Watchtower ONLINE A LIBRARIA
Watchtower
ONLINE A LIBRARIA
Iloko
  • BIBLIA
  • PUBLIKASION
  • GIMONG
  • w87 2/15 pp. 15-20
  • Panangipateg kadagiti Dua a Kadadakkelan nga Ebkas ti Ayat

Awan video-na ti napilim.

Pasensiakan, adda problema iti pannakai-load ti video.

  • Panangipateg kadagiti Dua a Kadadakkelan nga Ebkas ti Ayat
  • Ti Pagwanawanan Mangibumbunannag iti Pagarian ni Jehova—1987
  • Subtitulo
  • Umasping a Material
  • Ti Trabaho a Panagbalaybalay
  • Ti Panagsarungkar
  • Panangidaulo ti Panagadal ti Biblia kadagiti Pagtaengan
  • Panangaskasaba iti Lansangan
  • Ti Di Pormal a Panangaskasaba
  • Panangabrasa kadagiti Ganggannaet
  • Panangaskasaba Babaen ti Sursurat
  • Panagsarungkar iti Telepono
  • Panangaskasaba Babaen ti Naimbag a Kababalin
  • Dagiti Bendision ti Panangapresiar iti Panagayat ni Jehova—Paset 2
    Ti Ministeriotayo iti Pagarian—2001
  • Dagiti Bendision ti Panangapresiar iti Panagayat ni Jehova—Paset 1
    Ti Ministeriotayo iti Pagarian—2001
  • Panangasaba iti Binalaybalay
    Ti Ministeriotayo iti Pagarian—2006
  • Saritaenyo ti Dayag iti Kinaari ti Dios
    Ti Pagwanawanan Mangibumbunannag iti Pagarian ni Jehova—1987
Kitaen ti Ad-adu Pay
Ti Pagwanawanan Mangibumbunannag iti Pagarian ni Jehova—1987
w87 2/15 pp. 15-20

Panangipateg kadagiti Dua a Kadadakkelan nga Ebkas ti Ayat

“Datayo agayattayo, agsipud ta isu inayatnatayo nga immuna.”​—1 JUAN 4:19.

1. Ania nga ulidan ti impakita ni Jesus nga agpaay kadatayo?

KASANOT’ kasayaatan a panangipakitatayo ti panangipateg iti naindaklan nga ayat nga inyebkas ni Jehova a Dios ken ni Jesu-Kristo kadatayo? Ti kangrunaan a pamay-an ket babaen ti panangtulad ken Jesus, nga awan pulos bannogna a nangipakpakaammo iti naganna ken Pagarianna. (1 Pedro 2:21) Inaramidna dayta kadagiti pagtaengan, kadagiti sinagoga, templo, kadagiti arisadsad ti bantay, ken kadagiti igid ti baybay. Usigentayo dagiti siam a nalatak a pamay-an a mabalin a silulukat kadatayo.

Ti Trabaho a Panagbalaybalay

2. Kasano ti pannakapagtalinaedyo iti trabaho a panagbalaybalay?

2 Ti umuna, ken nalabit pakailasinan unay, a pamay-an a panangipakitatay ti ayat ken panangipategtayo ket babaen ti panagbalaybalay nga addaan iti naimbag a damag ti Pagarian ti Dios. Ti panangaramid iti dayta kasapulanna ti pudpudno a wayawaya ti panagsao agsipud ta ramanen dayta ti agtultuloy a naregta a pannakaipasango kadagiti dadduma, nga adu ti mangmatmat kadatayo kas taktak laeng. Kasapulanna ti pudpudno nga ayat iti Dios ken ti kaarruba iti panagtultuloy iti aramid a panagbalaybalay, agpapan pay mabalin a pannakaipasangotayo kadagiti di panangikankano, panagsimron, pananglais, wenno direkta nga ibubusor.​—Idiligyo iti Ezequiel 3:7-9.

3. Ania a Nainkasuratan a pangibatayan ti adda kadakayo a maipaay iti trabaho a panagbalaybalay?

3 Ti rekord ti Ebanghelio iti instruksion ni Jesus kadagiti 12 nga apostolna, ken kamaudiananna kadagiti 70 nga ebanghelisador, ipamatmatna a silalawag nga isuda ti mapan agbalaybalay a mangikaskasaba ti naimbag a damag ti Pagarian ti Dios. (Mateo 10:5-14; Lucas 10:1-7) Idiay Aramid 20:20 sasawen ni Pablo ti maipapan iti panagbalaybalayna. Dagidiay a sasao ti naiyaplikar iti panagaramidna met, ti isasarungkar a panangipastor, ngem ti Ara 20 bersikulo 21 awan ti ibatina a panagduadua no ania a trabaho ti kaipapananna, ta innayon ni Pablo: “A pinaneknekak a naan-anay kadagiti Judio ken kadagiti met Griego”​—saan a kadagiti Kristiano a kakabsat a lallaki ken babbai​—“ti panagbabawi iti Dios ken ti pammati ken ni Apotayo a Jesus.” No agar-aramid iti panagsarungkar a panangipastor, masansan a di igunamgunam, ti panglakayen ti ‘panagbabawi iti Dios ken ti panamati ken Jesus.’ Imbes ketdi, iparegtana kadagiti padana a Kristiano a parang-ayenda ti panangipateg iti panaggigimong wenno ti ministerio, wenno tulonganna ida kadagiti personal a parparikutda.

4. Aniat’ mangparegta kadakayo a makiraman iti panangasaba iti binalaybalay?

4 Saan laeng nga adda ti natibker a Nainkasuratan a pakaibatayan ti panagbalaybalay no di ket dagiti bungbunga dayta a trabaho ipakitana a ti bendision ni Jehova adda iti dayta. Wen, “ti kinasirib mapaneknekan gapu kadagiti gapuananna.” (Mateo 11:19) Masansan, dagidiay mapan agbalaybalay nakakitkitadan ti pammaneknek iti panangiturturong dagiti anghel kadakuada kadagidiay mabisbisin ken mawawan iti kinalinteg. Kunaen ti bumalay a mabalin maysa a lalaki wenno babai nga isut’ agkarkararag a maipaay iti tulong ket ti panagsarungkar ti Saksi ket sungbat dayta a kararag.

5. Ania a nagsayaat a katulongan ti adda kadatayo iti ministerio a panagbalaybalay, ken kadagiti ania a nadumaduma a pamay-an ti pakatulongan dayta kadatayo?

5 Anian a nagdakkelan a tulong ti adda kadatayo iti tay-ak ti serbisio iti libro a Reasoning From the Scriptures! Daytat’ naglaon kadagiti adu a makaallukoy nga introduksion iti pannakipatpatang iti Biblia agraman dagiti nausar nga impormasion kadagiti nagadu a Nainkasuratan wenno narelihiusuan a tema. Gapuna, saanyo laeng nga itugtugot dayta no di ket kanayon nga usarenyo dayta. Dagiti payunir nangnangruna inyebkasda ti dakkel a panangipateg iti daytoy a nagpateg a katulongan iti tay-ak ti serbisio. Maiparangarangyo aya ti panangipategyo iti ayat ti Dios babaen ti panangusar nga ad-adda pay iti daytoy a libro ken iti ad-adda pay nga epektibo a pamay-an?

6. Datayo ti magunggonaan kadagiti ania a personal a gunggona iti ipapan panagbalaybalay nga addaan iti mensahe ti Pagarian?

6 Ditay koma met liplipatan ti kinapudno a datayo a personal ti magunggonaan unay babaen iti pannakiraman iti ministerio a panagbalaybalay. Bayat a datayo a Kristiano agtigtignaytayo sigun iti pammatitayo, daytat’ agbalin a natibtibker; bayat ti panagsasaotayo a buyogen ti nauneg a pammati, mapapigsa met ti pammatitayo. Saantayo a mabalin nga ibaga kadagiti dadduma ti namnamatayo a di met mapapigsa ken maparaniag ti mismo a namnamatayo. Awanen ti umasping iti regular a pannakiraman iti ministerio a panagbalaybalay a mangsukay kadagiti bunga ti espiritu a nadakamat idiay Galacia 5:22, 23. Rebbengna laeng a kasta, ta ipasiguro ti Biblia kadatayo: “Ti managparabur a kararua rumang-ayto; ti mangpabang-ar kadagiti dadduma isu met laeng mabang-aranto.”​—Proverbio 11:25, New International Version.

Ti Panagsarungkar

7, 8. Agpaay kadagiti ania a lohikal ken praktikal a rason a rebbeng nga agsarungkartayo?

7 Ti maikadua a pamay-an a panangipakitatayo ti panangabrasa iti ayat nga impakita kadatayo ti Dios ken ni Kristo ket isut’ panagsarungkar kadagiti tattao a napalabas a nangipakita ti interes iti mensahe ti Pagarian. Ni Pablo ken ni Bernabe maseknanda kadagidiay a kinaskasabaanda. (Aramid 15:36) Kinapudnona, ti saan a panagbaliwbaliw kasapulanna ti intay panagaramid ti panagsarungkar. Bayat ti intay panangaskasaba iti balaybalay, kasta met ti di pormal, wenno kadagiti lansangan, sapsapulentayo dagidiay “silalagip kadagiti naespirituan a kasapulanda.” (Mateo 5:3) Kaawatan, ti panangted kadakuada, kaiyariganna, ti maysa a baso a naespirituan a danum wenno sanga-ilgat iti naespirituan a tinapay ket saan nga umdas. Tapno makagtengda iti dalan nga agturong iti biag, kasapulanda ti ad-adda pay a tulong.

8 Dagiti umuna a panagreggettayo ti mabalin a maiyarig iti panagmula kadagiti bin-i ti kinapudno. Ngem kas impamatmat ni apostol Pablo idiay 1 Corinto 3:6, 7, ad-adu pay ti kasapulan. Saan nga umdas ti basta panagmulana. Masapul met a masibugan dagiti bin-i, kas ti impaay ni Apollos. Santo laeng mainanama a ti Dios ti mangpadakkel iti dayta. Daytoy a paset ti trabaho ti maliwliwayan dagiti dadduma, idinto nga adu met dagiti mangibilbilang iti dayta a ti kinapudnona isut’ kalalakaan a paset ti Nakristianuan a ministerio. Apay? Agsipud ta dagiti tattao a sarsarungkarantayo ket nangipakitada metten iti bassit nga interes.

Panangidaulo ti Panagadal ti Biblia kadagiti Pagtaengan

9. Apay a ti panangidaulo iti panangyadal ti Biblia iti pagtaengan ti agbalin koma a kalatyo?

9 No maaramid a regular ti panagsarungkar kadagiti tattao a nangipakita iti interes iti mensahe iti Pagarian, masansan a ti resultana isu ti panagadal iti Biblia iti pagtaengan​—ti maikatlo a pamay-an a panangipakitatayo ti panangipategtayo. Kinapudnona daytoy ti karagsakan ken ti makagunggona unay a paset ti ministeriotayo. Apay? Ngamin, anian a ragsak ti pannakakita kadagiti tattao a dumakkel iti pannakaammo ken panangipateg kadagiti kinapudno ti Biblia, a makita ti panagbalbaliw ti panagbiagda, ken tulongan ida agingga nga idedikardan ti bagbagida nga agaramid ti pagayatan ti Dios ket mabautisaranda! Dagita ti pudpudno a mamatmatan kas dagiti naespirituan nga annaktayo ket datayo dagiti naespirituan a nagannak kadakuada.​—Idiligyo ti 1 Corinto 4:14, 15; 1 Pedro 5:13.

10. Ania a gagangay a pangarigan ti mangipakita ti pateg ti panangidaulo kadagiti panagadal ti Biblia iti pagtaengan?

10 Usigenyo ti maysa a gagangay a pangarigan. Maysa a misionero a napan nagbalaybalay iti maysa a puro idiay Caribbean ti nakasarak ti pagassawaan a hippie a ti pagtaenganda ket awan aniaman a nadalimanek ken naurnos. Ngem nangipakitada ti interes. Maysa a katulongan ti panagadal ti Biblia ti naipaima, ket narugian ti panagadal ti Biblia iti pagtaengan kadagiti agassawa, a saan pay idi a kasado nupay addaandan ti sumagmamano nga annak. Bayat a rumangrang-ay ti panagadal, nangrugi metten nga agbalin nga ad-adda a presentable ti pagtaenganda ken kasta met ti pagassawaan ken dagiti annakda. Di nagbayag indawat ti pagassawaan iti misionero nga isuda ti kasarenda, nga isu ti nangilukat iti dalan ti pannakabautisarda. Kalpasanna maysa nga aldaw ti baro a kabsat ti siraragsak a nangipakita iti lisensiana iti panagmaneho, ti damdamo a nagun-odanna. Wen, sakbay a nagbalin a maysa kadagiti Saksi ni Jehova, dina nakita ti pannakasapul iti panangala iti lisensia iti panagasawa wenno lisensia iti panagmaneho, ngem itan isun ti agtultulnog agpadpada kadagiti linteg ti Dios ken ni cesar.

Panangaskasaba iti Lansangan

11, 12. (a) Addaantayo iti ania a Nainkasuratan a pammaregta a makiraman iti panangaskasaba iti lansangan? (b) Ania dagiti adda a rason iti intay panangaramid iti dayta?

11 Ti maikapat a pamay-an a pakaipakitaantayo ti panangipateg ti naaramidan ti Dios ken ni Kristo kadatayo ket babaen ti panangaskasaba iti lansangan. No makipaspasettayo, tumultulongtayo a mangitungpal iti Proverbio 1:20, 21 iti kas literal a pamay-an: “Ni sirib agpukpukkaw iti lansangan. Iyebkasna ti timekna kadagiti nawaya nga yan. Aglaaw nangruna iti ayan ti pagdadagupan.”

12 Nagadu dagiti naimbag a rason ti intay pakiramanan a regular iti daytoy a paset ti panangikaskasaba ti Pagarian. Iti adu a luglugar, rumigat a rumigat ti pannakasarak kadagiti tattao kadagiti pagtaengan. Mabalin a makiramramanda iti maysa a langa ti panaglinglingay, mapanda ag-shopping, wenno napanda nagtrabaho. Kasta met, adu kadagiti tattao ti agtataengen kadagiti eksklusibo nga apartment wenno dagiti condominiums, malaksid laeng dagidiay agtataengen kadagiti otel. Ngem masansan adu ti makita a tattao kadagiti lansangan.

13. Ti panangaskasaba iti lansangan ti addaan ania a resulta? Iyilustraryo.

13 Maysa a panglakayen idiay Estados Unidos ti madama a mangidadaulo iti uppat a panagadal ti Biblia iti pagtaengan kadagiti indibidual nga immuna a nasarakanna iti trabaho a panangaskasaba iti lansangan. Siempre, saan a basta agtakderka sadiay a kasla umel (nupay no kadagiti dadduma a daga dayta laeng ti mabalin nga ipalubos ti linteg. Imbes ketdi, buyogen ti nainggayyeman a panagisem ken naragsak a timek, asitganna dagiti tattao a sitatakder, agur-uray iti bus wenno magmagna laeng nga agpaspasiar. Ti ‘saona ti makaay-ayo, a kasla natempla iti asin,’ ket us-usarenna ti pannakaawatna no kasano ti iyaasidegna iti tunggal maysa. (Colosas 4:5, 6; 1 Pedro 3:15) Saan laeng a nakagun-od iti panangiyadal ti Biblia iti pagtaengan babaen iti kasta a panangaskasaba iti lansangan no di ket isu ti nakabalballigi met iti panagipaima ti literatura kadagiti adu. Wen, babaen ti panagkawes a sidadalimanek ken maaddaan ti nainggayyeman a panagisem agraman ti wayawaya ti panagsao, mabalinyo ti agbalin nga epektibo unay iti panangaskasaba iti lansangan. Kinapudnona, lima a Saksi ti nabiit pay a nakaipaima iti nasurok a 30 a kopia ti libro a Life​—How Did It Get Here? By Evolution or by Creation? kadagiti luglugar a mapan paggatangan ti publiko. Adu kadagiti libro ti nagun-odan dagiti tattao nga agtugtugaw iti lugluganda.

Ti Di Pormal a Panangaskasaba

14. Kasano a mapaneknekan ti pateg ti di pormal a panangaskasaba?

14 Ti maikalima a pamay-antayo a panangipakita iti panangipateg iti naindaklan nga ayat nga inyebkas ti Dios ken ni Kristo kadatayo ket babaen iti di pormal a panangaskasaba. Anian a masansan ti kinaepektibo daytoy, agpadpada iti panangsapul kadagiti tattao a mabisbisin ken mawawan iti kinalinteg ken iti panangipaima iti literatura! Pudno a daytat’ maysa a pamay-an a mabalintayo a pangipangagan iti pammagbaga a masarakan idiay Efeso 5:15, 16, ‘a gundawayan ti panawen nga agpaay iti bagbagitayo.’ Maysa a misionero rinugianna ti pannakipatpatang iti padana a pasahero iti maysa a taxi. Ti lalaki ti nangipakita iti interes. Naaramid ti panagsarungkar ket narugian ti panangiyadal iti Biblia. Itattan dayta a lalaki ket maysan a panglakayen a Kristiano. Iti maysa pay a lugar maysa a panglakayen ti nangirugi ti pannakipatpatang iti maysa a babai a, kas nagtungpalanna, kayatna a baliwan ti relihionna tapno makiasawa iti maysa a Judio. Kayatna a maammuan no siasino ti immun-una, ni Moises, ni Noe, ni David, ken dadduma pay. Kuna ti panglakayen kenkuana a ti kasapulanna isu ti libro nga Estoria ti Biblia, nga isu ti mangisalaysay kadagiti paspasamak iti Biblia sigun iti kronolohikal a panagsasaganadna. Nupay isut’ naan-anay a ganggannaet iti babai, ti babai ti sisasagana a nangited iti nagan ken direksionna kenkuana ken ti kasapulan a kontribusion a mabalinna a pangikoreo iti libro kenkuana.

15. Aniat’ makatulong kadatayo nga agbalin nga alisto kadagiti gundaway a maipaay iti di pormal a panangaskasaba?

15 No maminsan, gaput’ amaktayo a mabainantayo, agalikakatayo a mangirugi iti pannakipatpatang iti maysa nga agbibiahe a kaduatayo. Ngem, anian a masansan, a magunggonaantayo a sibabaknang no ikabiltay amin ti kinaturedtayo a mangaramid iti dayta! Ti panangipateg iti kinaimbag ti Dios ken ti kasapulan dagiti tattao ti mangtulong kadatayo a maaddaan iti kasapulan a kinatured. Wen, laglagipenyo a “saannatay nga inikkan ti Dios ti espiritu ti kinamanagbabain, no di ti espiritu ti pannakabalin, ti ayat ken ti bukod a pannakadisiplina.”​—2 Timoteo 1:7, NIV.

Panangabrasa kadagiti Ganggannaet

16. Apay a rebbeng nga alistotayo a mangkita kadagiti ganggannaet a bumisita iti Kingdom Hall tayo?

16 Ti maikanem a pamay-an a panangipakitatayo iti panagyaman iti Dios ken ni Kristo ket babaen iti panangabrasa kadagiti ganggannaet nga agparang kadagiti Kingdom Hall tayo. Ti ayat iti kaarruba ti rebbeng a mangpaalibtak kadatayo iti asinoman a ganggannaet a bumisita iti lugar a pagdaydayawantayo. Pagreggetantayo a pagbalinen a di mababain ti bisita, a mariknana nga isut’ adda iti tengnga dagiti gagayyem a sipapasnek nga interesado iti naespirituan a pagimbaganna. Iti kaaduanna, ti ad-adda pay ngem basta panagusiuso ti mabalin a nangiyeg kenkuana sadiay. Mabalin nga isut’ pudpudno a mabisin ken mawawan iti kinalinteg. Ti pudpudno a pannakaseknantay kenkuana ti mabalin a mangibunga iti pannakairugitayo iti maysa a panagadal ti Biblia iti pagtaengan, a tumulong kenkuana nga agturong iti dalan ti biag. (Mateo 5:3, 6; 7:13, 14) Kinapudnona, daytoy a banag ti masansan a napaspasamaken. Maysa a misionero manipud iti umuna a klase iti Watchtower Bible School of Gilead ti nagkuna a dua kadagiti addaan panginanamaanna nga estudiantena iti Biblia ket dagidiay immuna a nasarakanna idiay Kingdom Hall.

Panangaskasaba Babaen ti Sursurat

17. Ti panangaskasaba babaen iti surat ti mabalin a maaddaan kadagiti ania a resulta?

17 Ti maikapito a pamay-an iti intay panangaskasaba, kas panagtignay iti ayat nga impakita ti Dios ken ni Kristo kadatayo, ket isut’ panagsurat. Masansan dagidiay mangus-usar iti daytoy a pamay-an ti panangaskasaba umaw-awatda kadagiti sursurat a napnuan iti panangapresiar. Daytoy a pamay-an ti us-usaren dagiti dadduma nga amin-tiempo a ministro a mabalin a temporario a di makapagbalaybalay gapu iti pisikal a panagsakit. Kas pangarigan: Adda maysa a pamilia nga addaan 12 nga annak. Maysa nga aldaw simmangpet ti ama a nakita a lima kadakuada ti napaltogan babaen ti maysa kadagiti agar-arem iti anakna a babai. Barengbareng nga isu ti nagsapsapul iti liwliwa manipud kadagiti klero iti Kakristianuan. Kalpasanna immawat ti surat manipud iti maysa a ganggannaet, maysa a Saksi a nakabasa iti pagiwarnakan maipapan iti trahedia a linak-amda ket kayatna a maliwliwa, nangilukon iti maysa a libro a Kinapudno. Daytoy ti apagpag-isu a birbiruken daydiay a tao. Itan, isu ket maysa metten a naregta a Saksi.a

Panagsarungkar iti Telepono

18, 19. Ania a sabali pay a pamay-an a panangikaskasaba ti naimbag a damag ti nasarakan dagiti dadduma nga epektibo, ken apay?

18 Ti panangdakamat iti maikawalo a pamay-an ti panangaskasaba, adda met ti gundaway a panangusar iti telepono iti panangikaskasaba ti naimbag a damag ti Pagarian. Daytoy ti mapampaneknekan a dumakdakkel a makaay-ayo ken epektibo a langa ti panangaskasaba. Umad-adu nga umad-adu dagiti Saksi nga agbalbalin a nasigon iti daytoy a paset ti ministerio, nga adu dagiti pagimbaganna. Babaen iti dayta madanontayo ti dadduma a tattao a ditay masarsarakan iti trabaho a panagbalaybalay. No sisisirib a maaramid ti panangaskasaba babaen iti telepono, nga addaan iti kinamanangngaasi, taktika, ken kinalaing, dadduma nakasarakda ti nasaysayaat pay a panagtignay ngem ti isasarungkar kadagita a tattao kadagiti pagtaenganda.

19 Maysa a kongregasion a Hapones iti Ingles-pagsasaona a pagilian ti mangus-usar iti libro ti telepono kas paset ti teritoriana. Umaw-awag dagiti agibumbunannag babaen ti telepono kadagiti nagnagan a Hapones ket iyurnosda ti personal a panagsarungkar sadinoman ti pakasarakanda ti interes. Iti literal nakairugidan ti dinosdosena a panagadal babaen iti daytoy a pamay-an.

Panangaskasaba Babaen ti Naimbag a Kababalin

20, 21. Ti kababalintayo ti mabalin nga addaan ti ania a nasayaat nga epekto? Iyilustraryo.

20 Ti maikasiam a pamay-an a pakaiyegantayo ti dayaw ti Dios ket babaen ti naimbag a kababalintayo. Maysa a periodista a Russo naminsan kunana a ti nasayaat a kababalintayo ti kasayaatan a sermontayo. Kinapudnona, masansan a komkomentuan dagiti pagiwarnakan ti nangato a moralidad dagiti Saksi ni Jehova. Maysa ti nangipadamag: “Malaslasin a dagiti Saksi ni Jehova ti kasisingpetan a tattao iti Pederal a Republika ti Alemania.” Idi pangrugian ti panageskuelana, maysa a babai a Saksi ti nangitugot ti School broshur para iti maestrona. Diretsaan a linaksidna dayta, a kunana nga awan ti aniaman a pakibibianganna kadagiti Saksi. Nupay kasta, idi agangay ti nasayaat a kababalin ti estudiantena a babai ti nakagapu iti panangidayawna kenkuana ken namataud ti interamente a panagbalbaliw ti kababalin ti maestrona kadagiti Saksi. Umas-asping ti pategna isu ti surat nga inawat dagiti nagannak a Saksi manipud mangisursuro kadagiti annakna: “Ti di mailibak a rukod ti panagballigi ti pammatiyo isu dagiti annakyo.”

21 Dagidiay taga lubong awan naimbag a masaoda maipapan kadagiti Saksi ni Jehova a di mangyeg dayaw iti Dios ken ni Kristo. Dayta latta ti pamay-an a pagbalinanna. Di met aya kinuna ni Jesus a pagsilnagentay dagiti lawagtayo tapno makita dagiti tattao dagiti naimbag nga ar-aramidtayo ken mangtedda iti dayaw iti nailangitan nga Amatayo? (Mateo 5:16) Pudno unay, babaen iti nasayaat a kababalintayo, ar-arkosantayo ti kinapudno. (Tito 2:10) Talaga, ti kinapudno a ti naimbag a kababalintayo ket mangyeg dayaw iti Dios ken ni Kristo ken tulonganna dagiti dadduma a makagteng iti dalan nga agturong iti biag ket napigsan a rason iti panagbalintay koma a maseknan unay maipapan kadagiti kababalintayo iti isuamin a tiempo a dayta koma ti awan pakaumsianna.

22. Ania kadagiti pamay-an a panangipakita ti panangipateg ti pagreggetanyo, ken apay?

22 Kas ti intay nakitan, nagadu dagiti pamay-an a mabalintayo a pangipakitaan iti panangapresiar kadagiti isuamin a naaramidan ni Jehova ken ni Jesu-Kristo kadatayo, nangnangruna ti naindaklan nga ebkas ti ayatda. Ket bayat ti panangar-aramidda iti dayta, mapaneknekantayo met ti ayattay kadagiti padatay a tao.​—Marcos 12:30, 31.

23. Iti ania a maudi a pamay-an ti mabalinyo a pangipakitaan ti panangipateg ti Dios ken ni Jesus?

23 Kamaudiananna, laglagipentayo a maipakitatayo met ti panangipategtayo kadagiti dua a kadadakkelan nga ebkas ti ayat babaen ti panangrambak iti Pangrabii ti Apo. Iti maudi a rabiina ditoy daga kas maysa a tao, inyusuat ni Jesus ti tinawen a pakalaglagipan a pannangan a buklen ti tinapay ken arak, a mangireprepresentar iti lasag ken ti darana. Imbilinna a daytoy a selebrasion a panglaglagip kenkuana. (1 Corinto 11:23-26) Ti Pangmalem ti Apo iti daytoy a tawen ti agtinnag iti Domingo, Abril 12, kalpasan ti ilelennek ti init. Iti intero a daga, dagiti Saksi ni Jehova agtataripnongda kas panagtulnog iti bilin ni Jesus. Dikay palpalabsen dayta!

[Dagiti Footnote]

a Agpaay kadagiti detalye, kitaenyo ti Awake!, Oktubre 22, 1986, panid 12-16.

Salsaludsod a Pangrepaso

◻ Kasano ken sadino ti nangaskasabaan ni Jesus?

◻ Kadagiti ania a pamay-an a mabalintayo a tuladen ni Jesus iti panangipateg iti naindaklan nga ayat ti Dios?

    Dagiti Publikasion iti Iloko (1984-2025)
    Ag-log out
    Ag-log in
    • Iloko
    • I-share
    • Ti Kayatmo a Setting
    • Copyright © 2025 Watch Tower Bible and Tract Society of Pennsylvania
    • Pagannurotan iti Panagusar
    • Pagannurotan iti Kinapribado
    • Privacy Settings
    • JW.ORG
    • Ag-log in
    I-share