Apay a Malaplapunos ti Lubong iti Buteng?

SIASINO ti mayat nga agbiag iti buteng? Tarigagayan ti gagangay a tao ti kinatalged, nga awan ti mamagpeggad iti biag wenno kadagiti sanikuana. Gapuna, adu dagiti pumanaw kadagiti lugar a nasaknap ti krimen. Kaskasdi, adda iti uray sadinoman dagiti pakaigapuan ti buteng.

Dagiti peggad nga agtaud kadagiti nuklear nga armas ken reactor ipangtada ti pannakaikisap ti sangatauan. Mangparnuay iti buteng ti kumarkaro a kinaranggas. Amken ti adu nga agbalinto ti AIDS a kakaruan a saplit iti siglo[tayo]. Ti pannakadadael ti aglawlawtayo ti maysa pay kadagiti makagapu iti buteng. Adda aya naisangsangayan a kaipapanan dagitoy a pagbutbutngan? Ken adda aya namnamatayo nga agbiag iti maysa a lubong nga awan ti kasta a buteng?

Adda Kaipapanan ti Sangalubongan a Panagbuteng

Adda kaipapanan ti nasaknap a panagbuteng ita gapu iti naipadto iti Biblia. Iti padtona maipapan iti maudi nga al-aldaw, dinakamat ni Jesu-Kristo dagiti kasasaad a pagtaudan ti buteng. Kinunana: “Ti nasion tumakderto a bumusor iti nasion ket ti pagarian bumusor iti pagarian, ket addanto dagiti kinakirang ti taraon ken dagiti ginggined iti nadumaduma a disso.” Dinakamat met ni Jesus ti ‘yaadu ti kinakillo.’ Nanipud 1914, dagiti awan pay kapadana a gubat, bisin, ginggined, ken kinakillo nagresulta iti dakkel a buteng ken pannakapukaw ti biag.​—Mateo 24:7-14.

Uray ti kababalin dagiti tattao ket mangpataud met ti buteng ita. Idiay 2 Timoteo 3:1-4, mabasatayo dagiti naimpadtuan a sasao ni apostol Pablo: “Kadagiti maudi nga al-aldaw dumtengto dagiti napeggad a tiempo a narigat a pakilangenan. Ta dagiti tattao managayatdanto iti bagbagida, managayat iti kuarta, napalangguad, natangsit, managtabbaaw, nasukir kadagiti nagannak, awanan panagyaman, saan a nasungdo, awanan nainkasigudan a panagayat, saan a sidadaan iti aniaman a tulagan, manangparpardaya, awanan panagteppel, narungsot, awanan panagayat iti kinaimbag, mangliliput, natangken ti uloda, natangsit a buyogen ti panagpannakkel, managayat iti ragragsak imbes a managayat koma iti Dios.” Tangay nalikmuttayo iti kakasta a tattao kadagitoy maudi nga al-aldaw, di pakasdaawan a nasaknap ti buteng!

No Ania ti Manamnama Daytoy a Lubong

Inyarig ni Jesus daytoy a panawen kadagiti maudi nga al-aldaw ti lubong idi tiempo ni Noe. Awan duadua a nakaro idi ti buteng, ta kuna ti historikal a rekord ti Biblia: “Nagdakes ti daga iti sanguanan ti pudno a Dios ket napno ti daga iti ranggas.” Gapuna, “kinuna ti Dios ken Noe: ‘Ti panungpalan ti amin a lasag dimtengen iti imatangko, ta ti daga napno iti ranggas.’” (Genesis 6:11, 13) Kasta unay ti kinaranggas daydi a dakes a lubong, isut’ gapuna nga inkisap ti Dios babaen ti sangalubongan a Layus. Nupay kasta, gapu iti ayat, intalimeng ni Jehova a Dios ni nalinteg a Noe ken ti pamiliana.​—2 Pedro 2:5.

Ngarud, ania ti manamnama ti agdama a naranggas a lubong? Bueno, kagura ti Dios ti naranggas a di panangikabkabilangan iti pagimbagan dagiti dadduma. Nalawag daytoy kadagiti sasao ti salmista: “Sukimaten ni Jehova ti nalinteg agraman ti nadangkes, ken asinoman nga agayat iti kinaranggas guraen ti kararuana.” (Salmo 11:5) Pinagpatingga ni Jehova ti naranggas a lubong idi kaaldawan ni Noe. No kasta, saan aya a namnamaentayo a pagpatinggaento ti Dios daytoy lubong a masapsaplit iti nakaam-amak a kinaranggas?

Napaltiingan ni apostol Pedro a nagsao maipapan iti kaadda ni Kristo ken nangipadto iti didigra a dumteng iti agdama a nadangkes a lubong. Insuratna: “Kadagiti maudi nga al-aldaw umaydanto dagiti managuy-uyaw agraman ti panguy-uyawda, nga agtultuloyda maitunos iti bukodda a tartarigagay ket kunkunada: ‘Sadino ti yan daytoy naikari a kaaddana? Ay ket, nanipud iti aldaw a dagiti ammami naturogda ken patay, amin a bambanag nagtultuloyda a kasta met laeng nanipud idi panangrugi ti sangaparsuaan.’” Kalpasanna inaramat ni Pedro ti termino a “langlangit” a mangitakder iti sistema ti imperpekto a panangituray iti sangatauan ken ti sao a “daga” para iti nakillo a kagimongan ti tao. “Ta,” kinunana, “maitunos iti kayatda, daytoy a kinapudno makaliklik iti panangammoda, nga adda idi langlangit nanipud idi ugma ken maysa a daga nga agtaktakder a sititibker manipud iti danum ken iti tengnga ti danum babaen ti sao ti Dios; ket babaen kadagidiay a pamay-an nadadael ti lubong iti daydi a tiempo [idi kaaldawan ni Noe] idi nalayus iti danum. Ngem babaen ti isu met laeng a sao naidulin ti langlangit ken ti daga nga adda ita maipaay iti apuy ket maisagsaganada iti aldaw ti panangukom ken ti pannakadadael dagiti di nadiosan a tattao.”​—2 Pedro 3:3-7.

Umasping iti dayta, impakita ni Pablo a yegto ni Kristo ken dagiti mannakabalin nga anghelna ti “pammales kadagidiay di makaammo iti Dios ken kadagidiay di agtulnog iti naimbag a damag maipapan ken Apotayo a Jesus. Dagitoy a mismo agpasardanto iti pannakaukom a dusa nga agnanayon a pannakadadael.” (2 Tesalonica 1:6-9) Saritaen ti maudi a libro ti Biblia ti pannakaurnong dagiti nasion iti “gubat ti naindaklan nga aldaw ti Dios a Mannakabalin-amin” ken ipanamnamana kadatayo a ‘yegto [ni Jehova] ti pannakadadael dagidiay mangdaddadael iti daga.’​—Apocalipsis 11:18; 16:14-16.

Panawen ti Panagrag-o, Saan a Panagbuteng

Imbes a mabuteng iti impadto ti Biblia a mapasamak iti daytoy a lubong, adda panggapuan dagiti nalinteg a tattao nga agrag-o. Din agbayag gibusanton ni Jehova daytoy nadangkes a lubong, ngem maaramidto daytoy a maipaay iti pagimbagan dagidiay agayat iti kinalinteg. Anianto ti sumaruno iti panamagpatingga ti Dios iti agdama a sistema ti bambanag? Maysa a baro a sistema iti sidong ti nailangitan a Pagarian ti Dios, nga insuro ni Jesus nga ikararag dagiti pasurotna! Kinunana: “Agkararagkayo, ngarud, a kastoy: ‘Amami nga adda iti langlangit, masantipikar koma ti naganmo. Umay koma ti pagariam. Maaramid koma ti pagayatam, kas sadi langit, kasta met iti rabaw ti daga.’” (Mateo 6:9, 10) Ania a panagbalbaliw ti mainanama inton maaramid ti pagayatan ti Dios ditoy daga?

Agpatingganton ti gubat ken dagiti pagbutbutngan a kakuyog dayta. Kuna ti Salmo 46:9: “Pagsardengenna [ni Jehova a Dios] dagiti gubat inggana iti ungto ti daga. Rungrungduenna ti bai ti pana ket gupdenna a mamimpinsan ti gayang; puoranna dagiti lugan [a pakigubat] iti apuy.” Iti kasta dagiti tattao “agtugawdanto, tunggal maysa iti sirok ti kayona nga ubas ken iti sirok ti kayona nga higos, ket awanto ti mangpabuteng kadakuada.”​—Mikias 4:4.

Saanton a mangpabuteng ken mangpukaw iti biag dagiti makapapatay a sakit. Inkari ti Dios: “Ti agtaeng dinanto kunaen: ‘Masakitak.’” (Isaias 33:24) Anian a pagrag-oan!

Awanto metten dagiti pagbutbutngan a mainaig iti krimen ken kinaranggas. Inkari ti Salmo 37:10, 11: “Ta bassit pay a darikmat, ket ti nadangkes maawanton; wen, mingmingamto a sigaganetget ti ayanna, ket awanton. Ngem dagiti naemma tawidendanto ti daga, ket maay-ayatandanto iti kinaruay ti talna.”

Kasanonto a masuktan dagiti agdama-aldaw a pagbutbutngan iti pudno a talna ken talged? Babaen ti maysa a nalinteg a gobierno​—ti Pagarian ti Dios. Maipapan iti tiempotayo, kuna ti Daniel 2:44: “Kadagiti al-aldaw dagita nga ar-ari mangipasdekto ti Dios ti langit iti maysa a pagarian a pulos a dinto madadael. Ket ti pagarian dinto maited iti aniaman a sabali nga ili. Burakennanto ken gibusannanto amin dagitoy a pagarian, ket isu agtalinaedto iti agnanayon.” Ti Ari a dinutokan ni Jehova, ni Jesu-Kristo, ‘masapul nga agturay agingga a ti Dios maikabilna amin dagiti kabusorna iti babaen dagiti sakana.’ (1 Corinto 15:25) Tungpalento ti Sangaribu a Tawen a Panagturay ni Jesus ti orihinal a panggep ti Dios a mangipasdek iti maysa a paraiso a daga a pagtaengan iti agnanayon dagiti naragsak a tattao.​—Lucas 23:43; Apocalipsis 20:6; 21:1-5.

Iti dayta a Paraiso a daga, addanto maysa nga umno a panagbuteng. Dayta ket isu ti “panagbuteng ken ni Jehova.” (Proverbio 1:7) Kinapudnona, rumbeng a maaddaantayo iti kastoy a panagbuteng uray itan, ta maysa dayta a nauneg a panagraem ken panagamak a napakuyogan iti panagbuteng a mamagpungtot iti Dios agsipud ta apresiarentayo ti naayat a kinamanangaasi ken kinaimbagna. Kalikaguman daytoy a buteng ti naan-anay a panagtalek ken Jehova ken napudno a panagtulnog kenkuana.​—Salmo 2:11; 115:11.

Nasaknap dagiti nakabutbuteng a pasamak kadagitoy maudi nga al-aldaw. Nupay kasta, no paneknekantayo ti ayattayo iti Dios, mabalintayo ti agrag-o imbes nga agbuteng. Ipakita dagiti padto ti Biblia nga asidegen a gibusan ti Dios daytoy a lubong. Suktanto dayta ti baro a lubong ti kinalinteg nga inkari ni Jehova a Dios. (2 Pedro 3:13) Wen, iti sidong ti turay ti Pagarian, iti saanen a mabayag addanto maysa a lubong nga awan ti di umno a panagbuteng.

[Kahon iti panid 6]

TI BILEG TI MAYSA A KOPIA

NI Tomasz, maysa nga agtutubo a lalaki idiay Poland, ket naglabsing iti linteg a nanggapuanna a pimmanaw iti pagilian. Iti uneg ti innem a bulan isut’ nakiluglugan iti panagalla-allana iti Europa, natnaturog iti tolda ken naaddaan iti nadumaduma a trabaho. Kabayatanna, adda maysa a saludsod a kanayon a mapampanunotna: Ania ti panggep ti biag?

Nasungbatan ti saludsod ni Tomasz idi napaimaan iti maysa a kopia ti Pagwanawanan iti pagsasao a Polako. Binasana dayta iti namin-adu a daras ket nabigbigna a naglaon dayta a magasin iti kinapudno a birbirukenna. Nakilugan ni Tomasz a nagturong idiay sanga nga opisina ti Watch Tower idiay Selters/Taunus, Alemania, a 200 kilometro ti kaadayona. Idi makasangpet iti maysa a rabii ti Lunes, inruarna ti magasinna a Pagwanawanan ket kinunana: “Kayatko nga adda mangilawlawag kaniak iti ad-adu pay maipapan iti linaon daytoy a magasin. Ania ti rumbeng nga aramidek?”

Iti dayta a rabii, dua kadagiti Saksi ni Jehova ti nakisarita ken Tomasz maipapan iti panggep ti biag, nga inusarda ti Biblia kas pakaibatayan ti panagsasaritada. Gapu ta magagaran a makaammo iti ad-adu pay, inaldaw a nagsublisubli ni Tomasz iti sanga nga opisina iti dayta a lawas, nagadal iti Biblia ken iti libro a Mabalinyo ti Agbiag nga Agnanayon iti Paraiso a Daga.

Inkeddeng ni Tomasz ti agsubli idiay Poland, nupay mabalin a maipasango kadagiti parikut sadiay. Iti kasta, iti Biernes, aguppat nga aldaw pay laeng kalpasan ti isasangpetna iti sanga nga opisina idiay Selters, nagluas ni Tomasz a nagturong iti bukodna a pagilian. Rinugianna a dagus ti nakipagadal kadagiti Saksi ni Jehova idiay Poland. Napardas ti panagrang-ay ni Tomasz ken sireregta a rinugianna nga insarsarita ti naadalna kadagiti sabsabali. Idi Oktubre 1993, uppat laeng a bulan kalpasan ti damo nga isasarungkarna idiay Selters, isu ket nabautisaran kas maysa a Saksi ni Jehova.

Maysa laeng a kopia ti Pagwanawanan ti nakatulong iti daytoy nga agtutubo a lalaki a mangsukimat iti panggep ti biag!

[Ladawan iti panid 7]

Iti sidong ti panagturay ni Jesu-Kristo iti Pagarian, saanton a malapunos ti lubong iti buteng