Report dagiti Manangiwaragawag ti Pagarian
“Saandakanto nga Atiwen”
ITI maysa a pagilian iti Central America, 15 nga armado a lallaki ti nangala ti dua kadagiti Saksi ni Jehova manipud iti pagtaenganda babaen ti panangpilit kadakuada ken inyegda ida iti sango ti grupo dagiti 75 a lallaki nga armado kadagiti pang-or ken dakkel a wasay. Ininsultoda dagiti Saksi babaen kadagiti dakes a sasao ket kalpasanna inyawatda ida ti sabali manen a grupo nga agarup 350 nga armado met laeng a lallaki. Impatoda a dagiti dua a kakabsat a lallaki ket agbutengdanto ket ikompromisodanto ti Nakristianuan a neutralidadda babaen ti pannakitiponda iti patroliada. (Isaias 2:4) Ngem nagtalinaed a natibker dagiti Saksi ket dida kayat ti tumipon iti namilitaran nga ar-aramidda. Gapuna naipisokda iti pagbaludan, bayat a dagiti kamkameng dagiti dadduma a relihion nakikompromisoda ket napanda kadagiti bambantay a kadua dagiti patrolia.
Iti sumaganad nga aldaw dagiti kakabsat ket napanda iti kangrunaan nga ili a maipaay iti pannakabistada. Bayat a magmagnada, imbaga dagiti guardia kadakuada a nakaro ti pannakadoktrinada. Simmungbat dagiti kakabsat: “Talaga a nakaro ti pannakadoktrinami! Gapuna nga ita awan ti dangranmin nga asinoman; saankami a mannanakaw, wenno mammartek, wenno mannakikamalala.” Idi ti opisial binistana ida, impakitaanna ida ti kaasi ket inalamanona ida, a kunkunana, “No tunggal maysa ket kasla koma kadakayo, nagpaiduma koma dagiti bambanag . . . sapay koma ta ti Diosyo a ni Jehova ti mangsalaknib kadakayo.” Kalpasanna nawayawayaandan.
Apay a maidaddadanes dagiti di makadangran, natalna a Kristiano a mangitantandudo kadagiti pagalagadan ti Dios maipapan iti kinalinteg? Agsipud ta “saanda a paset ti lubong” ken kadagiti napolitikaan nga ar-aramidda. (Juan 17:16) Anian a liwliwa a maammuan a numan pay ni Satanas ken ti lubongna ket labananda dagiti ad-adipen ni Jehova, saandanto nga agballigi! (Jeremias 1:19) Napaneknekan a pudno daytoy iti daytoy a pagilian, ket ti opisial nga inkargado ti rebbeng a makomendaran iti pannakaawatna iti neutral a takder dagiti Saksi ni Jehova.
◻ Napaneknekan met a pudno dagitoy a sasao ni Jeremias iti maysa a kapadasan manipud iti maysa a daga iti Africa a sadiay maparparitan ti trabaho dagiti Saksi ni Jehova. Kalpasan ti panangiladawanna kadagiti rigrigat a linasat dagiti kakabsat gaput’ panangtultulongda kadagiti tattao a makaammo ti ad-adu pay maipapan kadagiti nakaskasdaaw a pangpanggep ni Jehova, kuna ti report: “Gapu iti neutral a takder dagiti tattao ni Jehova, pinulpullo kadagiti kakabsattayo a lallaki ti maibalbalud, a masansan maipaay iti agsasaruno a sentensia. Dagitoy ti mapangpang-or iti kasta unay, mababaot, ken mapilpilit iti isuamin a pamay-an tapno salungasingenda ti Nakristianuan a konsiensiada. Iti maysa a kaso, kalpasan a napaay a nangdadael ti kinatarnaw ti maysa a kabsat babaen iti narungsot a pannakababaot, nagkukomplot ti dadduma kadagiti soldado a mangpapatay kenkuana. Idi naammuan ti nangatngato nga opisial daytoy a komplot, isut’ personal a bimmallaet ket sililimed nga impaiyakarna ti kabsat iti sabali a siudad, ket iti kasta naispal ti biagna.”
Daytoy a panangidadanes ti saan a nangpasardeng kadagiti Saksi ni Jehova manipud panangikaskasabada iti naimbag a damag kas bilin ti Dios. (Mateo 24:14) Tinaginayon ni Jehova ida babaen iti espirituna ken binendisionanna ti matalek a takderda. Ti report manipud iti daytoy a pagilian ti nagkuna met: “Agpapan pay adda aglablabes a pisikal a rigat, bisin, sakit, narungsot a guerra sibil, ken ti pannakaidadanes, adda met ti 17-porsiento nga irarang-ay iti promedio a bilang dagiti agibumbunannag.” Rimmang-ay dagiti timmabuno iti Memorial iti 21 porsiento, ken 21 porsiento kadagiti amin nga agibumbunannag ti nagserbi kas payunir bayat ti Abril 1984.
Gapuna maragsakan dagiti kakabsattayo a lallaki agpapan pay ti pannakaidaddadanesda. Agtalekda ken ni Jehova ket mapalpalagipanda kadagiti sasao ni Jeremias: “Ket makibakaldanto kenka, ngem saandakanto nga atiwen, ta ‘siak addaakto kenka,’ kuna ni Jehova, ‘tapno isalakanka.’”—Jeremias 1:19.
[Ladawan iti panid 27]
Tinaginayon ni Jehova dagiti maidaddadanes a Saksina