mẹ ang jẹ angịkịla ẹ-ẹpwụ nya ọháha. (Filim. 8, 9) Kori ka tị baba nyọka nwụ ọngịnyị rịrị, họ ịnyị la ọdụmwọọ, a họọ ẹ-ẹpwụ nya agbama ojuju ka. Aanahị anyang, anụ ka jẹ́-ẹ da alọjịra-jịra ụbwọ nyọka chị ihi ju awụlẹ bwula o-cheji ba hi ẹla onyobyi o-ya rụ́ angịkịla lee ọ-kpa angịnyị kụ. (Tay. 2:​3-5) Ahị wuu ka jẹ́-ẹ mẹjẹ nyori ahị chị ihi ju angịgbahị nya ọjịra-jịra bwula ọ-chẹkpẹ jwaa bala o-jaa obe ọhọhọ chajị nya ụkụrwọ ọtụka ọlẹ kị kaa họ nyọka mẹ ang jẹ ọọjịra-jịra, kpịlahị ẹ-ẹpwụ nya ẹrụ ọnyịịla ọ-kpa pyẹ, bala ọ-da angịlẹ kị hu ẹta-ẹdịyẹ nyọka “họ ang onyobyi” ụbwọ.—Gal. 6:1; 1 Tim. 5:17.

¹⁴ Ọọnahị ọnyang ọhẹ ká ẹnyị nyamwụ ri Rocío ya nyori nyị lujwo ha ọwa ụka ọhẹ nyọka ju ihi nya ọngọgbahị nya ọjịra-jịra ọlẹ kọ mẹ ẹla jọ́ọ. Ọ yẹkẹẹ: “Ẹla ọọwa wụ́m ẹjẹ chajị ọ lam lala o-ri ọ́ ya ẹla tam ụ-ụgbẹyị ọlẹ kọ pwoku ka. M̀ kaa ya ẹla ọtịpyọ rwọọ ẹ-ẹpwa. Nanana nyori m̀ họ ká angịkịla ka jẹ́ ẹla ọlẹpwụ nyam ka, ma m̀ kaa kụ irya nyori ọ́ kpahị jum ịlẹhị ka. Lẹ, ḿ kpa ẹla ọọwa họ ụkụrwọ ka.” Ẹlịyẹ dọọ ụbwọ? Ọ ya jehi yẹkẹẹ: “Lụka nya ịBayịbụụ ọjẹ́jẹ nyịlọm, m̀ wa ụpwụ nya 1 Ala ịTẹsalonika 5:​12, 13. M̀ wẹ ka yẹ nyori ḿ chị ihi ju ọọnahị ọwẹ ka, ọọwa olegu à dọmwụ nyọka lam eje lẹlẹ. M̀ raabwọ ha iJihova bala ọ-mwahị nya ẹla ka ẹpwụ nya apwụ nyahị nyọka jẹ́ ẹla ịlẹ kpangga kị ka jẹ́-ẹ dam ụbwọ nwụ abwẹla nyam rịrị. Ọọwa du kam yẹ nyori ẹ-ẹla ọtịpyọ ọọnahị ọwẹ à họ ẹ-ẹga nyam ka, ma am à wẹẹ hu ịlọm hwaa lẹ. M̀ jẹ́ lẹẹlẹẹ nyori m̀ baba nyọka kpịlọm keji ene kám ka jẹ́-ẹ chị ihi ju angịkịla. M̀ wẹẹ kịnyaa la ọ-maga nyịlẹhị-ịlẹhị nyọka chị ihi ju angịkịla gụ olene wẹẹ, m tị jẹ́ nyori aga ọmama nyam kpụ iJihova ịpyọ.”

CHỊ IHI JU ANGỊLẸ KỊ KAA GBỊGBA HA IJIHOVA KA

15. Ịyẹ tị́ du kọ ka lujwo hahị myị́ nyọka chị ihi ju angịlẹ kị kaa gbịgba ha iJihova ka?

¹⁵ Ang odudu kọ kaa lujwo. Ụka lụmẹ-lụmẹ, ahị kaa tọ angịlẹ ká ẹla nya Ohe lee ẹla ọla ịBayịbụụ kpaa ịpyọ ka, ụka kahị ja kpa ẹrụ ọnyịịla pyẹ. (Efe. 4:18) Angịhyẹ kaa pwa gbang-gbang nyọka wo ẹla nyahị ọọlajị nya ẹla ọlẹ kị mẹjáa bwu eji-eji. Angịmẹjẹ ịla ube-ụpwụ, alegbeju nyahị ọ-ọlụkụrwọ, tụ́ anyị ịla ube-ụpwụ bala ala ọlụkụrwọ nyahị ịhyẹ ka mẹjẹ nyori ẹla nyahị wáa ẹjẹ ịnyịnyị myị́. Ọ ka jụ́ụhị abwọ nyọka ju ihi nya angị ịlịnyị lee ọ-kpaa la ọ-dụmwọọ myị́.

16. Ịyẹ tị́ du kọ baba nyọka chị ihi ju angịlẹ kịị gbịgba ha iJihova lẹka? (1 iPita 2:12; 3:15)

¹⁶ Ịyẹ tị́ du kahị ka chị ihi jwaa? Kpịtịya nyori iJihova kaa yẹ abwọlẹ kahị wẹẹ kpa angịlẹ kị wẹ ka gbịgba họọ lẹ ka. Ọlẹrụ iPita kpụ Angịnyị nya ịKịrayịsị ịtịya nyori abwẹla ọnyịịla nyaa nyị ka gu angịhyẹ gbịla nyọka “gwogbo ha Ohe Oluhye” myị́. Chajị nyọọwa, o jwaa ọhụ nyọka ya ọmyịmyị nyaa dodehe la ‘olegu ọdụmwọ bala olegu nya ihi ojuju.’ (Wa 1 iPita 2:12; 3:15.) Kori ká Angịnyị nya ịKịrayịsị-ị́ ka ya ẹla u-uhye nya ọmyịmyị nyaa ẹ-ẹga oleje lee ẹga myị́ ẹga wẹwẹ, ị baba nyọka chị ihi ju angịkịla pyii. IJihova kaa yẹhị bala ọ-ke ụrụ wo ẹla ọlẹ kahị kaa ya bala abwọlẹ kahị bwu yoo. Ọwẹ ri ang ọkpọnchị ọhẹ ọlẹ ko du kahị ka chị ihi ju angịlẹ kị kaa gbịgba ha iJihova ka!

17. Ányị ahị tị́ ka bwu chị ihi ju angịlẹ kị kaa gbịgba ha iJihova ka?

¹⁷ Jaabwọ kahị ka bwu chị ihi jwaa. Ụka kahị juwa kpa ẹrụ ọnyịịla pyẹ, áhị ka yẹhị da angịnyị bwee chajị nyori ị́ jẹ́ ẹla ọla ịBayịbụụ gbuu ka lẹ ka. Ọkọkọ nyọọwa, ahị ka yaa lala angịlẹ kị ju apyobwuna ẹ-ẹga nya Ohe bala ọ-dọmwụ há gụ́ụhị. (Hag. 2:7; Filip. 2:3) Kori ká ọngịnyị á dong ido ọọlajị nya ọmyịmyị nyang, a họọ kwiwa bwula ọ-kpa ijeehi ya ẹla ọlẹ kọ ka hu ẹpẹpẹ jwoo ka. (1 Pit. 2:23) Kori ká ẹla o-pwoku ka ọhẹ á tị gụ́ng ya, yụbwọ beji ahyaahị. Ányị a tị́ ka bwu chị ihi ju angịkịla ọ-ọlụkụrwọ? Ri ọngọ họ ụkụrwọ kpịra-kpịra, ká maga nyọka yẹ ang ọnyịịla u-uhye nya angịlẹ káa họ ụkụrwọ ha bala ọ-họ ụkụrwọ bala. (Tay. 2:​9, 10) Kori ká ri ọngọ họ ụkụrwọ kpịra-kpịra bala ọ-kaa ya ẹlịlẹhị, ọhẹka ẹla nyang ka há angịnyị lee ọ́ ka háa ụka wuu ka myị́, ma ẹla nyang tị ka kpụ iJihova ịpyọ pyii lẹ.—Kol. 3:​22, 23.

18. Ịyẹ tị́ du kọ há kahị ka kịnyaa la ọ-chị ihi ju angịkịla?

¹⁸ Ahị la ang ịnyịịla lụmẹ-lụmẹ ịlẹ kị du kahị ka chị ihi ju angịkịla! Ahị yẹ nyori ụka kahị chị ihi ju alugbiyegu nyahị, ahị wẹẹ chị ihi ju iJihova ko ri Olegbeju nya ugbiyegu wuu. Ịnyịnyị, ụka kahị chị ihi ju aanahị ịlọjịra-jịra, ahị wẹẹ chị ihi ju Adahị olepwoohe. Ụka kahị tị chị ihi ju angịlẹ kịị gbịgba ha iJihova ka, ahị wẹẹ wụrụ ụgbẹyị da kị ka gwogbo ha Ohe ọtụka nyahị ẹnẹhẹ wẹẹ. Kori ká angịhyẹ á dọmwụ myị chị ihi juhi tịrẹkpẹ ka wẹwẹ, ọ há kahị ka kịnyaa la ọ-chị ihi jwaa. Ịyẹ tị́ du? Chajị iJihova ka wahị kụrụụhị. Ọ myọnụ yẹkẹẹ: ‘Angịlẹ kị myị ju ihi nyam, m ka ya ihi haa.’—1 Sam. 2:30.