Dagiti Saksi ni Jehova iti Aglikmut ti Lubong​—Ti Bahamas

TI Commonwealth ti Bahamas​—maysa nga arkipelago a buklen ti 3,000 a puro ken babassit a puro​—naiyintar a kasla korales a kuentas iti 900 kilometro a pangesmeraldaen nga asul a baybay iti nagbaetan ti Florida ken Cuba. Adda dumakdakkel a koro dagiti manangiwaragawag ti Pagarian kadagiti 267,000 nga umilina. Ti kanta ti panagdaydayawda ipalagipna ti Isaias 42:10-12: “Ikantaanyo ni Jehova iti maysa a baro a kanta, ti dayawna manipud iti pungto ti daga, dakayo a bumaba iti baybay ken iti adda kenkuana, dakayo a purpuro ken dakayo nga agnaed kadakuada. . . . Agriawda koma iti ragsak manipud iti tapaw dagiti bambantay. Mangtedda koma ti dayaw ken Jehova, ken ipablaakda ti dayawna kadagiti purpuro.”

Nakarit ti Naganus a Pammatina

Idi Hulio 1992, napaimaan ti maysa a regular payunir (amin-tiempo a manangaskasaba ti Pagarian) ti kaam-ammona a negosiante iti katulongan iti panagadal ti Biblia a Mabalinyo ti Agbiag nga Agnanayon iti Paraiso a Daga. Kalpasan a nabasa ti lalaki ti libro, kinunana iti bagina, ‘Daytoy a relihion ket maysa a banag a masapul nga usigek.’ Iti simmaganad a dua a Domingo, timmabuno kadagiti gimong iti dua a nagduma a Kingdom Hall dagiti Saksi ni Jehova. Kalpasanna, narugian ti panangyadal ti Biblia kenkuana. Nupay kasta, innem a lawas laeng kalpasan ti pannakipagadalna iti Biblia, timmanor ti karit a mangsuot iti naganus pay a pammatina​—panangrambak kadagiti kasangay.

Naigamer unay ti pamilia ti negosiante iti kakasta a selebrasion, ngem ti panagayatna iti Sao ti Dios ti nangpabileg kenkuana a mangitultuloy iti panagadalna ti Biblia. Bayat a rimmang-ay ti pannakaammona iti Nainkasuratan a kinapudno, rimmang-ay met ti pannakaawatna kadagiti panangrambak ti kasangay ken nailubongan a pipiesta ken ti panangmatmat ni Jehova kadagitoy.

Idi nangyurnos ti asawa daytoy a lalaki iti sosial a panagtataripnong maipaay iti Father’s Day, sidadayaw a nagkedked. Nupay kasta, narikna ti baketna, a dinan ay-ayaten ken ad-addan a ti relihionna ti as-asikasuenna ngem kenkuana ken ti pamiliana. Siaayat nga inlawlawagna a ti panangiyaplikar iti maad-adalna manipud iti Biblia ti tumultulong a mamagbalin kenkuana a nasaysayaat nga asawa a lalaki ken ama. Kamaudiananna, napatanor ni baketna ti panangapresiar gapu iti panagayat ni lakayna iti Nainkasuratan a kinapudno ket immanamong nga agadal iti Biblia. Itatta idadauluannan ti pamiliana iti panagadal ti Biblia. Ket anian ti rag-ona iti “Nadiosan a Panangisuro” a Kumbension Distrito itay napalabas a tawen! Timmabuno ti asawa ken ti anakna a babai ket naimatanganda ti pannakabautisarna.

Nangngegan Dagiti Imigrante ti Baro a Kanta

Rinibribu nga imigrante a taga Haiti ti makipulpulapol iti kagimongan dagiti Bahamian. Masapul a mangeganda met ti baro a kanta ti kinapudno ti Pagarian. Maragsakan dagiti Saksi nga agnanaed iti Bahamas ta simmangpet ti dua a pagassawaan a Haitian-American. Timmulong dagitoy nga indibidual a mangpabileg kadagiti nabiit pay a nabuangay a grupo dagiti Haitian kadagiti puro ti Grand Bahama ken Abaco.

Kas panangtulong pay kadagiti Haitian nga interesado iti mensahe ti Pagarian, naangay ti kaunaan a kumbension distrito idiay Bahamas a Creole ti nausar a pagsasao idi Hulio 31 aginggat’ Agosto 1, 1993. Adda 214 a timmabuno, ket tallo a kabbaro a dedikado ti nabautisaran. Adu a Haitian a nakaammo ti kinapudno idiay Bahamas ti nagsublin iti puro a naggapuanda wenno immakar iti sabali a pagyanan tapno inayonda dagiti bosesda kadagidiay lokal a Saksi iti panagkanta iti dayaw ken Jehova.

[Kahon iti panid 8]

KASASAAD TI PAGILIAN

1993 Tawen Serbisioa

KANGATUAN A BILANG TI MANGASKASABA: 1,294

RATIO: 1 a Saksi iti 197

TIMMABUNO ITI MEMORIAL: 3,794

PROMEDIO A BILANG DAGITI AGIBUMBUNANNAG A PAYUNIR: 186

PROMEDIO A BILANG DAGITI PANAGADAL ITI BIBLIA: 1,715

BILANG TI NABAUTISARAN: 79

BILANG DAGITI KONGREGASION: 22

SANGA NGA OPISINA: NASSAU

[Footnote]

[Ladawan iti panid 9]

Ti immuna a Kingdom Hall, agraman ti sanga nga opisina ken pagtaengan dagiti misionero

[Ladawan iti panid 9]

Sireregta nga iwarwaragawag dagiti Saksi ti naimbag a damag

[Ladawan iti panid 9]

Ni Milton G. Henschel ken ni Nathan H. Knorr agraman dagiti misionero idiay Nassau ag-45 a tawenen ti napalabas

[Ladawan iti panid 9]

Ti baro a sanga nga opisina a naidedikar idi Pebrero 8, 1992