Da Angịlẹ kị Tịtọ Nyọka Jẹ́ Ẹla nya Ohe Ụbwọ Ahyaahị

1. Ányị angịnyị à tị́ ka họ ẹ-ẹga nya oja ọnyịịla myị́? (Ụkụrwọ nya Alẹrụ 13:​47, 48; 16:​14, 15)

ỤMỤMẸ nya angịnyị la oyi ọhọhẹ ye ẹlịlẹhị myị ụka kị wo ẹla nya Angịnyị nya ịKịrayịsị bwaa. (Wa Ụkụrwọ nya Alẹrụ 13:​47, 48; 16:​14, 15.) Ịnyịnyị alẹ, angịhyẹ kaa chị ọkẹkẹnị ụka ọhọhẹ ọlẹ kị wo oja ọnyịịla. Angịlẹ kị tị dọmwụ myị ke ụrụ wo ẹla nya Ịpyị-Adịrahụ lụka nya ọgbanyẹ ka, ka wụrụ ọkịlẹtụ nyaa da kpụ ị ka ye myị ị-ịlahị wẹẹ. Ịyẹ ahị tị́ ka họ ụka kahị yẹ angịlẹ kị “chịla-chịla” ụka kahị ja kpa ẹrụ ọnyịịla pyẹ?

2. Ụgbẹyị oyina ụkụrwọ nya ọ-họ ká angịnyị ka ri angịjụgbẹyị à tị́ lala ụkụrwọ nya ọlẹrụ?

² Ahị ka jẹ́-ẹ chụ ụkụrwọ nya ọ-họ ká angịnyị ka ri angịjụgbẹyị kaka pwoku ụkụrwọ nya ọngọ wu ẹrụ myị́. Ọ chịkpẹẹ ká ang ịla ẹrụ nyamwụ ịhyẹ ka há ene nya ịkịla. Ụka ọlịnyị, ọlẹrụ ọwẹ ka baba nyọka du ang ịịwa lee ọ-chaa ahyaahị. Ma, ọ tị myị́myị́ ka juwa kpahị ju ịkịla ịlẹ kị há lẹka. Ịnyịnyị-ịnyịnyị, ụka kahị gbachị ọngịnyị ọlẹ kọ ye ẹla nyahị myị, ahị kaa tịtọ nyọka dọọ ụbwọ kọ ka ri ọngọjụgbẹyị nya ịKịrayịsị ahyaahị. Ẹ-ẹga nya angịlẹ kị tị nwụlanọ lẹka, ahị kaa kịnyaa la ọ-maga nyọka daa ụbwọ kị ka yẹ ang odudu kị baba nyọka jẹ́ Ohe bala ẹla ọla ịBayịbụụ ịnyịnyị. (Jọn. 4:​35, 36) Ụka kahị jẹ́ kori ká ọngịnyị á nwụlanọ lee ọ́ nwụlanọ lẹka, ọọwa kaa du kahị kaa jẹ́ ụgbẹyị ọlẹ kọ há gụ́ nyọka bwu da ọngọọwa ụbwọ. Ahị kụ ẹhị yẹ abwọlẹ kahị ka ya ẹla lụka nya ọgbanyẹ ọlẹ kahị tọ ọngịnyị, nyọka da ọngọlẹ kọ nwụlanọ nyọka ke ụrụ ụbwọ wẹẹ. Ahị ka kụ ẹhị yẹ abwọlẹ kahị ka bwu da angịlịnyị ụbwọ nyọka nwà ka ịlahị ịnyịnyị.

ỤKA KÁ ANGỊNYỊ Á NWỤLANỌ NYỌKA KE ỤRỤ

3. Ẹlịyẹ ahị tị́ ka họ kori kahị tọ angịlẹ ká ẹla nya Ohe kpaa ịpyọ ụka kahị ja kpa ẹrụ ọnyịịla pyẹ? (1 Ala ịKọrịntị 9:26)

³ Kori kahị tọ angịlẹ ká ẹla nya Ohe kpaa ịpyọ ụka kahị ja ya ẹla nya Ohe, ahị tịtọ nyọka daa ụbwọ kị ka dọmwụ nya ọ-jẹdịyẹ ụ-ụgbẹyị nya ọhịhị ahyaahị. Ụka ọlịnyị, ahị maga kahị ya ẹla nya ịBayịbụụ ọjẹ́jẹ taa bala ọ-wụraa wẹ ọjịra-jịra lụka ọhọhẹ ọlẹ kahị wẹẹ ya ẹla balaa.—Wa 1 Ala ịKọrịntị 9:26.

4. Ja oja nya ọngọhẹ ọlẹ kọ nwụlanọ nya ịBayịbụụ ọjẹ́jẹ ahyaahị wẹẹ.

⁴ Ya ẹla nya ịBayịbụụ ọjẹ́jẹ. Angịhyẹ ịlẹ kahị ya ẹla bala kaa nwụlanọ nya ịBayịbụụ ọjẹ́jẹ ahyaahị. Ọ-chụ pwokwita, ẹnụ nya ịTọsdee ọhẹ, ọyẹẹnọ ọhẹ ịị Canada wẹ ẹga kahị ya apwụ guru kaka hu ụpwụ nya Chị Ọkẹkẹnị Gboyi Myị́ Oyi! ochiche. Ọọnahị ọnyang ọlẹ kọ juwa wụlẹ ya joo nyori nyị kaa kpa ụpwụ ọwẹ mẹ ịBayịbụụ jẹ ọngịnyị la ọ-nwụ uri ka. Ẹla ọọwa kpụ ọyẹẹnọ ọọwa ịpyọ kpụ ọwa bala ọọnahị ya ịnọmba nya ifon nyaa ha awụlẹ. Nyọlẹ kọ nọ chẹẹ ahyẹẹnụ ọwọwẹ, ọyẹẹnọ ọọwa da ụpwụ bwu ifon du wẹ ọọnahị ka tọọ wo nya ụka ọlẹ kị ka jẹ́ ang. Nyọlẹ ká ọọnahị byoo ọwa nyị ka ka ẹga nyamwụ la ọmyịmyị nya epwihi myị́, ọyẹẹnọ ọọwa tọ wo yẹkẹẹ: “À ka wẹ ijuju myị́? M̀ ka hi ụbwọ.” Ị jẹ́ ang ẹnụ nya ịFụrayịdee ọọwa. Ọyẹẹnọ ọọwa wẹ ọjịra-jịra la ọmyịmyị nya epwihi ọwẹ bala ọ-kịnyaa la ọ-nwa kịlahị la agaga.

5. Ịyẹ à tị́ ka dahị ụbwọ nyọka jẹ́ abwọlẹ kahị ka bwu ya ẹla nya ịBayịbụụ ọjẹ́jẹ ta ọngịnyị? (Yẹ ifoto ịnyịnyị.)

⁵ Ẹlịlẹhị tị ri, áhị ya ahị guru nyori ọng myị́ ọng ọlẹ kahị ya ẹla bala ka myọnụ nya ịBayịbụụ ọjẹ́jẹ i-ijata lala ọyẹẹnọ ọwẹ ka. Angịhyẹ ka baba nya ụka chẹẹ ene. Ahị ka baba nyọka ya ẹla u-uhye nya egbeju nya ẹlẹhẹ ọlẹ kọ ka kpụ ọngọọwa ịpyọ ene. Ọ tị lịnyị kpá lẹ, kori kahị kịnyaa la ọ-la irya ọnyịịla ẹ-ẹga nya ọngọọwa bala ọ-họọ ọnahị, ọ ka chịkpẹẹ kahị ka dọmwụ nya ịBayịbụụ ọjẹ́jẹ balọọ lụka o-kpii myị́. Ẹlịyẹ ahị tị́ ka ya ụka kahị ja ya ẹla nya ịBayịbụụ ọjẹ́jẹ ta ọngịnyị? Ahị wo ẹla ọlẹ ká aanahị ịhyẹ ịlẹ kị jẹ́-ẹ họ ịnyị yẹẹyẹẹ ya wẹẹ.

6. Ẹlịyẹ ahị tị́ ka jẹ́-ẹ ya nyọka da ọngịnyị ụbwọ myọnụ nya ịBayịbụụ ọjẹ́jẹ?

⁶ Aanahị ịịwa ya nyori nyị́ kaa há gbuu e-epweji ịhyẹ kori kahị kpa omyi ẹla lala “jẹ́ ang,” “ịBayịbụụ ọjẹ́jẹ,” lẹẹ “mẹ ang jẹng” ya ẹla ụka kahị ja tịtọ nyọka dọmwụ nya ịBayịbụụ ọjẹ́jẹ ka. Ị ya nyori nyị kaa há gụ́ nyọka kpa omyi ẹla lala “ja oja lawụlẹ,” “ẹla o-ya lawụlẹ,” bala “ọ-kụ ẹhị yẹ ịBayịbụụ.” Nyọka da ọngọọwa ụbwọ kọ ka myị-ị̀ ya ẹla u-uhye nya ịBayịbụụ kịnyaa, à ka jẹ́-ẹ ya myị́ nyori, “Ọ kaa kpịpyọ nyori ịBayịbụụ wẹ ịtọ ẹla ịkpọnchị u-uhye nya ọhịhị” lee “ỊBayịbụụ á ri ụpwụ nya ịgba ọgbagba ị-ịwẹ kem ka; ọ kaa dahị ụbwọ a-agbẹyị lụmẹ-lụmẹ.” À ka jẹ́-ẹ ya myị́myị́ nyori: “Ọ́ kaa ye ụka lụmẹ abwẹhẹ ka; iminiti 10 ka 15 nwa nyọka jẹ́ ang ọkpọnchị lẹ.” Á baba nyọka kpa omyi ẹla lala “ụka o-hu nọ” lee “epwihi ọnyị myị́ ọnyị” ka, ọọwa ka du kị ka yọọ lala ang olujwo myị́.

7. Ụka oyina angịhyẹ à tị kaa jẹ́ ẹlịlẹhị ọla ịBayịbụụ? (1 Ala ịKọrịntị 14:​23-25)

⁷ Wụraa wẹ ọjịra-jịra. Ọ lala o-ri ụka ká angịhyẹ lụka nya ọlẹrụ ịPọlụ wẹ ọjịra-jịra lụka ọhọhẹ, ị jẹ́ ẹlịlẹhị ọla ịBayịbụụ lẹ. (Wa 1 Ala ịKọrịntị 14:​23-25.) Ọ kaa la ịnyịnyị alẹ. Ụmụmẹ nya angị inyeewe kaa nwà la agaga ụka kị dọmwụ nya ọjịra-jịra ọkaka. Ụka oyina a tị́ ka wụraa? Ụpwụ nya Chị Ọkẹkẹnị Gboyi myị́ Oyi! ya ẹla nya ọngịnyị ọ-wụrụ wẹ ọjịra-jịra ẹ-ẹpwụ nya ang ọjẹ́jẹ 10, ma á ka godayị kanụ ka jẹ́ ang pwụ ụwa ene nyọka wụrọọ ka. Ụka ọhọhẹ ọlẹ ká ya ẹla bala ọngịnyị, à ka jẹ́-ẹ wụrọọ wẹ ọjịra-jịra ọla ọmyịmyị nya epwihi myị́. Ọhẹka à ka jẹ́-ẹ họ ịnyị bwula o-ya egbeju nya ẹla o-ya dodehe bwu ịBayịbụụ lee ẹhị nya ẹla ọhẹ bwu Ẹpwang ọ-Kụ Gbeji ọlẹ kị ka jẹ́ la epwihi ọọwa.

8. Ẹlịyẹ ahị tị́ ka ya je ọngịnyị myị́ ụka kahị ja wụrọọ wẹ ọjịra-jịra nyahị? (Ayịsaya 54:13)

⁸ Ụka ká ja wụrụ ọngịnyị, wụlẹ ya joo jaabwọ ká ọjịra-jịra nyahị kaa datị hi abwọlẹ kị kaa họ ịchọọchị ọlẹ kọ kaa ka. Ụka ká ọngọhẹ ọlẹ kọ wẹẹ jẹ́ ịBayịbụụ wẹ ọjịra-jịra nya ọgbanyẹ kọ yẹ jaabwọ ká Ẹpwang ọ-Kụ Gbeji ọjẹ́jẹ kaa la, ọ tọ ọngọ kaa mẹ ang jọ́ọ wo nyori, “Ọngọ wẹẹ kpịlahị jẹ́ ẹnyị nya ọng myị́ ọng wuu?” Ọọnahị wụlẹ ya joo nyori ahị wuu kaa maga nyọka jẹ́ enyị nya angịlẹ kị ji ọjịra-jịra nyahị, jaabwọ kahị kaa jẹ́ ẹnyị nya alugbiyegu nyahị. Ọ yẹ nyori ọwẹ nyị datị hi abwọlẹ kọ kaa la ị-ịchọọchị nyamwụ. Ahị ka myị́myị́ jẹ́-ẹ ya je ọngịnyị ang odudu ká ọjịra-jịra nyahị kaa datị. (Wa Ayịsaya 54:13.) Ahị kaa tụguru nyọka gbịgba ha iJihova, jẹ́ ang bwu ẹga nyamwụ, bala ọ-ka ju awụlẹ ọhụ. (Hib. 2:12; 10:​24, 25) Ịnyị à dudu kị nwụla ọjịra-jịra nyahị nọ ụ-ụgbẹyị ọlẹ kọ ka dahị ụbwọ jẹ́ ang lẹ, áhị họọ lala ọhụhụ ka. (1 Kọr. 14:40) Myị́myị́, ị nwụ Ube nya Ịpyị-Adịrahụ nyahị hukee bala ọ-họọ ụ-ụgbẹyị ọlẹ kọ ka chịkpẹẹ la ọ-jẹ́ ang ụ-ụwa. Áhị kaa ya ọnụ ju ẹla nya upe ka, chajị áhị chẹkpẹ ju ụpa ọhẹ datị ka; áhị tị kaa da ịwẹẹ nya ẹla tọ awụlẹ ka ịnyịnyị. Ọ ka dụbwọ myị́ kori kahị mẹ ifim ọlẹ kọ ri, Ịyẹ Ị Tị-ị Họ U-ube nya Ịpyị-Adịrahụ? jẹ ọngọọwa ene. Ọọwa ka dọọ ụbwọ nyọka jẹ́ jaabwọ ká ụ-ụwa kaa la.

9-10. Ụka ká ja wụrụ ọngịnyị wẹ ọjịra-jịra, ányị ahị tị́ ka họ kọ ka juhi nyọka wẹ ka? (Yẹ ifoto ịnyịnyị.)

⁹ Angịhyẹ kaa họ atịmẹ la ọ-ka wẹ ọjịra-jịra nyahị chajị ị kaa juhi nyori ahị ka yaa ri Alibeenu nya iJihova la agbụrụ. Họ ká ọngọọwa a jẹ́ myị̀myị̀ nyori ọ kaa kpụhị ịpyọ ụka ká angga á wẹ ọjịra-jịra nyahị, ma áhị tị kaa yẹ rịrị ọngịnyị nyọka yẹ julahị lee ọ-ka wẹ ẹla pyii ka. Alugbiyegu wuu ka wẹ myị́, tụ́ anjwo ichiche. Áhị kaa chị anjwo ebwo datị lụka nya ang ọmẹjẹ ka. Ọkọkọ nyọọwa, adịda bala ịnịna, tụ́ anyị nyaa kaa hụhụ ẹ-ẹga ookpokpo jẹ́ ang lawụlẹ. Ọwẹ du ká adịda bala ịnịna jẹ́-ẹ kpa ẹhị ba anyị nyaa bala ọ-jẹ́ ang ọlẹ kị wẹẹ mẹjáa. (Ehile. 31:12) Áhị kaa dà angịnyị okpoko lee ọ-tịtọ kị ka hu ha la agbụrụ ka. Ọkọkọ nyọọwa, ahị kaa ba ehile ọlẹ ká iJisọsị da jẹ. Ọ yẹkẹẹ: ‘Anụ ye ọnahị nya Ohe la ọ-nwụ uri ka, lẹ anụ họ ọnahị la o-ye uri ka ịnyịnyị.’ (Mat. 10:8) À ka jẹ́-ẹ wụlẹ ya je ọngọọwa ịnyịnyị myị́ nyori ọ́ baba nyọka kụrụ awụrụ ọlịnya-lịnya ene kọ ka wẹ ka. Ọkịlẹtụ nya ọngịnyị Ohe à kaa yẹ lẹ, a-ang ọkụrụ-kụrụ ka.—1 Sam. 16:7.

¹⁰ Kori ká ọngịnyị á wẹ ọjịra-jịra, maga ká họ kọ ka kpọọ ịpyọ. Yoo je angịgbahị nya ọjịra-jịra bala aanahị ịkịla. Kori kọ yẹ nyori ẹla nyamwụ há angịnyị bala o-ri ị kpahị jwoo, ọ ka tịtọ nyọka wẹ myị́myị́. Lụka nya ọjịra-jịra, kori kọ kpa ịBayịbụụ ka, à ka jẹ́-ẹ kpa ịnyang tụ́ bọ́ọ kanụ ka yọọ lawụlẹ bala ọ-mẹ ẹgẹlẹ kị wẹẹ wa jọ́ọ chajị kọ ka jẹ́-ẹ wo ẹla ọlẹ kị wẹẹ ya yẹẹyẹẹ.

ỤKA KÁ DỌMWỤ NYA ỊBAYỊBỤỤ ỌJẸ́JẸ BALA ỌNGỊNYỊ

11. Ányị a tị́ ka mẹjẹ nyori à kpa ụka nya ọngọkịla i-irya?

¹¹ Ẹlịyẹ ahị tị́ ka kpa i-irya u-uhye nya ịBayịbụụ ọ-mẹjẹ ọngịnyị kpangga? Mẹjẹ nyori à jẹ́ kọ la ụkụrwọ ọkịla ka họ bala o-ri ọ baba nya ụka. Ọ-chụ pwokwita, kori kanụ ya ụka ha awụlẹ, maga ká pwụ ụwa lụka ọọwa, kori ká angịnyị á dọmwụ kaa ba ụka jẹ o-oye nyang gbuu ka wẹwẹ. Da ọọwa u-uhye, à ka chụ nyọka chị ang ọjẹ́jẹ ọlụka ọhọhẹ kpii myị́. Aanahị ịhyẹ ịlẹ kị kaa mẹ ịBayịbụụ jẹ angịnyị yẹẹyẹẹ ya nyori nyị kaa há nyọka myị́ ang ọjẹ́jẹ hyaa, kori ká ọngọọwa á tịtọ nyọka jẹ́ kịnyaa wẹwẹ. A tị ya ẹla lụmẹ ka ịnyịnyị. Ya iwe da ká ọngọlẹ ká wẹẹ mẹ ang jẹ a ya ẹla ọla irya nyamwụ dodehe.—Etu 10:19.

12. Ẹlịyẹ ahị tị́ ka kpa i-irya ụka kahị dọmwụ nya ịBayịbụụ ọ-mẹjẹ ọngịnyị?

¹² Ụka kahị dọmwụ nyọka mẹ ang jẹ ọngịnyị, ẹla ọlẹ kahị ka kpa i-irya ri ọ-ka dọọ ụbwọ bwu ọmwụ ọdada nyọka jẹ́ iJihova bala iJisọsị bala ọ-ka la ọháha ẹ-ẹga nyaa. Nyọka jẹ́-ẹ họ ịnyị, ahị ka kpaa irya ka ẹla ọlẹ ká ịBayịbụụ ya ọkọkọ nya ẹla ọlẹ kahị jẹ́. (Ụkụr. 10:​25, 26) Ọlẹrụ ịPọlụ ya ọgụ-ẹpẹtẹ ọnyịịla deeji hahị. Ọ kaa mẹ ang jẹ kpụnịrọ ẹla nya iJisọsị, kọ ri ọngọlẹ ká iJihova du warị nyọka dahị ụbwọ kahị ka jọ́ọ bala ọ-la ọháha ẹ-ẹga nyamwụ. (1 Kọr. 2:​1, 2) ỊPọlụ ya gbagbịla ịnyịnyị jaabwọ kọ baba lụmẹ nyọka da angị inyeewe ụbwọ kị ka la abwẹla ịnyịịla, ịlẹ kahị ka jẹ́-ẹ chụ kaka pwokwu okpoko ịgọm, okpoko onyoowuru, bala ajwọ ị-há ụhị. (1 Kọr. 3:​11-15) Abwẹla ịnyịịla ịlịnyị ri ọmyịmyị, ẹla ọjẹ́jẹ, ang ọjẹ́jẹ, bala ihi nya iJihova ojuju. (Eje. 19:​9, 10; Etu 3:​13-15; 1 Pit. 1:7) Gbịla ụgbẹyị ọlẹ ká ịPọlụ kaa bwu mẹ ang jẹ bwula ọ-da angịlẹ ká kaa mẹ ịBayịbụụ jẹ ụbwọ nyọka la ọmyịmyị ọnyọọngịrị bala ọ-ka ri igu o-chii bala Adaa ọ-la ọháha ọlẹ kọ juwa e-epwoohe.—2 Kọr. 1:24.

13. Ányị ahị tị́ ka bwu mẹjẹ nyori ahị la ọhụ ọdapịlẹ bala ọ-yẹ ẹla ẹkpẹ imiiye ụka kahị ja mẹ ang jẹ ọngịnyị? (2 Ala ịKọrịntị 10:​4, 5) (Yẹ ifoto ịnyịnyị.)

¹³ Gbịla ụgbẹyị ọlẹ ká iJisọsị kaa bwu mẹ ang jẹ bwula ọ-dọhụ pịlẹ bala ọ-yẹ ẹla ẹkpẹ imiiye. A tọ ịtọ ẹla ịlẹ kị ka hu oyoyi ju ọngịnyị ka. Kori ká ẹhị nya ẹlẹhẹ á lọọ ujwo la owowo, ọ́ baba nyọka ya ẹla u-uhye nyamwụ gbee abwọhẹ ka. Ọkọkọ nyọọwa, anụ ka jẹ́-ẹ kịlahị ene kanụ ka tịrẹkpẹ wẹ ẹla ọọwa ụka ọkịla myị́. Ọkọkọ nyọka tọọ tutu kọ ka myị ju ẹlẹhẹ ọlẹ ká ịBayịbụụ mẹjẹ, ahị ya ụka da ká ẹlịlẹhị ọọwa a da ụtẹ yeji ọ-ọkịlẹtụ nyamwụ. (Jọn. 16:12; Kol. 2:​6, 7) ỊBayịbụụ ya nyori ịmẹjẹ nya ịnịịkịla nyị lala “ụbwọ ẹwụ nya aluji” ịlẹ kahị baba nyọka ‘ta ayịreji.’ (Wa 2 Ala ịKọrịntị 10:​4, 5.) Ọ́ ka chịkpẹẹ lụmẹ ha ọngọlẹ kọ wẹẹ jẹ́ ịBayịbụụ nyọka tụụbwọ hi ẹla ọlẹ kọ myị la lụka ọtata lẹ myị́ ka. Lẹ, ahị ka baba nyọka dọọ ụbwọ họhẹ-họhẹ kọ ka ri igu o-chii bala iJihova. Ọọwa ọ ka chọọ kpẹẹ nyọka tụụbwọ hi ang ịlẹ kị da ụtẹ yeji ọ-ọkịlẹtụ nyamwụ ene-ene lẹlẹ.

ỤKA KÁ ANGỊ INYEEWE Á WẸ ỌJỊRA-JỊRA

14. Ányị ahị tị́ ka kpa angị inyeewe ịlẹ kị wẹ ọjịra-jịra nyahị?

¹⁴ IJihova á tịtọ kahị ka họ ẹla oye-oye ẹ-ẹga nya angị inyeewe ka, kori ká ọhọhọ nya aloye nyaa, ang ọlala nyaa, lee epweji nyaa á datị hi ịnyahị wẹwẹ. (Jem. 2:​1-4, 9) Lẹ ányị ahị tị́ ka bwu mẹ ọháha jẹ ẹ-ẹga nya angị inyeewe ịlẹ kị wẹ ọjịra-jịra nyahị?

15-16. Ányị ahị tị́ ka bwu da angị inyeewe ụbwọ ká ọjịra-jịra ka kpaa ịpyọ?

¹⁵ Angịhyẹ kaa wẹ ọjịra-jịra nyahị nyọka yẹ jaabwọ kọ kaa la lee ọ ka ri ọngọhẹ bwu ẹga ọkịla kọ jwaa ọhụ nyọka wẹ myị́. Lẹ, ahị họ atịmẹ la ọ-ka ya ẹla bala angị inyeewe ụka kị wẹ ọjịra-jịra ka. Daa ọwụraba, ma a tị họ ịnyị kpoye du kị ka la ịlaa ka lẹ ka. À ka wụraa kị ka hụhụ balang myị́. À ka kpa ịBayịbụụ nyang lee ụpwụ ọlẹ kị wẹẹ kpa jẹ́ ang tụ baa kị ka bọọ jẹ lee ọ-mwahị nya ọhẹ haa myị́. À tị ka jẹ́-ẹ mwahị nya agbẹyị ịkịla ịlẹ ká ka họ ká ọjịra-jịra ka kpaa ịpyọ myị́. Ọlẹng ọhẹ kọ wẹ Ube nya Ịpyị-Adịrahụ ọhẹ byi ọọnahị ọlẹ kọ dọọ ọwụraba nyori nyị la ọwa abwẹbwẹhẹ nyọlẹ kọ kụrụ ang kẹm-kẹm lala angịkịla ka. Ọọnahị ọọwa họ kọ ka la ịlọmwụ bwula o-byoo nyori nanana nyori ahị kaa kụrụ ang kẹm-kẹm wẹ ọjịra-jịra, áhị datị hi angịkịla ka. Ọlẹng ọọwa hu enyi Ohe lẹẹlẹẹ lẹ, ma ọ́ tị kaa deeri nya ẹla ọlẹ ká ọọnahị ọwẹ byoo du kọ la ịlọmwụ ka. Ẹlẹhẹ ọlẹ kahị tị ka kpịtịya ri: Ụka kahị ja ya ẹla bala angị inyewe ọọjịra-jịra, ahị ka dụmwọ-dụmwọ kahị ka taa ịtọ ẹla ịlẹ kị ka chị oyoyi jwaa lee ọ-tịtọ nyọka jẹ́ ẹla ịbaa nyaa ka.—1 Pit. 4:15.

¹⁶ Ahị ka jẹ́-ẹ họ ká angị inyeewe ka la ịlaa bwula ọ-chị ihi jwaa ụka kahị ja ya ẹla balaa, ụka kahị ja wẹ ẹla, bala ụka kahị ja ya ẹla rụ angịlẹ kị ri Alibeenu lẹka bala ọmyịmyị nyaa ẹ-ẹpwụ nya ụpa ọlẹ kahị ja họ. Yẹ abwọ hi omyi ẹla ọlẹ kọ ka waa ẹjẹ lee kị ka yẹ lala ido o-dodo. (Tay. 2:8; 3:2) Ọ-chụ pwokwita, áhị ka kpa ọnụ ta ẹla ọlẹ kị myị la ka. (2 Kọr. 6:3) Aanahị alẹng ịlẹ kị kaa họ ụpa nya ẹla o-ya dodehe bwu ịBayịbụụ ha alụma ka dụmwọ-dụmwọ u-uhye nya ẹlẹwẹ gụgụụgụ. Ị ka mẹjẹ ịnyịnyị nyori ị kpịtịya nya angị inyeewe ịlẹ kị juwa bwula ọ-wụlẹ omyi ẹla ịlẹ kị ka wo etu nyaa ka.

17. Ẹlịyẹ ahị tị́ ka họ ụka kahị tọ angịlẹ kị “chịla-chịla” ẹ-ẹrụ ọnyịịla ọ-kpa pyẹ?

¹⁷ Jaabwọ ká ahyẹẹnụ ọnyị myị́ ọnyị wẹẹ chịpwụrụ, ụkụrwọ nya ọ-họ ká angịnyị ka ri angịjụgbẹyị wẹẹ ju agaga gụ́ olene ịnyịnyị, lẹ ahị kịnyaa la ọ-mwahị nya “angịlẹ wuu kị chịla-chịla nyọka la ọhịhị ọmyịmyị-ka” mẹ. (Ụkụr. 13:48) Ụka kahị tị tọ angịlịnyị, ahị họ atịmẹ la o-ya ẹla nya ịBayịbụụ ọjẹ́jẹ balaa lee ọ-wụraa wẹ ọjịra-jịra nyahị ka. Bwula ọ-họ ịnyị, ahị ka jẹ́-ẹ daa ụbwọ nyọka dọmwụ nya ọ-jẹdịyẹ bwu “ụgbẹyị nya ọhịhị ọmyịmyị-ka.”—Mat. 7:14.